Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
OCTOBER 5-11
YUMA YALEMA YAMWIZU DANZAMBI | KWIDIKA 31-32
“Tondolwelenu Kupesha”
(Kwidika 32:1) “Antu chamwenuwu nawu Mosi hakulaba, kukunkumuka swayi hampidi nehi, antu hiyakumupompela Aroni, hiyakumwila nawu, Nyamukaku wutwilili akishi etu atwaminaña kumbidi kutukuya; yeniwu Mosi, iwu iyala watufumishili mwituña daEjipitu, hituneluki kwanayiyuku.”
Tukulenu Tupami Muloña, “Ifuku daYehova Deneni Didi Kwakwihi”
Kuzatisha yuma yitwadiza muNyikanda chakala, sweje-e dinu neyi yuma yinakali. Chakutalilahu, chimwahitili kapinji kantesha kufuma hampinji yayilubwiluwu anyana kaIsarela muwuduñu muEjipitu kudi Yehova, atachikili, ‘kumuzuñesha Mosi’ nawa ‘amwesekeleña Yehova.’ Muloñadi? Muloña wakubula menji akunwa. (Kwidika 17:1-4) Tukweji tuyedi twamanini wanyi kufuma hampinji yatiyañenuwu chitiyañenu naNzambi nakwiteja kwila ‘mazu ejima ahosheliyi Yehova,’ afumpili nshimbi jindi kuhitila mukupesha. (Kwidika 24:3, 12-18; 32:1, 2, 7-9) Komana afumpili nshimbi hamuloña wakwila atiyili woma chashimbwiliyi Mosi henohu anakumuleja nshimbi haMpidi yaHorebi? Komana atoñojokeli nawu hadaha aAmaleki akuyilukuka cheñi nawa aIsarela adi kuyishinda muloña wakwila Mosi, wolweli makasindi mwiwulu hakwila ashindi hakusambila wafuminuhu? (Kwidika 17:8-16) Atela atiyili woma, hichikweti muloña nayuma yatoñojokeleñawuku, aIsarela ‘akaanini kwovwahila.’ (Yililu 7:39-41) Pawulu wakonkomweneni akwaKristu ‘kushaku muchima’ kulonda abuli ‘kudimbuka nakulondeja mwajikwiluwu’ aIsarela chatiyiluwu woma hakwiñila Mwituña daChikaninu.—Aheberu 4:3, 11.
(Kwidika 32:4-6) Watutambwili kumakasawu, wabazili wuru nachikuñu chakubaza nachu, welili nachu mwana kañombi wakweñununa chakweñununa; elili nawu, Diwu akishi enu, enu aIsarela, diwu ayifumishili mwituña daEjipitu. 5 Aroni chamweniyi chochina, watuñili kwenoku kameña; Aroni wabidikili, nindi, Kumadiki twakadya chawija chaYehova. 6 Hakuchaha amenekesheli budidi, ocheli nyilambu yakushita, atweli ninyilambu yakuwunda; antu ashakamini nakudya nakunwa, anyamukili cheñi nakuhema
Mwovwahilenu Nzambi Kulonda Muheteli Muyikaninu Yindi Yakanayi
Hashimbwili wanyi, Yehova watachikili kushikija chitiyañenu chaNshimbi kuhitila mukuloñesha itenti dakudifukwilamu nikutonda atupristu akukwasha antu akwanshidi kulonda adifukuleña kudi yena. Ilaña aIsarela akañenyi kwila mwadikaninuwu naNzambi ‘amuneñesheli Wambala waIsarela Wajila.’ (Mas. 78:41) Chakutalilahu, hampinji yayiliyi Mosi nakutambula nshimbi jikwawu kuMpidi yaSinayi, aIsarela akañenyi kuwunda nikumukuhwelela Nzambi nawa atachikili kutoñojoka nawu Mosi nayishiyi chisayikila. Dichi atuñili mukishi wawuru wamwana kañombi, nikuleja antu nawu: ‘Iwu diyi Nzambi yenu, enu aIsarela, diyi wayifumishili mwituña daEjipitu.’ (Kwid. 32:1, 4) Kuhiñahu elili chuma chateneneñawu nawu “chawija chaYehova” nawa atachikili kumufukamina nikumulambula iwu mukishi atuñiluwu. Chachimweniyi Yehova, wamulejeli Mosi nindi: “Anasenuki dehi swayi swayi munjila yinayilejeli.” (Kwid. 32:5, 6, 8) Chawushona, kufuma tuhu hayina mpinji, aIsarela asanyikileña kudi Nzambi ilaña afumpileña mwasanyikileñawu.—Kuch. 30:2.
(Kwidika 32:9, 10) Yehova wamwilili Mosi, nindi, Awa antu nayimoni dehi komana hiyantu achinchika; 10 ichi dinu nleki kwami kuzuwa kwami kuyitatili neyi kesi, niyinoñeshi kwami, nikuvulishi eyi wili muza weneni.”
‘Hinyi Wudi Kukabadi kaYehova?’
Antu elukili nawu kudifukula kudi ankishi hikufumpa nshimbi jaYehova. (Kwid. 20:3-5) Ilaña hashimbwili wanyi atachikili kudifukula kudi mwana kañombi. Hela chakwila elileña chumichi, aIsarela adidimbileña nakutoñojoka nawu achidi kukabadi kaYehova. Dichaletesheli Aroni kutena kudifukula kudi mukishi nindi “chawija chaYehova”! Yehova welili ñahi? Wazuwili. Yehova wamulejeli Mosi nindi antu “anaditokeshi dehi bululu,” nawa “anasenuki dehi . . . munjila [Mwayilejeliyi.]” Kuzuwa kwindi “kuyitatili neyi kesi,” Yehova wakeñeleña kujilumuna muza wawuha waIsarela watuñiliyi.—Kwid. 32:5-10.
Kukeña Yuma Yalema yakuSpiritu
(Kwidika 31:17) Hichinjikijilu chetu, nanami nawanyana kaIsarela chahaya nyaka; muloña mafuku atanu nadimu Yehova waleñeli mawulu namaseki, hefuku damuchitanu nachiyedi hakunooka, hakutiya nihi-i.
