Ikalenu Abula Woma Ilaña Awunda
1 Antu amavulu yitwashimwinaña amwekeshaña yuma yiyakuhwelela chikupu yashiyashana nachalala chamuBayibolu. Hela chakwila twatela kushimwina chakadi woma, cheñi twatela kufwila ‘kwikala awunda nawantu ejima’ nakubula kuyihilisha hamukunkulwayi. (Rom. 12:18; Yish. 4:29) Munjilanyi mutunateli kwikalila abula woma ilaña awunda hampinji yitunakushimwina nsañu yaWanta?
2 Wanenu Hakuditejela: Muntu wawunda watondolwelaña mpami. Kuditadikisha namwiniitala hayuma yakuhwelelayi chikupu hikukumuleñela kwiteja mazu yitunakumushimwinaku. Neyi yahosha nsañu yaluwa, mukubabala hadaha tunateli kuhosha hansañu yacheñi yikuletesha tuditeji. Kuhitila mukukonkomwena hayuma yitwakuhwelelamu wonsu wetu, kunateli kukañesha yitoñojoka yatama nakumushika hamuchima.
3 Neyi tudiwula yitoñojoka yaluwa yamwiniitala, komana dikwila nawu tuneteji hohu chakutukanjikija hela tunakuzeyesha chalala? Inehi. Mudimu wetu hamu neyi ankoñi awiniKristu bayi neyi wakutadikisha ntañishilu yaheña yejima yitwatiyañaku, ilaña yidi yakushimwina nsañu yayiwahi yaWanta waNzambi. (Mat. 24:14) Chatela tuhilashaneña neyi muntu nahoshi nsañu yaluwa, twatela kuchimona neyi hikukooleka kwakushinshika yitoñojoka yamuntu chiyidi.—Yish. 16:23.
4 Hanenu Kalemesha Kudi Mwiniitala: Kudi mpinji yitunateli kwikala ahamuka nawa abula woma neyi hitukutadika ntañishilu yaheña. Hela chochu, hakwikala antu awunda, twatondolwelaña kwikala nakadiwu nikuzatisha mazu akasawuntu hakutena antu akuhwelela hela atañishaña yuma yaheña. Yitoñojoka yakudisamba yakojejaña antu amakwawu kubula kutiyilila, ilaña yililu yakudizoza niluwi yenzununaña yitoñojoka yawantu akeña chalala. Kumwekesha kalemesha kudi antiyilili etu nikulemesha yuma yakuhwelelawu chamwekeshaña kalemesha kudi wena, ichi chikuyipelelaku kwiteja nsañu yayiwahi.
5 Kapostolu Pawulu wadiña nakushinshika hayuma yakuhweleleliwu antu ashimwinineñayi nawa wakeñeli kuyileja nsañu yayiwahi nakuyishika hamuchima. (Yil. 17:22-31) Mukudikeñela, Pawulu wekalili ‘yuma yejima kudi antu ejima,’ kulonda ‘mwejimimu yatweshi kuhandishahu amakwawu.’ (1 Kor. 9:22) Anetu nawa tunateli kwila mwomumu kuhitila mukwikala awunda hampinji yitunakushimwina nsañu yayiwahi chakadi woma.