Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
DECEMBER 7-13
YUMA YALEMA YAMWIZU DANZAMBI | ALEVI 10-11
“Twatela Kumukeña Yehova Nankashi Kubadika Antu Amuchisaka”
(Alevi 10:1, 2) ANadabi naAbihu, anyana kaAroni amayala, anoneni yeña yakusendela insensi iwu nachindi iwu nachindi, ashilumu kesi, hakesi ashiluhu insensi, alambwili kumesu aYehova kesi kacheñi kabulili kuyilejayi. 2 Kudi Yehova kwafumini kesi, Kayinoñesheli, afwili kumesu aYehova.
it-1 1174
Chetejewa Wanyi
Kesi Kakanishiliwu niInsensi. Ha Alevi 10:1 izu daChiheberu dakwila nawu zar (feminine, za·rahʹ; datalisha mukwila nawu, chambuuka) adizatisha kutalisha “kukesi kakanishiliwu, kabulili kuyilejayi [Nzambi], ilaña kalambwiliwu anyana kaAroni aNadabi naAbihu kumesu aYehova nawa kaletesheli yayibabeshi nakesi. (Lev 10:2; Kuc 3:4; 26:61) Kuhiñahu, Yehova wamulejeli Aroni nindi: “Hela eyi, hela anyaneyi wudi nawu, chimukwiñilaña mwitenti dakubulakena bayi munwaña hela vinyu hela walwaku, mwakenza kafwa, hichidika chenu chahaya nyaka nimwamba kavwalikilañawu anyanenu; kulonda mwakatweshaña kwambula yajila nayabula kujila, niyamajilu nayitooka; kulonda mwakatweshaña kuleja anyana kaIsarela yidika yejima yayilejeliyi Yehova kukanwa kaMosi.” (Lev 10:8-11) Chumichi chinakumwekesha nawu anyana kaAroni aNadabi naAbihu asheteli, dichuma chaletesheli alambuli kesi kabulili kuyilejawu. Chakadi nikujina aka kesi akibutwili hampinji yabula kutelela, heluña hela munjila yalambwililimu, hela yadiña insensi yakubombabomba wanyi yashimunawu haKwidika 30:34, 35. Hela chakwila elili yumiyi hamuloña wakusheta hiyayanakeneniku.
(Alevi 10:4, 5) Mosi watambikili aMishayeli naElizafwana, anyana kaUjiyeli, mandumi yaAroni; hakuyila nindi, Kundamenu kwakwihi, sendenu ana kwenu muyifumishi kwaduwu, kwakwihi namalala, muyiidishi muchilombu. 5 Dichi akundamini kwakwihi, ayisendeli ayiidishili muchilombu iku chochavwalawu yikovwelu yawu; mwomwahosheliyi Mosi.
(Alevi 10:6, 7) Mosi hakumwila Aroni nawanyanindi amayala aEleyazari naItamari, nindi, Enu kuvuula kunyitu hela kutabula yuma yenu yakuvwala chinjila, kuchina kufwa, kuchina niantu ejima kumona kuzuwa. Yilekenu ana kwenu, mutaña waIsarela wejima, adilili kesi kanochiyi Yehova. 7 Enu bayi mwakedika muchisu chetenti dakubulakenaku, mwakenza kafwa; muloña hanyijimba yenu hadi manji aYehova ayiwayishawu. Elili mwomwayilejeliyi Mosi.
Komana Muneñili Dehi Mukunooka KwaNzambi?
Aroni mana kwaMosi wamweni kukala hamuloña wayuma yakoñeluwu anyanindi ayedi awamayala. Anyanindi aNadabi naAbihu ahanini mulambu munjila yaheña nawa Yehova wakaanini. Yehova watemesheli kesi kufuma mwiwulu nawa afwili. Eñañi, hiyateleleli cheñi kudikunda nawanvwali jawuku. Ilaña kudi cheñi yuma yikwawu. Yehova wamulejeli Aroni nianyanindi awamayala ashinshika nindi: “Enu kuvuula kunyitu hela kutabula yuma yenu yakuvwala [hachipenji] chinjila, kuchina kufwa, kuchina niantu ejima kumona kuzuwa [kwaYehova].” (Lev. 10:1-6) Awa mazu anatiyakani chikupu. Twatela kumukeña Yehova nankashi kubadika chitwakeña antu amuchisaka abula kashinshi.
Kukeña Yuma Yalema yakuSpiritu
(Alevi 10:8-11) Yehova wahosheli naAroni, 9 nindi, Hela eyi, hela anyaneyi wudi nawu, chimukwiñilaña mwitenti dakubulakena bayi munwaña hela vinyu hela walwaku, mwakenza kafwa, hichidika chenu chahaya nyaka nimwamba kavwalikilañawu anyanenu; 10 kulonda mwakatweshaña kwambula yajila nayabula kujila, niyamajilu nayitooka; 11 kulonda mwakatweshaña kuleja anyana kaIsarela yidika yejima yayilejeliyi Yehova kukanwa kaMosi.
