Kuwahisha Njila Jetu Jakushimwinamu—Chakwakula Mwiniitala Wunahili

Chikwalemena: Antu amavulu itwawanaña mumudimu wakushimwina ekala awunda. Hela chochu, Yesu waprofweteli nindi antu amakwawu akatuhela. (Yow. 17:14) Dichi, hitwatela kuhayamaku neyi tuwana mwiniitala wunahili. Neyi tuwana muntu wunahili, twatela kwakula munjila yikuzañalesha muntu wutwemenañaku, Yehova. (Rom. 12:17-21; 1 Pet. 3:15) Neyi twila mwenimu, tukukañesha kukala kubuli kuleta ntaadi. Cheñi nawa tukuhana wunsahu kudi mwiniitala nikudi antu anakutumona, nawa chakayendelawu kudi aYinsahu jaYehova akatiyilila.—2 Kor. 6:3.

Yuma Yimwatela Kwila:

Wundishenu muchima nawa mwekeshenu muzañalu. Chumichi chikuyikwasha kuwundisha kukala. Bayi mutoñojoka nenu mwiniitala nayihilili. (Mukwa. 7:9) Hadaha nahili hamuloña wakukala kukwetiyi hela munamwendeli hampinji yatama. Hela chakwila nahili nansañu yetu, chumichi chamwekanaña muloña amudimba dehi.—2 Kor. 4:4.
Akulenu mumesu awunda nawa munjila yayiwahi. (Yish. 15:1) Komana mwamuhindwisha hela mwamuluwañesha? Hela chakwila hitwalombaña kwanakena hamuloña wamudimu wetuku, ilaña mwatela kulomba kwanakena hakuyendela hampinji yabula kutelela. Komana nahili muloña wansañu yakutwamba yatiyayi hadetu? Neyi dimu, hoshenu nenu: “Neluki iyi nsañu chiyinaleteshi muhili. Hela chochu, nsañu yimwatiya hadetu yakutwamba. Mukuñiteja niyilumbulwili?” Komana yakundama kuyuma yitwakuhwelela, chidi neyi kuhaña muntu muchipompelu hela nsañu yamashi? Munateli kuhosha nenu: “Neluki. Antu amakwawu ahoshawu dehi haniyi nsañu. Kwila niyilejaku chahosha Bayibolu haniyi nsañu nehi?”
Neyi muntu nahili nankashi, mushiyenu chakadi kumwakula. Neyi yahosha nindi aYinsahu jaYehova bayi akamwendela cheñiku, mulejenu nenu chachiwahi.

Esekenu Kuzatisha Iyi Njila Mukanu Kakweji:

Hitulukenu muniyi nsañu hakudifukula kwachisaka.
Neyi munamushiyi dehi mwiniitala wunahili, hanjekenu namukwakushimwina wumunakuzata nindi chimwadi kwakula munjila yayiwahi.