Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
OCTOBER 7-13
YUMA YALEMA YAMWIZU DANZAMBI | YAKOBA 3-5
“Mwekeshenu Maana aNzambi”
(Yakoba 3:17) Ilaña maana afumaña mwiwulu, chatachi amawahi, kuhiñahu awunda, hiyakolelaña kumu hohuku, anyakalaña kwovwahila, enzala naluwi ninyikabu yayiwahi, hiyakweti chaambu hela wunfwikijiku.
cl 221-222 ¶9-10
“Maana Afumaña Mwiwulu” Azatikaña Muchihandilu Chenu?
“Chatachi amawahi.” Kwikala amawahi hikwatalisha mukwikala hohu atooka hanjiku, ilaña nimukachi kamuchima. Bayibolu yabomba maana hamu namuchima ilaña maana amwiwulu kwila eñila mumuchima wamuntu wekala nayitoñojoka yatama, kufwila kwatama niyilwilu yatama nehi. (Yishimu 2:10; Matewu 15:19, 20) Hela chochu, neyi nyichima yetu yitooka dikwila nawu, neyi muntu wawanina, ‘tukufuma kukutama, tukwilaña chachiwahi.’ (Masamu 37:27; Yishimu 3:7) Chakadi nikujina, kuwaha kunashikilimu kwikala chilwilu chatachi hamaana. Hanu dinu, neyi chakwila tudi atooka kuspiritu wanyi, tunateli kumwekesha ñahi yilwilu yikwawu yamaana afumaña mwiwulu?
“Kuhiñahu awunda.” Maana amwiwulu atukwashaña kufwila kuwunda. Kuwunda, himukabu waNzambi wakuspiritu. (Añalija 5:22) Twazataña nañovu kulonda “tuhembi kunuñañana kwetu” kwanuñañeshaña antu jaYehova. (Aefwesesa 4:3) Twazataña cheñi nañovu kulonda tuleti kuwunda neyi kunaluwankani. Muloñadi? Bayibolu yahosha nawu: “Twalekenuhu . . . kushakama mukuwunda; Nzambi wakukeña nawa wakuwunda wukwikalaña nanenu.” (2 Akorinda 13:11) Dichi neyi tutwalekahu kushakama mukuwunda, Nzambi wakuwunda wukwikalaña nanetu. Chitwayilaña akwetu akwakwitiya chakoleshaña wubwambu wetu naYehova. Tunateli kwikala ñahi akwakuleta kuwunda? Shinshikenu hanichi chakutalilahu.
(Yakoba 3:17) Ilaña maana afumaña mwiwulu, chatachi amawahi, kuhiñahu awunda, hiyakolelaña kumu hohuku, anyakalaña kwovwahila, enzala naluwi ninyikabu yayiwahi, hiyakweti chaambu hela wunfwikijiku.
cl 223-224 ¶12
“Maana Afumaña Mwiwulu” Azatikaña Muchihandilu Chenu?
“Hiyakolelaña kumu hohuku.” Kubula kukolela kumu kwatalisha mudihi? Kwesekeja nawantu adiza izu dadeni dachiGiriki diyazatishawu haYakoba 3:17 nawu “hiyakolelaña kumu hohuku,” dakala kudibalumuna. Akwakubalumuna abalumuna idi izu nawu “kwovwaha,” “kuwunda,” ‘nikutoñojokelaku.’ Tumazu twaheshina twamu New World Translation twamwekeshaña nawu “hikudihana.” Tunateli kumwekesha ñahi netu awa maana afuma mwiwulu tudi nawu?
cl 224-225 ¶14-15
“Maana Afumaña Mwiwulu” Azatikaña Muchihandilu Chenu?
“Anyakalaña kwovwahila.” Izu dachiGiriki dabalumunawu nawu “anyakalaña kwovwahila” kwosi hekwawu muNsona jawakwaKristu jachiGiriki hidekalaku. Kwesekeja namuntu wumu wadiza wahosheli nindi idi izu “adizatishaña kudi amashidika neyi anakubabesha.” Datalisha “mukushinjila muntu swayi nikwovwahila.” Muntu alombolañawu namaana afumaña mwiwulu wanyakalaña kwovwahila yuma yahoshaña Nsona. Hakasaña yitoñojoka yindi nakukaana yuma yinambuki nachinakutoñojokayiku. Ilaña, washikenaña kuhimpa yitoñojoka yindi neyi amuleja kwesekeja naNsona nawu naluwañeshi hela nakunkululi mwaluwa. Komana ninenu dichayilukawu?
“Enzala naLuwi niNyikabu Yayiwahi”
“Enzala naluwi ninyikabu yayiwahi.” Luwi himaana afumaña mwiwulu, muloña awa maana ayitena nawu “enzala naluwi.” Mwatela kwiluka nenu “luwi” “ninyikabu yayiwahi” ayitenena hamu. Chumichi chinateleli, muloña muBayibolu, luwi lwatalisha kukwakamena antu amakwawu, niwushona watwileñelaña kukwasha akwetu. Mukanda wumu walumbulula izu daluwi nawu “hichineñi chatiyilañayi muntu mukwawu wudi mukukala nikufwila kumukwasha.” Hela chochu, maana afumaña kudi Nzambi hiyachinchika, kukola muchima, hela maana hohuku. Ilaña amawahi, amwovu, nawa akamenaña. Tunateli kumwekesha ñahi netu tukweti luwi?
