Lemeshenu Chahosha Nsona haNsañu yaYipenji Chibalu 4
Neyi Munayi Kuyipenji yaWantu Abula Kwikala aYinsahu
1. Yumanyi yitwatela kushinshikahu chikupu henohu kanda tufuukuluhu kuya kuchipenji?
1 Kuya kuchipenji chinaloñeshuwu kudi akwansakililu yakutwamba chili muchechi hela hamukala hichuma chalema nankashi neyi chashimunawu muchibaaba “chaMalwihu Kufuma Kudi Antañi” muKaposhi Kakutalila kaMay 15, 2002 kaChibemba. Twatela kwanuka netu chipenji chidi muchechi hichidika chansakililu nawa kakavulu atañishaña hela kuzatisha nhoshelu yatandishaña ntañishilu yabula kwikala munsona chidi neyi wumi wamuntu hiwafwañaku hela nawu antu ejima amawahi ayaña mwiwulu. Hayipenji yamunyikala mumaluña amavulu, kwekalaña kuchiisha hachipenji, kwimba tumina twansakililu, kulomba kudi ankakulula, kulambula nyilambu, kumwaña walwa hamaseki niyidika yayivulu yawusenji.
2. Muloñadi chichawahila kushimwina chadimu yuma yitwakuhwelela kutalisha hayidika yahachipenji?
2 Mpinji yikwawu anateli kuleja antu amuchisaka nawu chiña akoñi yidika yahachipenji yalemeshawu. Chakutalilahu, mana kwetu mukwaKristu nawa mwana wawedi anateli kumuleja kukoña yidika yahachipenji yabula kwikala munsona hachipenji chatata yindi wabula kwikala Chinsahu. Cheñi nawa, ntuluwa mukwaKristu anateli kumuleja nawu yalondeli yidika yawusenji yahachipenji neyi nfumwindi nafwi. Muyuma yamuchidiwu twatela kubabala chikupu kulonda tubuli kwila yuma yatama. Hitwatela kuhembela sampu kumwekana kufwa mwaka dinu tushimuneña yuma yitwakuhwelela kudi antaña jetu abula kwikala aYinsahuku. Neyi eluka yuma yitwakuhwelela henohu kanda kumwekani kukala, tukuheñuka wanyi hampinji yitunaneñi nikumona ikakeja dekala hachipenji.
3. Twatela kudihula malwihwinyi henohu kanda tuyi kuchipenji?
3 Chumanyi chatela kwilayi mukwaKristu neyi nakukeña kuya kuchipenji chamukwawu muyazatilañawu, ntaña hela ntuñi nindi wabula kwikala Chinsahu? Watela kudihula nindi: ‘Komana kwikala hakachi kawantu anakwila yidika yansakililu yakutwamba kukunleñela kudiñijamu tahindi nehi? Neyi niya, komana nukutuntwisha yinleji yamuchima yawakwetu amuchipompelu? (Mat. 18:6) Neyi niya, chikuletesha kutaadeka nawantu abula kwiluka muloña wunakaaninaña kudiñija muyidika yenoyu?’ Nawa bayi tudiwula chinleji chetu chamuchima chichikwikala neyi tuya kuchipenji chenichi. Chikutama nankashi kukatisha chinleji chetu chamuchima hela chamukwetu kubadika yuma yayiwahi yitunakutoñojoka netu yinateli kufumamu neyi tuya kuchipenji chamuchidiwu.—Esekejenu 1 Akorinda 8:12, 13.
4. Indi chisaka chinafwishi chinateli kutiya kuwaha nankashi nikukoleshewa neyi tuyihempula mpinjinyi?
4 Chumanyi chikwilayi muntu neyi yeluka nindi chayayi kuchipenji wukwila yidika yabula kwikala yawakwaKristu hela kutuntwisha akwawu hela kutaadeka nawantu abula kwikala aYinsahu? Yumiyi yinateli kuleñela mukwaKristu kufuukulahu kubula kuya kuchipenji chamuchidiwu. Neyi muntu yafuukulahu chiwahi kubula kuya kuchipenji, kwosi muntu wamuchipompelu watela kuhila hela kumwinka muloña hachuma chinafuukuliyuku. Amakwawu afuukulañahu kuhempula chisaka chinafwishi henohu kanda ajiiki hela neyi anamwañi dehi chipenji. Hampinji yamuchidiwu chisaka chinafwishi chinateli kutiyilila chikupu nsañu yamuBayibolu. Neyi tukwasha chisaka munsañu yamali chakubula antu kwiluka hampinji yamuchidiwu, hadaha chisaka chikuzatisha awa mali nkawawu. Neyi twiluka mpinji yitwatela kuyikwasha nikuyikundeja chikutukwasha kuspiritu nikwiluka chikupu netu yuma yitunayinki yikuyikwasha hama.