‘Kwekala Mpinji’ Yakuzata niMpinji Yakunooka
Komana chazatañayi Yehova niYesu nañovu chinayi mukwila nawu twatela kunooka wanyi? Inehi mwani. Yehova hazeyañaku, dichi hakeñaña kunooka hanyima yakuzata mudimuku. Ilaña Bayibolu yahoshaña nawu hanyima yakwila Yehova naleñi dehi mawulu nimaseki, “hakunooka, hakutiya nihi-i.” (Kwid. 31:17) Hela chochu, chumichi chaya mukwila nawu Yehova walekeli kuleña nawa wadiña nampinji yakudiluñisha nayuma yaleñeliyi. Cheñi, hela chakwila Yesu wadikitileña nankashi hadiñayi hamaseki, wadiña nampinji yakunooka nikudila hamu nawamabwambu jindi.—Mat. 14:13; Luka 7:34.
(Kwidika 32:32, 33) Ichi dinu neyi wukuyanakena nshidi yawu-! Neyi nehi, anjimi mwani kumukanda weyi wunasoneki. 33 Yehova wamwilili Mosi, nindi, Yowu nanvulumuni diyi nukujima kumukanda wami.
w87 9/1 29
Malwihu Kufuma Kudi Antañi
Muntu neyi amwanukaña nawa amwiteja (asoneka ijina dindi “mumukanda wawumi”) hichinayi mukwila nawu wukekala nawumi wahaya nyaaka, neyi kwiji hichuma chakabula kuhimpikaku. Mosi wamwilili Yehova kutalisha hadi aIsarela nindi: “Neyi wukuyanakena nshidi yawu-! Neyi nehi, anjimi mwani kumukanda weyi wunasoneki.” Nzambi wamwakwili ninidi: “Yowu nanvulumuni diyi nukujima kumukanda wami.” (Kwidika 32:32, 33) Hela chakwila Nzambi nasoneki muntu “mumukanda” windi, Iwu muntu nateli kudikaña hela kuleka yuma yakuhwelelayi. Neyi chuma chamuchidiwu chimwekana, Nzambi nateli ‘kujima ijina dindi mumukanda wawumi.’—Chimwekeshu 3:5.
Kutaña Bayibolu
(Kwidika 32:15-35) Mosi wabalumukili cheñi, wakunkumukili hampidi, muchikasa chindi nasendi malola awubasa awunsahu ayedi; malola awubasa akusoneka niishinadi niishinadi, heshinadi dimu niheshinadi dikwawu anasonekuhu. 16 Wena malola awubasa owu adiñi mudimu wakwila kudi Nzambi, ninsona jadiñi nsona jakusoneka kudi Nzambi, jakubaza hamalola owu awubasa. 17 Yoshuwa chatiyiliyi ipumba dawantu adiñi nakudikuwa, wamwilili Mosi, nindi, Muchilombu mudi ipumba danjita. 18 Yena nindi, Hiizu dawantu akuyikaku, hela dawantu akukaloka nakuyitapaku, ami natiyi neyi hiizu dawantu akwimba tumina. 19 Cheliliyi nashiki dehi kwakwihi nachilombu, hakumona nimwana kañombi niantu akuhañana, Mosi abutuka nikesi laku, nazuwi dehi nankashi, hakunata nimalola awubasa adiñi mumakasindi, hakuyihumona mwishina dampidi.20 Owu mwana kañombi eliluwu, hakumutwala, hakumwocha nakesi, hakumutwa puchi puchi hiwuña hohu, hakuwulakumuna hameji, hakuyinwishawu anyana kaIsarela. 21 Mosi wamwilili Aroni nindi, Indi awa antu akwilili ñahi mwaka wuyikojeji nshidi yatoha chikuma hichi?22 Aroni nindi, Mwanta wami bayi asweja kuzuwaku; awa antu wunayiluki dehi, ata kwawu nyichima yawu hakwila yuma yatama. 23 wena diwu añilili nawu, Twilili akishi etu atwaminaña kumbidi kutukuya; nawu, Yeniwu Mosi, iwu iyala watufumishili mwituña daEjipitu, mwanayiyi hituneluki mwoku.24 Ninami nayilili nami, Yowu muntu wukweti wuru awukotoli, dichi wena awunyinkeli, ami nawuumbilili mukesi, himukwidika niniwu mwana kañombi.25 Mosi chamweniyi antu adi nzekesi, muloña Aroni wayivuulishili mahina, walondeli atiyi nsonyi hadi ayilumbu jawu; 26 Mosi hakwimana muchisu chachilombu, hakuhosha nindi, WaYehova waYehova hinyi? Enzi kunu kunidami. Anyana kaLevi amayala ejima apompa nikupompa kudi yena. 27 Wayilili nindi, Tiyenu chanahoshiyi Yehova, Nzambi yawaIsarela, nindi, Wejima wenu vwalenu mpoku jenu jatubali hamakata, yenuña nakukimbuka mwahita chilombu kuchisu nachisu nakutapa akwenu, iwu nakutapa mana kwindi, iwu nakutata mukwawu adikatayi nindi, iwu nakutapa mukwawu atuñayi nindi. 28 Anyana kaLevi elili mwomwizu daMosi; denodu ifuku hafwili antu neyi kwiji makombakaji asatu.29 Mosi welili nindi, Dikunjikenu lelu kudi Yehova, mwalala iwu hamujimba wamwanindi weyala, iwu hamujimba wamana kwindi, kulonda ayikiswili nkisu lelu. 30 Chikwachili Mosi wayilili antu, nindi, Enu munavulumuni nshidi yeneni; ichi dinu hinukukandama cheñi hampidi niyi kudi Yehova, hadaha nakela yakubuta nachu nshidi yenu.31 Mosi wafuntili cheñi kudi Yehova, welili nindi, Nalembi mwani, awa antu anavulumuni dehi nshidi yeneni, aneli dehi akishi awu awuru. 32 Ichi dinu neyi wukuyanakena nshidi yawu-! Neyi nehi, anjimi mwani kumukanda weyi wunasoneki. 33 Yehova wamwilili Mosi, nindi, Yowu nanvulumuni diyi nukujima kumukanda wami. 34 Ichi dinu yaku wakayilomboli awa antu ayi kunakuleja dehi; nikañelu kami wakatwaminaña kumbidi kuwukuyeyi. Hela chochina kudi ifuku dinakayishikijila nshidi yawu. 35 Yehova wayibabesheli antu nanowu mwana kañombi eliliyi Aroni.
