Shikola Yawakwakushimwina Yamu 2015 Yikutukwasha Kuwahisha Njila Jetu Jakushimwinamu

¹ Ñimbi yamasamu Davidi wasonekeli nindi: “Nimazu amukanwa kami, niyitoñojoka yamumuchima wami yiikali yakukutiyisha kuwaha, eyi Yehova, yeyi ilola dami yeyi nkuuli yami.” (Mas. 19:14) Anetu nawa tunakukeña mazu etu amutiyisheña Yehova kuwaha muloña twalemesha kukooleka kutukweti kwakuhosha chalala muchipompelu nimwiha. Shikola Yawakwakushimwina hinjila yimu mwatudizishilañayi Yehova chakushimwina. Iyi shikola yekalañaku mulungu nimulungu muyipompelu yakubadika ha 111,000 mukaayi kejima. Yinakwashi amanakwetu niahela afuma kuyitachi yashiyashana kwikala akwakushimwina akuluka yitembi ansañu yayiwahi, ashimwinaña nakushinjila, mukubabala nawa chakadi woma.—Yil. 19:8; Kol. 4:6.

² Mundandanda yashikola yamu 2015 mudi nyitu yinafumi muBayibolu, mumukanda waChatañishaña Bayibolu, mubuloshuwa ‘yaKudiza Nsañu Yidi Mwizu daNzambi’ nimuKaposhi Kakutalila. Cheñi, mpinji yakuhaninamu mpanji yayikuma yamaneni yamuBayibolu niMpanji Na. 1 anayihimpi. Maparagilafu analondelihu akutuleja yuma yinahimpiki ninshimbi jitukulondelaña hakuhana mpanji mushikola.

³ Yikuma Yamaneni yamuBayibolu: Amanakwetu akwinkañawu iyi mpanji akweti jiminiti jiyedi jakuhaninamu chikuma chachiwahi chamuNsona kufuma mukutaña Bayibolu kwanowu mulungu. Neyi tuloñesha chiwahi tunateli kuhana chikuma chikukwasha chipompelu chakadi kudya mpinji. Kuhiñahu, chipompelu chikwikalaña najiminiti jitanu nakamu jakuhoshahu mujisekondi 30 nakufunta mwishina hayuma yatiyawu kuwaha mukutaña Bayibolu kwanowu mulungu. Twatela kuloñesha chiwahi nikubabala kulonda tuhoshi chikuma chatelela mujisekondi 30, neyi twila mwenimu tukuhetelañamu. Tukushilaku cheñi akwetu mpinji yakuhosha hayuma yadizawu.

⁴ Mpanji Na. 1: Mpinji yakuhaninamu mpanji yakutaña Bayibolu anayifuntishi hajiminiti jisatu nakufunta mwishina nawa kadizi wukatañaña nsañu yantesha. Atudizi akwinkañawu iyi mpanji atela kuhitulukamu kakavulu nakutañila hewulu nikutena mazu adimu chiwahi chakadi kuhudekela kulonda yikuma yitiyakani. Chineli kutaña chiwahi kwalema nankashi mukudifukula kwetu, antu jaYehova ejima atela kwiluka kutaña chiwahi. Twatiyaña kuwaha muloña anyanetu amavulu atañaña chiwahi. Twatela kuyihameka avwali hakukwasha anyanawu kwikala atañi amawahi.

⁵ Mpanji Na. 2: Iyi mpanji atela kuyihana kudi muhela mujiminiti jitanu. Watela kuhosha hamutu wampanji yinamwinkuwu. Neyi iyi mpanji yinafumi mubuloshuwa yaKudiza Nsañu Yidi Mwizu daNzambi, watela kuyihana neyi wudi mwiha nakushimwina kwesekeja nachimwelaña mwiluña denu. Neyi iyi mpanji yinashindameni hadi muntu washimunawu muBayibolu wudi muKaposhi Kakutalila, kadizi watela kusandujola nsañu yinakundami hadi owu muntu ashimunawu muBayibolu, watela kusakula nsona jatelela jatela kutañayi nikuhosha hayuma yitwatela kudizila kudi owu muntu anashimunuwu muBayibolu. Munateli kutaña nsona jikwawu jinakuhosha hanshimbi jamuBayibolu jinakundami kunowu mutu. Nkoñi washikola watela kumwinka muntu wakumukwasha.