Twatela Kwikala Ajila muYililu Yetu Yejima
Hakwila twikali ajila, twatela kutañaña Nyikanda yajila nakanañachima nikwila yuma yakeñañayi Nzambi. Shinshikenu anyana kaAroni aNadabi niAbihu ajahiluwu muloña alambwili “kesi kacheñi,” hadaha asheteli. (Lev. 10:1, 2) Talenu Nzambi chamulejeliyi Aroni. (Tañenu Alevi 10:8-11.) Komana iyi nsañu yinatalishi mukwila nawu hitwatela kunwa walwa henohu kanda tuyi kukupompa kwawakwaKristuku? Toñojokenu haniyi yikuma: Hitwalondelaña Nshimbi jaMosuku. (Rom. 10:4) Mumatuña amakwawu, amana kwetu anwaña walwa wantesha hakudya yakudya henohu kanda ayi nakupompa. HaChipandakenu azatishileña mpasa jiwana javinyu. Hampinji yatachikiliyi Chanukishu, Yesu wayilejeli apostolu indi nindi anwi vinyu yemeneneñaku mashi indi. (Mat. 26:27) Bayibolu yakaanisha kunwa walwa wawuvulu nikusheta. (1 Kor. 6:10; 1 Tim. 3:8) Chinleji chawakwaKristu amavulu chinateli kuyikaanisha kunwa walwa henohu kanda atachiki kuzata mudimu wajila. Hela chochu, yihandilu yawantu yashiyashana kwesekeja namatuña awu nawa chuma chalemeshawu akwaKristu ‘hikwambula yajila nayabula kujila’ kulonda ekali ajila hakumuzañalesha Nzambi.
(Alevi 11:8) Kudya mbiji yawu chinjila, hela kukunka wafwa dehi chinjila, enu kwenu amajilu, enu kwenu amajilu.
it-1 111 ¶5
Anyama
Iyi nshimbi kutalisha kunawa anyama yakundama hohu kudi antu adiña muNshimbi yaMosi, muloña mazu ekala haAlevi 11:8 ahosha nawu: “Enu kwenu amajilu,” ayilejeleña aIsarela. Kwesekeja nanshimbi kutalisha hamulambu wakufwa kwaKristu Yesu, iyi nshimbi ayifuutili, nawa antu alondelaña cheñi nshimbi yamwinkeliwu Nowa hanyima yaDibaji.—Kol 2:13-17; Kut 9:3, 4.
Kutaña Bayibolu
(Alevi 10:1-15) ANadabi naAbihu, anyana kaAroni amayala, anoneni yeña yakusendela insensi iwu nachindi iwu nachindi, ashilumu kesi, hakesi ashiluhu insensi, alambwili kumesu aYehova kesi kacheñi kabulili kuyilejayi. 2 Kudi Yehova kwafumini kesi, Kayinoñesheli, afwili kumesu aYehova. 3 Mosi hakumwila Aroni, nindi, Tiya chanahoshiyi Yehova, nindi, Ami nukudijilika mudi awa akwinza kwakwihi nanami, nakalema kumesu awantu ejima. Aroni amwena nizo-o. 4 Mosi watambikili aMishayeli naElizafwana, anyana kaUjiyeli, mandumi yaAroni; hakuyila nindi, Kundamenu kwakwihi, sendenu ana kwenu muyifumishi kwaduwu, kwakwihi namalala, muyiidishi muchilombu. 5 Dichi akundamini kwakwihi, ayisendeli ayiidishili muchilombu iku chochavwalawu yikovwelu yawu; mwomwahosheliyi Mosi. 6 Mosi hakumwila Aroni nawanyanindi amayala aEleyazari naItamari, nindi, Enu kuvuula kunyitu hela kutabula yuma yenu yakuvwala chinjila, kuchina kufwa, kuchina niantu ejima kumona kuzuwa. Yilekenu ana kwenu mutaña waIsarela wejima, adilili kesi kanochiyi Yehova. 7 Enu bayi mwakedika muchisu chetenti dakubulakenaku, mwakenza kafwa; muloña hanyijimba yenu hadi manji aYehova ayiwayishawu. Elili mwomwayilejeliyi Mosi. 8 Yehova wahosheli naAroni, 9 nindi, Hela eyi, hela anyaneyi wudi nawu, chimukwiñilaña mwitenti dakubulakena bayi munwaña hela vinyu hela walwaku, mwakenza kafwa, hichidika chenu chahaya nyaka nimwamba kavwalikilañawu anyanenu; 10 kulonda mwakatweshaña kwambula yajila nayabula kujila, niyamajilu nayitooka; 11 kulonda mwakatweshaña kuleja anyana kaIsarela yidika yejima yayilejeliyi Yehova kukanwa kaMosi. 12 Mosi wahosheli naAroni nawanyanindi amayala asheluku, wowu aEleyazari naItamari, nindi, Tambulenu mulambu wawuña washala kunyilambu yakumwilila Yehova nakesi, mwakawudiili kumbadi yakameña chakadi iluñi, muloña wasweja kujila; 13 mwakawudiila kwajila, muloña wambala weyeyi nawanyaneyi amayala, wakunyilambu yakumwilila Yehova nakesi; muloña dimu mwananlejuwu. 14 Niibwambu dakunyinkesha, nichipeha chakuleleka, mwakayidiilaña kutooka, nineyi nianyaneyi amayala, nianyaneyi awambanda; muloña anakwinkiyi dehi yeyi nawanyaneyi amayala, yakuyimuna yanyilambu yawanyana kaIsarela yakuwunda. 15 Nichipeha chakuleleka, niibwambu dakunyinkesha, akayileti hamu nanyilambu yamanji yakwila nakesi, kulonda kuyinyinkeshaña himulambu wakunyinkesha kumesu aYehova; wakekalaña weyi nawanyaneyi amayala, wenu wahaya nyaka; mwomwanayilejiyi Yehova.
DECEMBER 14-20
YUMA YALEMA YAMWIZU DANZAMBI | ALEVI 12-13
“Dizilenu kuNshimbi Jahosha haMusoñu waMbumba”
(Alevi 13:4, 5) Neyi ibeña ditokoloka dikutooka to-o mwikowa damujimba windi, neyi kumwekana kuhanuka hekowa nehi, niwuvuji wuduhu kubalumuka kutooka nehi, kapristu akamwenzeleli mukwamusoñu mwitala mafuku atanu nayedi. 5 Kapristu akamutali hefuku damuchitanu nachiyedi; neyi wakamona musoñu wunemani dehi hamu, nimusoñu kuswila mwikowa nehi, kapristu akamwenzeleli cheñi mwitala mafuku atanu nayedi.
