Imbujolenu Atuprofwetu—Amosa
1. Indi chakutalilahu chaAmosa chinateli kutukolesha ñahi?
1 Mwatiyahu dehi nenu himwashikila mwoku kushimwina muloña himwataña chikupuku? Neyi mwatiyahu dehi muniyi njila, chakutalilahu chaAmosa chinateli kuyikolesha. Wadiña kabiña wanyikoku nawa mukwakukalakala hachilaaka chakwañula, ilaña Yehova wamwinkeli ñovu yakushimuna mazu alema. (Amosa 1:1; 7:14, 15) Nimakonu Yehova wazatishaña antu adizoza. (1 Kor. 1:27-29) Yumanyi yikwawu yamumudimu wetu wakushimwina yitunateli kudizila kudi kaprofwetu Amosa?
2. Muloñadi wutwatela kutwalekahu kuumika neyi anakutudimbulula mumudimu wakushimwina?
2 Twalekenuhu Kuumika Neyi Anakuyidimbulula: Chelili Amaziya kapristu wakuwanta wanyitaña ikumi wawaIsarela wakukabeta kaluwunda wadifukwileña kudi mwana kañombi yatiyi chaprofweteleñayi Amosa, munjila yikwawu welili nindi: ‘Yaña kwenu! Tuleki! Tukweti kwitiya kwetu.’ (Amosa 7:12, 13) Hakulomba lusesa kudi Mwanta Yerobowami kulonda yalekeshi mudimu waAmosa, Amaziya walebumwini mazu akaprofwetu. (Amosa 7:7-11) Ilaña Amosa hatiyili womaku. Makonu, akulumpi jayipompelu akeñaña kuyikwasha kudi akapolitiki kulonda ayandisheña antu jaYehova. Hela chochu, Yehova watukana nindi hikwakekala chitwa chakatuchililawu nawu atukatishi nachu chakakolaku.—Isa. 54:17.
3. Yumanyi yiyedi yitwashimwinaña makonu?
3 Shimunenu Wunsompeshi waNzambi niNkisu jaKumbidi: Hela chakwila Amosa waprofweteleña wunsompeshi wakubabesha wanta wanyitaña ikumi wawaIsarela, wamanishili kusoneka mukanda wamuBayibolu wukweti ijina dindi nachikaninu chaYehova chakuyifuntisha cheñi munyikala yawu ninkisu jajivulu jatambwililuwu. (Amosa 9:13-15) Anetu nawa twahoshaña ‘hefuku [daNzambi] dakusompesha’ dinakwinza, nawa iyi diyi ‘nsañu yayiwahi yawanta’ yitwatela kushimwina. (2 Pet. 3:7; Mat. 24:14) Neyi Yehova najilumuni dehi antu atama haAmagedoni, wukaleta paradisa hamaseki.—Mas. 37:34.
4. Tweluka ñahi netu tunateli kuzata mudimu watwinkayi Yehova?
4 Chineli twashimwinaña nsañu yaWanta mukaayi mwekala antu amavulu atudimbululaña, chumichi chaleñelaña kufuukulahu kwetu kwakukakela kukudihana kwetu nikwila mwaya muchima waYehova kwikala mukweseka. (Yow. 15:19) Hela chochu, twakuhwelela chikupu netu Yehova wukutwalekahu kutwinka yuma yakeñekaña hakwila tuzati mudimu windi neyi cheliliyi Amosa.—2 Kor. 3:5.