Kuhitila Munvwalilu Yetu niKudiwahisha:

1. Yakuvwala yamuchidinyi yakeñañawu antu amakwawu kuvwala hayipenji?

¹ Neyi kudi chipenji antu hiyakeñaña nawu amuchisaka, antaña, niamabwambu avwali yakuvwala yayiwahuku. Ambanda avwalaña yakuvwala yambukaku yidi neyi mahina, yitambala, nimapapa hela tuhu kumaluña amakwawu kwabulañawu kuvwala chamuchidiwu mafuku ejima. Amayala niambanda ayishinjilaña nawu abuli kuvwala yakuvwala yavwalañawu dikalu nikudiwahisha kulonda abuli kumwekana wunyonji. Amakwawu ehulaña nawu, ‘Komana kuvwala yakuvwala yamuchidiwu hikwashindamena muNsonaku?’

2. Muloñadi antu chavwalileñawu yikeleyi kushankulu?

² Amakwawu atoñojokaña nawu kashidikilu kamuchidiwu kadifwana nakuvwala yikeleyi yavwalileñawu kushankulu. Eña yikeleyi mpinji yikwawu ayichimineña nakuyivwala neyi yakuvwala nawa ayivwalileña kudi antu afwishileña, ayivwalileña cheñi nankeñelu yikwawu yayivulu bayi neyi hachipenji hohuku. Yikeleyi ayichimineña nayitembi yampembi nawa aswejeleña kuyizatisha hakutuña nachu masaka hela mafuba akuhembelamu mbutu. Kushankulu, atubiña avwalileña mahina ayikeleyi muloña adiña apela wuseya nawa adiña akola. Amakwawu avwalileña yikeleyi kulonda amwekeshi nawu anabalumuki mumuchima chikupu. (1 Anya. 21:27; Yona 3:6-8) Danyeli wavwalili chikeleyi hampinji yalombeleñayi kudi Yehova chakufuma hamuchima. (Dan. 9:3) Atuprofwetu awaHeberu mpinji yikwawu avwalileña yikeleyi kwesekeja nansañu yakusoñamisha yayilejeleñawu kushimwina. (Isa. 20:2) Munjila jamboka mboka jejima javwalileñawu yikeleyi, antu jaNzambi hiyayivwalileña nakukuhwelela nsañu yakupesha afuku. Nawa hiyavwalileña nawu alondeji tushidikilu niyaaku yanyunza yadiña kwakwihuku. Anetu nawa neyi tunakukeña kutonda yakuvwala nikudiwahisha hakuya kuchipenji makonu, kwekala nshimbi jalema jitwatela kushinshika.

3. Indi nvwalilu yetu nikudiwahisha kunateli kuleñela amakwawu kwiladi hachipenji?

³ Shinshikenu Nshimbi: Tachi, antu jaNzambi hiyadilaña namunzenzenzi hela kumwekesha kudi antu nawu adi nawushona chikupu neyi chelañawu antu ‘abula kuchiñeja’ mpinji yikwawuku. (1 Tesa. 4:13) Chamuchiyedi, hitwakeñaña kwila chuma chidi chejima “chakudimbwisha nachu” amakwawuku. (2 Kor. 6:3) Kwesekeja nanilu lushimbi, twatela kudihula netu: ‘Komana kuvwala yakuvwala yikwawu hela kuvwala yakuvwala yamajilu kwamwekeshaña kudi antu amakwawu nawu inakulondela yaaku nitushidikilu twakaanishawu munsona? Komana kuvwala yumiyi kunateli kudimbwisha antu eluka yuma yakuhwelelawu nawa yatañishañawu aYinsahu jaYehova kutalisha hadi afu? Komana yakuvwala yinukuvwala yikukabisha yinleji yawakwetu akwakwitiya? Komana kuvwala muniyi njila kukuzeyesha amana kwetu anabuli kuvwala muniyi njila nawa akabishiluwu hamuloña wayuma yafuukulawu?’—Talenu Kaposhi Kakutalila kaChibemba kaJuly 15, 1998, mafu 22-23; 1998 Yearbook, ifu 203, parakalafu 1.

