Tuzatenuña Nañovu Kulonda Tumusakilileña Yehova Hayuma Yatwililayi Twakanakana Chanukishu haApril 17
1. Mazwinyi ahosheliyi ñimbi yamasamu atela kutuletesha kusakilila hachilaaka chaChanukishu?
1 Hamuloña waluwi lwaYehova lwasweja ninyidimu yakupulwisha yamuletesheli ñimbi yamasamu kwihula nindi: “Yehova nukumwinkadi nayuma yayiwahi yejima yanañiliyi?” (Mas. 116:12) Makonu, ambuña Nzambi akweti yuma yayivulu yayileteshaña kusakilila. Chimwahitili yaaka yayivulu kufuma hampinji yasonekeluwu awa mazu, Yehova wayinkeli antu chawaana chasweja kubadika, ifutu danyiloña. Hampinji yitunakudiloñesha kwanakana kufwa kwaKristu haApril 17, tukweti yuma yayiwahi yatela kutuleñela kusakilila chikupu.—Kol. 3:15.
2. Yumanyi yatuleñelaña kusakilila ifutu danyiloña?
2 Nkisu Yitwatambwila Hamuloña Wefutu Danyiloña: Hamuloña wefutu danyiloña, ‘atwanakena nyiloña yetu.’ (Kol. 1:13, 14) Chumichi chatukwashaña kudifuukula kudi Yehova nachinleji chamuchima chitooka. (Heb. 9:13, 14) Tunateli kuhosha naJehova chakadi woma kuhitila mukulomba. (Heb. 4:14-16) Antu akuhwelela mwifutu danyiloña akweti chikaninu chawumi wahaya nyaka.—Yow. 3:16.
3. Tunateli kumwekesha ñahi netu twamusakililaña Yehova hefutu danyiloña?
3 Mwekeshenuña Nenu Mwasakililaña: Njila yimu yitwatela kumwekesha netu twasakililaña chikupu hikutaña chibalu chakutaña Bayibolu mumafuku aChanukishu ifuku nifuku nikutoñojokahu chikupu. Ndandanda yakutaña Bayibolu muMpinji yaChanukishu yidi mukamukanda kaKutalatala muNsona Hefuku Hefuku kamu 2011 niKalenda kamu 2011 kutachika haApril 12-18. Tunateli cheñi kumuleja Yehova mukulomba kwakufuma hamuchima netu twalemesha chikupu ifutu danyiloña. (1 Tesa. 5:17, 18) Tunateli kumwekesha kusakilila hakwovwahila lushimbi lwaYesu lwakwanakana Chanukishu neyi tuya kuChanukishu. (1 Kor. 11:24, 25) Kubombelahu, tunateli kumwimbujola Yehova wukweti kukeña kwasweja nikutambika antu amavulu kulonda twakapompi nawu.—Isa. 55:1-3.
4. Chumanyi chitunafuukuluhu kwila?
4 Ambuña Yehova asakililaña hiyanateli kumona kwanakana Chanukishu neyi kupompa kukwawuku. Hikupompa kwasweja kulema kwamuchaaka. Chineli tudi kwakwihi naChanukishu, tutwalekuhu kusakilila neyi ñimbi yamasamu wasonekeli nindi: “Mukiswili Yehova nkisu, eyi muchima wami, bayi wuvulamenaña mwejima mwakwilañayi chachiwahuku.”—Mas. 103:2.