⁶ Mpanji Na. 3: Iyi mpanji atela kuyihana kudi manakwetu hela muhela mujiminiti jitanu. Neyi muhela diyi anenkiwu iyi mpanji, watela kuyihana neyi Mpanji Na. 2. Neyi manakwetu diyi anenkiwu iyi mpanji yinafumi muKaposhi Kakutalila, watela kuyihana neyi chahanañawu mpanji kwiizaza Mwitala daWanta. Kadizi watela kuhosha hamutu wampanji yinamwinkuwu, watela kusakula nsona jatelela jatela kutañayi nikuhosha hayuma yitwatela kudizila kudi owu muntu anashimunuwu muBayibolu.

⁷ Njila Yayiha Yakuhaninamu Mpanji Na. 3 yawaManakwetu: Neyi manakwetu anamwinki mpanji yinafumi mubuloshuwa yaKudiza Nsañu Yidi Mwizu daNzambi, watela kuyihana neyi nakulombola kudifukula kwachisaka hela kwakuya mwiha. Nkoñi washikola wakamwinkaña kadizi muntu wakumukwashaku nichakuyihosha. Nkwashi yindi watela kwikala ntaña yindi hela manakwetu wamuchipompelu. Munateli kutaña nsona jikwawu jinakuhosha hanshimbi jamuBayibolu jinakundami kunowu mutu. Iyi mpanji akayinkaña aeluda neyi munahiti mpinji. Aeluda atela kuditondela muntu wakuyikwashaku nichakuyihosha. Chakubula nikujina, chipompelu chikahetelamu hakumona aeluda chinakutañishawu chiwahi ntaña yawu hela manakwetu mukwawu.

⁸ Kufumba: Nkoñi washikola watela kuzatisha jiminiti jiyedi neyi kadizi nahani dehi mpanji kulonda yamuhameki nikumukolesha kufuma mumukanda waNonkelenimo mu Masambililo ya Isukulu lya Butumikishi Ilya Bulesa. Neyi nkoñi washikola nashimuni mpanji yikuhanayi kadizi mushikola, hatela kushimuna chikuma hakumufumbilayi kadizuku. Neyi kadizi nahani dehi mpanji, nkoñi watela kumuhameka nankashi, shimunenu kufumba hanakuzatilayi nawa shimunenu chuma chinaleñeli kadizi yahoshi chiwahi hela lumbululenu chikuhetelamu kadizi neyi yazatila hakufumba.

⁹ Fomu yakufumbilahu kadizi yidi hefu 79 kushika ku 81 mumukanda windi waNonkelenimo. Neyi kadizi nahani dehi mpanji, nkoñi washikola wukusoneka mumukanda chinazatiyi nawa watela kumwihula kadizi kumbadi neyi wazata kweseka kudi hakufumba hanakuzatilayi. Mwatela kumuhameka kadizi hela kumuleja nsañu yikwawu yikumukwasha hanyima yakupompa hela mpinji yikwawu. Kadizi watela kumona kufumba kwejima kukutambwilayi mushikola nindi kukumukwasha kupama kuspiritu.—1 Tim. 4:15.

¹⁰ Neyi kadizi nadyi mpinji, nkoñi washikola hela nkwashi yindi watela kuvumisha ngezu hela chuma mukubabala chikumwekesha nawu mpinji yinamani. Neyi ngezu yinavumi, kadizi watela kumanisha mukuku wamazu wunakuhoshayi nakufuma hachinañamu.—Talenu mukanda waNonkelenimo, ifu 282, para. 4.

¹¹ Ejima anawanishi yuma yakeñekaña atela kusonekesha muShikola Yawakwakushimwina. (Talenu mukanda waNonkelenimo, ifu 282, para. 6.) Kufumba kutwatambwilaña muniyi shikola kwakwashaña antu jaYehova kushimwina nikudizisha antu nsañu yayiwahi yaWanta chakufuma hamuchima, nakalemesha nikukeña. Yehova watiyaña kuwaha chamuhamekañawu kudi antu ejima ahetelaña mushikola yawakwakushimwina.—Mas. 148:12, 13; Isa. 50:4.