Vidiyo Yitwatela Kushaku Kashinshi Chikupu
“Iyi Vidiyo yaleñeshaña muntu kutoñojoka chikupu!”
“Yanshikili hamuchima chikupu!”
“Natiyili muzañalu nankashi!”
1 Komana dichimwatiyili hampinji yatachi yimwatalili iyi vidiyo yaYoung People Ask—How Can I Make Real Friends? Yaaka yinahituhu, mana kwetu wakansi wadiña nakukala mukuhanda kwindi muloña wawamabwambu jindi atondeliyi. Amukojejeli kujimbesha mpwila yakukeña chalala nakujimbesha wubwambu windi naYehova. Dichi vidiyo yaReal Friends yedikili. Wasonekeli nindi: “Chinatalileña vidiyo mapampa kakavulu, mumesu ami mwenzeli mpola yamadilu. Namusakilili Yehova hawukwashu wanyinkeliyi wahampinji yatelela.” Vidiyo yamukwashili kuhimpa nshakaminu yindi nikwikala nawamabwambu amawahi. Wahosheli cheñi nindi: “Chinamwekani hatooka to-o nawu enu enividiyo iyi muneluki chikupu yuma yinakumwekana katataka yinakuluwañesha atwansi.” Anvwali niatwansi, komana kwila muyitala cheñi iyi vidiyo hakudiza kwachisaka chenu kukalondelahu nehi? Neyi chibalu chimu chinamani, imikenu vidiyo, nawa hanjekenuhu wonsu wenu mukukasuka nikuhosha chakashinshi hamalwihu adi mumaparakarafu analondeluhu.
2 Ntachikilu: Muntu wamuchidinyi watela kwikala ibwambu walala?—Yish. 18:24.
3 Nyikoleku Yakañeshaña Wubwambu: Munjilanyi muwatela kushindila yitoñojoka yakwila nawu anakushiya nkaweyi? (Fwi. 2:4) Muloñadi chiwatela kuwahishaku wuntu weyi, nawa hinyi watela kukukwashaku kwila mwenimu? Chumanyi chikuletesha wikali nakukooleka kwakwikala namabwambu amavulu, nawa kudihi kuwatela kuyiwana?—2 Kor. 6:13.
4 Wubwambu naNzambi: Munjilanyi muwunateli kukwatila wubwambu waweni naYehova, nawa muloñadi chichikukeñekela kuzata nañovu hakwila mwenimu? (Mas. 34:8) Hinyi watela kukolesha chikupu wubwambu weyi naNzambi?
5 Amabwambu Atama: Indi amabwambu atama anyi? (1 Kor. 15:33) Indi amabwambu atama anateli kuluwañesha ñahi wuspiritu wamuntu? Indi nsañu yamuBayibolu yaDina yakudizishañadi?—Kutach. 34:1, 2, 7, 19.
6 Chimwenu Chamunanu Mafuku: Indi wuudi wamuluwañesheli ñahi Tara? Nyiloñanyi yahaniniyi hakudikunda nawatwansi akwituña? Amwiñijili muyuma yamuchidinyi yafwana? Muloñadi anvwali jindi chakañenyiwu kwiluka kukala kwadiñayinaku, ilaña munjilanyi anvwali jindi mwahimpililuwu yitoñojoka yawu kulonda atweshi kumukwashaku kukola lwakuspiritu? Indi muhela payiniya wamwekesheli ñahi nawu wadiña ibwambu daTara walala? Muloñadi eniKristu chatela kutiyilila Yishimu 13:20 niYeremiya 17:9? Chumanyi cheneni chadiziliyi Tara?
7 Kukunkulula: Yumanyi yimunadizi muniyi vidiyo? Munateli kuyizatisha ñahi hakukwashaku amakwawu?—Mas. 71:17.