Twalekenuhu Kuyilaku Hambidi Chineli Mudi Akwakushimwina
1. Yakutalilahwinyi yamumafuku awapostolu yinakumwekesha nawu twatela kuyilaku hambidi chineli tudi akwakushimwina?
1 AkwaKristu atela kuyilaku hambidi chineli hiyakwakushimwina. Dimuloña waweni Yesu wayidizishili atumbanji twindi kulonda awahishi njila jakushimwinamu. (Luka 9:1-5; 10:1-11) Akwila naPirisila niwena amutwalili Apolosi kwitala dawu ‘nakumulumbulwila mwaya njila yaNzambi chakashinshi.’ (Yil. 18:24-26) Pawulu niyena wamukolesheli Timotewu mukwakushimwina wakuluka yitembi kutwalekahu kuzatisha yuma yatañishileñayi kulonda chikuyañayi kumbidi “chimwekanaña kudi antu ejima.” (1 Tim. 4:13-15) Twatela kutwalekahu kuwahisha njila jetu jakushimwinamu hela chakwila tunamukalakeli Mwanta neyi akwakushimwina ansañu yayiwahi hadi yaaka yayivulu.
2. Tunateli kudizila ñahi kudi akwetu?
2 Dizilenu Kudi Akwenu: Njila yimu yakuwahishilamu njila jetu jakushimwinamu hikudizila kudi akwetu. (Yish. 27:17) Dichi, mwenda mushaku maana neyi mukwenu mukwakushimwina nakushimwina. Ilenu akwakushimwina eluka chakuhanjeka nawantu mumudimu wakushimwina kulonda ayileji njila jajiwahi, nawa tiyililenu chinakuhoshawu. (Yish. 1:5) Komana mweluka wanyi chakufuntilaku, chakutachika kudizisha muntu Bayibolu hela kuzatisha njila jikwawu jakushimwinamu? Lejenu mukulumpi wezanvu hela mukwakushimwina wakuluka yitembi kulonda yayidizishi. Anukenu cheñi nenu spiritu yajila yaYehova yinateli kuyikwasha, dichi lombenuña spiritu mpinji yejima.—Luka 11:13.
3. Tunateli kwila ñahi neyi atuleja njila yitwatela kuzatisha hela chakwila hitwalomba wukwashuku?
3 Neyi ayileja njila yimwatela kuzatisha, bayi muhila hela chakwila himwalomba wukwashuku. (Mukwa. 7:9) Kufwana Apolosi, itejenu neyi ayikwasha nakudizoza nawa sakililenu. Neyi mukwiteja, mukumwekesha nawu mukweti maana.—Yish. 12:15.
4. Chishimwinyi chashimwiniyi Yesu chakuyilaku hambidi neyi akwakushimwina?
4 Kuyilaku hambidi Kwamulemeshaña Nzambi: Yesu wakolesheli atumbanji twindi kuyilaku hambidi neyi akwakushimwina kuhitila mukuyileja chishimu. Wadesekejeli yomwenidi kumuvinyu nawa atumbanji twindi wayesekejeli kumutayi. Wahosheli nindi Tata yawantu wawahishaña nyitayi yasoñaña nyikabu “kulonda yisoñi nyikabu yayivulu.” (Yow. 15:2) Chochakeñañayi mwiniitempa davinyu nindi nyitayi yanyivinyu yikali kulonda yisoñeña nankashi, Yehova nakukeña nindi tutwalekuhu kuyilaku hambidi kulonda tusoñeña “nyikabu yakunyivumbu.” (Heb. 13:15) Chumanyi chachiwahi chikafumamu neyi tuyilaku hambidi neyi akwakushimwina? Yesu watwakula nindi: “Chuma chakumulemesha nachu Tata yami, chochakusoña nyikabu yayivulu.”—Yow. 15:8.