Loleni! Yadimena Yakuhana muSeptember
1 Antu amavulu atiyaña kuwaha chembañawu atujila nichamwekanaña kuhuma kwetañwa. Hela chochu, antu amavulu akañanyaña kwiluka nawu Tata yetu wamwiwulu wukweti kukeña diyi waleñeli yuma yejimiyi. Twakekala nakukooleka kweneni nankashi kwakushimwina hakwimenaku wunleñi waYehova kuhitila mukuhana Loleni! yadimena. (Isa. 40:28; 43:10) Loleni! yamuSeptember yinashindameni chikupu hamutu wunakuhosha nawu “Komana Nleñi Wekala Kwoku?”
2 Mwiluña Dakuzatila: Neyi chinatwesheki, loñeshenu kulonda mukalakeli hamu nachipompelu Mposu yidi yejima mumudimu wakwitala nikwitala. Eña, munateli kuhana iyi Loleni! yadimena mumafuku amakwawu amukachi kamulungu. Antañishi, niantu amakwawu akundama kumutayi watalaña jamashikola niwena atela kuyikeña iyi Loleni! Dichi mwatela kuloñesha chachiwahi kulonda kwendela antu amuchidiwu adi mwiluña denu.
3 Neyi namwekeshi mpwila, mwihulenu owu muntu lwihu lumukakula ifuku dimwakafuntaku cheñi. Chakutalilahu, mwatela kwihula lwihu hadi Nleñi wukweti kukeña chetejelayi makabi amavulu nankashi. Dichi hakufuntilaku, mwatela kuhosha hakapetulu 1 hela kapetulu 11 kamukanda waChatañishaña Bayibolu. Hela mwatela kwihula lwihu lunakundami hankeñelu yaNleñi kutalisha kwiseki nawa hampinji yimwakafuntilaku cheñi mwakahoshi hakapetulu 3.
4 HaShikola: Neyi wudi mukwashikola, komana kwila wuhana Loleni! yadimena neyi chawaana kudi antañishi jeyi hela kudi akwenu atudizi nehi? Chakala muyisha hewulu dadesiki yenu chikuletesha antu kwihula malwihu hansañu yachikuhwelelu chetu. Munateli kuzatisha nsañu yidimu neyi himukuhakwilaku chikuhwelelu chenu mujimpanji jamushikola nihakusoneka yituñi. Hakwila chiyikwashuku, iyi Loleni! yikweti chibaba chinakuhosha nawu “Munjilanyi Munatela Kuhakwilaku Chikuhwelelu Chami Kutalisha haKuleña?” “Malwihu Ehulañawu Atwansi.”
5 Yehova watelela kutambwila kulema nimpuhu hamuloña wayuma yaleñayi. (Chim. 4:11) Tunateli kumulemesha Nleñi yetu nikukwashaku amakwawu kwila mwenimu kuhitila mukuhana Loleni! yamuSeptember namuzañalu.