Ikalenu Ababala Hampinji Yimunakushimwina
1. Muloñadi wutwatela kwikala ababala hampinji yitunakushimwina?
1 Ambuña Nzambi anakushimwina “Neyi anyikoku mukachi kawatuñwidi” “mukachi kawantu amakonu aheña achinchika.” (Mat. 10:16; Afwilipi 2:15) Yileji yakusoñamisha kutalisha hamadombu, kuwombolola antu yinatandi nankashi, nawa chumichi chinakumwekesha nawu antu atama ‘anakuya nakuswejelaku.’ (2 Tim. 3:13) Nshimbinyi yamuNsona yitwatela kuzatisha yinateli kutukwasha ‘kwikala ababala’ mumudimu wakushimwina?—Mat. 10:16.
2. Yumanyi yinateli kutuleñela kufuma mwiluña dakushimwina nakuya nakushimwina kwiluña dikwawu?
2 Dihoñeshenu Mumuchima: Mukanda waYishimu 22:3 watukonkomwenaña kwikala namaana “akubatama” neyi tumona kukala. Ikalenu asoñama. Nshakaminu muchituñilu mwabula wubanji yinateli kuhimpika chakubula kwiluka. Hadaha munateli kumona atupokola amavulu hela mazanvu awantu mumukwakwa. Mpinji yikwawu mwiniitala wudi chiwahi nateli kuyisoñamisha. Chatela tulabajaleña, twatela kufumahu swayi-swayi nakutwalekahu kushimwina kwacheñi.—Yish. 17:14; Yow. 8:59; 1 Tesa. 4:11.
3. Indi nshimbi yekala haMukwakutaŋisha 4:9 yazatikaña ñahi mumudimu wetu wakushimwina?
3 Zatenuña Ayedi Ayedi: Hamukanda waMukwakutaŋisha 4:9 hahosha nawu, “Antu ayedi anabadiki wumu.” Hadaha mwenjilili kuzata nkawenu mumudimu wakushimwina chakubula kumonahu chuma chatama, komana nichayinu mpinji munateli kuzata nkawenu? Kumaluña amakwawu munateli kuzata nkawenu. Ilaña kumaluña amakwawu kwekala wubanji, dichi muhela hela kansi hatela kushimwina kwitala nikwitala nkawinduku, sweje-e neyi itañwa dinahumi dehi. Yuma yamonawu antu yamwekeshaña nawu chalema kwikala namukwetu wasoñama. (Mukwa. 4:10, 12) Muntu wudi wejima wunakushimwina nezaza dawakwawu watela kwikala wasoñama. Neyi munakuzata nawakwanu, mwatela kuyileja kulonda eluki nawu munamanishi dehi kuzata.
4. Tunateli kuzata ñahi hakukiña antu ejima amuchipompelu?
4 Muloña wakwila ‘ahembaña nyichima yetu,’ aeluda akweti mudimu wakutuleja nshimbi yayiwahi kwesekeja nayuma chiyidi mwiluña detu. (Heb. 13:17) Chitwadizoza neyi akwaKristu nikuzatila hamu nawaeluda Yehova wukatukiswila. (Mika 6:8; 1 Kor. 10:12) Chikusweja kuwaha neyi ambuña Nzambi ejima akushimwinaña chikupu mumaluña etu akushimwinamu, nikwikala asoñama mpinji yejima.