Munateli Kutachika Kudiza Bayibolu Nawantu Imwatwalilaña Magazini
1. Muloñadi kuloñesha kwaYehova chikunakolesheli akwakushimwina hadi mpinji yeneni kwikala nachaaku chakutwalilaña antu magazini?
1 Antu amavulu hiyakeñaña kudiza Bayibolu nanetuku, ilaña atiyaña kuwaha kutaña magazini etu. Dichi kuloñesha kwaYehova kunakoleshi akwakushimwina hadi mpinji yeneni kwikala nachaaku chakutwalilaña antu magazini. Neyi antu atañaña magazini etu mpinji yejima, ekalaña nampwila Yezu daNzambi. (1 Pet. 2:2) Nkumininaku, nsañu yikatañawu yikayishika hamuchima nawa akakeña kutachika kudiza Bayibolu.
2. Tunateli kuyisañumuna ñahi antu itwatwalilaña magazini kwikala nampwila yakudiza Bayibolu?
2 ‘Tukumwinenuña’ Mbutu yaChalala: Chatela mukumineña dakumushila mwiniitala magazini hohu, tachikenu kuhanjeka nindi nawa esekenu kukwata wubwambu nindi. Ichi chikuyikwasha kwiluka chihandilu chindi, yuma yakeñayi niyakuhwelelayi kulonda mwiluki chakuhanjeka nindi nakashinshi. (Yish. 16:23) Diloñeshenu mpinji yejima yimunakufuntilaku. Neyi chinatwesheki, hanjekenu chantesha hachikuma chidi mumagazini nawa tañenu ninsona yidumu, kulonda mutukumwini mbutu yachalala yejima yidi mumuchima windi. (1 Kor. 3:6) Sonekenu ifuku didi dejima dimunafuntiluku, nimukanda wumunahani, nsañu ninsona yimunahanjekuhu.
3. Tunateli kufuntila mapampa kañahi kudi antu itwatwalilaña magazini?
3 Twatela Kufuntilaku Mapampa Kañahi? Mwatela kufuntilaku kapampa kamu hakakweji hakwila muyitwalili magazini amaha. Hela chochu, kwesekeja nachihandilu chenu nimpwila yikwetiyi muntu, munateli kufuntilaku mapampa kakavulu. Chakutalilahu, chimwahita mulungu wumu hela yiyedi kufuma himwamushilili magazini munateli kufuntaku nikumuleja nenu, “Nenzeña hohu nami tuhanjeki chantesha hayuma yidi mumagazini yinayishilili.” Ichi chikumusañumuna muntu kwikala nampwila yakutaña ochu chibaaba. Neyi wachitaña dehi munateli kumwila yayileji chinakutoñojokayi hanochu chibaaba chatañayi nikuhanjekahu nindi chantesha. Neyi muntu wakeñaña kutaña nyikanda yetu, munateli kufuntilaku nakumwinka tilakiti, buloshuwa hela mukanda wutunakuhana munowu kakweji.
4. Chumanyi chitwatela kwila kulonda twiluki neyi chakwila tunateli kutachika kudiza Bayibolu nawantu itwatwalilaña magazini, mukuhita kwampinji?
4 Bayi muhembelela mwiniitala yayileji nindi mumudizisheña Bayiboluku. Mwatela kutachikilahu. Hela chakwila, wakaanini kumudizisha Bayibolu hakusambila, neyi munahiti dehi mpinji munateli kumuleja chibaaba chakwila nawu “Malwihu amuBayibolu Anayakuli” muKaposhi Kakutalila kulonda mwiluki neyi nakukeña nindi muhanjeki nindi. Hadaha munateli kutachika kuhanjeka nindi hetala. Hela chochu, neyi himukutwesha kutachika kudiza nindi Bayiboluku, mwatela kutwalekahu kumutwalila magazini kulonda yekali nampwila.