Kubulakana Kwakuya Mwiha Kwakwashaña Akwakushimwina Kuzata Chiwahi
1. Kubulakana kwakuya mwiha kwalemenadi?
1 Ifuku dimu, Yesu wabulakeni nawatumbanji twindi 70 henohu kanda ayi mukampeni kakushimwina. (Luka 10:1-11) Wayikolesheli nindi hiyadiña nkawawuku ilaña adiña nakuyilombola kudi ‘Mwanta wakwañula,’ Yehova. Wayinkeli nshimbi yayikwashili kushimwina nawa wayitemesheli ‘ayedi ayedi.’ Nimakonu, kubulakana kwakuya mwiha kwatukoleshaña, nawa kwatukwashaña.
2. Kubulakana kwakuya mwiha kwatela kwikala kwajiminiti jiñahi?
2 Chayinu mpinji, kubulakana kwakuya mwiha kwekalaña kwajiminiti 10 nakushika ku 15, mwabombeleli kudipaña, kushimuna maluña mwakuzatila nikulomba. Ichi anahimpi. Kutachika muApril, kubulakana kwakuya mwiha kukwikalaña kwajiminiti 5 nakushika ku 7. Neyi munafumi nakupompa, kubulakana kwatela kwikala kwajiminiti jantesha muloña anenzi kukubulakana anapompi nehi. Akwakushimwina akuzata mpinji yeneni mwiha neyi mubulakana mukapinji kantesha. Kubombelahu, neyi apayiniya hela akwakushimwina atachika kushimwina henohu kubulakana kanda, atela kuya kukubulakana dinu hiyakufunta mwiha.
3. Mwatela kutanjika ñahi kubulakana kwakuya mwiha kulonda akwakushimwina ahetelumu?
3 Mwatela kutanjika chiwahi kubulakana kwakuya mwiha kulonda akwakushimwina aheteleñamu. Muyipompelu yayivulu chakwashanaña neyi mazanvu amumudimu wamwiha abulakana nkawawu chatela abulakeneña heluña dimu. Chumichi chikuyipelela akwakushimwina kuya kukubulakana kwakuya mwiha nimwiluña dakushimwina. Akwakushimwina atela kwinza swayi nawa ichi chikukwasha mukulumpi wezanvu kusha maana kudi antu amwizanvu dindi. Izanvu dawaeluda datela kwiluka kukala kudi mwizanvu nawa datela kufuukula chakumanisha kukala. Akwakushimwina atela kwiluka iluña nimuntu wakuzata nindi henohu kanda mulombi kulomba kwamakumishilu.
4. Muloñadi chitukubulila kuhosha netu kupompa kwachipompelu kwalema kubadika kubulakana kwakuya mwiha?
4 Kubulakana Kwakuya Mwiha Kwalema Neyi Kupompa kwaChipompelu: Chineli antu anakuya nakushimwina diwu ahetelaña mukubulakana kwakuya mwiha, bayi neyi chipompelu chejima chatela kubulakanaku. Hela chochu, hitwatela kumona netu kupompa kwachipompelu kwalema kubadika kubulakana kwakuya mwihaku. Neyi chochekala kupompa kwetu kwejima, Yehova watuloñeshela kubulakana kwakuya mwiha kwatukwashaña kusañumuna akwetu kukeñañana nakwila nyidimu yayiwahi. (Heb. 10:24, 25) Dichi, mukwakulombola watela kuloñesha chiwahi kulonda muhetelumu nawa mumulemeshi Yehova. Akwakushimwina anakuya mwiha anateli kuya kukubulakana kwakuya mwiha neyi muloñeshaña chiwahi.
Bayi tumonaña netu kupompa kwachipompelu kwabadika kubulakana kwakuya mwihaku
5. (a) Mudimwinyi wukwetiyi nkoñi wamudimu neyi nakuloñesha kubulakana kwakuya mwiha? (b) Indi muhela nateli kulombola ñahi kubulakana kwakuya mwiha?
