Kuhumañana kwaKuya muMudimu waMwiha
1. Muloñadi chitwashilaña muchima kumudimu wakuya mwiha munjila yatelela?
1 Yesu waheni chakutalilahu chakwakamena mudimu waWanta wakushimwina munjila yatelela nawa yayiwahi. Nikulelu, antu akunjikawu kwakamena iwu mudimu wamukaayi kwonsu wakushimwina Wanta afwilaña kuwuzata neyi chazatiliyi Yesu. Hakufwila kulondela iyi njila, yipompelu mukaayi kejima yazatishaña mpinji yakuhumañana kwakuya mumudimu wamwiha neyi njila yakupompeshelamu akwakushimwina akuya mudimu wamwiha.—Mat. 24:45-47; 25:21; Luka 10:1-7.
2. Yumanyi yatela kumwekana hakuhumañana kwakuya mumudimu wamwiha?
2 Hinjila Yayiwahi: Kuhumañana kwakuya mwiha hinjila yimu yakutukoleshelamu nikutuleja nshimbi jatela kukwasha anakuya mumudimu wamwiha. Anateli kuhanjeka hansona yefuku mukwihihisha nawa neyi yinakuhosha chikupu hakushimwina. Mpinji jikwawu, nsañu yakuhanjekahu yinateli kufuma muMudimu Wetu waWanta, mukanda waUkupelulula, hela mukanda waNonkelenimo kulonda akwashi ejima anenzi akuya nakushimwina odu ifuku. Kwatela kwikala chimwenu chachihi chinakumwekesha chakuhana mukanda wunakuhanawu owu kakweji. Henohu kulomba kwamakumishilu kanda, ejima atela kwiluka muntu wukuzatawu nindi mwiha nikwakuya nakushimwina. Neyi iku kuhumañana kwajiminiti 15 kunamani dehi, akwakushimwina ejima atela kuya mwiha.
3. Anyi akweti mudimu wakutanjika kuhumañana kwakuya mumudimu wamwiha?
3 Adiloñesha Ñahi? Nkoñi wamudimu, wunakulombola, wukweti mudimu wakutanjika kuhumañana kwakuya mumudimu wamwiha. Ankoñi amazanvu, hela ankwashi jawu niwena atela kuzatila hamu namazanvu amudimu wamwiha alombolañawu hamposu nihamulungu. Aeluda niankoñi akuzatila amakwawu atela kuzatila hamu nezanvu dawu mukachi kamulungu. Ankoñi amazanvu azatilaña hamu nankoñi wamudimu kulonda ekali neluña deneni mwakuzatila izanvu dawu kwitala nikwitala kunsa yamulungu. Mukachi kamulungu, nkoñi wamudimu wukutanjika antu akulombola mazanvu hakuya mumudimu wamwiha.
4-6. (a) Indi nkeñelu yakuhumañana kwakuya mumudimu wamwiha yendelaña ñahi hamu neluña dachipompelu dakushimwina? (b) Yumanyi yimwatela kushinshika kulonda mwiluki nkeñelu yakuhumañana kwakuya mumudimu wamwiha?
4 Mwatela Kuhumañena Kudihi Nawa Mpinjinyi? Chatela chipompelu chejima chihumañeni heluña dimu, chikuwaha neyi akuhumañenaña kumaluña amakwawu atelela, sweje-e mumatala awana kwetu, mwiluña dejima dazatilaña chipompelu kulonda chikwashani kuzatila mwiluña dejima. Munateli kuhumañena cheñi muMatala aWanta. Yipompelu yayivulu yahumañenaña muMatala aWanta hakuya mwiha neyi anakumishi dehi mpanji yawantu amavulu niKudiza Kaposhi Kakutalila haMulungu. Mwatela kuzata nañovu kulonda mubuleña kwenda yintampu hakuya kudi iluña denu dakushimwina. Dichi, mwatela kuhituluka muniyi ntanjikilu hampinji hampinji kulonda mumoni chikupu nenu maluña akwetuwu akutwaleka kwikala amawahi kuzatilamu chiwahi nakuyimanisha.
5 Kwesekeja nachidi iluña, munateli kwiluka mpinji yakuhumañana nimapampa imwatela kuhumañana mumulungu wejima. Mwatela kudihula malwihu analondeluhu kulonda mwiluki iluña dadiwahi nimpinji yimwatela kuhumañana hakuya mumudimu wamwiha.
6 Iluña dimu didihi ditwatela kuzatila nankashi? Mpinjinyi yikuwaha kushimwina kwitala nikwitala? Komana mpinji yamelela yatela kuwaha kuya nakushimwina kwitala nikwitala hela kufuntila? Mwatela kulamika ntanjikilu yejima yamudimu wamwiha habodi yansañu muchipompelu. Dichi akwakushimwina ejima atela kwikala namuchima wakushimwina mwiluña dejima dayinkawu kulonda ahoshi neyi chahosheli kapostolu Pawulu nindi: “Hinikweti cheñi nsañu yakukalakala kumutamba wunuku.”—Rom. 15:23.