Nsañu Yekalamu Yaleka Dehi Kuzatika Tahindi Yikazatika niKumbidi?
• Kwambula antu akata.
Nshimbi yaMosi yahosheli nawu antu akata mbumba atela kushakama kwakankawawu. Muyaaka yamuma 1800 diyi mpinji yelukiliwu andotolu chakuzatisha ichi chishina, chinakuzatika nimakonu.—Alevi, kapetulu 13 ni 14.
(Alevi 13:45, 46) Muntu wukweti musoñu wambumba akavwalaña mahina ataboka, nsuki jindi jesasa hohu, akajikaña hamuvumbu windi wahewulu, akabilelaña nindi, Majilo! Majilo! 46 Mafuku ejima akekalayi namusoñu akekali wamajilu hohu; wamajilu kwindi; akashakamaña kanka windi, akashakamaña kunsa yachilombu.
Komana Mweluka?
A Yudeya akushankulu achinineña musoñu wambumba wadiñaku kunyima. Iwu musoñu wafwana wakisañanaña yiidi yamujimba nawa antu ashalileña nawufwayi. Kwadiña wanyi yitumbu yakuuka nachu mbumba. Dichi, antu adiña nanichi chikatu ayishileña kwakankawawu nawa ayinkeli lushimbi lwakusoñamisha antu.—Alevi 13:45, 46.
(Alevi 13:52) Akochi ihina dakuvwala bwi-i, hela njila hela nketula, hela yehina dawuvuji, hela yehina dawanda, hela chitembi chakutuña chuma, yejima yikweti musoñu, muloña himbumba yasumana; akayochi mukesi bwi-i.
(Alevi 13:57) Neyi wakamona saña wamwekena mwihina dakuvwala, hela munjila hela munketula, hela muchitembi chakutuña chuma, wunediki; chuma chikweti musoñu akachochi mukesi bwi-i.
it-2 238 ¶3
Mbumba
Muyakuvwala nimumatala. Mbumba yakisileña cheñi chakuvwala chawuvuji, yehina dawanda hela chachichitembi chakutuña. Musoñu wamanineneña neyi ayikosa nawa kwadiña ntanjikilu yakuchinzela mwitala. Ilaña neyi musoñu wumwekana neyi menji amatamba, indi kwiji neyi wuchinanaku chanti, dikwila nawu ichi chakuvwala chidi nambumba yasuma nawa adiña nakuchocha. (Lev 13:47-59) Neyi musoñu wumwekana neyi menji amatamba, indi kwiji neyi wuchinanaku chanti wumwekana hambañu yetala, kapristu wadenzeleña odi itala. Adiña nakulamunaku malola adi nambumba nikutotolaku maseki ashiñwiliwu kumbañu nawa ayinatilileña kwiluña damajilu hanji yamusumba. Neyi musoñu wufunta cheñi, itala adimweneña nawu damajilu nawa adihumwineña, cheñi yuma yadiñaku ayinatilileña kwiluña damajilu. Ilaña neyi awana nawu itala dakadi majilu, kwadiña ntanjikilu yakuditookesha. (Lev 14:33-57) Antu amakwawu atoñojokaña nawu mbumba yakumahina hela yamumatala hadaha diyi yatenañawu makonu nawu kabuwa hela iwumba. Hela chochu, hitunateli kushimuna jiikaku.
Kukeña Yuma Yalema yakuSpiritu
(Alevi 12:2) Hoshaku nawanyana kaIsarela, neyi, Neyi mumbanda wukubaaba ivumu, hakuvwala mwana weyala, henohu akekali wamajilu mafuku atanu nayedi; mwomwekalila mafuku akatilañayi hayilañayi kwitala dikwawu dimu mwakekalilayi wamajilu.
(Alevi 12:5) Ilaña neyi wukuvwala mwana wamumbanda, henohu akekali wamajilu nyilungu yiyedi neyi hayilañayi kwitala dikwawu, wakashakamaña mafuku makumi atanu nadimu namafuku atanu nadimu namashi indi mwakaditookeshelayi.
w04 5/15 23 ¶2
Yikuma Yamaneni Kufuma muMukanda waAlevi
12:2, 5—Mumbanda wekalileña ñahi “wamajilu” neyi yavwala mwana”? Yiidi yalusemu ayileñeli kulonda yivwaleña antu awanina. Ilaña hamuloña wanshidi yitwaswana, kubula kuwanina nichihandilu chanshidi kwenjili nihadi anyana. Mpinji yekalileñayi muntu ‘wamajilu’ mubombeli kuvwala mwana, kuya kwitala dikwawu nikuditekelela mbutu yalusemu, hinshidi yaswanayi muntu yekala muyitoñojoka. (Alevi 15:16-24; Masamu 51:5; Aroma 5:12) Nshimbi yashiliku kutalisha hakuditookesha yayikwashileña aIsarela kwiluka nawu kwateleleli mulambu wefutu danyiloña wakubuta nachu nshidi yawantu nikuletesha antu kwikala awanina cheñi. Dichi Nshimbi jekalili ‘mukwakuyitañisha ndo-o nichenjiliyi Kristu.’—Añalija 3:24.
(Alevi 12:3) Hefuku damuchitanu nachisatu akamwadiki mwana muvumbu windi.
Nsañu Yekalamu Yaleka Dehi Kuzatika Tahindi Yikazatika niKumbidi?
• Mpinji yakwalamisha.