5 Mukwakulombola Chatela Kuloñeshayi: Hakwila nawu muntu yaloñeshi nikuhana chiwahi mpanji, atela kumwinkela chadimu. Dichimwatela kwila nikubulakana kwakuya mwiha. Neyi mazanvu amudimu abulakana nkawawu akulumpi amazanvu hela ankwashi jawu atela kulombola. Ilaña neyi chipompelu chibulakana hamu nakuya mwiha, nkoñi wamudimu wukutonda muntu wukulombola. Ankoñi anyidimu amakwawu ahanaña ndandanda yakulombola kuya mwiha kudi akwakulombola nikusha kopi yimu habodi. Nkoñi wamudimu watela kuzatisha kashinshi neyi nakutonda akwakulombola, watela kutonda muntu wukweti wuswa wakutañisha nawa weluka kulumbulula kulonda yalomboli iku kubulakana. Neyi odu ifuku eluda, nkoñi wakuzatila hela manakwetu wapapatishewa watela kulombola kwosi, nkoñi wamudimu watela kuleja muhela wapapatishewa nawa washikahu kulonda yalomboli.—Talenu chibaaba chinakwila nawa “Mpinji Yatela Kulombola Muhela.”
6. Muloñadi mukwakulombola chatela kuloñeshayi chiwahi?
6 Neyi atwinka mpanji yamuShikola hela yamuKupompa kwaMudimu, twashañaku muchima nikuyiloñesha chiwahi. Antu antesha hohu diwu ahembelelaña sampu ifuku dakuya nakupompa dinashiki mwaka dinu hiyakuloñesha mpanji yawu. Dichi, twatela kuloñesha chiwahi kubulakana kwakuya mwiha. Chineli kubulakana kwakuya mwiha kukwikalaña kwajiminiti jantesha, twatela kuloñesha chiwahi kulonda yikuma yitiyakani nawa tubuli kumanisha mpinji. Kuloñesha chiwahi kwabombelamu kutambula iluña dakushimwinamu chadimu.
7. Nsañwinyi yatela kuloñeshayi mukwakulombola yakuhanjeka?
7 Yuma Yimwatela Kuhanjeka: Chineli yuma yamwekanaña mumaluña yashiyashana, nduñu wakashinshi waloñesha wanyi maawutilayini akuzatisha hakubulakana kwakuya mwiha. Chikasha chinakwila nawu “Nsañu Yimwatela Kuhanjeka Hakubulakana Kwakuya Mwiha,” chinashimuni nsañu yimwatela kuhanjeka. Kakavulu, kubulakana kwakekalaña kwakuhanjeka. Mpinji yikwawu, kukekala kumwekesha chimwenu hela kutala vidiyo yaha jw.org\lun. Neyi munakuloñesha kubulakana kwakuya mwiha, mukwakulombola watela kuloñesha nsañu yikukolesha nikukwasha akwakushimwina anakuya mwiha.
Neyi mukwakulombola nakuloñesha kubulakana kwakuya mwiha, watela kutoñojoka nsañu yinateli kukolesha nikukwasha anakuya mwiha odu ifuku
8. Yumanyi yayiwahi yitwatela kuhanjeka hakubulakana kwakuya mwiha Hamposu niHamulungu?
8 Chakutalilahu, akwakushimwina amavulu ahanaña Kaposhi Kakutalila niAwake! Hamposu. Akwakushimwina amavulu ashimwinaña Hamposu ayaña wanyi nakushimwina mukachi kamulungu, dichi anateli kuvulamena nsañu yadiziluwu haKudifukula kwaChisaka kwamelela yakuzatisha mwiha. Mukwakulombola watela kuhituluka mujinjila jidi hefu dakukumishaku muMudimu Wetu waWanta. Munateli cheñi kuhosha chimwatela kuhanjika nsañu yinakumwekana mwiluña hela jinjila jidi mumagazini jinakuhosha hamafuku akunooka hela chakwihula lwihu lumukahanjeka hakufuntila neyi enimatala atambula magazini. Neyi kudihu akwakushimwina anenki antu magazini yimunakuhana, mukwakulombola watela kuyila ashimuni mukwihihisha chinakuyihanawu hela yuma yayiwahi yinamoniwu. Hamulungu, mukwakulombola watela kuhosha nsañu yidi munyikanda yakuhana munowu kakweji. Nyikanda yakudizamu yidi neyi, buloshuwa yaNsañu Yayiwahi, Mutiyililenu Nzambi nimukanda waChatañishaña Bayibolu mwatela kuyihana ifu didi dejima, dichi mukwakulombola watela kuhosha chantesha chimwatela kuhana iyi nyikanda.
