A Yinsahu jaYehova—Adiloñesha Kushimwina Nsañu Yayiwahi
Kubadika hayaaka 100 yinahituhu, aYinsahu jaYehova ekala adiloñesha kushimwina nsañu yayiwahi. Twashimwinaña iyi nsañu mumadimi amavulu nawa mumatuña akubadika ha 230, kuhitila mumudimu wekala neyi kampeni yamukaayi kejima (Mat. 24:14) Muloñadi iwu mudimu chiwalemena? Nawa anakuwuzata ñahi mukaayi kejima? Vidiyo yidi namutu wakwila nawu, Jehovah’s Witnesses—Organized to Share the Good News yakula awa malwihu kuhitila mukulumbulula nsañu yahosha hamudimu wetu mukaayi kejima. Hanyima yakutala iyi vidiyo, akulenu awa malwihu analondeluhu.
Indi iyi vidiyo yinayileñeli ñahi kutiyishinsha nikuhameka (1) mudimu wunakukalakala kuloñesha kwaYehova hakushimwina nsañu yayiwahi? (2 Tim. 4:2) (2) yisaka yaBeteli mukaayi kejima? (3) shikola yaloñeshawu yakudizisha amishonali niankoñi? (2 Tim. 2:2) (4) kulema kwakutachika ifuku nakutaña nsona yefuku nikuloñesha kupompa mulungu nimulungu? (Yil. 17:11) (5) kuwaha kwekala mukupompa kwawakwaKristu? (Heb. 10:24, 25) (6) nkisu yitwakatambwila hampinji yakafuntishawu Paradisa hamaseki? (Isa. 11:9) (7) kukooleka kumukweti kwakukalakala mumudimu wakwañula wunakutwalekahu?—Yow. 4:35.
Iyi vidiyo yekala chozelu chachiwahi hama chakukwasha nachu antu akweti mpwila yakudiza hakwila eluki mudimu wamukaayi kejima wazatañawu aYinsahu jaYehova. (8) Mpinjinyi yatelela yitwatela kuleja atudizi etu aBayibolu, antaña niamakwawu iyi vidiyo? (9) Yumanyi yayiwahi yimunamoni mudi antu hampinji yimwayitalishili iyi vidiyo?
Neyi tutoñojoka hayuma yinakuzatayi Yehova, twatiyaña neyi chatiyiliyi ñimbi yamasamu wahosheli nindi: “Eyi Yehova Nzambi yami, nyidimu yeyi yakuhayama yiwuneli yinavuli, niyitoñojoka yeyi yiwatutoñojokaña, Hiyakutwesha kukuchindilayuku.” (Mas. 40:5) Tuzatisheña chachiwahi iyi vidiyo kulonda tukwashi nachu antu amuhamekeña Yehova nikuloñesha kwindi.