Nshimbi yaNzambi yahosheli nawu mwana weyala atela kumwalamisha neyi nashikiji dehi mafuku 8. (Alevi 12:3) Mwana neyi wudi namulungu wumu kufuma hanasemukiyi, chilonda chadikwataña swayi. Kumpinji yakunyima, henohu kanda kwikali yitumbu yinakuzatishawu makonu, kwalamisha mwana henohu munahiti dehi mulungu wumu kwadiña kwakuwahi.
Kutaña Bayibolu
(Alevi 13:9-28) Neyi musoñu wambumba wudi namuntu, henohu akamuleti kudi kapristu. 10 Kapristu akatali, neyi wakamona mwikowa munanani, mutooka, niwuvuji wunabalumukilumu wutooka, munanani himukumwekana musunyi nge-e, 11 himbumba yayikulu mwikowa damujimba windi, kapristu akamuteni nindi wamajilu, bayi akamwenzelela mwitalaku, muloña wamajilu. 12 Neyi mbumba yikwidika mwikowa, nimbumba yikupambila ikowa dejima danowu wukweti musoñu, kufumisha kumutu windi ndo nikuyendu yindi hejima hakutala kapristu, 13 henohu kapristu akatali chachiwahi, neyi wakamona mubumba yinamupambili mumujimba windi wejima ndo, akamuteni mukwamusoñu nindi natooki; wejima wunabalumuki wutooka, natooki. 14 Ilaña neyi mudi yena mwakamwekana musunyi nge, akekali wamajilu. 15 Kapristu akatali hamusunyi wange, akamuteni nindi wamajilu, musunyi wange wamajilu, himbumba. 16 Ilaña neyi musunyi wange wukubalumunaka cheñi, hiwukubalumuka wutooka, henohu akenzi cheñi kudi kapristu, 17 nikapristu akamutali cheñi. Neyi wakamona musoñu wunabalumuki wutooka, kapristu akamuteni mukwamusoñu nindi natooki; natooki dehi. 18 Nehi ihuti didi mwikowa damujimba hidikukusuka, 19 muna mwadiñi ihuti himukunana, Himukutooka, indi kwiji himukwila ibeña ditokoloka, Iku neyi dichinana, Iku neyi ditooka, henohu akadimwekeshi kudi kapristu. 20 Kapristu akatali, neyi wakamona ibeña dinamwekani neyi dinahanuki mwikowa, niwuvuji wuduhu wunabalumuki wutooka, henohu kapristu akamuteni nindi wamajilu; himusoñu wambumba wunedikili mwihuti. 21 Ilaña neyi kapristu wakatalahu wakamona wuvuji wutooka hosi, Hidinahanuki mwikowaku, ilaña hidikujimañana, henohu kapristu akamwenzeleli mwitala mafuku atanu nayedi; 22 neyi ibeña dikuya nakuswila mwikowa, henohu kapristu akamuteni nindi wamajilu, himusoñu. 23 Ilaña neyi ibeña ditokoloka dikwimana hohadu, Nikuswila nehi, hichibata chehuti; kapristu akamuteni nindi natooki. 24 Neyi ikowa damujimba dikwiha nakesi, nimusunyi wunahi wukubalumuka ibeña ditokoloka, iku neyi dichinana, iku neyi ditooka, indi kwiji ditooka chikupu, 25 henohu kapristu akataluhu. Neyi wakamona wuvuji wudi mwibeña ditokoloka hiwukubalumuka wutooka, niibeña hidikumwekana neyi dinahanuki mwikowa, himbumba, yinedikili hahiliyi; kapristu akamuteni nindi wamajilu, himusoñu wambumba. 26 Ilaña neyi kapristu wakatalahu, neyi wakamona mwibeña ditokoloka mwosi wuvuji wutooka, Niibeña hidinahanuku mwikowaku, ilaña hidikujimañana, henohu kapristu akamwenzeleli mwitala mafuku atanu nayedi. 27 Hefuku damuchitanu nachiyedi kapristu akamutali, neyi ibeña hidikuya nakuswila mwikowa, henohu kapristu akamuteni nindi wamajilu, himusoña wambumba. 28 Neyi ibeña ditokoloka dikwimana hohadu, kuya nakuswila mwikowa nehi, ilaña didi nakujimañana, hahiliyi hananani tuhu, kapristu akamuteni nindi natooki; hichibata chahiliyi.
DECEMBER 21-27
YUMA YALEMA YAMWIZU DANZAMBI | ALEVI 14-15
“Kudifukula Kwalala Kwakeñekaña Etu Kwikala Akadi Majilu”
(Alevi 15:13-15) Wapwekaña, neyi natooki dehi nanochu chapwekelañayi, akachindi mafuku indi atanu nayedi akutooka nachu, akakosi mahinindi, akaweli mumeji adi nakuhita, akatooki. 14 Hefuku damuchitanu nachisatu akadikwatili tutela tuyedi, hela anyana katupompa ayedi, akenzi kumesu aYehova kuchisu chetenti dakubulakena, akayinki kapristu; 15 kapristu akayilambuli, wumu wamulambu wahanshidi, mukwawu wamulambu wakushita; kapristu akamwilili yakumubuta nachu kumesu aYehova nanochu chanapwekiyi.
it-1 263
Kuwela
Kudi yuma yaletesheleña aIsarela kuwela. Neyi mbumba yinamumani muntu, neyi nakunki muntu wejima “wapwekaña,” iyala wunaditekeleli mbutu yalusemu, mumbanda wudi kukakweji hela muntu wejima welileña wuvumbi wadiña wamajilu nawa wateleli kuwela. (Lev 14:8, 9; 15:4-27) Muntu wejima wudi mwitenti mudi mufu hela wunamukwati wadiña “namajilu” wateleli kuditookesha namenji akadi majilu. Neyi muntu yakaana kulondela iyi nshimbi, “yenowu muntu hakachi kachipompelu akamufumishuhu muloña natamishi dehi malala ambala aYehova.” (Kuc 19:20) Chumichi chinateleli, muloña kuwela akuzatisha muchifwikija nawu kwemenañaku kwikala wakadi majilu kudi Yehova. (Ms 26:6; 73:13; Isa 1:16; Eze 16:9) Kuwela nezu daYehova dachalala, demeneñaku menji, dikweti ñovu yakutookesha.—Efw 5:26.