(Yakoba 3:17) Ilaña maana afumaña mwiwulu, chatachi amawahi, kuhiñahu awunda, hiyakolelaña kumu hohuku, anyakalaña kwovwahila, enzala naluwi ninyikabu yayiwahi, hiyakweti chaambu hela wunfwikijiku.
cl 226-227 ¶18-19
Komana “Maana Afumaña Mwiwulu” Anakuzatika Muchihandilu Chenu?
“Hiyakweti chaambuku.” Maana aNzambi hiyakweti chaambu chekowa nikudisamba netuñaku. Neyi atulombolaña namaana amuchidiwu, tukufumisha chaambu munyichima yetu. (Yakoba 2:9) Hitwakoñelaña antu kakawahi muloña washikola yatañawu, mali akwetiwu hela kukooleka kukwetiwu muchipompeluku nawa hitwadiwulaña akwetu akwakwitiya muloña wammwekenu yawuku. Neyi Yehova wayikeña chikupu awa antu, ninetu twatela kuyikeña nikuyimona netu alema.
“Hela wunfwikijiku.” Izu dachiGiriki dakwila nawu “Wunfwikiji” dinateli kutalisha kudi “nhemi wahemaña chisela.” Kunyima, akwakuhema yisela aGiriki niaRoma avwalileña makishi neyi anakuhema. Dichi, izu dachiGiriki ‘dawunfwikiji’ adizatishileña kudi muntu wunakutwamba. Ichi chilwilu chamaana aNzambi chatela kumwekena muyuma yitwayilaña akwetu nichitwatiyaña hadi wena.
Kukeña Yuma Yalema yakuSpiritu
(Yakoba 4:5) Hela, komana munakutoñojoka nenu nsona yahosha chamukunkulwayi nawu: “Spiritu yalwisu yashakamaña mudi etu yafwilaña yuma yashiyashana” tahindi?”
Yikuma Yamaneni Kufuma muMukanda waYakoba niPetulu
4:5—Nsonanyi Yazatishiliyi Yakoba Haniyi vasi? Yakoba hazatishili vasi yidi yejimaku. Hela chochu, awa mazu onenawu kudi Nzambi atela ashindamena hohu hayikuma yidi neyi yekala haniji nsona Kutachika 6:5; 8:21; Yishimu 21:10; ni Añalija 5:17.
(Yakoba 4:11, 12) Dichi enu anakwami, lekenu kudihosha chatama wumu namukwawu. Muntu wejima wukumuhosha manakwindi chatama hela wukumusompesha manakwindi, dikwila nawu nakuhosha nshimbi chatama nawa nakusompesha nshimbi. Dichi neyi wusompesha nshimbi, dikwila nawu hiwudi mukwakwila mwaya nshimbiku, ilaña wudi nsompeshi. 12 Kwekala hohu Mukwakuhana Nshimbi wumu niNsompeshi wumu, diyi wunatweshi kwamwina nikujilumuna. Ilaña eyi yeyinyi mwaka wusompeshi mukwenu?
w97 11/15 20-21 ¶8
Chikuhwelelu Chatukwashaña Kwikala Adiwunjika niKulombelahu
Hinshidi kuhosha chatama hadi mukwetu mukwakwitiya. (Yakoba 4:11, 12) Hela chochu amakwawu akalisha hadi akwawu akwaKristu hadaha hamuloña wakudimona nawu aloña hela afwilaña kuditohesha nakumona akwawu nawu amukunkulwayi. (Masamu 50:20; Yishimu 3:29) Izu dachiGiriki dazatishawu nawu ‘kuhosha chatama’ datalisha mukuhelañana nikuhosha nakulebumuna hela kumutwambila muntu. Chumichi chaleñelaña kumusompesha manakwetu chatama. Chumichi chinatalishi ñahi ‘mukuhosha chatama nikusompesha nshimbi jaNzambi’? Ansoneki niaFwarisi, ‘adiwileña nshimbi jaNzambi’ nawa asompesheleña akwawu kwesekeja nachakeñeleñawu. (Maku 7:1-13) Munjila yoyimu, neyi tuhisha manakwetu namuloña wukubula kumuhishawu kudi Yehova, dikwila nawu tunakusompesha nshimbi jaNzambi nawa tunakuvulumuna nakwila netu nshimbi jindi jamukunkulu? Neyi tuhoshaña chatama hadi manakwetu hakadi muloña, dikwila nawu tunakushikija wanyi lushimbi lwakukeña.—Aroma 13:8-10.
