Chakuhetela Mwizanvu Denu daMudimu Wamwiha
1. Yumanyi yayiwahi yaKudiza kwaMukanda haChipompelu yitunateli kuhetela mwizanvu detu damudimu wamwiha?
1 Komana mwatoñaña yuma yikwawu yaKudiza kwaMukanda haChipompelu? Mazanvu adiñi anyanya nawa twadiña nakushakama chiwahi. Chumichi chatukwashileña kukwata amabwambu atukolesheleña kuspiritu. (Yish. 18:24) Nkoñi wakudiza kwamukanda welukileña kukala kwetu nawa watukolesheleña hamuntu hamuntu. (Yish. 27:23; 1 Pet. 5: 2, 3) Nikatataka tunateli kuhetela muyuma yeniyi mwizanvu detu damudimu wamwiha.
2. Tunateli kutachikilahu ñahi kukwata amabwambu akutukolesha kuspiritu mwizanvu detu damudimu wamwiha?
2 Tachikilenuhu: Mazanvu amudimu wamwiha ekala anyanya neyi chochadiña mazanvu akudiza kwamukanda. Neyi tuzatilaña ‘hamu’ nawakwetu mumudimu wamwiha, tunateli kwikala nawulunda wakola. (Fwi. 1:27) Antu añahi amwizanvu denu imwazatahu dehi nawu? Komana munateli ‘kuswejesha’ kuzata nawantu amakwawu? (2 Kor. 6:13) Kubombelahu, mpinji yikwawu tunateli kutambika muntu wamwizanvu detu haKudifukula kwetu kwaChisaka kwamelela hela kudiila hamu. Muyipompelu yikwawu, mazanvu amudimu wamwiha adihimpahimpaña hakuloñeshela nhoshi mwenyi yakudya. Mumulungu wawu wakuloñeshela nhoshi mwenyi yakudya, izanvu dapompaña nakudiila hamu nikudikolesha hela chakwila nhoshi hakushakama nakudya nawuku.
3. Kukoolekanyi kwakutukolesha kutukweti mwizanvu detu damudimu wakushimwina?
3 Hela chakwila chipompelu chapompaña kapampa kayedi mumulungu, ichi hichinayi mukwila nawu akwakushimwina hiyakuyihempulaña kakavuluku. Mwizanvu nimwizanvu mwekala akulumpi amazanvu akoleshaña akwakushimwina hamuntu hamuntu nikuyidizisha chakushimwina. Neyi mukulumpi wezanvu denu kanda yayileñahu dehi nindi muzati nindi mumudimu wakushimwina, kwila mumwila nenu mukazati nindi nehi? Kubombelahu, nkoñi wamudimu washimwinaña namazanvu ashiyashana kunsa yamulungu wumu kakweji nikakweji. Muyipompelu mwekala akwakushimwina antesha nawa mwekala mazanvu amumudimu wamwiha antesha hohu, nateli kuyihempula kapampa kayedi hachaaka. Komana mwatanjikaña nyidimu yenu kulonda muyi nakushimwina neyi nendeli izanvu denu?
4. Indi kubulakana kwakuya mumudimu wamwiha akuloñeshaña ñahi? (b) Muloñadi chitwatela kwiteja netu itala detu adizatisheña hakubulakana kwakuya mumudimu wamwiha?
4 Chikusweja kuwaha neyi izanvu niizanvu dihumañanaña nkawadu hakuya mumudimu wamwiha kunsa yamulungu. Kwikala namaluña amavulu akubulakena hampinji yoyimu kukuyipelela akwakushimwina kuya kwiluña dakubulakena nikuya mwiha nimwiluña dakushimwina. Akwakushimwina anateli kudiloñesha swayi-swayi nikutachika kuya mwiluña dakushimwina chakadi kulaba. Chamukwashaña cheñi mukulumpi wezanvu kusha maana kudi antu amwizanvu dindi. Hela chochu, kudi yuma yinateli kuleñela mazanvu ayedi hela kubadikahu kudibomba. Neyi chipompelu chabulakanaña hakuya mumudimu wakushimwina haMposu yatachi mukakweji hela hanyima yaKudiza Kaposhi Kakutalila, kakavulu chawahaña neyi izanvu niizanvu dikala nkawadu kulonda nkoñi wezanvu yekali nakapinji kantesha kakulombola izanvu dindi henohu kuhumañana kwakuya mumudimu kanda kumani nakulomba.—Talenu chikasha chinakwila nawu “Munateli Kwiteja Itala Denu Adizatisheña?”
5. Hela chakwila ntanjikilu yaKudiza kwaMukanda haChipompelu yamana dehi, yumanyi yitunateli kukuhwelela?
5 Hela chakwila ntanjikilu yaKudiza kwaMukanda haChipompelu yamana dehi, Yehova natwalekuhu kutwinka yuma yejima yitwakeñaña kulonda twili mwaya muchima windi. (Heb. 13:20, 21) Hamuloña wakwila Yehova watwakamenaña kwosi chuma chitwabula. (Mas. 23:1) Tukweti nkisu yayivulu kuhitila mumazanvu etu amudimu wamwiha. Neyi tutachikilahu ‘nikukuwa yayivulu tukañula yayivulu.’—2 Kor. 9:6.
[Chikasha chidi hefu 6]
Munateli Kwiteja Itala Denu Adizatisheña?
Yipompelu yikwawu yadibombaña mumazanvu amudimu wamwiha hansa yamulungu muloña wakwila kwosi matala amavulu akubulakena. Kubulakana kwakuya mumudimu wakushimwina nikwena hintanjikilu yachipompelu, dichi neyi matala etu ayizatishaña hakuhumañenamu hikukooleka kwakweni. Munateli kwiteja itala denu adizatisheña? Dichi bayi mushintajala nenu muloña itala denu hidashikila mwokuku. Aeluda akushinshika hekalila itala denu niyuma yikwawu yadifwana nayuma yakeñekeleña hakutonda iluña dakudizila mukanda. Neyi munakukeña nenu itala denu adizatisheña, mulejenu mukulumpi wezanvu denu.