Chanukishu Chikatuleñela Tukamwekeshi Kusakilila

1. Mpinji yaChanukishu yatwinkaña kukoolekanyi?

¹ Chanukishu chikekalaku haApril 14, chikatuleñela tukekali nakukooleka kwakumwekesha kusakilila hakuwaha kwaYehova. Nsañu yekala haLuka 17:11-18 yashimunaña Yehova niYesu chalemeshawu kusakilila. Chawushona, hadi akwambumba ikumi okiluwu wumu hohu, diyi wasakililili. Kumbidi, chawana chefutu danyiloña chikaleñela akafumishuhu yikatu yejima, nakuleta wumi wahaya nyaka! Chakadi nikujina, twakamusakililaña Yehova mafuku ejima hankisu yikaletayi. Hanu dinu tukamwekesha ñahi kusakilila hanyilungu yidi hambidi?

2. Tunateli kwikala ñahi namuchima wakusakilila hefutu danyiloña?

² Ikalenu Namuchima Wakusakilila: Yuma yitwatoñojokaña diyaleteshaña twikaleña namuchima wakusakilila. Hakwila atukwashi twikali namuchima wakusakilila hefutu danyiloña, analoñeshi ndandanda yakutaña Bayibolu mumpinji yaChanukishu nawa tunateli kuyiwana chidi neyi mukalenda nimukamukanda kaKutalatala muNsona Hefuku Hefuku. Akayisha cheñi ha jw.org henohu Chanukishu kanda chishiki. Komana kwila muhanjeka haniyi nsañu nachisaka chenu nehi? Kwila mwenimu, kukutuleñela tusweji kuhameka hefutu danyiloña. Ichi chikuleñela twikali nayililu yayiwahi.—2 Kor. 5:14, 15; 1 Yow. 4:11.

3. Jinjilanyi mutunateli kumwekeshela muchima wakusakilila muchilaaka chaChanukishu?

³ Mwekeshenuña Muchima Wakusakilila: Twamwekeshaña kusakilila kuhitila munyidimu. (Kol. 3:15) Mukwambumba wadiña namuchima wakusakilila wazatili nañovu hakwila yafunti kudi Yesu nakumusakilila. Chakadi nikujina, watela wazañaleli hama hakulejaku antu amakwawu chamuukiluwu muchihayamisha. (Luka 6:45) Komana kusakilila hefutu danyiloña kukutusañumuna tuzati nañovu mukampeni yakutiyakesha Chanukishu? Njila yayiwahi yakumwekeshalamu kusakilila yidi yakuzata wupayiniya wakukwasha hela kuzata nañovu mumudimu wakushimwina muchilaaka chaChanukishu. Hefuku daChanukishu muchima wakusakilila wakatusañumuna kutambwila enyi nikwakula malwihu ejima akehulañawu.

4. Tukamwekesha ñahi kusakilila hachinu Chanukishu?

⁴ Komana achinu Chanukishu dichakukumishaku? (1 Kor. 11:26) Tuneluki wanyi. Ilaña tweluka netu Chanukishu chichahita, dikwila nawu mpinji yayiwahi yamwekesha kusakilila yinahiti. Komana mukuzatisha iyi mpinji? Dichi mazu amukanwa ketu niyitoñojoka yamumuchima wetu yimutiyisheña Yehova kuwaha, Mukwakuhana ifutu dinyiloña.—Mas. 19:14.