(Alevi 15:28-30) Neyi nakumishi dehi kupweka, akachindi mafuku indi atanu nayedi, akatooki. 29 Hefuku damuchitanu nachisatu akadikwatili tutela tuyedi, hela anyana katupompa ayedi, akayileti kudi kapristu kuchisu chetenti dakubulakena. 30 Kapristu akalambuli wumu wamulambu wahanshidi, mukwawu wamulambu wakushita; kapristu akamwilili yakumubuta nachu kumesu aYehova nanochu chanapwekiyi hakwikala wamajilu.
it-2 372 ¶2
Kuya kukakweji (kuya kwitala dikwawu)
Mumbanda amumweneña cheñi nawu wamajilu neyi yapwekaña mashi mafuku amavulu habulilaña kuyayi kukakweji, hela “neyi wapwekaña nakupandakesha hayilañayi kwitala dikwawu [kukakweji,]” haniyi mpinji wadiña natuña hakukama hela hakushakama nawa muntu neyi yakwata kuniyi yuma wekalileña wamajilu. Hanyima yakwila nakumishi dehi kupweka, wachindileña mafuku 7, kuhiñahu wekalileña wakadi majilu. Hefuku damu 8, mumbanda waleteleña tutela tuyedi, hela anyana katupompa ayedi, kudi kapristu, wamubutilileñaku hanshidi, wahanineña wumu wamulambu wahanshidi, mukwawu wamulambu wakushita kudi Yehova.—Lev 15:19-30; talenu WUNYONJI, KUBULA MAJILU.
(Alevi 15:31) Mwenimu dimu mumwakayambwila anyana kaIsarela kumajilu awu, kulonda abuli kufwa namajilu awu, hakutamisha tabanaka yami yidi mukachi kawu.
it-1 1133
Iluña Dajila
2. Itenti dakubulakena kuhiñahu tembeli. Ntanjikilu yejima kushilahu nichipañu chatabanaka nichatembeli yadiña himaluña ajila. (Kwi 38:24; 2Ku 29:5; Yil 21:28) Yuma yalema yadiña muchipañu, hikameña kanyilambu nimbashila yawuneñu. Iyi yadiña yuma yajila. Antu akadi majilu diwu hohu eñilileña muchipañu chatabanaka hampinji yejima yinakeñiwu; cheñi kwosi muntu weñilileña muyipañu yatembeli namajiluku. Chakutalilahu, wamumbanda neyi wudi namajilu wakwatileña wanyi kuchuma chejima chajila hela kwinza kwiluña dajila. (Lev 12:2-4) AIsarela atwalekeleñahu kwikala namajilu ayimweneña nawu anakutamisha tabanaka. (Lev 15:31) Ejima aleteleña nyilambu yawu yakuyitookesha nachu kumbumba emeneña hahalehi nachiisu chakuchipañu. (Lev 14:11) Neyi muntu wudi namajilu yada kumulambu wakuwunda hatabanaka hela hatembeli, amujahileña.—Lev 7:20, 21.
Kukeña Yuma Yalema yakuSpiritu
(Alevi 14:14) Hamashi amulambu wakutanya kapristu akanonuhu, akamwomoni owu akukeña kutookeshawu kunsa yetu dindi dachidiilu, nikumunu wedimbanu wakuchikasa chindi chachidiilu nikumunu wedimbanu wakumwendu windi wachidiilu.
(Alevi 14:17) Hamanji akushalahu muchikasa chindi kapristu akanonuhu, akamwomonuwu owu akukeña kutookeshawu kunsa yetu dindi dachidiilu, nikumunu wedimbanu wakuchikasa chindi chachidiilu, nikumunu wedimbanu wakumwendu windi wachidiilu, hohamashi amulambu wakutanya.
(Alevi 14:25) Akajahi nimwana kamukoku wamulambu wakutanya, hamashi amulambu wakutanya kapristu akanonuhu, akamwomonuwu owu akukeña kutookeshawu kunsa yetu dindi dachidiilu, nikumunu wedimbanu wakuchikasa chindi chachidiilu, nikumunu wedimbanu wakumwendu windi wachidiilu.
(Alevi 14:28) Kapristu akanonuhu manji amakwawu adi muchikasa chindi, akamwomonuwu owu akukeña kutookeshawu kunsa yetu dindi dachidiilu, nikumunu wedimbanu wakuchikasa chindi chachidiilu, nikumunu wedimbanu wakumwendu windi wachidiilu hohamashi amulambu wakutanya.
it-1 665 ¶5
Itu
Hampinji yaswanyikileñawu atupristu muIsarela, Mosi amulejeli kunona mashi achizamba chamukoku wazatishiliwu hakuswanyika nakusha kunsa yetu daAroni dachidiilu nikwawanyanindi awamayala, nikumunu wedimbanu wakuchikasa chindi chachidiilu, nikumunu wedimbanu wakumwendu windi wachidiilu, nakumwekesha nawu yuma yatiyileñawu, mudimu wazatileñawu nichendeleñawu jadiña nakwendela hamu nayuma yazatikileña. (Lev 8:22-24) Munjila yoyimu, kutalisha hakutookesha muntu wadiña nambumba, Nshimbi yashimwini nawu kapristu watela kusha mashi achizamba chamukoku wunalambuliwu neyi mulambu, wakutanya nikusha manji ahaniniwu kunsa yetu dachidiilu damuntu wakata mbumba. (Lev 14:14, 17, 25, 28) Iyi ntanjikilu ayizatishileña nikudi muntu wakeñeleña kutwalekahu kwikala nduñu kudi nkanka yindi haya nyaaka. Nduñu amutwalileña kuchenzelu hela kuchipamba chakuchisu nawa nkaka yindi walokweleña kwitu dindi namukumbu. Ichi chinjikilijilu chashileñawu kwitu, chamwekesheleña nawu nduñu nakukeña kutwalekahu kumwovwahila nkanka yindi.—Kwi 21:5, 6.