Kutaña Bayibolu
(Yakoba 3:1-18) Enu anakwami, amavulu hakachi kenu hiyatela kwikala antañishiku, nanochu chimuneluki nenu akatusompesha chikupu kubadika antu amakwawu. 2 Muloña wejima wetu twahukanaña kakavulu. 3 Neyi kudi muntu wabulaña kuhukana mumazu, dikwila nawu himuntu wawanina, nawa natweshi nikuyuula mujimba windi wejima. Neyi tusha nyibulu kutunwa twawatuwalu netu atwovwahileña, twateñululaña ninyijimba yawu yejima. 4 Toñojokenu cheñi hadi jimbopolu: Hela chakwila jamaneni nankashi nawa ajikumpulaña kudi mpepela yasweja, ajiteñululaña nachilapu chanyanya chikupu nakuya kwejima kunakukeña kuyayi mukwakuteñulula. 5 Munjila yoyimu, idimi hichidi chamujimba chanyanya, hela chochu, dadivwimbaña nankashi. Toñojokenu kesi kantesha chikwochaña mpata yeneni chikupu! 6 Idimi nidena hikesi. Hakachi kayiidi yetu yamujimba, idimi demenañaku yuma yabula kuloña yejima, muloña datamishaña mujimba wejima nikwocha chihandilu chamuntu chejima, nawa idimi nidena adochaña nakesi kamuGehena. 7 Muloña nyichidi yejima yawanyama amwisaña, atuda, yuma yazalalaña niyuma yamutuluñalwiji ayifwomonaña, nawa ayifwomonahu dehi kudi antu. 8 Ilaña kwosi muntu wunateli kufwomona idimiku. Dakala kudolola, datama nawa denzala wulembi wajahanaña. 9 Idimi dodimu, twamuhamekaña nachu Yehova Tata, nawa idimi dodimu twashiñaña nachu antu aleñawu “muchifwanisha chaNzambi.” 10 Mukanwa kokamu mwafumaña nkisu nikushiñana. Enu anakwami, yumiyi hiyatela kwikalaña chochichiku. 11 Komana kaseloki kokamu kanateli kuseluka menji amawahi nialula? 12 Enu anakwami, komana mutondu wachikuyu wukutwesha kusoña maolivi, hela mutondu wamuvinyu wukutwesha kusoña nyikuyu? Hela tuhu menji amuñwa hiyanatweshi kufumisha menji amawahiku. 13 Komana hakachi kenu, hadihu muntu wukweti maana nikwiluka? Muntu wamuchidiwu yekali nayilwilu yayiwahi yamwekeshaña nawu welaña yuma yejima namuchima wawovu wenzaña hamuloña wakwikala namaana. 14 Ilaña neyi mudi nechima datama niyikonkojola munyichima yenu, bayi mudisambaña nikutwambila chalalaku. 15 Awa bayi neyi himaana afumaña mwiwuluku; ilaña himaana ahamaseki, awunyama nawa awundemoni. 16Muloña kwejima kudi ichima niyikonkojola, kwenoku kwekalaña nikuluwañeshewa niyuma yawuzondu yejima. 17 Ilaña maana afumaña mwiwulu, chatachi amawahi, kuhiñahu awunda, hiyakolelaña kumu hohuku, anyakalaña kwovwahila, enzala naluwi ninyikabu yayiwahi, hiyakweti chaambu hela wunfwikijiku. 18 Kubombelahu, antu aletaña kuwunda, atumbaña mumpinji yakuwunda nawa añulaña nyikabu yakuloña.
OCTOBER 14-20
YUMA YALEMA YAMWIZU DANZAMBI | 1 PETULU 1-2
“Mwatela Kwikala Ajila”
(1 Petulu 1:14, 15) Hakwikala anyana ovwahilaña, lekenu kwiteja kufwila kumwadiña naku kunyima kumwafwilileña mukubula kwiluka kuyiluwañeshiku, 15 ilaña ikalenu ajila muyilwilu yenu yejima, neyi chekalayi Owu Wajila wayitambikili enu,
Ifutu Danyiloña ‘Chawaana Chabadika Kuwaha’ Kufuma Kudi Tata
Tunateli kumwekesha ñahi netu twajilika ijina daYehova? Kuhitila muyilwilu yetu. Yehova wakeñaña nindi twikali ajila. (Tañenu 1 Petulu 1:15, 16.) Dichi twatela kudifuukula kudi Yehova hohu nikumwovwahila namuchima wetu wejima. Hela chakwila anakutukabisha, twatela kulondela yishina ninshimbi yindi yaloña. Neyi twilaña yuma yaloña, tukutoñeka chejeji nakuleta kalemesha hejina daYehova. (Mat. 5:14-16) Chineli twajila, chihandilu chetu chamwekeshaña nawu nshimbi yaYehova yayiwahi nawa netu Satana watwambaña. Wejima wetu twaluwañeshaña, neyi tuluwañesha, twatela kubalumuka mumuchima nakuleka yilwilu yamuneñeshaña Yehova.—Mas. 79:9.
(1 Petulu 1:16) muloña chasonekewa nawu: “Mwatela kwikala ajila, muloña ami najila.”
Chakutonda Yisela
Yehova watulejaña nindi: “Mwatela kwikala ajila, muloña ami najila.” (1 Petulu 1:14-16; 2 Petulu 3:11) Yehova wukwiteja hohu kudifukula kwetu neyi kwikala kwajila hela kwawunyonji. (Kuhituluka 15:21) Neyi twilaña yuma yahelayi Yehova, yidi neyi wuvumbi, wubanji hela kudikunda nawandemoni, kudifukula kwetu kukwikala kwamajilu. (Aroma 6:12-14; 8:13) Cheñi, Yehova nateli kuneña neyi twilaña iyi yuma. Yumiyi yinateli kutamisha kudifukula kwetu kudi Yehova nawa wubwambu wetu naNzambi wunateli kuluwankana.
Kukeña Yuma Yalema yakuSpiritu
(1 Petulu 1:10-12) Muloña waniwu wamwinu, atuprofwetu aprofweteli kutalisha haluwi lwasweja lwadi kuyitiyilawu enu, alukeñakeñeli chikupu nikulusandujola. 11 Atwalekelihu nakukeñakeña kulonda eluki mpinji hela chilaaka chakashikijewa yuma yahosha hadi Kristu yashimwinini chadimu spiritu yajila yadiña mudi wena, iyi spiritu yashimwinini chadimu makabi akamonayi Kristu nikulema kukalondelahu. 12 Nzambi wayikojejeli atuprofwetu kwiluka nawu hiyadiña nakudiprofwetela awenawuku, ilaña adiña nakuprofwetela enu. Nawa ichi, iyi yuma anayisolweliyu enu kuhitila mudi owu ayishimwinini enu nsañu yayiwahi. Elili mwenimu muloña ayikwashili kudi spiritu yajila yafumini mwiwulu. Muyuma yeniyi añelu niwena anakufwila kushinshikamu chikupu.
