Njila Jitanu Jakuwaninamu Kadizi waBayibolu
1. Neyi chatukalilaña kuwana kadizi waBayibolu mwiluña detu, chumanyi chitwatela kwila nawa muloñadi?
1 Komana chayikalilaña kuwana muntu wakudizisha Bayibolu? Twalekenuhu kukeñakeña. Yehova wakiswilaña antu atwalekañahu kwila mwaya muchima windi. (Ŋal. 6:9) Iji njila jitanu jinalondeluhu jinateli kuyikwasha.
2. Tunateli ñahi kutachika kudiza Bayibolu nawantu kuhitila mukuyihula?
2 Yihulenu Antu Neyi Anakukeña Kudiza Bayibolu: Antu amavulu eluka nawu twahanaña Kaposhi Kakutalila niAwake!, ilaña aluka wanyi nawu twadizishaña antu Bayibolu. Kwila mweseka kuyihula antu neyi anakukeña kudiza Bayibolu hampinji yimunakushimwina kwitala nikwitala nehi? Munateli cheñi kwihula antu adi nampwila imwafuntilañaku neyi akukeña kudiza Bayibolu. Neyi akaana, mwatela kutwalekahu kuyitwalila nyikanda kulonda muyisañumuni mpwila. Mana kwetu wumu wayileña kudi antu adisumbula hadi yaaka yayivulu nakuyitwalila magazini. Ifuku dimu chatwaliliyi magazini amaha, wafukwiluhu kuyihula nindi: “Munakukeña kudiza Bayibolu?” Wahayamini chiyakwiluwu nawu eña. Chayinu mpinji apapatishewa.
3. Komana twatela kutoñojoka netu antu ejima enzaña kukupompa adizaña Bayibolu? Lumbululenu.
3 Antu Enzaña naKupompa: Bayi mutoñojoka nenu antu akweti mpwila enzaña nakupompa akweti wayidizishaña Bayiboluku. Mana kwetu wumu washimwini nindi: “Atudizi amavulu inekalaña nawu natachikaña kudiza nawu kuhitila mukwihula antu enzaña nakupompa.” Muhela wumu wafukwiluhu kwihula mumbanda wukweti nsonyi wadiña nanyana yawambanda yapapatishewa muchipompelu. Mumbanda yeniwu wenjileña kukupompa kwakwihi nayaaka 15 nawa mpinji yejima wenjileña Kwitala daWanta henohu kupompa hikukutachika nawa wayileña chiyamanishawu tuhu kupompa. Iwu mumbanda wetejeli kudiza Bayibolu nkumininaku wekalili muchalala. Muhela wasonekeli nindi: “Natiyaña kutama hakumwihula neyi wunakukeña kudiza Bayibolu henohu munahiti dehi yaaka 15.”
4. Tunateli kuwaha ñahi kadizi kuhitila mukwihula?
4 Kwihula: Muhela wumu wafwilaña kutwalaku akwawu kudi atudizi awu aBayibolu. Neyi anamanishi dehi kudiza, watambulaña lusesa kudi mukwawu mukwakushimwina kulonda yamwihuli kadizi windi neyi welukahu muntu mukwawu wunateli kudiza Bayibolu. Neyi munakuhana mukanda waChatañishaña Bayibolu kudi muntu imwafuntilañaku, munateli kumwihula nenu: “Mwelukahu muntu mukwawu wunateli kutambula iwu mukanda?” Mpinji yikwawu kwekalaña yuma yinateli kukañesha akwakushimwina hela apayiniya kudizisha muntu mwiluña dakushimwina. Dichi lejenu amakwawu kulonda eluki nawu munakukeña kulombola kadizi waBayibolu.
5. Muloñadi wutwatelela kwihula muntu wasumbula hela wasumbuka namuntu wabula kwitiya wamuchipompelu neyi mwinikwawu wukukeña kudiza?
5 Asumbula Hela Asumbuka naMuntu Wabula Kwitiya: Kuduhu akwakushimwina muchipompelu chenu asumbula hela asumbuka namuntu wabula kwitiya? Antu amakwawu abula kwitiya achiinaña kuhanjeka namwinikwawu mukwaKristu hansañu yamuBayibolu ilaña anateli kwiteja kudiza namuntu wacheñi wabula kwikala muchisaka. Chachiwahi kusambila kwihula iyala hela mumbanda wetiya henohu kanda mwihuli mwinikwawu wabula kwitiya kulonda mwiluki njila yayiwahi yimwatela kuzatisha.
6. Indi kulomba kwekala kwalema ñahi neyi munakukeña kwikala nakadizi?
6 Kulomba: Bayi mudiwula wukwashu wafumaña mukulombaku. (Yak. 5:16) Yehova wakana nindi wukwakula kulomba kwetu neyi kwesekana namwaya muchima windi. (1 Yow. 5:14) Mana kwetu wumu wadiñi nanyidimu yayivulu watachikili kulomba kulonda yawani kadizi waBayibolu. Ñodindi wajinokeleña neyi chakwila wukwikalaña nampinji yakumudizisha kadizi, sweje-e neyi kadizi wudi nakukala kwakuvulu. Dichi wamulejelumu Yehova kukala kweniku hampinji yamulombeleleñaku nfumwindi kulonda yawani kadizi. Kulomba kwawu akwakwili, chimwahitili nyilungu yiyedi payiniya wamuchipompelu wawanini muntu wakeñeleña kudiza, nawa wamwilili ona manakwetu kulonda yamudizisheña. Ñodindi wasonekeli nindi: “Neyi kudi antu anakutoñojoka nawu chikuyikalila kulombola kadizi waBayibolu, nukuyileja nami: Shimunenu chikupu chuma chimunakukeña mukulomba kwenu nawa bayi muleka kulombaku. Twazañaleli hama kubadika chinatoñojokeleña.” Neyi mutwalekahu munateli kuwana muntu wakudizisha Bayibolu nawa mukuzañalala hakukwasha muntu kwikala ‘munjila yaya kuwumi.’—Mat. 7:13, 14.