(Alevi 14:43-45) Hakela nafumishi dehi malola, nakooli dehi itala, nadisoti dehi, kutala musoñu iwukwinza cheñi nakwidika mwitala, 44 kapristu akeñilumu nakutala, neyi wakamona musoñu wunayi nakuswila mwitala, himbumba yasumana mwitala; damajilu. 45 Odu itala akadisandi, nimalola adu, ninyitondu yadu, nimaseki etala ejima, akayifumishi hamukala, akayitwali kumajilu.
g 1/06 14, chikasha
Kabuwa—Ibwambu niChilumbu!
KABUWA MUMAFUKU AKUNYIMA
Bayibolu yashimuna “musoñu [wambumba] wunayi nakuswila mwitala,” dikwila nawu mwitala mwamweni. (Alevi 14:34-48) Antu amakwawu ashimunaña nawu iyi mbumba diyatenañawu nawu “mbumba yasumana mwitala,” himbumba yakabuwa hela iwumba. Ilaña haniyi nsañu kwosi weluka. Hela chochu, Nshimbi yaNzambi yashimwini nawu mwiniitala wateleli kufumisha malola ejima adiña namusoñu, nikukoola maseki mwitala dejima nikunatila yuma yejima yamweñeyi nindi yamajilu kunsa yamukala “kumajilu.” Neyi musoñu wufunta cheñi, itala dejima adimweneña nawu damajilu nawa adihumwineña dejima. Iyi nshimbi yahaniniyi Yehova yamwekesheleña nawu wayikeña antu jindi nawa wayakameneneña kumujimba.
Kutaña Bayibolu
(Alevi 14:1-18) Yehova wahosheli naMosi, 2 nindi, Tiya lushimbi lwamukwambumba lwamwifuku dakumutookesha. Nawu akamuleti kudi kapristu. 3 Kapristu akafumi muchilombu; kapristu akatali, neyi wakamona musoñu wambumba wunamufumi dehi mukwambumba, wunakusuki, 4 kapristu akayileji kumukwatila akukeña kutookeshawu atujila amomi iyadyañawu ayedi, akanoni nimutondu musida, niwanda wuchinana, nimutuntamu. 5 Kapristu akayileji kujahila kajila wumu munuñu yewumba, hewulu dameji adi nakuhita; 6 hakwila kajila wamumi akamunoni, nimutondu musida, niwanda wuchinana, nimutuntamu, akayijimiki hamu nakajila wamumi mumashi akajila anajahiluwu hewulu dameji adi nakuhita; 7 owu akukeña kutookeshawu mbumba akamusampwili mapampa katanu nakayedi, akamuteni nindi natooki, kajila wamumi akamuumbuku akayi tuhu mumpata. 8 Owu akukeña kutookeshawu akakosi mahinindi, akatewuli nsuki jindi jejima, akaweli mumeji, akatooki; neyi neli dehi chochochu akeñili muchilombu, ilaña akakamaña hanzi yetenti dindi mafuku atanu nayedi. 9 Hefuku damuchitanu nachiyedi akatewuli nsuki jindi jejima kumutu windi, niwevu windi, ninkuñu jindi, akatewuli kafwampi joji nsuki jindi jejima; akakosi mahinindi, akaweli mumeji, akatooki. 10 Hefuku damuchitanu nachisatu akakwati anyana kanyikoku ayizamba akadi hataminawu ayedi, nimwana kamukoku wamukaji wamwaka wumu wakadi hataminayi wumu, akanoni mabañu asatu awuña walembuluka wamulambu wawuña, wakubomba namanji, nichipunda chamanji chimu; 11 owu kapristu wakamutookesha akamushi owu muntu akukeña kutookeshawu, niyumoyu, kuchisu chetenti dakubulakena, kumesu aYehova. 12 Kapristu akanoni mwana kamukoku wachizamba wumu, akamulambuli himulambu wakutanya, nichipunda chamanji, akayinyinkeshi kumesu aYehova, himulambu wakunyinkesha. 13 Mwana kamukoku wachizamba akamujahili kwajahilañawu mulambu wahanshidi nimulambu wakushita, mwomu mumalala; muloña neyi chiwuneli mulambu wahanshidi wambala wakapristu, dichi chiwuneli nimulambu wakutanya, wasweja kujila. 14 Hamashi amulambu wakutanya kapristu akanonuhu, akamwomoni owu akukeña kutookeshawu kunsa yetu dindi dachidiilu, nikumunu wedimbanu wakuchikasa chindi chachidiilu nikumunu wedimbanu wakumwendu windi wachidiilu; 15 kapristu akanoni manji muchipunda, akahuñunwini muchikasa chindi yomweni chachimunswa; 16 kapristu akatumpiki munu windi wachidiilu mumanji adi muchikasa chindi chachimunswa, akasampuli manji namunu windi kumesu aYehova mapampa katanu nakayedi. 17 Hamanji akushalahu muchikasa chindi kapristu akanonuhu, akamwomonuwu owu akukeña kutookeshawu kunsa yetu dindi dachidiilu, nikumunu wedimbanu wakuchikasa chindi chachidiilu, nikumunu wedimbanu wakumwendu windi wachidiilu, hohamashi amulambu wakutanya; 18 manji adi muchikasa chakapristu anashaluhu akahuñununi hamutu wanowu akukeña kutookeshawu; kapristu akamwilili yakumubuta nachu kumesu aYehova.