5. Twamwekeshaña ñahi netu twekala akwaKristu apama nikwesekeja yuma hampinji yitunakufuukulahu neyi twatela kuya kuchipenji?
5 Bayi Mudiwula Yuma Yatama Yinateli Kufumamuku: Antu amavulu amonaña yipenji neyi yidika yayinkaña kukooleka kwakuhumañana nawantu nikunwa nakudya yuma yaloñeshañawu. Antu alemesha chikupu kumona antu nikuyimona hachipenji. Dichi neyi muntu nayi wanyi kuchipenji wukuneñesha nankashi chisaka chinafwishi. Amakwawu atoñojokaña nawu neyi kuya kuyipenji yawakwawu mpinji yejima nehi, antu antesha hohu diwu akenza kuchipenji chawu. Yumiyi yaleñelaña antu kuvula kuya kuyipenji yejima yekalaña muchituñilu chawu. Anateli kwila mwenimu hela chakwila hiyamwilukili muntu wunafwi hela antu amuchisaka chinduku. Chamwekanaña neyi antu avula kujiña kukupompa kwawakwaKristu hamuloña wanyidimu yakumujimba chayikalilaña wanyi kutambula lusesa kumudimu hakwila ayi kuchipenji chantaña yawu wakutonta chakutonta. Komana yitoñojoka yamuchidiwu yakuya kuyipenji yesekana nayitoñojoka yaNzambi?
6. Indi kuya kuyipenji yikwawu kunateli kukañesha ñahi muntu kwikala nawulunda wawuwahi naYehova?
6 Chineli tudi akwakudifukula alala aYehova, twatela kutoñojoka hawulunda wetu naYehova chiwukwikala neyi tuswejaña kuya kuyipenji. Komana chikuwaha kushakama mpinji yeneni hayipenji kunsa yanyilungu chakwila tushiyaku hohu mpinji yantesha yakuya mumudimu wamwiha ninyidimu yikwawu yateokalatiki? (Efwes. 5:15, 16) Chineli hayipenji yawantu akwituña havula yidika yabula kwikala yawakwaKristu chidi neyi kusweja kunwa walwa niwuvumbi, tunateli kudihula netu, ‘Komana chikuwaha kuya kuchipenji chamuchidiwu nkawami hela kutemeshaku mukwetu wamumaluwi hela muntu wamuchisaka nkawindi kuchipenji chidi kumbaka hela kumukala kwakulehi?’ Wejima wetu twatela kwikala ababala kulonda tubuli kwiñija nyitu munyidimu yahachipenji yamuneñeshaña Yehova, chineli yumiyi yinateli kutukañesha kupama kuspiritu nikubula kwikala nayililu yawakwaKristu.—Chim. 18:4.
7. Muloñadi chitwatela kwikala asoñama hampinji yitunakufuukulahu kuya kuchipenji chawantu abula kwikala aYinsahu?
7 Mpinji yikwawu akwaKristu abula kusoñama adiwulaña kukala kwafumañamu nawa elaña yuma yatama. Amakwawu ayitambula kukooleka kwakuzata nyidimu yikwawu, amakwawu ayihaña muchipompelu chawakwaKristu. Bayibolu yasoñamishaña nawu, “Muntu wadihoñeshaña mumuchima wamonaña katama, hakubatama.” (Yish. 22:3) Neyi twiluka iyi nshimbi niyuma yatama yitunateli kumona chikutuleñela kwikala asoñama hampinji yitunakufuukulahu neyi twatela kuya kuchipenji chawantu abula kwikala aYinsahu hela nehi.