4. Chumanyi chitunafuukuluhu kubula kwila?

⁴ Hela chochu, hanshimbi jejima jitwatela kushinshika, kwosi lushimbi lwasweja kulema kubadika ilu: Tukuluwañesha neyi twila chuma chikumutiyisha Yehova kutama. (Yish. 27:11; Kol. 1:9, 10) Twakeñaña kwikala ambukaku nakanu kaayi. Hitunateli kwiluka ntachikilu yatushidikilu twejima twahachipenjuku. Ilaña tweluka netu tushidikilu twatuvulu twakundama kuyitoñojoka yakwila nawu afu hiyafwañaku. Dichi dinu twatela kwikala ababala kulonda twiluki netu neyi tulondela tushidikilu tukwawu tukumanisha wulunda wetu naYehova. ‘Hitukutwesha kutambula kumesa yaMwanta, tutambula nawa kumesa yawademonuku.’—1 Kor. 10:21, 22.

5. Nshimbinyi yitwatela kulondela hakutonda yakuvwala yitwatela kuvwala hachipenji?

⁵ Kuvwala Yakuvwala Yakalemesha haChipenji: Yakuvwala yamuchidinyi yitwatela kuvwala hachipenji? Hayaaka yinahituhu nyikanda yanduñu wamaana nikashinshi yahosha haniyi nsañu.a Atukolesha kutoñojokahu chiwahi nikwesekeja yuma kutalisha hayakuvwala yatelela nawa yakalemesha yitwatela kuvwala. Yakuvwala yeniyi yatela kwikala yawulombu wafukuluka nsañu tunakuya “kwitala kudi kudila madilu.” (Mukwa. 7:2) Hakwila tubuli kuneñesha amakwawu chamukunkulwayi, hitwatela kuvwala yakuvwala yasweja kutamuka hela yabula kutelelaku. Hichikweti muloña nayakuvwala yidi yejima yitukutonda kuvwalaku, muloña wakwila tweluka netu afu hiyeluka chumaku, chumichi chikutukwasha kuvwala yakuvwala yakalemesha hakuya kuchipenji chakadi kulondela tushidikilu twamukaayi.

Chakusweka Mujimba

6. Nshimbinyi jitwatela kulondela hachipenji chamukwaKristu?

⁶ Neyi mukwaKristu diyi wunafwi mwatela kusweka mujimba munjila yakalemesha nikulondela nshimbi jejima jakeñekaña jakundama kuwunyonji. Neyi munakufwila kukundeja antu chikupu naNsona hachipenji nikushimuna hatooka to-o nsañu yalala yahosha hadi afu, himwatela kwiteja tushidikilu hela yidika yakaanishawu munsonaku. (Efwes. 5:7-11) Yuma yamwekanaña hachipenji hiyatela kukabisha yinleji yawakwetu akwakwitiyaku. (1 Kor. 10:32) Indi iyi nshimbi yamuBayibolu yinateli kuzatika ñahi neyi munakuloñesha yipenji yawakwaKristu?

7. Muloñadi wutwatela kwikala ababala hakuhosha hadi mufu?—Yish. 18:21.

⁷ Kumuhameka Mufu: Mpanji yahachipenji yashimunaña nsañu yayihi yakundama kuchihandilu chamuntu wunafwi ninyidimu yakashinshi yinakalakaliyi. Hela chochu, neyi akutalishila mujimba kumajamu hela kwiluña dikwawu, antaña nimabwambu abula kwikala ayinsahu akukeña kuhoshahu mazu akumuhameka mufu. Anateli kuhosha mazu anakumwekesha nawu Nzambi namutambiki kwiwulu hela nawu mufu wudi halwendu lwakuya kwiluña dikwawu. Avula kuzatisha nhoshelu yidi neyi “wunooki mukuwunda,” (W.M.K.) “wukami chiwahi,” “niwendañahu.” Antu amavulu anateli kutoñojoka nawu kuhosha mwenimu diyi njila yakumulemeshelamu mufu kakukumishaku. Hela chochu, tweluka netu mufu hanateli kutiya mazu hela nhoshelu yamuchidiwuku. Chikusweja dinu kutama muloña antu ahoshaña chamuchidiwu akuhwelela mudi aspiritu jawankakulula, dichi dinu akwaKristu alala hiyatela kuhosha muniyi njilaku.—Isa. 52:11.