Yikuma Yamaneni Kufuma muMukanda waYakoba niPetulu
1:10-12. Añelu akeñaña kwiluka nikutiyisha chalala chakunama chakuspiritu chasonekeluwu atuprofwetu aNzambi akushankulu kutalisha hachipompelu chawakwaKristu awayishewa. Hela chochu, iyi yuma yakunama yakuspiritu ayilukili hohu hampinji yatachikiliyi Yehova kuyisolola kuchipompelu. (Aefwesesa 3:10) Twatela kwimbujola chakutalilahu chawañelu nakufwila kusandujola “yuma yaNzambi yayeni yakunama.”—1 Akorinda 2:10.
(1 Petulu 2:25) Muloña enu mwadiña neyi anyikoku apwapukili, ilaña ichi munafunti kudi kabiña nawa kalama wamawumi enu.
it-2 565 ¶3
Kalama
Kalama Wabadika. Ha 1 Petulu 2:25 azatishahu mazu ekala haIsaya 53:6 kutalisha kudi antu adi “neyi anyikoku apwapukili,” nawa Petulu niyena wahosheli nindi: “Ilaña ichi munafunti kudi kabiña nawa kalama wamawumi enu.” Iyi nsañu yatalishaña kudi Yehova Nzambi, chineli antu asonekeleleñayi Petulu hiyapwapukili kufuma kudi Yesu Kristuku, ilaña kuhitila mudi yena ayilombola nakuyitwala kudi Yehova Nzambi Kabiña Muneni wawantu jindi. (Ms 23:1; 80:1; Yer 23:3; Eze 34:12) Yehova wekala cheñi kalama wahempulaña. (Ms 17:3) Izu dakuhempula (Gr., e·pi·sko·peʹ) dinateli cheñi kwendela hamu nezu dawunsompeshi wakufuma kudi yena neyi chamwekeni mumafuku awapostolu kutalisha kuYerusalema, wabulili kwiluka mpinji ‘yakumuhempula’ [Gr., e·pi·sko·pesʹ].” (Luk 19:44) Hela dinateli kuleta yuma yayiwahi kudi antu amulemesheña Nzambi “mwifuku dindi dakweseka.” [Gr., e·pi·sko·pesʹ].”—1Pe 2:12.
Kutaña Bayibolu
(1 Petulu 1:1-16) Ami Petulu, kapostolu kaYesu Kristu, inakuyisonekela enu munakushakama neyi akwakwenda mwambala mukanu kaayi, enu mwapalañena muPontu, muÑalija, muKapadosiya, muAsiya nimuBitiniya, kudi enu atondewa 2 kwesekeja namwaya kwilukila chadimu kwaNzambi Tata, enu ajilikawu naspiritu kulonda mwovwahileña nikwikala akusampwila mashi aYesu Kristu: Luwi lwasweja nikuwunda jiyivulili enu. 3 Kulema kwiikali kudi Nzambi nawa Tata yaMwanta wetu Yesu Kristu, muloña kwesekeja naluwi lwindi lwasweja, watwilishili etu kuvwalika kamuchiyedi 4 kulonda twiikali nakuchiñeja kwatwalekañahu kuhitila mukusañuka kwaYesu Kristu kufuma mudi afu, kulonda twiikali nawuswana wakadi kutoka, wakadi kutamishewa nawa wabulaña kufukuluka. Wuswana weniwu ayihembelawu mwiwulu, 5 enu anakukiñawu nañovu jaNzambi kuhitila muchikuhwelelu chenu kulonda mumoni wamwinu wunaloñeshiwu dehi wakasololawu mumpinji yakukuminina. 6 Muloña wachumichi munakuzañalala chikupu, hela chakwila hakapinji kantesha munaneñi nakweseka kwashiyashana kumunakuhitamu, 7 kulonda chikuhwelelu chenu chinesekiwu dehi, chabadika kulema wuru yakisikaña hela chakwila anayeseki mukesi, chikayileñeli enu akayihameki, akayilemeshi nikuyitiyakesha mpuhu hampinji yakamusololawu Yesu Kristu. 8 Hela chakwila himwamumwenihuku, mwamukeña. Hela chakwila hayinu mpinji himunakumumonaku, ilaña mwamukuhwelela nawa munakuzañalala chikupu namuzañalu waweni wakulema wakukañanya nikulumbulula, 9 hampinji yimunakufwila kutambwila yuma yimwakuhwelela, dikwila nawu wamwinu wenu. 10 Muloña waniwu wamwinu, atuprofwetu aprofweteli kutalisha haluwi lwasweja lwadi kuyitiyilawu enu, alukeñakeñeli chikupu nikulusandujola. 11 Atwalekelihu nakukeñakeña kulonda eluki mpinji hela chilaaka chakashikijewa yuma yahosha hadi Kristu yashimwinini chadimu spiritu yajila yadiña mudi wena, iyi spiritu yashimwinini chadimu makabi akamonayi Kristu nikulema kukalondelahu. 12 Nzambi wayikojejeli atuprofwetu kwiluka nawu hiyadiña nakudiprofwetela awenawuku, ilaña adiña nakuprofwetela enu. Nawa ichi, iyi yuma anayisolweliyu enu kuhitila mudi owu ayishimwinini enu nsañu yayiwahi. Elili mwenimu muloña ayikwashili kudi spiritu yajila yafumini mwiwulu. Muyuma yeniyi añelu niwena anakufwila kushinshikamu chikupu. 13 Dichi, loñeshenu yitoñojoka yenu kulonda muzati mudimu; hembenuña chikupu yitoñojoka yenu; chiñejenuña luwi lwasweja lwakayiletelawu enu hampinji yakamumwekeshawu Yesu Kristu. 14 Hakwikala anyana ovwahilaña, lekenu kwiteja kufwila kumwadiña naku kunyima kumwafwilileña mukubula kwiluka kuyiluwañeshiku, 15 ilaña ikalenu ajila muyilwilu yenu yejima, neyi chekalayi Owu Wajila wayitambikili enu, 16 muloña chasonekewa nawu: “Mwatela kwikala ajila, muloña ami najila.”