8. Kukalanyi kwamonawu antu amakwawu muloña wakudiñija mumazanvu atalaña hansañu yayipenji muchituñilu?
8 Kaayi mpinji yikwawu akitenaña nawu ‘mukala wamukaayi kejima,’ dichi tushidikilu niyidika yatandaña swayi-swayi. Mumatuña amakwawu, amana kwetu eñila mumazanvu atalaña hansañu yakujiika. Kakavulu awa mazanvu mwekala hohu antu edimi dimu. Asonkeshaña mali kulonda ayizatishi hachipenji chamuntu wahoshaña idimi dawu. Antu ekala munawa mazanvu atelela kukwasha nikuya kuyipenji yawantu ahoshaña idimi dawu. Komana chachiwahi kwikala munawa mazanvu? Mumukala wumu, muhela mukwaKristu wekalili membala wamwizanvu datalaña nsañu yakujiika chakubula anvwali jindi kwiluka. Chafwiliyi, mamembala amwizanvu datalaña nsañu yakujiika enjili amavulu hachipenji nakwimba jiñoma, kwimba tumina nikuhañana. Hela chakwila chisaka chesekeli kuyikaanisha, ayikañenyi nawa chumichi chaleteli nsonyi kudi anvwali niana kwetu akwaKristu enjili kuchipenji. Kwiluka netu kudikunda nawantu atama kukuluwañesha wulunda wetu naNzambi kukutukwasha kwiluka kutama kwekala mukudibomba mumazanvu amuchidiwu.—1 Kor. 15:33.
Nsona Yahosha Chachiwahi Nawa Choloka
9. Muloñadi chitwatelela kushinshika chikupu yuma yitunakwila yinakundami kukufwa, kudila, niyidika yahachipenji?
9 Hamukanda wa 1 Akorinda 10:21 atuleja nawu: ‘Himukutwesha kwila mudya kumesa yaYehova, mudya nawa kumesa yawademonuku.’ Antu jaNzambi alemesha chikupu iku kusoñamisha. Chumanyi chinateli kumwekana neyi muntu wamuchipompelu yela yidika hela yaaku yawusenji yahachipenji muloña wakumukakeja kudi antaña hela antuñi nindi abula kwikala aYinsahu? Neyi muntu yapesha hela yadikunda nansakililu yacheñi, chumichi chinesekani nakwikala mukwakusekesha nawa akuzatilahu kulonda chipompelu chitwalekuhu kwikala chitooka.—Kuhit. 18:9-13; Yere. 7:16-19.
10, 11. Chumanyi chikutukwasha kwikala nayitoñojoka yayiwahi kutalisha hakufwa niyidika yahachipenji?
10 Ikalenu naYitoñojoka Yayiwahi Kutalisha haKufwa: Chumanyi chikutukwasha kumona kufwa niyidika yahachipenji yitunahanjekuhu munjila yayiwahi? Twatela kumukeña Yehova chikupu munyichima yetu nawa chumichi chikutuleñela ‘kuhela yuma yatama.’ (Mas. 97:10) Hitwatela kudiñija muyidika yahachipenji yakundama kuyitoñojoka yakwila nawu afu akabishaña antuku. Cheñi nawa, kukeña kutwakeña akwetu kwatela kutuleñela kutondolwela yuma yejima yinateli kutuntwisha akwetu akwaKristu hela kutamisha yinleji yawu yamuchima.—1 Kor. 10:32, 33.
11 Kwiluka chikupu chekalawu afu kukutukwasha kutondolwela yitoñojoka niyilili yawantu ekala mumwidima wakuspiritu. Dichi bayi atuluwañesha kudi antu alombolaña yipenji munjila yakuhameka nikulemesha afu hela ‘yakudisamba kwamukunkulwayi’ nachifulu chikwetuwu nimahetaku. Bayi twiteja yipenji yiluwañeshi nyidimu yetu yalema yateokalatikuku. Nawa bayi tushaku maana chikupu chakwila tuhila nikuhila neyi muntu nafuukuluhu kubula kuya kuchipenji hela kubula kututonda kutala nsañu yikwawu yahachipenjuku. AkwaKristu alala atoñojokaña nikwila yuma munjila yambukaku muloña eluka nsañu yalala yamuBayibolu. (Efwes. 5:8) Twadilaña nikujiika antu itwakeña munjila yakalemesha nawa yatelela, yesekana nansañu yalala yamuBayibolu nawa yamwekeshaña nawu tweluka yuma yakuspiritu.—1 Tesa. 4:13; 5:5, 8, 11.
