Kuhameka haKwanakana Ifutu daNyiloña
1, 2. Muloñadi chitwatelela kuhameka hakwanakana ifutu danyiloña?
1 Hamuloña wakwovwahila nshimbi yaYesu, eniKristu kunyeñumuka kaayi kejima akapompa Hamposu March 22, 2008 hanyima yakuhuma kwetañwa, nakwanakana kufwa kwaYesu Kristu. (Luka 22:19; 1 Kor. 11:23-26) Twelaña mwenimu hamuloña wakukeña kuhameka chikupu hayuma yejima yashikijeweli hadina ifuku yaaka 1,975 yinahituhu. Hamuloña wakutwalekahu kwikala washinshika nihampinji yamukabishiluwu nakumujahila hamutondu wakuyandishila, Yesu wajilikili ijina daTata yindi, nakuhana ñakwilu yayiwahi kukusawula kwaSatana.—Yoba 1:11; Yish. 27:11.
2 Mashi aYesu apwekeli akolesheli chitiyañenu chachiha, nakuleñela antu abula kumaninina kwikala anyana kaNzambi nakwikala nakuchiñeja kwakuyula hamu naKristu muWanta windi wamwiwulu. (Yere. 31:31-34; Maku 14:24) Kubombelahu, kukeña kwaNzambi kwasweja kwakeñeliyi muchidi wamuntu akwimwekesheli hampinji yahaniniyi Mwanindi wakeñayi hamu neyi mulambu, neyi chalumbulwiliyi Yesu kudi Nikodemu.—Yow. 3:16.
3. Indi antu akawanika kuChanukishu akahetelamu ñahi?
3 Tambikenu Antu Amakwawu: Mudimu Wetu waWanta waJanuary washimwini nawu twatela kusoneka majina awantu yitweluka nikuyitambika. Mwatachika dehi kutambika antu yimwasonekeli? Komana munakudiloñesha kulonda kukalakala chikupu mukampeni yikatachika haMarch 1 kulonda kutambika antu kuChanukishu? Antu akawanikaku akatiya nsañu yamuNsona yinateli kukolesha chikuhwelelu chawu mwifutu danyiloña, dalombolaña kuwumi wahaya nyaka.—Rom. 10:17.
4. Muloñadi chitwatelela kushika swayi hefuku daChanukishu?
4 Ejima akawanikaku atela kufuukulahu kushika swayi kulonda kutambwila owu aketeja iwu mutambikewa wadimena. Chineli awanikaña kuChanukishu kakavulu ekalaña amavulu, chidi chalema kusha kashinshi kudi amaha nikudowu awanikaña kukupompa kamu nakamu.
5. Munateli kudiloñesha ñahi mumuchima hampinji yachawija?
5 Diloñeshenu muMuchima: Mukanda waUkubebeta Amalembo Cila Bushiku—2008 niKalenda ya 2008 yikweti ndandanda yakutaña Bayibolu yaChanukishu kutachika haMarch 17. Kutoñojoka hayuma yamwekeni hamafuku aYesu akukumishaku muwumi windi wahamaseki yikuyikwasha kudiloñesha mumuchima kulonda kwanakana Chanukishu. (Ezera 7:10) Kulomba nikutoñojoka haniyi nsañu yamuBayibolu kukuyileñela kuhameka chikupu hakukeña kwaYehova nikwaMwanindi kwakutuloñeshela ifutu danyiloña.—Mas. 143:5.
6. Chumanyi chitukahetelamu neyi tuzata nañovu kulonda kusweja kuhameka hefutu danyiloña?
6 Chineli Chanukishu hichikuswila kwakwihi, wejima wetu twatela kudiloñesha chikupu nikukwasha amakwawu kulonda adiloñeshi kuwanika kunichi chawija chalema. Kuhameka hakwanakana ifutu danyiloña chikukolesha wubwambu wetu naYehova niMwanindi. (2 Kor. 5:14, 15) Chikutuleñela cheñi kuyimbujola mukudihana kuhitila mukukeña antu.—1 Yow. 4:11.