DECEMBER 28–JANUARY 3
YUMA YALEMA YAMWIZU DANZAMBI | ALEVI 16-17
“Ifuku daKubuta Nshidi niNenu”
(Alevi 16:12) Akookoli cheña chakusendelaña insensi chamakala akesi to-o kukameña kadi kumesu aYehova, akenzeshi makasindi to-o nainsensi yevumba dadiwahi yakuchikachika, akaleti mukachi, kunyima yehina dakujika.
Yuma Yitunateli Kudizila kuMukanda waAlevi
Tañenu Alevi 16:12, 13. Toñojokenu hachuma chamwekeneña Hefuku Dakubuta Nshidi. Kapristu Muneni neñili mutabanaka. Aka dikatachi kwiñila hakapampa kasatu katela kwiñilayi Mwamweni Mwajila hanidi ifuku. Chikasa chimu, nasendeliku cheña hadi insensi yevumba dadiwahi nawa kuchikwawu nakwatiliku fwosholu hadi makala akesi to-o! Nemani kwakwihi nehina dajika hawiñililu wakapeka kaMwamweni Mwajila. Nakalemesha kakeni, neñili Mwamweni Mwajila nawa nemani kuchimbañu chachitiyañenu. Dikwila nawu nemani kumesu aYehova Nzambi muchifwikija. Dichi kapristu nechili insensi yajila hamakala akesi nawa mukapeka munepuki Ivumba dadiwahi. Kuhiñahu, wukwiñila cheñi Mwamweni Mwajila namashi amulambu wanshidi. Dichi nasambili kwocha insensi henohu kanda yalambuli mashi amulambu wanshidi.
(Alevi 16:13) Akashi insensi hakesi kumesu aYehova, kulonda ivu dawishi dainsensi dakabuti hetanda daluwi didi hachitiyañenu, kulonda yena abuli kufwa.
Yuma Yitunateli Kudizila kuMukanda waAlevi
Yumanyi yitwatela kudizila kuinsensi yazatishileñawu Hefuku Dakubuta Nshidi? Bayibolu yamwekeshaña nawu kulomba kwetejañayi Yehova kwawakwakudifukula indi ashinshika kudi neyi insensi. (Mas. 141:2; Chim. 5:8) Mwatela kwanuka nenu kapristu muneni wamwekesheleña kalemesha kakeni hakuleta insensi kumesu aYehova. Munjila yoyimu, neyi tunakulomba kudi Yehova twalombaña nakalemesha kakeni. Twazañalalaña chikupu kwiluka netu Nleñi wakuleña kwejima watwitejaña kuswina kwakwihi nayena neyi chekalaña mwana natata yindi. (Yak. 4:8) Watwiteja kwikala amabwambu jindi. (Mas. 25:14) Twalemesha nankashi ichi chawaana chakwila twakeñaña kwila yuma yinateli kumuneñesha wanyi.
(Alevi 16:14, 15) Akanonuhu mashi añombi, akasampuli namunu windi hetanda daluwi kumusela; akanoni mashi amakwawu, akasampuli kumesu etanda daluwi namunu windi mapampa katanu nakayedi. 15 Akajahi nimpembi wamulambu wahanshidi, wahanyijimba yawantu, akaleti mashi indi mukachi, kunyima yehina dakujika, mashi indi akayili mwomweliliyi namashi añombi, akayisampuli nihewulu detanda daluwi, nikumesu etanda daluwi.
Yuma Yitunateli Kudizila kuMukanda waAlevi
Kapristu muneni wasambilileña kwocha insensi henohu kanda yalambuli mulambu. Chasambilileñayi kwocha insensi, wamwekesheleña nindi Nzambi wukumutiya kuwaha. Chumanyi chitwatela kudizilaku? Hampinji yadiñayi Yesu hamaseki, wazatilihu chuma chimu chalema henohu kanda yahani wumi windi kwikala mulambu, chuma chalema kubadika kukuula muchidi wamuntu. Chumanyi chenichi? Wateleleli kumwovwahila Yehova muchihandilu chindi chejima heseki kulonda Yehova yeteji mulambu windi. Kwila mwenimu, Yesu wamwekesheleña nindi kwila yuma yamutiyishaña Yehova kuwaha dichuma chachiwahi. Nawa wamwekesheli cheñi nindi chiyuulu chaTata yindi chachiwahi nawa dichinashikilimu kuyuula.
Kukeña Yuma Yalema yakuSpiritu
(Alevi 16:10) Mpembi yinaholokeli chinjikijilu chakukinjika nachu akamwimiki wamumi kumesu aYehova, kulonda kwila yakubuta nachu, kulonda amutwali mwisaña ekali wakukinjika.
it-1 226 ¶3
Chinjikijilu Chakukinjika Nachu
Neyi chalumbulwiliyi kapostolu Pawulu, nindi Yesu chahaniniyi wumi windi wawanina nakwikala mulambu wanshindi yawantu, mulambu windi wazatili mudimu weneni kubadika “mashi awañombi ayizamba niawampembi.” (Heb 10:4, 11, 12) Dichi wekalili ‘chinjikijilu champembi wakukinjika nachu,’ ‘mukwakusenda yihuñu yetu’ nawa “amukatishilili [kukoola] nyiloña yetwetu.” (Isa 53:4, 5; Mat 8:17; 1Pe 2:24) ‘Wasendeli’ nshidi jawantu ejima akuhwelelaña mumulambu windi. Wamwekesheli Nzambi chakafumishayi nshidi jejima haya nyaaka. Muniyi njila mpembi ‘wachinjikijilu chakukinjika nachu’ wemenañaku mulambu waYesu Kristu.