OCTOBER 12-18
YUMA YALEMA YAMWIZU DANZAMBI | KWIDIKA 33-34
“Yilwilu yaYehova Yayiwahi”
(Kwidika 34:5) Yehova wasulukilili mwivu, wemeni nindi kwenoku, wabidikili nakutena ijina daYehova.
it-2 466-467
Ijina
Yuma yaleñawu yamwekeshaña nawu Nzambi wekala kwoku, ilaña hiyamwekeshaña ijina daNzambiku. (Ms 19:1; Rom 1:20) Hakwila muntu yeluki ijina daNzambi hatela kwiluka hohu izuku. (2Ku 6:33) Chatalisha mukwila nawu watela kwiluka Muntu yomweni, dikwila nawu nkeñelu yindi, nyidimu niyilwilu yindi yamwekeshawu mwiIzu dindi. (Esekejenu 1An 8:41-43; 9:3, 7; Ne 9:10.) Chumichi anachimwekeshi hadi Mosi, muntu ‘elukiliwu hejina’ kudi Yehova, dikwila nawu, muntu elukiliwu chikupu. (Kwi 33:12) Mosi wamweni kulema kwaYehova nawa ‘watiyili anakubidika ijina daYehova.’ (Kwi 34:5) Iku kubidika hikwadiña kwakufuntisha funtishahu hohu ijina daYehovaku, ilaña adiña mazu amwekesheleña nyidimu niyilwilu yaNzambi. “Yehova, Yehova Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi; hayiñishaña mukwakutanya nihantuku; kuluwa kwawatata jawantu wakushikijaña nihadi anyana, nihadi ezukulu, nihadi anyanawu wena, nihadi ezukulu awu wena.” (Kwi 34:6, 7) Munjila yoyimu, kamina kembiliyi Mosi mwadiña awa mazu akwila nawu “hinukubidika mwaya ijina daYehova,” amwekeshaña Nzambi cheliliyi nawaIsarela nawa amwekeshaña chekalayi.—Kuh 32:3-44.
(Kwidika 34:6) Yehova wahitili kumesu indi, wabidikili nindi, Yehova, Yehova Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala;
Yehova Chadilumbulwiliyi Yomweni
Chuma chatachi chamwekesheliyi Yehova hadi yomwenindi chidi chakwila nawu “Nzambi, wenzala nawushona, watoñaña antu.” (Vasi 6) Kwesekeja namuntu wumu wataña, izu dachiHeberu dazatishawu nawu “wushona” damwekesha nawu Nzambi wukweti “luwi, neyi lwekala natata yawantu hadi anyanindi.” Izu dazatishawu dakwila nawu “watoñaña” dakundama kwizu “damwekeshaña chatiyañayi muntu wunakukeña kukwasha muntu wunakankili.” Mwamweni, Yehova nakukeña nindi twiluki netu wakamenaña akwakudifukula indi neyi chakamenaña anvwali anyanawu, dikwila nawu kuyikeña chikupu nikuyakamena.—Masamu 103:8, 13.
kuhiñahu, Yehova wahosha nindi “hazuwaña swayuku.” (Vasi 6) Hashikenaña kuzuwa nawambuña indi ahamasekiku. Ilaña, wadiwunjika, nawa wayitiyililaña muloña wakubula kuwanina kwawu nikuyinka mpinji yakuhimpa yilwilu yawu yanshidi.—2 Petulu 3:9.
Nzambi watwalekahu kuhosha nindi “wasweja niluwi, wavulisha ninsañu yalala.” (Vasi 6) Luwi lwindi hela kukeña kwalala hichilwilu chalema chamwekeshañayi Yehova hadi antu jindi, dikwila nawu wubwambu wabulaña kumana. (Kuhituluka 7:9) Yehova wavulisha cheñi nsañu yalala. Hanateli kudimba muntu hela kumudimba yenaku. Chineli ‘hiNzambi wavulisha nsañu yalala,’ twatela kukuhwelela chikupu muyuma yejima yahoshañayi, kushilahu tuhu niyikaninu yindi yakumbidi.—Masamu 31:5.
(Kwidika 34:7) Wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi; hayiñishaña mukwakutanya nihantuku; kuluwa kwawatata jawantu wakushikijaña nihadi anyana, nihadi ezukulu, nihadi anyanawu wena, nihadi ezukulu awu wena.
Yehova Chadilumbulwiliyi Yomweni
Chalala chikwawu chinakukeñayi Yehova nindi twiluki hadi yena chidi chakwila nawu wanakenaña “nikuluwa, ninyiloña, ninshidi.” (Vasi 7) Yena “wanakenaña” akwanshidi anabalumuki munyichima. (Masamu 86:5) Hampinji yoyimu, Yehova hetejaña yuma yatamaku. Walumbulula nindi “hayiñishaña mukwakutanya nihantuku.” (Vasi 7) Nzambi wajila nawa wabula chaambu hakabula kubabesha mukwanshidiku. Katataka hela kumbidi akayibabesha muloña wanshidi jawu.
Kukeña Yuma Yalema yakuSpiritu
(Kwidika 33:11) Yehova wahosheli naMosi mesu namesu, neyi chahoshañayi muntu nebwambu dindi. Yena wafuntilaña cheñi muchilombu; ilaña kambanji kindi, mwana kaNuni Yoshuwa, mukwenzi weyala, saña emenayi mwitenti.
(Kwidika 33:20) Nindi, Hiwukutwesha kumona kumesu amuku, muloña kwosi muntu wakanmonami ahandaku.
w04 3/15 27 ¶5
Yikuma Yamaneni Kufuma muMukanda waKwidika
33:11, 20—Nzambi wahosheli ñahi naMosi “mesu namesu”? Awa mazu anakumwekesha hadi amabwambu anakuhanjeka munjila jiyedi. Mosi wahanjekeli namuntu wadiña nakumwimenaku Nzambi nawa watambwilili nshimbi kudi Yehova kuhitila mudi iwu muntu. Ilaña Mosi hamumweni Yehovaku, muloña ‘kwosi muntu wamumonahu dehi Nzambi nawa yahandaku.’ Dichi, Yehova hahosheli naMosi yomwenindiku. Añalija 3:19 yahosha nawu, Nshimbi “jenjili nawañelu kuchikasa chehaku.”
(Kwidika 34:23, 24) Ayeyi amayala ejima akamwekani kumesu aMwanta Nzambi, Nzambi yaIsarela, mapampa kasatu hamwaka. 24 Muloña nakayitemuna nyuza kuwakaya, nakatohesha ñinza jenu; chiwakaya mapampa kasatu hamwaka nakumwekana kumesu aYehova Nzambi yeyi, kwosi muntu wakakeña ituña deyuku.
w98 9/1 20 ¶5
Sambilenuña Kutwamijaku Yuma Yatachi!