OCTOBER 21-27
YUMA YALEMA YAMWIZU DANZAMBI | 1 PETULU 3-5
“Kukuma Kwayuma Yejima Kunaswini Dehi Kwakwihi”
(1 Petulu 4:7) Hela chochu, kukuma kwayuma yejima kunaswini dehi kwakwihi. Dichi toñojokenuña mwamaana nawa mpinji yejima ikalenu adiloñesha kulonda mulombeña.
‘Babalenu Kulonda Mulombeña’
“IYALA wumu wadiña nakuzata nawufuku wahosheli nindi, “mpinji yakalaña kwikala wasoñama nawufuku himpinji yakumacha. Hadaha antu amakwawu achiishahu dehi anateli kwiteja mwahosheliyi. AkwaKristu makonu amonaña kukala kokumu muloña kaayi katama kaSatana kadi mumwidima waweni. (Rom. 13:12) Chikwikala chatama neyi tutachika kunoñoka hayinu mpinji yakala. Dichi chalema kwikala ‘awundisha mumesu’ nakutiyilila kufumba kwamuNsona kwakwila nawu ‘babalenu kulonda mulombeña.’—1 Pet. 4:7.
(1 Petulu 4:8) Kubombela hayuma yejimiyi, dikeñenu chikupu wumu namukwawu, muloña kukeña kwabutaña hanshidi jajivulu.
w99 4/15 22 ¶3
Chakwiluka niKutondolwela Yuma Yinateli Kutuzeyesha kuSpiritu
Nkumininaku, twalekenuhu kuhemba kufumba kwakapostolu Petulu kwakwila nawu: “Kukuma kwayuma yejima kunaswini dehi kwakwihi. Dichi toñojokenuña mwamaana nawa mpinji yejima ikalenu adiloñesha kulonda mulombeña. Kubombela hayuma yejimiyi, dikeñenu chikupu wumu namukwawu, muloña kukeña kwabutaña hanshidi jajivulu.” (1 Petulu 4:7, 8) Chinateli kwikala chaswayi kwiteja kubula kuwanina kwawantu nikwetu kutuleñeli kwikala munyichima yetu nimuyitoñojoka yetu kulonda twikali chuma chakuhukesha nachu. Satana weluka iku kuzeya-zeya. Tufuta twazatishañayi hikutwambula nikutushinda. Dichi twatela kushinda aka kafuta kuhitila mukudikeña chikupu wumu namukwawu nawa “bayi [tumushila] Diyabolu hakwiñililaku.”—Aefwesesa 4:25-27.
(1 Petulu 4:9) Ikalenu nachisambu kudi wumu namukwawu chakadi kutooba.
Wejima Wetu Twatela Kwikala naChisambu!
Kubombela hayuma yahosheliyi, Petulu wayilejeli amanakwindi nindi: “Ikalenu nachisambu kudi wumu namukwawu.” (1 Pet. 4:9) MuchiGiriki izu dakwila nawu “chisambu” dalumbuluka nawu “kukeña hela kumwekeshela luwi antu imwabula kwiluka.” Hela chochu, anukenu nenu, Petulu walejeleña amanakwindi niahela akwaKristu kumwekesha chisambu “kudi wumu namukwawu,” antu iyelukiliwu dehi nawa iyahanjekeleña nawu. Chisambu chadi kuyikwasha ñahi?
Chisambu chadi kuyinuñañesha. Toñojokenu chuma chayimwekeneni enu aweni. Ayitambikahu dehi kudi manakwenu kwitala dindi? Komana himwanukaña yuma yayiwahi yamwekeniku? Komana wubwambu wenu nawamanakwenu wakoleleliku wanyi chimwahosheli nsañu yayitiyishili kuwaha? Neyi tutambikaña amanakwetu niahela kumatala, tukuyiluka chiwahi kubadika chitwatela kuyiluka kumaluña amakwawu. AkwaKristu adiñaku mumafuku aPetulu ateleleli kudikunda chikupu chineli yuma yataminineñaku. NiakwaKristu alala atela kudikunda munanu “mafuku akukuminina.”—2 Tim. 3:1.
Kukeña Yuma Yalema yakuSpiritu
(1 Petulu 3:19, 20) Nawa hadiñayi muspiritu, wayili nakushimwina kudi aspiritu adiña mukaleya, 20 owu adikañili kunyima hampinji yadiwunjikiliyi Nzambi nakuchiñilila mumafuku aNowa, iku watu anakuwutuña, mwahandilili antu antesha, dikwila nawu mawumi 8 abulili kufwa namenji.
