Kudizisha Kuzatisha Buloshuwa yaNsañu Yayiwahi
1. Buloshuwa yaNsañu Yayiwahi ayiloñesha ñahi?
1 Neyi chitwahanjekeli muMudimu Wetu waWanta waJuly, tukweti buloshuwa yalema yaNsañu Yayiwahi Yinafumi Kudi Nzambi yakudizisha nachu antu. Nsona jidumu anajiteni hohu kulonda enimatala atañeña muBayibolu. Hela chakwila nyikanda yetu yayivulu yakudizamu ayisoneka munjila yakwila ntañi watela kudidizisha yomweni, ilaña iyi buloshuwa ayiloñesha munjila yakwila ntañi watela kuhanjeka namukwakudizisha. Dichi neyi tunakuyihana, twatela kumuleja mwiniitala chitwadizaña kulonda yeluki chichawahila kudiza nsañu yayiwahi yamuBayibolu.—Mat. 13:44.
2. Twatela kuzatisha ñahi buloshuwa yaNsañu Yayiwahi halwendu lwatachi?
2 Halwendu Lwatachi: Munateli kuhosha nenu: “Nayendeli muloña antu amavulu anakwakama yuma yakamwekana kumbidi. Munakutoñojoka nenu yuma yakawaha? [Mulekenu yaakuli.] MuBayibolu mudi nsañu yayiwahi yatukwashaña kwikala namuchima wakuchiñeja. Talenu awa malwihu akulawu muBayibolu.” Mwinkenu mwiniitala buloshuwa nawa mwilenu yasakuli lwihu hefu dakunyima. Kuhiñahu mulejenu chitwadizaña kuzatisha paragilafu yatachi yidi hakudiza kunatondiyi. Njila yikwawu, mwatela kumwihula mwiniitala lwihu lukumusañumuna lunashindameni hakudiza kumwatonda, kuhiñahu mulejenu buloshuwa chiyinateli kumukwasha kuwana ñakwilu muBayibolu. Neyi tudi navidiyo ha jw.org/lun, yinesakani nansañu yidi nanoku kudiza akwakushimwina ayitalishaña enimatala iyi vidiyo halwendu lwatachi.
3. Lumbululenu chitwatela kulombola kadizi kuzatisha buloshuwa yaNsaña Yayiwahi.
3 Chakulombola Kadizi waBayibolu: (1) Tañenu lwihu lunasonekuwu muwulombu watamuka ludi nanaambala kulonda mumukwashi mwiniitala kusha muchima hayikuma. (2) Tañenu paragilafu yidi heshina. (3) Tañenu nsona jinakamikuwu nawa mwihulenu malwihu mukubabala kulonda mumukwashi mwiniitala kwiluka nsona chiyinakuli lwihu ludi nanaambala. (4) Neyi hadi paragilafu yikwawu heshina dalwihu, londelenu njila 2 ni 3. Neyi nsañu yamuvidiyo yinesekani nalwihu nawa kanda mumutalishi mwiniitala, mutalishenu hampinji yimunakuhanjeka. (5) Nkumininaku, mwihulenu mwiniitala yakuuli lwihu ludi nanaambala kulonda yatiyishi.
4. Chumanyi chikutukwasha kwiluka chakuzatisha chiwahi iyi buloshuwa?
4 Ilukenu chakuzatisha iyi buloshuwa. Yizatishenuña mpinji yejima yimunamoni nenu yayiwahi. Henohu kanda mutachiki kudiza, toñojokenu chidi kadizi wenu ninjila yakuhanjekelamu nindi kuzatisha jinsona jidi mukudiza. (Yish. 15:28; Yil 17:2, 3) Neyi mwiluka chakuyizatisha chiwahi, iyi buloshuwa yikwikala chozelu chachiwahi chimukuzatishaña hakudizisha antu chalala.