Kapampa kasatu muchaaka kaIsarela wejima weyala nimuntu wabalumukili nakwikala kaIsarela ayilejeleña kuya kumesu aYehova. Chineli elukileña nawu yisaka yawu yinateli kuhetelamu kuspiritu kuniku kupompa, nyitu yayisaka yayivulu yayileña hamu nawañodi jawu nianyanawu. Hanu dinu hinyi wadi kuhemba matala awu nimaha awu neyi ayilumbu jawu alukuka iluña henohu chisaka kwosi? Yehova wakanini nindi: “Chiwakaya mapampa kasatu hamwaka nakumwekana kumesu aYehova Nzambi yeyi, kwosi muntu wakakeña ituña deyuku.” (Kwidika 34:24) Dichi aIsarela ateleleli kwikala nachikuhwelelu nikukuhwelela nawu neyi atwamijaku yuma yakuspiritu, hiyakajimbesha yuma yawuku. Komana Yehova welili mwahosheliyi? Eña dimweliliyi!
Kutaña Bayibolu
(Kwidika 33:1-16) Yehova wahosheli cheñi naMosi, Nindi, Nyamukenu, mufumi kunu nineyi niantu iwafumishili mwituña daEjipitu, muyi kwituña dinasanyikilili Abarahama, naIsaka, naYakoba, ituña dinelili nami, Nakayinka anyaneyi. 2 Nakatemeshañahu keñelu kumbidi kuwukuya; nakatemunamu kaKenani, nikaAmori, nikaHiti, nikaPerizi, nikaHivi, nikaYebusi. 3 Nakakutwala mwituña dalumbama mayeli nawuchi; ami kwami hinukuya nenu mukachi kenuku, muloña enu muyantu achinchika, nakenza kayinoñesha tuhu munjila ji-i. 4 Antu chatiyiluwu mazu owu atama, adilili, hosi muntu niwumu wavweli yuma yindi yakudiwahisha nachuku. 5 Muloña Yehova wamwilili Mosi, nindi, Yili anyana kaIsarela, neyi, Enu muyantu achinchika, hela neyi nukuya mukachi kenu kapinji kamu hohu nukuyinoñesha tuhu ji-i, dichi dinu subulenu yuma yenu yakudiwahisha nachu kulonda niiluki kwami munukuyila. 6 Anyana kaIsarela kufumisha kuna kumpidi yaHorebi nikwayiluwu kumbidi asubwili yuma yawu yakudiwahisha nachu. 7 Henohu Mosi watwelelaña itenti nakudilema kupandakana hachilombu kwakulehi nachilombu; waditeneni nindi, Itenti dakubulakena. Elili neyi muntu hakukeña Yehova hakwidika muchilombu hakuya kwitenti dakubulakena dadiñi oku kwakupandakana chilombu. 8Chelilañayi Mosi hakwidika muchilombu hakuya kwitenti, antu ejima hiyakunyamuka, hiyakwimana, muntu muchisu chetenti dindi, muntu muchisu chetenti dindi, hiyakuhuñununa mesu nakutala mwakuyayi Mosi nichakwiñilayi mwitenti. 9 Chelilañayi Mosi hakwiñila mwitenti, chishimi chevu hichikuzenzumuka, hichikwimana kwokuchisu chetenti, niYehova hakuhosha naMosi. 10 Antu ejima amweni chishimi chevu hichikwimana kuchisu chetenti, niantu ejima hiyakunyamuka, hiyakudifukula, muntu muchisu chetenti dindi, muntu muchisu chetenti dindi. 11 Yehova wahosheli naMosi mesu namesu, neyi chahoshañayi muntu nebwambu dindi. Yena wafuntilaña cheñi muchilombu; ilaña kambanji kindi, mwana kaNuni Yoshuwa, mukwenzi weyala, saña emenayi mwitenti. 12 Mosi wamwilili Yehova, nindi, Tala, wunañili neyi, Twalaku antu awa, ilaña wunabuli kunleja iwakantemesha nindi. Ilaña eyi wunahoshi neyi, Nakwiluki ijina deyi, neyi, Nakutoñi. 13 Ichi dinu mwani, neyi wunantoñi, anleji dinu njila yeyi, kulonda nikwiluki, kulonda wuntoñi; atali hadi muza iwu wuyiluki neyi antu ami. 14 Yena nindi, Mesu ami akaya naneyi, nakakunookesha. 15 Mosi wamwilili nindi, Neyi mesu eyi kuya nanami nehi, bayi wututwalaku. 16 Indi antu akwiluka ñahi nawu ami wunantoñi ninami niantu eyi? Hiyakwiluka nanochu chitukuya naneyuku? Ami nawantu eyi mwenomu dimu tukwambukila kudi antu ejima ekala hewulu damaseki, indi heñi nawa?
OCTOBER 19-25
YUMA YALEMA YAMWIZU DANZAMBI | KWIDIKA 35-36
“Adiloñesheli Kuzata Mudimu waYehova”
(Kwidika 35:25, 26) Ambanda ejima adiñi namaana munyichima yawu, atuñili mahina namakasawu, aleteli atuñiluwu, niwuzeeli, niwusombu, niachinana nge, niamawahi akushinta. 26 Ambanda ejima abimbishiluwu nyichima yawu namaana atuñili mahina amavuji ampembi.
Yehova Wakiswilaña Chikupu Antu Ahanaña naMuchima Wumu
Bayi neyi yuma yahaninuwu diyi yamuzañalesheli Yehovaku, ilaña wazañaleli chahaninuwu namuchima wumu nakukwasha kudifukula kwalala. Adihanini cheñi kuzata mudimu. Bayibolu yahosha nawu “ambanda ejima adiñi namaana munyichima yawu, atuñili mahina namakasawu.” Eñañi, ‘ambanda ejima ahizumwishiluwu munyichima yawu namaana atuñili mahina amavuji ampembi.’ Kubombelahu, Yehova wamwinkeli Bezaleli ‘maana, kashinshi, kwiluka, niwukalawenu wejima.’ Kafwampi, Nzambi wamwinkeli Bezaleli niOholiyabi wukalawenu wakuzata nyidimu yejima yakeñekeleña.—Kwi. 35:25, 26, 30-35.