Malwihu Kufuma Kudi Antañi
Bayibolu yahosha nawu Yesu ‘washimwinini kudi aspiritu amukaleya.’ (1 Pet. 3:19) Komana chumichi chatalisha mudihi?
Kapostolu Petulu wayilumbulula awa aspiritu nindi hiyaspiritu ‘adikañili hamwaka, hadiwunjikiliyi Nzambi nakuchiñilila mumafuku aNowa.’ (1 Pet. 3:20) Chakadi nikujina, Petulu wateneneña yileñaleña yakuspiritu yafuukwiluhu kulondela kudikaña kwaSatana. Yuda watena añelu “abulili kuhemba wanta wawu, hiyakufuma mwaawu mwashakaminañawu,” nakuhosha nindi Nzambi “nayihembi mumaleñi ahaya nyaaka mumwidima wiyila bwii, nayiswekeli kusompesha kwefuku odu deneni.”—Yuda 6.
Munjilanyi mwadikañilili iyi yileñaleña yakuspiritu mumafuku aNowa? Henohu Dibaji kanda dinzi, awa aspiritu atama avuulili nyijimba yawu nakuvwala nyijimba yawuntu, chuma chabulili kuyinkayi Nzambi. (Kutach. 6:2, 4) Kubombelahu cheñi, ana añelu akamini nawambanda, elileña chuma chabulili kuyileñelawu. Nzambi haleñeli yileñaleña yakuspiritu kulonda yidishimeña nawambandaku. (Kutach. 5:2) Awa añelu atama nawa adikañili, akayijilumuna mumpinji yatoñolayi Nzambi. Kwesekeja nachahosha mukanda waYuda, chayinu mpinji adi “mumwidima wiyila bwi,” hela twili netu mukaleya kakuspiritu.
Mpinjinyi nawa munjilanyi Yesu mwayishimwininiyi awa “aspiritu amukaleya”? Petulu wasonekeli nindi chumichi chamwekeni hanyima yakwila Yesu ‘anamuhandishi muspiritu.’ (1 Pet. 3:18, 19) Cheñi nawa, hanu Petulu nahoshi nindi Yesu ‘washimwinini.’ Chinyika chakunyima chazatishiliyi Petulu chinakumwekesha nawu Yesu wayishimwinini henohu Petulu kanda yasoneki mukanda windi watachi. Chumichi chinakumwekesha nawu chimwahitili mpinji kufuma hasañukiliyi, Yesu wayishimwinini awa aspiritu atama kutalisha hakujilumuka kwayitelela kukayishikena. Iku hikwadiña kuyishimwina kwayuma yayiwahuku. Kwadiña kuyishimwina kwawunsompeshi. (Yona 1:1, 2) Yesu chamwekesheliyi chikupu chikuhwelelu chindi nikashinshi kushika nikukufwa nawa amusañwili, nakumwekesha nawu Diyabolu hadiña nachuma mudi yenaku, chamuteleleli Yesu kushimuna mazu amuchidiwu awunsompeshi.—Yow. 14:30; 16:8-11.
Kumpinji yakumbidi, Yesu wakamukasa Satana niañelu jindi nakuyumbila mwikela. (Luka 8:30, 31; Chim. 20:1-3) Sampu iyi mpinji yinashiki dehi, awa aspiritu adikañili akutwalekahu kwikala mumwidima wakuspiritu wiyila bwi, nawa chakadi nikujina akayijilumuna.—Chim. 20:7-10.
(1 Petulu 4:6) Kafwampi, ichi dichaletesheli nsañu yayiwahi ayishimwini nikudi afu, kulonda akatweshi kuhanda kwesekeja nanochu chamonañayi Nzambi hela chakwila ayisompesha dehi mumujimba wawuntu kwesekeja nachamonañawu antu.
Yikuma Yamaneni Kufuma muMukanda waYakoba niPetulu
4:6—Indi “afu” ‘ashimwininuwu nsañu yayiwahi’ hiyanyi? Awa diwu ‘afwili nanyiloña yawu yanshidi,’ hela afwili lwakuspiritu, henohu kanda atiyi nsañu yayiwahi. (Aefwesesa 2:1) Dichi chakuhweleleluwu nsañu yayiwahi ‘ahandili’ muloña akwatili wubwambu naYehova.
