Yuma Yimwatela Kwila haKubulakana Kwakuya Mwiha Hakwila Kuyikwasheña

Kubulakana kwakuya mumudimu wamwiha, kudi neyi kupompa kwejima kwahachipompelu, hinjila yatwinkayi Yehova yatukwashaña kudisañumuna wumu namukwawu kumwekesha kukeña nikukoña nyidimu yayiwahi. (Heb 10:24, 25) Kwatela kwikala hohu namaminiti 5 hela 7, munabombeli kuya mumazanvu, kuhana maluña akuzatila nikulomba. (Neyi kudi anakupompa cheñi kwatela kwikala kwakwihi.) Muntu wunakulombola watela kuloñesha nsañu yikukwasha antu anakuya nakushimwina hanodu ifuku. Chakutalilahu, neyi antu amavulu mwizaza ayili nakushimwina wanyi mulungu wunafumihu, chikuwaha neyi mukuhanjeka hohu hayuma yatela kuhoshawu neyi anayi nakushimwina. Nsañwinyi yikwawu yinateli kwikala yayiwahi kuhanjekahu?

• Chakuhanjeka nawantu kufuma muChihandilu niMudimu Wanetu AkwaKristu—Mukanda Wakupompa

• Chakuzatisha nsañu yinakumwekana hela nyijimbu hakutachika kuhanjeka nawantu

• Chimwatela kwila neyi muntu nakukaana kumushimwina

• Chakwakula antu akanaaña nawu hikwekala Nzambiku, akuhwelela nawu yuma yadivumbukilili, muntu wahoshaña idimi dikwawu hela muntu wayaña munsakililu yacheñi yabula kwikala mwiluña denu

• Chakuzatisha yuma yidi ha jw.org webusayiti, ha JW Library^® app, hela Bayibolu

• Chakuzatisha yozelu yekala muChikasha Chetu Chakutañisha

• Chakushimwina munjila jamboka-mboka kuzatisha foni, kusoneka nyikanda, kushimwina kumaluña kwekala antu amavulu, kufuntila hela atudizi aBayibolu

• Kuyanukisha kulonda ekali akiñewa, abula kukalisha, kwikala nayilwilu yayiwahi, yitoñojoka yayiwahi hela yuma yikwawu yadifwanaku

• Kudiza hela vidiyo yamu broshuwa yaShenu Muchima kuKutaña nikuKutañisha

• Chakumukolesha hela chakumukwasha mukwenu imunakushimwina nindi

• Nsona yinakundami kumudimu wakushimwina hela nsañu yakukolesha yayuma yamwekeni mumudimu wakushimwina