Hetelenumu Chikupu muKuhumañana kwaMudimu waMwiha
1. Indi kuhumañana kwamudimu wamwiha kwatela kutukwasha ñahi?
1 Kuhumañana kwakuwahi kwamudimu wamwiha kwakoleshaña chikupu nawa kwatwinkaña kufumba kwakuwahi henohu kanda tuyi mumudimu wakushimwina. Kwatukwashaña kukalakala mumudimu wakushimwina kudi antu amavulu nawakwakushimwina amakwawu kulonda tutweshi kuzata nawantu amakwawu mukudikwasha nikudizisha. (Yish. 27:17; Mukwa. 4:9, 10) Chumanyi chitwatela kwila kulonda tuhetelumu nankashi muniku kuhumañana?
2. Mukwakulombola watela kuhosha hayuma yamuchidinyi?
2 Mukwakulombola: Nsañu yayeni yakuhosha haniku kuhumañana hiyekala yakuloñeshela dekuluku. Dichi, neyi yenu munakulombola mwatela kuloñesha chachiwahi. Bayi mukumina dakufuukulahu kuhosha hansona yefukuku, chiña neyi yinakundami chikupu kumudimu wakushimwina dihu dinu himwatela kuhoshahu hansona yefuku. Toñojokenu hayuma yatela kukwasha ana anakuya nakushimwina hanodu ifuku. Chakutalilahu, munateli kukeña kuhanjeka hela kumwekesha chimwenu. Hadaha munateli kufuukulahu kuhituluka hachikuma chimu chidi mumukanda waUkupelulula, nimukanda waNonkelenimo hela mumpanji yakatataka yamuKupompa kwaMudimu. Mpinji yikwawu munateli kuhosha hachimwatela kuzata nakukala kunateli kumwekana mwiluña denu dakuzatila hela munateli kuhanjeka chimunateli kumwekesha mpwila nichimunateli kutachika kudiza kwaBayibolu, sweje-e neyi akwakushimwina amavulu anakufuntila. Hichikweti muloña nayuma yimunakuhoshahuku, ikalenu neyena nawa akukolesha.
3. Indi kuhumañana kunateli kusenda mpinji yikuma hadihi, nawa yumanyi yimwatela kwila haniyi mpinji?
3 Hela chakwila muneluki nenu amakwawu akulaba, tachikenu kuhumañana mumpinji. Ikalenu nakashinshi kakupompesha izanvu dejima hamu, nawa lejenu ana anakukeña iluña dakuzatila kwakuzatilawu. Kuleha kwampinji yakuhumañana kwejima kwatela kwikala hakachi kajiminiti 10 na 15 hela kufunta mwishina neyi kupompa kwachipompelu dikwasambila. Ejima atela kwiluka muntu wakuzata nindi niiluña dakuzatilawu. Mwatela kukumisha kuhumañana nakulomba.
4. Chumanyi chatela kukwasha ejima kuhetelamu mukuhumañana kwamudimu wamwiha?
4 Munateli Kukwashan: Neyi chochekala kupompa kwachipompelu, twamwekeshaña kalemesha kudi Yehova nikutoñojokelaku amakwawu kuhitila mukushika swayi. Hoshenuhu hampinji yakuhanjeka. Mwatela kwiteja mukwakulombola yoyinki muntu yimukuzata nindi, hela munateli kudikeñela enu aweni muntu yimukuzata nindi henohu kuhumañana kanda. Neyi munakeñi kwikala nantanjikilu yenu enu aweni, fwilenu ‘kwilukilaku amakwawu’ kuhitila mukuzata nawakwakushimwina ashiyashana, bayi kukumina dakuzataña nawalunda nenu mpinji yejimaku. (2 Kor. 6:11-13) Neyi kuhumañana kunamani dehi, bayi kwikala kuhimpa ntanjikiluku, nawa nyakalenu kuya mwiluña dakushimwina.
5. Indi kuhumañana kwamudimu wamwiha kukweti nkeñelwinyi?
5 Nkeñelu yakuwanika kukuhumañana kwamudimu wamwiha yinesekani nayina yakuwanika kukupompa kukwawu kwachipompelu. Akwishaku hakwila tutweshi ‘kuditoñojoka muntu himuntu, kulonda tusañumuni akwetu kukeñañana nakwila nyidimu yayiwahi.’ (Heb. 10:24, 25) Neyi tukufwila kuhetelamu muniku kuhumañana, akutukwasha kukalakala mudimu wetu wakushimwina—owu wunekali himudimu wawuwahi chikupu!