Jehovah’s Witnesses—Faith in Action, Part 1: Out of Darkness
MuBayibolu chejeji achesekeja nansañu yalala, mwidima awesekeja nansañu yakutwamba. (Mas. 43:3; Isa. 5:20) Satana waleteli mwidima mukaayi hampinji yamudimbiliyi Evu, nkumininaku watandishili mwidima mukaayi kejima. (Chim. 12:9) Vidiyo yaJehovah’s Witnesses—Faith in Action, Part 1: Out of Darkness yamwekeshaña chejeji chakuspiritu chichatachikili kutoñeka mumwidima. (Isa. 60:1, 2) Hanyima yakutala iyi vidiyo, komana munateli kwakula awa malwihu?
(1) Indi mwidima wasweja watachikili ñahi hanyima yakwila apostolu anafwi dehi? (2) Kumatachikilu ayaaka yamuma 1100, yumanyi yakwashili antu kwiluka nawu machechi atañishileña nsañu yalala wanyi? (3) Yumanyi yitweluka hadi Henry Grew niGeorge Storrs? (4) Yumanyi yamwekeni muchihandilu chaCharles Russell yamukwashili chikupu? (5) Indi Mana Kwetu Russell, tata yindi niakwawu antesha adizili ñahi Bayibolu, nawa yumanyi yaditejeluwu yashindameneni muNsona? (6) Indi idi izanvu dawakwakudiza Bayibolu dadibombeli ñahi nezanvu daNelson Barbour, hanu dinu yumanyi yaletesheli Mana Kwetu Russell kufuma munidi izanvu? (7) Yumanyi yamwekeni muJuly 1879 yaleñeleli kwikali chejeji chakuspiritu? (8) Cheñi nawa chumanyi cheliluwu aTudizi aBayibolu avulileña hakwila atiyakeshi nsañu yayiwahi? (9) Henohu kanda ashiki muchaaka cha 1914, indi aTudizi aBayibolu akuhweleleli nawu yumanyi yikamwekana munichi chaaka? (10) Kukalanyi kwamwenuwu aTudizi aBayibolu chelili Mana Kwetu Russell nafwi dehi? (11) Yumanyi yeliluwu aTudizi aBayibolu chamufumishiluwu Mana Kwetu Rutherford nialundanindi mukaleya? (12) Indi iyi vidiyo yinayikwashi ñahi kutiyishisha nikuhameka kuloñesha kwaYehova? (13) Indi iyi vidiyo yinayikoleshi ñahi kutwalekahu kushimwina neyena hela chakwila mukumonaña kukala? (14) Tunateli kuzatisha ñahi iyi vidiyo hakukwasha antaña jetu, atudizi etu aBayibolu niantu amakwawu?
Mwalala ana aTudizi aBayibolu atachi atushilili wuswana wakuspiritu wabadika kulema. Adiña akwakushimwina chejeji neyena nawa akadi woma mukaayi kamwidima wakuspiritu. Tufwilenu kwimbujola chakutalilahu chawu nikutwalekahu ‘kwenda neyi akwachejeji.’—Efwes. 5:8.