(Kwidika 35:30-35) Mosi wayilili anyana kaIsarela, nindi, Tiyenu, Yehova namutambiki hejina dindi Bezaleli mwana kaUri, Uri mwana kaHuri, wakumuchidi waYuda; 31 namwinzeshi dehi naspiritu yaNzambi, mumaana, nimukashinshi, nimukwiluka, nimuwukalawenu wejima; 32 kulonda akatoñojoki chachiwahi mwaya nyidimu yawutotombu, akakalakali nawuru, nasiliva, niwuneñu, 33 akaketuli nitumalola twakupatapata, akabazi ninyitondu, akakalakali mwejima mwaya wukalawenu wawutotombu. 34 Namushili mumuchima windi maana akuleja akwawu, niyena niOholiyabi, mwana kaAhisamaki, wakumuchidi waDani. 35 Wenawa nayinzeshi namaana munyichima yawu kulonda akalakali mwejima mwaya wukalawenu, nikwakubaza yuma, niwamukwakukoña nyidimu yawutotombu, niwamukwakuchima nakusowashana niwuzeeli, niwusombu, niwanda wuchinana nge, niwanda wawuwahi, akalakali nimwaya wukalawenu wamukwakutuña mahina, hela wawukalawenu wejima, wukalawenu hiwukalawenu, hela wawantu atoñojokaña chachiwahi mwakwila nyidimu yawutotombu.
Antu Ashinshika Akunyaka Alombweluwu naSpiritu yaNzambi
Chuma chamumwekeneni Bezaleli wadiñaku mumpinji yaMosi chamwekeshaña spiritu yaNzambi chiyayikwashaña antu. (Tañenu Kwidika 35:30-35.) Bezaleli amutondeli kulonda yalomboli hakuzata mudimu wakutuña yuma yamutabanaka. Komana wadiña weluka mudimu wawukalawenu henohu kanda yatachiki kuzata iwu mudimu weneni? Hadaha welukili, ilaña mudimu wakukumishaku kuzata wadiña wakutafula matafwali awaEjipitu. (Kwid. 1:13, 14) Hanu dinu, Bezaleli wadi kuzata ñahi mudimu windi wakala? Yehova ‘wamwinzesheli spiritu yaNzambi, mumaana, nimukashinshi, nimukwiluka, nimuwukalawenu wejima; kulonda akatoñojoki chachiwahi mwaya nyidimu yawukalawenu, . . . akakalakali mwejima mwaya wukalawenu.’ Spiritu yajila yamukwashili Bezaleli kwiluka chikupu mudimu welukiliyi. Spiritu yajila yamukwashili niOholiyabi. Bezaleli niOholiyabi adizili chiwahi, muloña azatileña chiwahi nyidimu yawu nawa adizishili niakwawu. Nzambi wayinkeli maana akudizisha akwawu.
(Kwidika 36:1, 2) NiBezaleli niOholiyabi niamayala ejima akweti nyichima yamaana, anashiliyi Yehova munyichima yawu nimaana nikashinshi, kulonda kwiluka kukalakala nyidimu yakukalakala nachu malala, mwejima mwalejeliyi Yehova, nindi akakalakali. 2 Mosi watambikili niBezaleli niOholiyabi niamayala ejima akweti nyichima yamaana, ashiluwu maana munyichima kudi Yehova, ejima akweti nyichima yayibimbishili kulonda enzi nakukoña mudimu,
Antu Ashinshika Akunyaka Alombweluwu naSpiritu yaNzambi
Wunsahu wukwawu wamwekeshaña nawu Bezaleli niOholiyabi ayilombweli naspiritu yaNzambi wamwekenaña munyidimu yazatiluwu, muloña yuma yatuñiluwu yadiña yakola. Yuma yeniyi ayizatishili kwakwihi nayaaka 500. (2 Kushi. 1:2-6) Kwambukaku nawantu atuñaña yuma makonu, Bezaleli niOholiyabi hiyakeñeli kusoneka majina hayuma yatuñiluwuku. Mpuhu yejima yayili kudi Yehova hanyidimu yejima yakalakeluwu.—Kwid. 36:1, 2.
Kukeña Yuma Yalema yakuSpiritu
(Kwidika 35:1-3) Mosi wapompesheli chipompelu chawanyana kaIsarela chejima, wayilili nindi, Tiyenu mazu anayilejiyi Yehova kulonda muyili. 2 Nindi, Mafuku antu nadimu mwakakalakali nyidimu, ilaña hefuku damuchitanu nachiyedi hakekali ifuku denu dajila, hisabata yakunooka kwalema kwakumunookela Yehova; yowu wakakoñelamu mudimu akamujahi. 3 Mumatalenu ejima bayi akabutula mwoku kesi hefuku dasabataku.
w05 5/15 23 ¶14
Kwiluka Yuma Yakeñayi Yehova
Lemeshenuña yuma yakuspiritu. Muza wawaIsarela hiyawitejeli kulemesha yuma yakumujimba kubadika wubwambu wawu naNzambiku. Chihandilu chawaIsarela hichashindameneni hakusha maana hanyidimu yakumujimbaku. Mulungu nimulungu Yehova washiliku mpinji yakwililamu yuma yajila, iyi mpinji ayishiliku kulonda azatileñamu nyidimu yakundama kukudifukula kudi Nzambi walala. (Kwidika 35:1-3; Kuchinda 15:32-36) Chaaka hichaaka, kwadiña mpinji yakupompa kweneni. (Alevi 23:4-44) Iku kupompa kwayikwashileña kutoñojoka hanyidimu yaYehova yañovu, kwanuka njila jindi, nikumwekesha kusakilila hayuma yindi yayiwahi yejima. Neyi antu adihana chikupu kudi Yehova, adiña nakumutiya Nzambi woma, kumukeña nawa chadiña nakuyikwasha kulondela nshimbi jindi. (Kuhituluka 10:12, 13) Iji nshimbi jayikwashaña niambuña aYehova makonu.—Aheberu 10:24, 25.
(Kwidika 35:21) Ejima atiyili nyichima yawu hiyikuyibimbisha, atiyishiluwu kuwaha kuspiritu yawu, atweli mulambu waYehova, wamudimu wetenti dakubulakena, niwakukalakala nachu mudimu wadu wejima, niwayuma yajila yakuvwala.
w00 11/1 29 ¶1
Chisambu Chaletaña Muzañalu
Fwikijenu chatiyiliwu aIsarela. Makiñu akabakeni muwuduñu nawa hiyadiña nayuma yidi yejimaku. Kuhiñahu ekalili asubuka nawa ekalili namaheta amavulu. Adi kutiya ñahi neyi afumishahu maheta amu? Atela adi kutoñojoka nawu anekali namaheta dichi akweti wuswa wakuyihemba. Hela chochu, neyi ayileja nawu ahaniku yawaana yakukwasha nachu kudifukula kwalala, adiña nakuhana chakufuma hamuchima. Elukili nawu Yehova diyi waletesheli ekali namaheta. Dichi, ahanini yuma yayivulu siliva, wuru niyimuna yawu. Ahanineña ‘chakufuma hamuchima.’ ‘Nyichima yawu yayibimbishili.’ ‘Spiritu yawu yayitiyishili kuwaha.’ Chalala “amuleteleli Yehova mulambu wakuleta chakunyichima yawu awenawu.”—Kwidika 25:1-9; 35:4-9, 20-29; 36:3-7.