9. Yumanyi yimwatela kuhanjeka neyi munakuzata mukampeni yadimena kunsa yamulungu?
9 Neyi akwakushimwina anakuzata mukampeni yadimena kunsa yamulungu, mukwakulombola watela kushimuna chakuhana magazini akatataka hamu nachipapilu chakutambika nachu antu hela tilakiti nikushimuna chiyatela kwila neyi muntu namwekeshi mpwila. Njila yikwawu hikuhanjeka hayuma yayiwahi yafumañamu mukampeni.
10, 11. Muloñadi akwakushimwina chiyatela kudiloñesha neyi anakuya kukubulakana kwakuya mwiha?
10 Akwakushimwina Chiyatela Kudiloñesha: Akwakushimwina niwena atela kuhoshahu neyi abulakana nakuya mwiha. Neyi aloñesha chadimu nsañu yakuhosha mwiha, hadaha hakudifukula kwachisaka, atela kuhanjeka iyi nsañu nawakwawu akwakushimwina. Kudiloñesha chiwahi kwabombelamu kutambwila chadimu magazini ninyikanda henohu kanda mubulakani nakuya mwiha kulonda muyi mwiha chakadi kunata mpinji.
11 Mwatela kwinzaña swayi kukubulakana kwakuya mwiha henohu kunashali jiminiti janti nakutachika. Kafwampi, twenzaña swayi kukupompa kwaChipompelu kwejima. Dichi, neyi tulaba kukubulakana kwakuya mwiha tukuluwañesha akwetu. Munjilanyi? Manakwetu wunakulombola wahoshaña nsañu yikutukwasha henohu kanda tuyi mwiha. Neyi kunenzi hohu akwakushimwina antesha, mukwakulombola nateli kuyitemesha kuya nakuzatila mwiluña mwabula kuzatilawu nankashi. Neyi kudi akwakushimwina enza hamaseki nawa iluña dakushimwinamu didi kwakulehi, nateli kuyipaña hamu nawakwakushimwina akweti nyotoka. Neyi munodu iluña mwekala wubanji, nateli kuleja amanakwetu kuzatila hamu nawahela hela kuzatila kwakwihi namanzavu awahela. Akwakushimwina akata atela kuzatila mumukwakwa wabula mabuku hela mudi matala abula kwikala hazanduka. Akwakushimwina amaha atela kuzatila hamu nawakwakushimwina apama. Neyi akwakushimwina amakwawu enza mukulaba, mukupaña cheñi. Hela chochu, mpinji yikwawu twalabilañamu hohu wanyi. Ilaña neyi chaaku chetu chakulaba, twatela kutoñojokahu neyi twalabaña muloña hitwalemesha kubulakana kwakuya mwihaku hela twakañanyaña kuloñesha chadimu.
12. Neyi mwatondaña antu akuzata nawu, chumanyi chimwatela kwila?
12 Akwakushimwina anenzi kukubulakana kwakuya mwiha atela kutonda muntu wakuzata nindi henohu kanda abulakani, hela atela kuyinka muntu wakuzata nindi. Neyi mwatondaña antu akuzata nawu, komana kwila ‘musweja’ kuzata nawakwakushimwina ashiyashana chatela muzateña hohu nawamabwambu jenu nehi? (2 Kor. 6:11-13) Kwila mudikana kuzata namukwakushimwina wamuha kulonda mumukwashi yeluki chakushimwina nehi? (1 Kor. 10:24; 1 Tim. 4:13, 15) Londelenu nshimbi yejima yinayilejiwu, nawa yenu kwiluña danayilejiwu kuzatila. Neyi kubulakana kunamani, bayi muhimpa muntu wunayinkuwu kuzata ninduku nawa yenu mwiluña dakushimwina swayi.
13. Tunateli kuhetelamu ñahi mukubulakana kwakuya mwiha neyi ejima ashaku muchima nawa adiloñesha?
13 Chamanishiluwu atumbanji 70 atemesheliyi Yesu kushimwina, ‘afuntili namuzañalu.’ (Luka 10:17) Chakadi nikujina, chabulakenuwu hamu naYesu henohu kanda ayi nakushimwina chayikwashili kushimwina chiwahi. Makonu, kubulakana kwakuya mwiha kwatukwashaña kushimwina chiwahi. Neyi antu ejima ashaku muchima nawa adiloñesha, kubulakana kwakuya mwiha kukutwikolesha nikutwikwasha kuzata mudimu wetu watwinkawu ‘wakuyilila nyuza yejima wunsahu.’—Mat. 24:14.