12. Neyi tutondahu ‘kumwovwahila Nzambi neyi nyuuli’ yumanyi yikumwekana?
12 Bayi Muchiina Antuku: Hitwakeñaña kutuntwisha antuku. Neyi chochatiyileñawu kutama antu abulili kwiluka nsañu yalala yakuSpiritu nanyidimu yayiwahi yaYesu, anetu neyi tukolela kukudifukula kwakala antu akutiyaña kutama. (Yow. 6:60, 66) Chitwakaana kulondela yaaku yawusenji yahachipenji anateli kutuhoshola, kututukola, kutukabisha nikutuhela kudi antu abula kwikala aYinsahu. (1 Pet. 4:4) A Yinsahu jaYehova amakwawu ayikaaninaña kuswana maheta, kubula kuyikwasha nikuyuumba muloña wakukolela kuyuma yaloña. (Yow. 15:19) Amakwawu ayijinokaña nikuyitwambila nawu hiyadikundaña nawakwawuku nawa nawu hiyalemeshaña afuku. Hela chakwila tunateli kutiya kutama kutukabisha muniyi njila, tweluka netu anateli kutuyandisha muloña twambukaku nawantu amukaayi. (2 Tim. 3:12) Dichi, chatela tuchiineña antu, twatela kwikala nawoma wawuwahi wakuchiina kumuhilisha Yehova Nzambi.—Yish. 29:25; Yil. 5:29.
13, 14. Indi Satana nateli kutulawula ñahi kutalisha hayidika yahachipenji?
13 Atela Kumona Chaambu: Antu amakwawu atwinkaña nyiloña kuhitila mukuhosha nawu, “A Yinsahu jaYehova eluka wanyi chakujika afu.” Komana awa mazu atuneñeshaña? Komana mpinji yikwawu twakeñaña kuleja antu kulonda eluki nawu chalala tweluka kujiika antu itwakeña? Twatela kwanuka netu chelili Satana yamushinjili Yesu kulonda yadimwekeshi nindi hiMwana kaNzambi kuhitila mukudinatila hamaseki kufuma hewulu dambañu yatembeli, Yesu hetejeluku. Hetejeli kwila chuma chatama kulonda yazañaleshi antu amakwawuku. (Mat. 4:5-7) Anetu twatela kukaana kweseka kwakufwila kwimbujola chaloñeshañawu antu abula kwikala aYinsahu yipenji kulonda tuyileji antu netu tweluka kujiika afu. Chumichi chinateli kumwekana ñahi?
14 Chinsahu chaYehova hatela kudiñija muchidika chawusenji chahachipenjuku. Ilaña neyi kubabala neyi, tukutachika kutoñojoka munjila yatama neyi chatoñojokeleñawu antu jaNzambi kushankulu. Tunateli kwanuka netu aIsarela atuñili mwana kañombi wawuru nakutachika kudifukulaku nawa ateneni chidika chenichi nawu “chawija chaYehova.” (Kwid. 32:5) Adidimbileña nakutoñojoka nawu Nzambi wukwiteja neyi abomba kudifukula kwalala nakwakutwamba. Atoñojokeli mwaluwa chikupu! Yehova wahilili chikupu muloña adikundili nansakililu yacheñi, nawa aIsarela akushika ku 3,000 afwili.—Kwid. 32:28.
15. Tunateli kumulemesha ñahi Yehova nikukwasha amakwawu kwiluka kudifukula kwalala?
15 Antu jaNzambi bayi eseka kumona yidika yachisemwa yawusenji chidi neyi kuchiisha hachipenji niyidika yikwawu yatama nawu yayiwahi, kuhitila mukufumishahu yuma yikwawu yawusenji yakundama kukudifukula kwakutwamba nakuhiñishahu yuma yamwekanaña neyi yekala mukudifukula kwalalaku. Hela chakwila yumiyi yinateli ‘kuzañalesha’ antu abula kwikala aYinsahu, awa antu akutoñojoka cheñi nawu aYinsahu jaYehova niwena akweti njila yacheñi yakwililamu iyi yidika yawusenji. (Ŋal. 6:12; Kuhit. 12:30) Ilaña tweluka chikupu netu itu tushidikilu twamuneñeshaña Nzambi, twawusenji nawa hitwekala mukudifukula kwalalaku. (1 Kor. 10:20) Neyi tutwalekahu kwikala naniyi yitoñojoka, antu akwikala nakukooleka ‘kwakumona chaambu chekela hadi aloña niatama, niamukalakelaña Nzambi, niabulaña kumukalakela.’—Mal. 3:18.
16. Kudihi kwafumaña nsañu yalala yatukundejaña?
16 Kufwa keña akwifumishuhu. Neyi Yehova nasañuli dehi afu, hitwamba kadilaña, kuneña hela kutiya chikela kumuchimaku. (Chim. 21:4) Hakwila tukamoni antu itwakeña afwa dehi twatela kutwalekahu kwikala ashinshika. Chitunakuchiñeja iyi yikaninu yayiwahi, tutwalekenuhu kwikala akadi ihuji kudi Yehova chakubula hakutwinkela muloña, ambukaku chikupu kunaka kaayi katama nitushindikilu twamuneñeshaña Nzambi.—2 Pet. 3:14.