Kutaña Bayibolu
(Kwidika 35:1-24) Mosi wapompesheli chipompelu chawanyana kaIsarela chejima, wayilili nindi, Tiyenu mazu anayilejiyi Yehova kulonda muyili. 2 Nindi, Mafuku antu nadimu mwakakalakali nyidimu, ilaña hefuku damuchitanu nachiyedi hakekali ifuku denu dajila, hisabata yakunooka kwalema kwakumunookela Yehova; yowu wakakoñelamu mudimu akamujahi. 3 Mumatalenu ejima bayi akabutula mwoku kesi hefuku dasabataku.4 Mosi wahosheli nachipompelu chawanyana kaIsarela chejima, nindi, Tiya chuma chanayilejiyi Yehova, 5 nindi, Pompeshenu mukachi kenu mulambu waYehova; yowu wukweti muchima wakutiyamu kuwaha diwu wukuwuleta, himulambu waYehova; niwuru, nisiliva, niwuneñu,6 niwuzeeli, niwusombu, niwanda wuchinana nge, niwanda wawuwahi, nimavuji ampembi; 7 niyitembi yanyikoku yayizamba, yakuloomba wulombu wuchinana, niyitembi yamayobu, ninyitondu yanyishitimi; 8 nimanji enoñu, ninyitondu yanunka mavumba amawahi yakwila nachu manji akuwayisha nachu, niyakwila nachu insensi yevumba dadiwahi; 9 nitumalola twatushohama, nitumalola twakupata chachiwahi, nitwefwodi, nitwachibwiku chakuvwala hantulu. 10 Antu ejima amukachi kenu akweti maana munyichima yawu, enzi atuñi yuma yejima yanayilejiyi Yehova; 11 nitabanaka, niitenti dindi, nichifwiku chindi, ninkubu jindi, nimapalanga indi, ninyikambu yindi, niyishimi yindi, nimayanda akwimikila; 12 nichimbañu, ninyikambu yachu, niitanda daluwi, niihina dakujika nachu hakachi; 13 nimesa, ninyikambu yayu, niyuma yayu yejima, nimankendi akutenteka kumesu aNzambi; 14 niinoñu dakutoñeka chejeji, niyuma yadu, nimanoñu adu, nimanji achejeji; 15 nikameña kainsensi, ninyikambu yaku, nimanji akuwayisha nachu, niinsensi yevumba dadiwahi, niihina dakukudika muchisu, mwomuchisu chakutabanaka; 16 nikameña kamulambu wakushita, hamu nakanyungulu kaku kawuneñu, ninyikambu yaku, niyuma yaku yejima, nimbashila yakuwelela, niitentaminu dayu; 17 nimahina akukudika kuchipañu, niyishimi yachu, nimayanda akwimikila, niihina dakukudika muchisu chachipañu; 18 nimpopu jakutabanaka, nimpopu jakuchipañu, ninyonji yaju; 19 niyuma yakuvwala yakutuña chachiwahi, yakukalakala nachu mwajila, yoyuma yajila yakuvwala kapristu Aroni, niyuma yakuvwala anyanindi amayala, kulonda akakalakali mudimu wawupristu. 20 Chipompelu chawanyana kaIsarela chejima afumini kudi Mosi. 21 Ejima atiyili nyichima yawu hiyikuyibimbisha, atiyishiluwu kuwaha kuspiritu yawu, atweli mulambu waYehova, wamudimu wetenti dakubulakena, niwakukalakala nachu mudimu wadu wejima, niwayuma yajila yakuvwala. 22 Ayili niambanda niamayala, ejima atiyili kuwaha munyichima yawu, aleteli ninyibulu, niyingelingeli yakumatu, nituzeya twakunyinu yawu, ninyikosa, yuma yalema yawuru yejima; diwu antu ejima amulambwili Yehova mulambu wawuru. 23 Niantu ejima adiñi nawuzeeli, hela nawusombu, hela nawanda wuchinana nge, hela nawanda wawuwahi, hela namavuji ampembi, hela nayitembi yayizamba yanyikoku yakuloomba wulombu wuchinana, hela nayitembi yamayobu, aleteli. 24 Antu ejima adiñi nakulambula mulambu wasiliva nawuneñu awuleteli mulambu waYehova; niantu ejima adiñi nanyitondu yanyishitimi yakukalakala nachu mudimu himudimu, aleteli.”
OCTOBER 26–NOVEMBER 1
YUMA YALEMA YAMWIZU DANZAMBI | KWIDIKA 37-38
“Tumeña twahaTabanaka niMudimu Wutwazatileña muKudifukula Kwalala”
(Kwidika 37:25) Watuñili kameña kainsensi nanyitondu yanyishitimi; mukuleha kwaku munkotweli yimu yachikasa, mukutoha kwaku munkotweli yimu yachikasa, kwesekana hamu, nikuzandama kwaku munkotweli jiyedi jachikasa; nseñu jaku jakutuñila hamu nakameña, chuma chochimu hohu.
it-1 82 ¶3
Kameña
Kameña kainsensi. Kameña kainsensi (akitenaña cheñi nawu “kameña kawuru” [Kwi 39:38]) akituñili nanyitondu yanyishitimi, hewulu nimutubadi twaku mwadiña mwakulambwija nawuru. kwiwulu anyeñumwishiliku mukinkita wawuru. Kadiña natubadi tuwana twesekana, kabadi hikabadi kadiña 44.5 cm nawa mukuzandama kadiña 89 cm, nawa kadiña cheñi ‘nanseñu’ jedikili mumawombu awana. Tuzeya twawuru tuyedi atutuñili kulonda kukulañamu nyiyeñu yakusenda nachu yatuñiliwu nanyitondu yanyishitimi yakulambwija nawuru, nawa itu tuzeya atutuñilili heshina damukinkita wawuru mutubadi twejima tuyedi twakameña. (Kwi 30:1-5; 37:25-28) Insensi adiña nakuyochela hakameña kapampa kayedi hefuku, ntetemena nimelela. (Kwi 30:7-9, 34-38) Cheña chakusendelahu insensi, achitena cheñi nawu cheña chakochelahu insensi, nawa chinamwekani neyi achizatishileña cheñi hakameña kainsensi. (Lev 16:12, 13; Heb 9:4; Chi 8:5; esekejenu 2Ku 26:16, 19.) Kameña kainsensi kadiña mutabanaka kwakwihi naMwamweni Mwajila, dichahoshelañawu nawu kadiña “kuchimbañu chawunsahu.”—Kwi 30:1, 6; 40:5, 26, 27.
