Asenu Nkonyi Jenu Chiwahi
1. Indi mukanda wa 1 Akorinda 9:26 wazatikaña ñahi mumudimu wetu wakushimwina?
1 Kapostolu Pawulu wasonekeli nindi: ‘Dichi ninami chinatemukaña mwenomu, hinatemukaña nakululutaku; chinasaña nkonyi hinetaña hampepelaku.’ (1 Kor. 9:26) Pawulu wateneneña chashiliyi muchima hakushikija yikonkwanyi yakuspiritu. Hela chochu, awa mazu atalisha cheñi kumudimu wakushimwina. Twakeñaña kwasa ‘nkonyi’ jetu hela kuzata chachiwahi kulonda nyidimu yetu yisoñeña nyikabu yayiwahi chikupu. Munjilanyi?
2. Tunateli kumwimbujola ñahi Pawulu niakwakushimwina amuyaaka nkulakaji yakusambila hakutonda mpinji nimaluña akushimwina?
2 Yenuña Kumaluña Kudi Antu: Pawulu niakwakushimwina amuyaaka nkulakaji yakusambila ashimwinineña kumaluña kwelukiluwu nawu kudi antu. (Yil. 5:42; 16:13; 17:17) Neyi antu amavulu mwiluña detu dakushimwina ekalaña hamatala namelela, dikwila nawu diyi mpinji yayiwahi yitwatela kushimwina kwitala nikwitala. Mpinjinyi yavulaña antu kumaluña akulandishila mwiluña denu dakushimwina? Munateli kuzata chiwahi mudimu wakushimwina mumukwakwa haniyi mpinji.
3. Tunateli kwasa ñahi nkonyi jetu chiwahi hampinji yitunakuzata mwiluña detu dakushimwina?
3 Zatenuña Chiwahi Mwiluña daKushimwina: Twatela kubabala cheñi kulonda twaseña nkonyi jetu chiwahi hampinji yitunakuzata mwiluña detu dakushimwina. Chakutalilahu, chatela kuya nezanvu deneni mwiluña dodimu mumwatela kuzata nañovu nimpinji yeneni hakwila nawu izanvu dizati chiwahi, chikuwaha neyi mwambula mazanvu. Komana tunateli kutambula iluña dakushimwina kwakwihi netala detu kulonda tubuleña kumanisha mpinji nakwenda?
4. Chumanyi chikutukwasha kwikala ‘ayibinda awantu’ akuluka yitembi?
4 Yesu wesekejeli akwakushimwina ‘nawayibinda awantu.’ (Maku 1:17) Chibinda chanshi hafwilaña hohu kunatila wanda hamenjuku ilaña wakeñaña kukwata inshi. Dichi ayibinda anshi akuluka yitembi ayaña kumaluña kwatela kuwanawu inshi hampinji yatelela, nawa atachikaña kuta inshi chakubula kumanisha mpinji. Chalala azataña chiwahi. Anetu nawa twatela kudikita mumudimu wetu wakushimwina neyi ayibinda anshi.—Heb. 6:11.