Kutaña Bayibolu
(1 Petulu 3:8-22) Nkumininaku, wejima wenu nuñañanenu muyitoñojoka, dakamenenuña, keñenuña anakwetu, ditiyilenuña wushona nikudizoza. 9 Bayi mufuntisha katama kudi muntu wunayili katamaku, hela kutuka muntu wunayitukiku. Ilaña yikiswilenuña, muloña chumichi dichayitambikililiwu kulonda mutweshi kuswana nkisu. 10 Muloña “muntu wejima wukukeña kudiluñisha wumi nikumona mafuku amawahi, watela kuhemba idimi dindi kubula kuhosha yuma yatama ninyivumbu yindi kubula kuhosha yuma yakudimbana. 11 Yaleki kukoña yuma yatama, ilaña yakoñeña yuma yayiwahi; yakeñakeñeña kuwunda nakukufwila chikupu. 12 Muloña mesu aYehova atalaña antu aloña, nimatu indi atiyililaña kukulomba kwawu kwakulembelela, ilaña Yehova wafutalelaña antu akoñaña yuma yatama.” 13 Chalala, neyi mwikala neyena dakwila yuma yayiwahi, hinyi wukuyila chuma chatama? 14 Ilaña neyi mukabakana kukoola kuloña, mukweti muzañalu. Hela chochu, bayi mutiya woma yuma yatiyañawu wena womaku, hela bayi muluwankanaku. 15 Ilaña mujilikenuña Kristu neyi Mwanta munyichima yenu, mpinji yejima ikalenu adiloñeshela chadimu kudihakwila enu aweni kudi muntu wejima wukuyihula kutalisha hakuchiñeja kumukweti, hela chochu, mwileña mwenimu namuchima wawovu nikalemesha chikupu. 16 Ikalenuña nachinleji chamuchima chachiwahi, kulonda mwejima mwatama munakuyihoshawu enu, antu anakuyihosha mwatama atiyi nsonyi muloña wayilwilu yenu yayiwahi nanochu chimudi akwakumulondela Kristu. 17 Muloña neyi diyi nkeñelu yaNzambi nindi mukabakani muloña wakukoña yuma yayiwahi, chachiwahi, kubadika enu kukabakana muloña wakukoña yuma yatama. 18 Muloña Kristu wafwili kamu hohu kukoola nshidi, muntu waloña wafwilili antu abula kuloña, kulonda yayilomboli kudi Nzambi. Amujahili mumujimba wawuntu, ilaña amuhandishili muspiritu. 19 Nawa hadiñayi muspiritu, wayili nakushimwina kudi aspiritu adiña mukaleya, 20 owu adikañili kunyima hampinji yadiwunjikiliyi Nzambi nakuchiñilila mumafuku aNowa, iku watu anakuwutuña, mwahandilili antu antesha, dikwila nawu mawumi 8 abulili kufwa namenji. 21 Chipapatishu chesekana nanichi chuma chamwekeni, nichena chinakuyamwina enu (chipapatishu bayi neyi hikufumisha majilu amujimbaku, ilaña hikulomba chinleji chamuchima chachiwahi kudi Nzambi), kuhitila mukusañuka kwaYesu Kristu. 22 Yena wudi kuchikasa chaNzambi chachidiilu, muloña wayili mwiwulu, añelu, akwawuswa niakwañovu amwovwahishililiwu.”
OCTOBER 28–NOVEMBER 3
YUMA YALEMA YAMWIZU DANZAMBI | 2 PETULU 1-3
“Anukenuña Chikupu Kwikalahu Kwefuku daYehova”
(2 Petulu 3:9, 10) Yehova hanakulaba kutalisha hakushikija chikaninu chindi neyi chatoñojokañawu antu amu nawu nalabiku, ilaña wadiwunjika nanenu muloña hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima. 10 Ilaña ifuku daYehova dakenza neyi chenzañayi ikombi, dichi hefuku denodu mawulu akahita nalushindu lwasweja, ilaña yuma yamwiwulu yakasuñunuka muloña wakutata chikupu neyena, nawa iseki ninyidimu yadu akayisolola hatooka.
w06 12/15 27 ¶11
Yehova “[Wakayiñisha] naMuloña”
Yesu watalishili mudihi chahosheliyi nindi Yehova “wakanyakashana” kuyiñisha namuloña? Izu daNzambi damwekeshaña nawu “hela chakwila [Yehova] wadiwunjika” wakanyakashana kuleta wuñanji neyi mpinji yinashiki dehi. (Luka 18:7, 8; 2 Pet. 3:9, 10) Chelili dibaji dinzi mumafuku aNowa, antu atama ayijilumwini neyi mukulabula kwadisu. Hohamu nimumafuku aLoti chenjili kesi kufuma mwiwulu antu atama anoñeli. Yesu wahosheli nindi: “Dichichakekala nihanodu ifuku dakamusololawu Mwana kamuntu.” (Luka 17:27-30) Cheñi, “kujilumuka kwakayishikena” antu atama. (1 Tes. 5:2, 3) Mwamweni, twatela kukuhwelela chikupu netu Yehova haketeja kaayi kaSatana kutwalekahu hela ifuku dimu neyi wunsompeshi windi wunenziku.
(2 Petulu 3:11, 12) Chineli yuma yejimiyi yikasuñunuka chochichi, toñojokenu muchidi wawantu imwatela kwikala. Mwatela kwikala antu akweti yilwilu yakujila nawa kalakalenuña nyidimu yakumwakama Nzambi, 12 hampinji yimunakuchiñilila nikwanuka chikupu kwikalahu kwefuku daYehova, mwakajilumwinawu mawulu nanyizuzu yakesi, nawa yuma yamwiwulu niyahamaseki yikasuñunuka neyena dasweja chikupu!
w06 12/15 19 ¶18
“Ifuku Deneni daYehova Didi Kwakwihi”
Dichatusoñamishililiyi kapostolu Petulu kwanuka chikupu “kwikalahu kwefuku daYehova”! Tunateli kukwanuka ñahi? Njila yimu hikuhitila mukwikala ‘nayilwilu yakujila nawa nikukalakala nyidimu yakumwakama Nzambi.’ (2 Petulu 3:11, 12) Kukalakala nankashi iyi nyidimu kunateli kutukwasha kufwila chikupu kumona kwinza “kwefuku daYehova.” Izu dachiGiriki dabalumunawu nawu “kwanuka chikupu” daya mukwila nawu “kunyakashana.” Tukutwesha wanyi kunyakesha mpinji yinashaliku sampu kwinza kwefuku daYehova. Hela chochu, hampinji yitunakuhembelela idi ifuku, mpinji yinateli kwenda swayi neyi tudikitaña chikupu mumudimu waNzambi.—1 Akorinda 15:58.