(Kwidika 37:29) Welili manji ajila akuwayisha nachu, niinsensi yitooka to-o yanyitondu yakununka mavumba amawahi, mwomwelilañayi muntu wukweti wukalawenu wakubombabomba nyitondu yamavumba amawahi.
it-1 1195
Insensi
Insensi yajila yashimwiniwu nawu yakuzatisha mutabanaka muchinkalampata ayituñileña kufuma kuyuma yalema wuseya yahanineña chipompelu. (Kwi 25:1, 2, 6; 35:4, 5, 8, 27-29) Hahanineñayi nshimbi kutalisha hakutuña insensi, Yehova wamulejeli Mosi nindi: “Tambulaku nyitondu yepukaña mavumba amawahi, niweñu wanunka chachiwahi, Nichecheleti, nichelibena; hinyitondu yepukaña mavumba amawahi yakubomba nalibona ditooka to-o; kweseka yejima pezu yoyimu hohu; wakeli nachu insensi, hiyuma yakubombabomba chachiwahi yevumba dadiwahi mwomwelañayi muntu waheta maana akubombabomba mavumba, Akashuku nimuñwa, yakeli yitooka to-o, yajila. Wakanonuhu yikwawu wakayitwi puchi-puchi, wakashi kumesu awunsahu mwitenti dakubulakena kwokunakabulakena neyi; kudenu yakekali yajila nankashi, bayi mwakadilila enu aweni insensi yakubombabomba chochinaku; kudeyi yakekali yajila yambala yaYehova hohu. Yowu muntu wakela yidi chochina kulonda kununkaku, akamufumishi mudi antaña jindi.” Hakwila iyi insensi yikali yajila nawa yindi hohu, Yehova wabombelelihu cheñi nindi: “Yowu muntu wakela yidi chochina kulonda kununkaku, akamufumishi mudi antaña jindi.”—Kwi 30:34-38; 37:29.
(Kwidika 38:1) Watuñili kameña kamulambu wakushita nanyitondu yanyishitimi; mukuleha kwaku munkotweli jachikasa jitanu, mukutoha kwaku munkotweli jachikasa jitanu, kwesekana hamu, ndwa, mumbañu jaku jiwana; kuzandama kwaku kwesekeli munkotweli jachikasa jisatu.
it-1 82 ¶1
Kameña
Tumeña twahaTabanaka. Hakutuña tabanaka, tumeña tuyedi atutuñili kwesekeja nanshimbi yayinkeliwu. Kameña kakochelahu nyilambu (katenañawu cheñi nawu “kameña kawuneñu” [Kwi 39:39]) akituñili nanyitondu yanyishitimi neyi chikasha, hadaha kadiña wanyi nachakubuta hewulu hela heshina. Mutubadi mwejima muwana mwadiña 2.2 m nawa muchiminu mwadiña 1.3 m ‘ninseñu’ jafumini mumawombu awana kwiwulu. Mumaluña mwejima abutilimu nawuneñu. Kanyugulu kawuneñu kakutuña neyi wanda akishili “hakachi kakameña kwishina kuleha, nikwiwulu nawa kuleha.” Tuzeya tuwana atwishili kumawombu awana kwakwihi nakanyugulu nawa chinamwekani neyi munitu tuzeya dimwahitishileñawu nyiyeñu yakutuña nanyitondu yanyishitimi yakulambwija nawuneñu yazatishileñawu hakusenda kameña. Hadaha chumichi chinakumwekesha nawu kameña akilokweleña kutubadi tuyedi kulonda eñijimu kanyungulu kapapalala kadiña natuzeya kutubadi twejima tuyedi kunsa jaku. Antu adiza akweti yitoñojoka yambuka kutalisha haniyi nsañu, nawa antu amavulu atoñojokaña nawu hadaha itu tuzeya twadiña nyitapu yiyedi, mutapu wamuchiyedi atushiliku kulonda asheñamu nyiyeñu yakusenda nachu kameña, itu tuzeya atulamikili mumbadi yakameña. Atuñili yozelu nawuneñu yidi neyi, yifoyu, mafosholu akufumisha nachu mawuti, yeña hakusampukila mashi awatunyama, mafoloku akunona nachu mbiji niyifoyu yaku yakesi.—Kwi 27:1-8; 38:1-7, 30; Kuc 4:14.
Kukeña Yuma Yalema yakuSpiritu
(Kwidika 37:1) Bezaleli watuñili chimbañu nanyitondu yanyishitimi; mukuleha kwachu munkotweli jiyedi jachikasa nachiketu, kutoha kwachu munkotweli yachikasa nachiketu; mukuzandama kwachu munkotweli yachikasa nachiketu;
(Kwidika 37:10) Watuñili mesa yanyitondu yanyishitimi, mukuleha kwayu munkotweli jiyedi jachikasa, mukutoha kwayu munkotweli yimu yachikasa, mukuzandama kwayu munkotweli yimu yachikasa nachiketu;
(Kwidika 37:25) Watuñili kameña kainsensi nanyitondu yanyishitimi; mukuleha kwaku munkotweli yimu yachikasa, mukutoha kwaku munkotweli yimu yachikasa, kwesekana hamu, nikuzandama kwaku munkotweli jiyedi jachikasa; nseñu jaku jakutuñila hamu nakameña, chuma chochimu hohu.
