Komana Kwila Mushimwinaña Hefuku Damulungu Nehi?
1. Chumanyi chitukudizila kumudimu wazatiliyi Pawulu nialundanindi muFwilipi?
1 Dadiñi ifuku daSabata danookeleñawu aYudeya amavulu muFwilipi. Pawulu nialundanindi ayileña nakuhempula iwu musumba hampinji yadiñawu halwendu lwawu lwawumishonali. Kwosi wadi kuyinka muloña neyi abulili kuya nakushimwina hadina ifuku dakunooka. Hela chochu, elukili nawu didi ifuku dapompeleleñawu aYudeya hanzi yamusumba nakulomba, dichi akoolekeleli mpinji yeniyi kulonda ayishimwini. Pawulu nialundanindi atela azañaleli chelukiluwu nawu Lidiya natiyi nsañu yatañishiluwu nawa akwetala dindi ejima apapatisheweli. (Yil. 16:13-15) Chineli antu amavulu makonu anookaña Hamulungu, kwila mushimwinaña hanidi ifuku nehi?
2. Kukalanyi kwashindawu antu jaYehova hakwila nawu tushimwineña Hamulungu chakubula kutukabisha?
2 Kukala Kwakushimwina Hamulungu: Muchaaka cha 1927, antu jaYehova ayikolesheli kuzata mumudimu wakushimwina hefuku Damulungu. Hashimbwili niwanyi atachikili kuyikañesha. Amavulu ayikasili mutuleya kuUnited States hamuloña wakufumpa nshimbi jaSabata jaHamulungu, kuluwañesha antu, nikulandisha chakubula pasu. Ilaña antu jaYehova hiyalekeli kushimwinaku. Muyaaka yamuma 1930, aloñesheli “makampeni amaneni,” nawa akwakushimwina amuyipompelu yakwakwihi enjileña hamu kulonda ashimwini mumaluña akushimwinamu. Mpinji jikwawu neyi akwakushimwina ayikasa, dihiyaswejeleña kuvula chakwila nfulumendi yakañenyeña kuyilekesha kushimwina. Komana mwasakililaña hakudihana kwadihaninuwu awa amana kwetu hakwila tushimwineña Hamulungu chakubula kutukabisha?
3. Indi ifuku Damulungu dekaliladi ifuku dadiwahi kushimwina?
3 Hifuku Dadiwahi Kushimwina: Antu amavulu ekalaña hamatala Hamulungu. Kakavulu anookaña hohu. Antu amakwawu ayaña kumachaachi akeñaña kuhosha hadi Nzambi hanidi ifuku. Neyi twapompaña Hamulungu, dikwila nawu tunavwali dehi chachiwahi neyi chitwavwalaña hakuya nakushimwina, komana kwila tufuukulahu kuya nakushimwina henohu kanda tupompi hela neyi twapompa dehi nehi? Neyi munakukeña loñeshenu yakudya yantesha musendi.
4. Tunateli kuzañalala ñahi neyi tuya nakushimwina hefuku Damulungu?
4 Neyi tufuukulahu kuya nakushimwina hefuku Damulungu, tunateli kunooka mpinji yikwawu yikushalaku. Nawa chitukunooka tukwikala namuzañalu wafumaña mukukalakala mudimu wajila. (Yish. 3:24) Hadaha tunateli kwikala namuzañalu neyi tuwana muntu wudi neyi Lidiya.