(Alevi 17:10, 11) Neyi hamutaña waIsarela, hela hadi enyi ashakamawu nawu, hakekala muntu wakadya mashi wowu anadyi wowu, yenowu muntu wakadya mashi nakamutala nakuhila, chiña hadi akwawu nakamufumishahu. 11 Muloña wumi wamujimba wekala mumashi, nayinkeluwu hakameña ekalaña akudibuta nachu, muloña mashi diwu abutañawu nachu nanochu chiyakweti wumi.
Muloña Wutwatelela Kwikala Ajila
Tañenu Alevi 17:10, 14. Yehova wayilejeli aIsarela kubula kudya “mashi ambiji himbiji.” AkwaKristu ayikaanisha kudya mashi akanyama hela kwiteja kuyisha mashi mumujimba. (Yilw. 15:28, 29) Twatiyaña woma hamuloña wakwila nawu Nzambi nateli ‘kututala nakuhila’ nikutuhaña muchipompelu chindi. Twamukeña nawa twafwilaña kumwovwahila. Hela chakwila wumi wetu wudi hakatoña, hitwakeñaña kutiyilila chinakutulejawu kudi antu abula kumwiluka Yehova nawa abulaña kukeña kumwovwahilaku. Eñañi, tweluka netu antu anateli kutuseha hamuloña wakukaana mashi, ilaña twatondahu kumwovwahila Nzambi. (Yuda 17, 18) Chumanyi chinateli kutukwasha haniyi nsañu kulonda ‘tushinshiki’ nakubula kudya mashi hela kubula kwiteja kutwisha mashi mumujimba?—Kuhit. 12:23.
Kutaña Bayibolu
(Alevi 16:1-17) Yehova wahosheli naMosi hafwiluwu anyana kaAroni ayedi, hakundaminuwu kumesu aYehova hiyakufwa. 2 Yehova hakuhosha naMosi, nindi, Hoshaku namana kweyi Aroni, neyi kwinzaña mwajila kunyima yehina dakujika, kumesu etanda daluwi didi hachimbañu, honsu hanenjiliyi hohu, chinjila, wakenza kafwa; muloña ami nakamwekana mwivu hetanda daluwi. 3 Tiya yakenzañayi nachu Aroni mwajila; akenzi neyoña dañombi weyala wamulambu wahanshidi, nichizamba chamukoku wamulambu wakushita. 4 Akavwali chikovwelu chajila chawanda wawuwahi. Mumujimba windi akavwali kaputula kawanda wawuwahi. Akavwali nimuya wawanda wawuwahi. Akavwali ninkuku yawanda wawuwahi. Diyi yuma yajila yakuvwala. Akaweli mumeji, hakuyivwala. 5 Akatambuli kudi anyana kaIsarela mwakapompelawu yizamba yampembi yiyedi yamulambu wahanshidi, nichizamba chamukoku wamulambu wakushita. 6 Aroni akashikiji ñombi wamulambu wahanshidi, wahamujimba windi yomweni, akeli yakudibuta nachu yomweni niakwetala dindi. 7 Akakwati yizamba yampembi yiyedi, akayiimiki kumesu aYehova kuchisu chetenti dakubulakena. 8 Aroni akasakuli oju mpembi jiyedi nayinjikijilu, chinjikijilu chimu chaYehova, chinjikijilu chikwawu chakukinjika nachu. 9 Aroni akashikiji mpembi yinaholokeli chinjikijilu chaYehova, akamulambuli wamulambu wahanshidi. 10 Mpembi yinaholokeli chinjikijilu chakukinjika nachu akamwimiki wamumi kumesu aYehova, kulonda kwila yakubuta nachu, kulonda amutwali mwisaña ekali wakukinjika. 11 Aroni akashikiji ñombi wamulambu wahanshidi wahamujimba windi yomweni, akeli yakudibuta nachu yomweni niakwetala dindi, akajahi ñombi wamulambu wahanshidi wahamujimba windi yomweni. 12 Akookoli cheña chakusendelaña insensi chamakala akesi to-o kukameña kadi kumesu aYehova, akenzeshi makasindi to-o nainsensi yevumba dadiwahi yakuchikachika, akaleti mukachi, kunyima yehina dakujika. 13 Akashi insensi hakesi kumesu aYehova, kulonda ivu dawishi dainensi dakabuti hetanda daluwi didi hachitiyañenu, kulonda yena abuli kufwa. 14 Akanonuhu mashi añombi, akasampuli namunu windi hetanda daluwi kumusela; akanoni mashi amakwawu, akasampuli kumesu etanda daluwi namunu windi mapampa katanu nakayedi. 15 Akajahi nimpembi wamulambu wahanshidi, wahanyijimba yawantu, akaleti mashi indi mukachi, kunyima yehina dakujika, mashi indi akayili mwomweliliyi namashi añombi, akayisampuli nihewulu detanda daluwi, nikumesu etanda daluwi; 16 akeli yakubuta nachu mwajila nansañu jamajilu awanyana kaIsarela, nansañu janyiloña yawu kafwampi nshidi jawu jejima; dichi chakelilayi itenti dakubulakena dekalawu nadu mukachi kamajilu awu. 17 Chakwiñilayi nakwila yakubuta nachu omu mwajila, nichakwidikayi, neli dehi yakubuta nachu niyena, niakwetala dindi, nichipompelu chawaIsarela chejima, mwejimomu muntu kwikala mwitenti dakubulakena nehi.