it-1 36
Nyishitimi
Nyitayi yanyitondu yanyishitimi yikweti nyiña yayilehi. Iyi nyitayi kakavulu yadisempashanaña nanyitayi yakunyishitimi yikwawu nakutuña ivunda; chakadi nikujina chumichi chinalumbululi muloña waweni chazatishilawu muBayibolu izu dakwila nawu nyishitimi nakumwekesha nawu yayivulu. Mutondu wanyishitimi walehaña mamita 6 kushika ku 8 m, ilaña kakavulu wamwekanaña neyi ivunda. Yikweti mafu amwovu nawa yikweti nkenu yalubanji yawulombu wansela, yidi nanyikabu yakompama. Yikweti chula chakola chinateli kubula kukisañanawu kudi atububu. Muloña wanichi chekalayi nawa chineli diyi mutondu wadiña wawuvulu muchinkalampata, mutondu wanyishitimi wawuwahi kutuña nachu tabanaka niyuma yamutabanaka. Awuzatishili kutuña nachu chimbañu chachitiyañenu (Kwi 25:10; 37:1), mesa hakutenteka mankendi (Kwi 25:23; 37:10), kameña (Kwi 27:1; 37:25; 38:1), nyikambu hakusendela iyi yuma (Kwi 25:13, 28; 27:6; 30:5; 37:4, 15, 28; 38:6), yishimi kwakukudika mahina nimahina akukudika muchisu chetenti (Kwi 26:32, 37; 36:36), mapalanga (Kwi 26:15; 36:20) ninkañalu jachu (Kwi 26:26; 36:31).
(Kwidika 38:8) Watuñili mbashila yakuwelela yawuneñu, niitentaminu dayu dawuneñu, nayibanjilu yawambanda akwakukalakala akalakeleli kuchisu chetenti dakubulakena.
w15 4/1 15 ¶4
Komana Mweluka?
Kwambukakaku nayibanjilu yamakonu, yibanjilu yamumpinji yakunyima ayituñileña nayikuñu yinalambwijiwu chiwahi—kakavulu azatishileña wuneñu, ilaña hadaha azatishileña cheñi siliva, wuru, hela weñi wamulombi. Kapampa katachi katenawu yibanjilu muBayibolu yinakundami kunsañu yakutuña tabanaka, iluña datachi dakudifukwila aIsarela. Ambanda ahanini yibanjilu yawu kulonda atuñimu mbashila yakuwelela yawuneñu yajila niitentaminu dayu. (Kwidika 38:8) Hadaha iyi yibanjilu adiña nakuyisuñununa kulonda ayizatishi kuniwu mudimu.
Kutaña Bayibolu
(Kwidika 37:1-24) Bezaleli watuñili chimbañu nanyitondu yanyishitimi; mukuleha kwachu munkotweli jiyedi jachikasa nachiketu, kutoha kwachu munkotweli yachikasa nachiketu; mukuzandama kwachu munkotweli yachikasa nachiketu; 2 walamikili wuru wakoseka to-o nimukachi nihanzi, hewulu watuñililuhu mukinkita wawuru kwi-ndo. 3 Kunyendu yachu yiwana wawumbililuku tuzeya twachu twawuru tuwana, tuzeya tuyedi hakabavu kamu, tuzeya tuyedi hakabavu kakwawu. 4 Wasoñeli nyikambu yiyedi yanyishitimi walamikiluhu wuru. 5 Waloñeli nyikambu mutuzeya mumbavu jachimbañu kulonda kutembekela chimbañu. 6 Watuñili itanda daluwi dawuru wakoseka to-o; mukuleha kwadu munkotweli jiyedi jachikasa nachiketu, mukutoha kwadu munkotweli yimu yachikasa nachiketu. 7 Welili akerubi ayedi awuru, wayichililili kunsa jiyedi jetanda daluwi; 8 kerubi yimu kunsa yimu, kerubi yimu kunsa yikwawu; wayichilili nawuru wumu hohu niitanda daluwi niakerubi akushila kunsa jadu jiyedi. 9 Akerubi olweli mpuula jawu hewulu, nakubuta itanda daluwi nampuula jawu, aditalili mesu awu, mesu awakerubi atalili hetanda daluwi. 10 Watuñili mesa yanyitondu yanyishitimi, mukuleha kwayu munkotweli jiyedi jachikasa, mukutoha kwayu munkotweli yimu yachikasa, mukuzandama kwayu munkotweli yimu yachikasa nachiketu; 11 walamikiluhu wuru wakoseka to-o, watuñililuku mukinkita wawuru kwi-ndo. 12 Watuñililuku nimwowelu kwi-ndo wakweseka muchikasa chakusamanesha, kumwowelu watuñililuku mukinkita wawuru kwi-ndo. 13 Wawumbili tuzeya twayu twawuru tuwana, washili tuzeya hamawombu awana adiñi kunyendu yayu yiwana. 14 Tuzeya twadiñi kwakwihi namwowelu hawushilu wanyikambu yakusendela mesa. 15 Wasoñeli nyikambu yanyitondu yanyishitimi, walamikiluhu wuru, kulonda kutembekelaña mesa. 16 Welili yuma yadiñi hamesa, niyeña yayu, nitutuwa twayu, nimbashila jayu, ninyilondu yayu kulonda kuhuñojola nachu, yawuru wakoseka to-o. 17 Welili inoñu dawuru wakoseka to-o; inoñu wachilili dakuchila, niitentaminu dadu, niiyanda dadu, nimpasa jadu, nimahumbadu, ninkenu jadu, jejima jakuchila wuru wumu hohu. 18 Mumbavu jadu mwedikili nyitayi yitanu nawumu, nyitayi yisatu yenoñu yedikili kumbadi yimu, nyitayi yisatu yenoñu yedikili kumbadi yikwawu; 19 kwadiñi mpasa jakwila neyi nkenu jamutondu wachakadi, jisatu kumutayi wumu, niihumba nilukenu, nimpasa jakwila neyi nkenu jamutondu wachakadi, jisatu kumutayi wukwawu, niihumba nilukenu; dichi cheliluwu nanyitayi yitanu nawumu yedikili mwinoñu; 20 mwinoñu welili mpasa jiwana jafwana neyi nkenu jamutondu wachakadi, nimahumbaju, ninkenu jaju; 21 ihumba dimu kwishina danyitayi yiyedi, yawuru wumu hohu nehumba, ihumba dimu kwishina danyitayi yiyedi, yawuru wumu hohu nehumba, ihumba dimu kwishina danyitayi yiyedi, yawuru wumu hohu nehumba, yanyitayi yitanu nawumu yedikili mwinoñu. 22 Nimahumbayu ninyitayi yawu yelili wuru wumu hohu nenoñu; dejima mudakuminini dadiñi dakuchila hohu, dawuru wakoseka to-o. 23 Welili nimanoñu adu atanu nayedi, ninzamba jawu, nituyeña twawu twakujima nachu twawuru wakoseka to-o. 24 Wadituñili niyuma yadu yejima yantalenta yimu yawuru wakoseka to-o.