8. Anyi akweti ñovu yakushimuna chatela kwenda nsañu yachipenji chamuntu wamuchisaka kwesekeja naNsona? Shimunenu chakutalilahu.

⁸ Anyi Atela Kutala Nsañu yaChipenji?: Kumaluña amavulu, antaña abula kwikala ayinsahu amonaña nawu chisaka chejima hela antaña amakwawu diwu akweti wuswa wakufuukulahu chatela kwenda nsañu yachipenji. Hela chochu, neyi chipenji chidi mwitala dawakwaKristu, iyala nimumbanda diwu akweti ñovu yakufuukulahu yuma yalema yinakundami kuchihandilu chawu nichawanyanawu. Anvwali, antaña niantu amuchipompelu chawakwaKristu atela kulemesha iyi ñovu yayinkawu kwesekeja naNsona. (Mat. 19:5, 6) Sweje-e dinu neyi tunakujiika muntu itwakeña. (Kutach. 23:19; 35:29) Hakwila nawu yabuli ‘kudibomba nawabula kwitiya mumpanda yoyimu’ mukwaKristu watela kushimuna hatooka to-o nindi nsañu yejima yachipenji yatela kwenda kwesekeja nanshimbi jamuBayibolu. (2 Kor. 6:14-17) Yumanyi yatela kwilayi hakwila yalondeli nshimbi jamuBayibolu?

9, 10. Indi kusonekela chadimu nshimbi jatela kulondelawu hachipenji kwawahiladi, nawa chumichi chamwekeshaña ñahi nawu mwakeña akwenu?

⁹ Shimunenu Chiwahi Nshimbi Jakulondela haChipenji Chenu: Neyi muntu yasonekela chadimu nshimbi jatela kulondelawu hachipenji chindi, chekalaña chaswayi kuhanjeka nawantaña, muloña antu avula kulemesha nshimbi jasonekeliyi muntu wunafwi. (Kutach. 50:5) Nsañu yakufwachika nawa hadi niayinsahu atela kuyilemesha chikupu. Nsañu yamuchidiwu yatela kwikala yambukaku nawilu ninsañu yakusoneka yinakumwekesha chakwanzañana maheta. Antu atoñwelañahu dehi yuma yakumbidi nakashinshi nimaana eluka nawu hiyatela kutalila sampu anashinakaji dehi hela anakati chikupu mwaka dinu asonekuku. (Mukwa. 9:11) Yuma yalema yimwatela kusoneka kutalisha hanshimbi jakulondela hachipenji henohu muchidi amomi nawa akola yinabombelumu chakenda chipenji, iluña kuchakekalila, muntu wukekala nawuswa wakuloñesha nikutwaminina nsañu yachipenji.

¹⁰ Antu amakwawu chayikalilaña kusonekela chadimu nsañu yamuchidiwu. Hela chochu, kwila mwenimu chamwekeshaña nawu mudi akwaKristu apama nawa mwakeña akwenu. Antu eluka nsañu yalala yamuBayibolu eluka nawu kusonekela chadimu nsañu yamuchidiwu hichaya mukwila nawu akufwa swayi chili kuwejelaku mafuku kuwumi wawuku. Kusonekela chadimu nenu antaña abula kwikala ayinsahu hiyatela kutala hansañu yidi yejima yachipenjuku chinateli kuyihilisha. Hela chochu, chachiwahi kusonekela chadimu iji nshimbi henohu muntu kanda yafwi kubadika kushila amuchisaka ananeñi iwu mudimu muloña anateli kuyikanjikija kwiteja yaaku yatama yabulili kukuhwelela hela kwitejayi mufu. (Fwi. 2:4) Kwila mwenimu chamwekeshaña nawu muntu wakeña akwawu nawa wayakamenaña.—Efwes. 5:28, 33.