Kukeña Yuma Yalema yakuSpiritu
(2 Petulu 1:19) Tukweti mazu awuprofwetu akola chakubadika; chachiwahi enu kushinshikamu neyi hiinoñu datoñekaña mumwidima nichikukucha, nichikusela ntanda munyichima yenu.
Yikuma Yamaneni Kufuma muMukanda waYakoba niPetulu
1:19—Indi “ntanda” hinyi, mpinjinyi yaselañayi, nawa twelukaña ñahi netu naseli? Yesu Kristu chekaliliyi Mwanta waWanta waNzambi wekalili “ntanda.” (Chimwekeshu 22:16) Mu 1914, Yesu wekalili Mwanta wawuMesiya hayileñaleña yejima, nakubidika nindi kunachi. Kubalumuka kwamwekesheleñahu dehi kulema kwaYesu niñovu yaWanta, nakumwekesha walala wezu daNzambi dawuprofwetu. Kusha kashinshi kwizu dawuprofwetu kwatoñekaña munyichima yetu, nawa kwatuleñelaña kwiluka netu Ntanda naseli dehi.
(2 Petulu 2:4) Nzambi walekeli kwanakena añelu havulumwinuwu, hakuyumbila mukaluña kachinana nakuyisha mumena amwidima wabwi, kulonda kuyisweka akashiki kukusompesha.
w08 11/15 22 ¶3
Yikuma Yamaneni Kufuma muMukanda waYakoba niPetulu
2:4—“Tatarusi” hichumanyi, nawa mpinjinyi yayinatililimu añelu adikañili? Tatarusi hikaleya kachifwikija mwayikasilawu añelu, bayi antuku. Awa añelu ekala mumwidima waweni muloña eluka wanyi yuma yayiwahi yakelayi Nzambi kumbidi. Nawa añelu ekala muTatarusi hiyakweti kuchiñeja kwakushakama haya nyaakaku. Nzambi wayumbilili awa añelu adikañili muTatarusi mumafuku aNowa, nawa akutwalekahu kushakama muniwu mwidima sampu Nzambi nayikisañani.
Kutaña Bayibolu
(2 Petulu 1:1-15) Ami Shimona Petulu, nduñu nawa kapostolu kaYesu Kristu, inakusonekela antu ejima adi nachikuhwelelu chalema neyi chetu kuhitila mukuloña kwaNzambi yetu niChamwinu chetu Yesu Kristu: 2 Luwi lwasweja nikuwunda jiyivulili enu kuhitila mukwiluka kwalala kwakumwiluka Nzambi niYesu Mwanta wetu, 3 muloña ñovu jaNzambi jinatwinki yuma yejima yatukwashaña mukuhanda kwetu nimukumwakama Nzambi kuhitila mukwiluka kwalala kwaNowu watutambikili nakulema kwindi nikuwaha kwindi. Kuhitila muyumiyi, natwinki chikaninu chalema nawa chasweja kutoha, kulonda. 4 mwiikali nayilwilu neyi yaNzambi kuhitila muyumiyi, nanochu chimunapuluki kukutoka kwamukaayi kwenzaña nakufwila kwatama. 5 Muloña wachumichi, zatenu nañovu chikupu kulonda kuchikuhwelelu chenu mubombeliku kuwaha, kukuwaha kwenu mubombeliku kwiluka, 6 kukwiluka kwenu mubombeliku kudiyuula, kukudiyuula kwenu mubombeliku kuumika, kukuumika kwenu mubombeliku kumwakama Nzambi, 7 kukumwakama Nzambi kwenu mubombeliku kukeña kwakukeña anakwenu, kukukeña kwenu kwakukeña anakwenu mubombeliku kukeña. 8 Muloña neyi iyi yilwilu yiikala mudi enu nawa yivula nankashi, yikuyileñela mubuli kwikala azeya hela mubuli kuleka kusoña nyikabu kutalisha kukwiluka kwalala kwakumwiluka Mwanta wetu Yesu Kristu. 9 Muloña muntu wejima wukubula kwikala naniyi yilwilu, himputamesu, nabuti hamesu indi kuchiina kumona chejeji, nawa navulameni kutookesha kwamutookesheliwu kunshidi jindi jakoñeliyi kunyima. 10 Dichi enu anakwami, zatenu nañovu kulonda mukwatishi kukukooleka kwenu kwakuyitambika nikwakuyitonda, muloña neyi mutwalekahu kubombelaku iyi yilwilu, chakadi nikujina mwakakañanya wanyi. 11 Kafwampi, neyi mwila mwenimu, akayikiswila chikupu nawa akayiteja kwiñila muWanta wahaya nyaaka waMwanta wetu nawa Chamwinu chetu Yesu Kristu. 12 Muloña wachumichi, mpinji yejima nakeñaña kuyanukisha kutalisha hayumiyi, hela chakwila mwayiluka dehi nawa mwashimata dehi chikupu muchalala chidi mudi enu. 13 Ilaña kwesekeja nakumona kwami, chachiwahi ami kuyanukisha enu cheñi hayumiyi hampinji yinichidi muniyi tabanaka, 14 nanochu chinneluki nami katataka nishiyi iyi tabanaka, neyi chanlejeliyi Mwanta wetu Yesu Kristu chakadi kuhita mumbadi. 15 Mpinji yejima nukuzataña nañovu jami jejima kulonda neyi nayi dehi, mwakatweshi kwanuka iyi yuma enu aweni.