7. Mudimwinyi wukweti mana kwetu anekuwu mudimu wakulombola izanvu damudimu wakushimwina?
7 Chakulombola Kuhumañana kwaKuya muMudimu waMwiha: Mana kwetu wunenkuwu mudimu wakulombola watela kulemesha ntanjikilu yateokalatiki kuhitila mukuloñesha chiwahi. Kupompa kwatela kutachika nampinji nawa antu chiña ahetelamu, kwatela kwikala kwakwihi, kwajiminiti 10 hela 15. Henohu kanda ahumañani, mukwakulombola watela kwiluka kwakuya nakuzatila. Hela hikwekala kuhembela antu analambi hanyima yakuhumañanaku, chikuwaha neyi mukushiya mazu kulonda analambi eluki kwakuwanawu izanvu. Neyi kuhumañana kunamani dehi, ejima atela kupalañana nakuya kwanayilejuwu kuzatila. Kuhumañana kwakuya mumudimu wamwiha neyi kwenda chiwahi nawa kukwashana, antu ejima anapompi akwiluka nshimbi jakuzatisha mwiha hanodu ifuku.—Yish. 11:14.
8. Munjilanyi antu anenzi kukuhumañana kwakuya mumudimu wakushimwina chatela kwovwahilawu anakulombola?
8 Kubulakana kwaKuya muMudimu waMwiha: Kutiyilila kwekala kwakuwahi. (Heb. 13:17) Neyi chinatwesheki, muntu wunakutala izanvu nateli kukwasha muntu wunakukeña wakuzata nindi. Neyi akwakushimwina akuluka yitembi akwinzaña nakuhumañana kulonda akwasheñaku akwakushimwina amaha hela abula kukuluka yitembi chikuwaha nankashi. Antu ejima anakukeña kuzata namuntu mukwawu, chakamu, anateli kuzata chiwahi nankashi. (Yish. 27:17; Rom. 15:1, 2) Antu ejima atela kudikita kulonda enzeña swayi. Muloña wakulemesha iyi ntanjikilu yateokalatiki nikwakamena ana kwetu niahela akwaKristu muniyi nsañu kukutuleñela kuhimpa.—2 Kor. 6:3, 4; Fwi. 2:4.
9. Njilanyi jalema mwakwashilañawu apayiniya iyi ntanjikilu?
9 Wukwashu wawaPayiniya: Antu atiyaña kuwaha nawa akolelañaku neyi apayiniya enzaña kukuhumañana kwakuya mumudimu wamwiha. Hela chochu, apayiniya akweti nyidimu yayivulu. Kubombela hakudizisha antu Bayibolu nikufuntila, akweti cheñi nyidimu yikwawu yakwakamena chisaka nikuzata nyidimu yakumujimba. Dichi, bayi mukuhwelelaña nenu apayiniya chiña enza kukuhumañana kwakuya mumudimu wamwiha kunaloñeshi chipompeluku, sweje-e neyi anatanjiki nawu akuyaña hefuku hefuku. Ilaña, chinateli kutwesheka neyi apayiniya akwinzaña kukuhumañana kukwawu kwakuya mumudimu mumulungu nimulungu. Mpinji jikwawu, kuhumañana kwakuya mwiha kwatuleñelaña kudizisha antu muchipompelu, nawa antu ahetelañamu chikupu muloña apayiniya eluka yuma yamuBayibolu nawa eluka chekala mudimu wamwiha. Hamuloña wakuzata mpinji yejima mwiha kunayikwashi kwiluka chakushimwina chikupu. Dichi neyi tuzata nawu anetu tukwiluka. Twatela kwimbujola chakutalilahu chawu chachiwahi chakudikita mumudimu nikwinza kukuhumañana kwakuya mumudimu wamwiha. Nawa twazañalala nankashi neyi akulañahu haniku kupompa.
10. Muloñadi akwakushimwina aWanta chatelelawu kukwasha chikupu iyi ntanjikilu?
10 Neyi chichadiñi kudi Yesu niatumbanji twindi, mudimu wetu weneni wakushimwina Wanta wunakuzatika kuhitila mukushimwina kwitala nikwitala. Dichi nkeñelu yakuhumañana kwakuya mumudimu wamwiha yidi yakudikolesha wonsu wetu kulonda tukalakali chiwahi iwu mudimu. Akwakushimwina ansañu yayiwahi ejima atela kukwasha chikupu iyi ntanjikilu yateokalatiki. (Yil. 5:42; 20:20) Wonsu wetu twikalenu namuchima wakuya nakuhumañana kwakuya mumudimu wamwiha. Neyi twila mwenimu, Yehova wukutukiswila nawa tukuzañalesha Nlomboli yetu, Yesu Kristu, chitukushimwinaña nsañu yayiwahi yaWanta waNzambi.—Mat. 25:34-40; 28:19, 20.