11, 12. Chumanyi chitwatela kutondolwela neyi muntu itwakeña nafwi, nawa tunateli kwila ñahi mwenimu?

¹¹ Chakuzata Nawantaña Abula Kwikala aYinsahu: Kumaluña amakwawu antu ekala nachaaku chakubulakana hakapinji kantesha kulonda aloñeshi chatela kwenda chipenji neyi muntu nafwi. Abulakanaña kulonda akuñululi mali nikwiluka chakukwasha antu hachipenji nikufuukulahu chatela kwenda chipenji. Yuma yamwekanaña yamwekeshaña nawu iyi mpinji Chinsahu nateli kukañanya kulombola yuma hachipenji nakushila mumakasa awantaña abula kwikala ayinsahu. Neyi chitunadizi, Nsona yashimuna chikupu nawu hitwatela kwiteja antu abula kwikala ayinsahu kulombola nsañu yikwawu yahachipenji henohu chipompelu chinakutala nsañu yikwawuku. (2 Kor. 6:14) Dichi dinu, neyi muntu wunafwi wadiña mukwaKristu washinshika hichikuwaha kushila chipenji mumakasa awantaña abula kwikala ayinsahu kulonda ekali “mukometi yachipenji” yikushimuna chatela kwenda chipenjuku. Antu amuchipompelu abula kwikala antaña hiyatela kudiñijamu chikupu munsañu yakubulakana nachisaka chinafwishi nakuhanjeka nsañu yakufwa hela chatela kwenda kufwaku.

¹² Chisaka chawakwaKristu chatela kulumbulula mumesu awunda nawa munjila yayiwahi chinatanjikuwu nsañu yachipenji. Neyi antaña abula kwikala ayinsahu anakukeña kulondela nshimbi yimunatanjiki mwatela kuyilejamu ntanjikilu yejima. Hanu dinu, mukwila ñahi neyi antaña amakwawu abula kwikala ayinsahu anakufwila kulondela tushidikilu hela yaaku yakaanishawu munsona? Chekala chalema neyi mukulumbulula yuma yitwakuhwelela etu akwaKristu munjila yayiwahi nawa chakadi woma. Hela chochu, neyi muntu wunafwi wasonekeli chadimu nshimbi jakulondela hachipenji chindi hikwatela kwidika ntaaduku.

13. Neyi yuma yinasweji kukala hela kuvulumuka ntaadi, antu amakwawu anateli kufuukulahu yumanyi kutalisha hantanjikilu yachipenji, hanu dinu chumanyi chitwakuhwelela?

¹³ Neyi chakwila antaña abula kwikala ayinsahu anakukeña chikupu kuloñesha yuma yejima yahachipenji, akwakwitiya amuchisaka anateli kufumishahu makasa munsañu yachipenji. Neyi chumichi chinamwekani, anateli kuhana mpanji yachipenji yayihi Hetala daWanta hela kwiluña dikwawu kwatelela kulonda ‘akundeji naNyikanda yajila’ antu ananeñi hamuloña wakufwa kwamuntu akeñawu. (Rom. 15:4; Mas. 119:50) Hela chakwila mujimba hosi, mpanji yamuchidiwu yatela kwikala yakalemesha nawa yetejewa. (Kuhit. 34:5-6, 8) Hela chakwila wufwinda wunaletuwu antu abula kwitiya wunateli kuleñela chineñi kuswejeshelaku, tunateli kukundejewa neyi twiluka netu Nzambi wamonaña chitwafuukulañahu kwila chuma chaloña, nawa nateli kutwinka “ñovu jabadika nankashi.”—2 Kor. 4:7.

[Tumazu twaheshina]