Kampeni Yeneni Yakushimwina Yabadika muKaayi!
Kubadika hadi yaaka 100 yinahituhu, aYinsahu jaYehova ekala adiloñesha kushimwina nsañu yayiwahi. (1 Kor. 9:23) Muniyi kampeni yeneni yakushimwina yabadika mukaayi, twashimwinaña iyi nsañu mumadimi amavulu. Twashimwinaña iyi nsañu mumatuña akubadika ha 230. (Mat. 24:14) Hanu dinu iwu mudimu walemenadi? Nawa anakuwishimwina ñahi mukaayi kejima?
Vidiyo yaJehovah’s Witnesses—Organized to Share the Good News yakula awa malwihu kuhitila mukulumbulula yikuma yakunama yajinjila jajivulu jamudimu wetu wunakuzatika mukaayi kejima. Hampinji yimukutalaña iyi vidiyo, toñojokenu hanawa malwihu: (1) Indi mudimu wetu awiloñeshaña ñahi nikuwulombola? (2) Indi Dipatimenti yaKusoneka, Mudimu waKubalumuna, mudimu wakuleña nyevulu, niwakukwata mazu hajiTepu hela haVidiyo azataña mudimwinyi kutalisha hakushimwina nsañu yayiwahi? (3) Muloñadi chikunekalili nkeñelu yakupulinta nyikanda yayivulu nimudimu wakuyitemesha? (Yow. 17:3) (4) Nyikanda yiñahi yapulintañawu muchaaka? (5) Indi nyikanda yetu yashindamena haBayibolu yinakuzata mudimwinyi? (Heb. 4:12) (6) Yumanyi yinakuloñeshawu yakukwasha nachu amputa mesu nianjika matu lwakuspiritu? (7) Indi mali akukwasha mudimu wetu afumaña kudihi? (8) Twahetelañamu ñahi mumudimu wakalakalaña Dipatimenti yatalaña Nsañu jakuChipatela, Dipatimenti yaMudimu, niDipatimenti yaKupompa kwaNkambi? (9) Hakwikala Chinsahu chaYehova, iyi vidiyo yinakwashi ñahi enu kusweja kuhameka (a) hamudimu wunakukalakala kuloñesha kwaYehova hakushimwina nsañu yayiwahi? (b) yisaka yaBeteli yakubadika ha 100 mukaayi kejima? (c) Shikola yaloñeshawu yakudizisha ankoñi niamishonali? (d) kulema kwakutachika ifuku nakutaña nsona yefuku nikuloñesha kupompa mulungu nimulungu? (e) kuwaha kwekala mukupompa kwawiniKristu? (f) chikekala Paradisa heseki? (Isa. 11:9) (g) kukalakala mumudimu wakwañula wunakutwalekahu?—Yow. 4:35.
Yumanyi yayiwahi yimunamoni mudi antaña jenu, amabwambu, antu yimwafuntilañaku, niatudizi aBayibolu hakuyitalisha iyi vidiyo? Komana kwila mutalishaku amakwawu iyi vidiyo nikuyileja nsañu yayiwahi katataka nehi?—Mat. 28:19, 20.