Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2023 Watch Tower Bible and Tract Society of Pennsylvania
JANUARY 1-7
YUMA YALEMA YAMWIZU DANZAMBI | YOBA 32-33
Kundejenu Antu Anakwakama
it-1 710
Elihu
Elihu wadiña nachaambu wanyi, hahoshelihu muntu wudi wejima chatamaku. Welukili nindi niyena amuwumbili nandambu neyi chochamuwumbiliwu Yoba nawa nindi Mukañovu Jejima diyi Nleñi yindi. Elihu hakeñeleña kumutiyisha woma Yobaku, ilaña wahanjekeli nindi neyi ibwambu walala, wamuteneneña hejina, chuma chabuliliyi kwilayi Elifazi, Bilidadi, hela Zofari.—Yob 32:21, 22; 33:1, 6.
Mwamonaña Kuzeyazeya Kwawakwenu Neyi Yehova?
8 Neyi twanukaña netu amana kwetu amakwawu niahela anazeyi hamuloña wayihuñu yinakumonawu, yidi neyi yikatu, kushakama muchisaka chambokelamu mukwitiya, hela chineñi, tukuyitiyilaña luwi chikupu. Anetu nawa ifuku dimu twamba kamona kukala kokumu. Henohu kanda eñili Mwituña daChikaninu, aIsarela, adiña atuzweñi nawa abulili ñovu mwituña daEjipitu, ayilejeli nawu bayi ‘achinchikisha nyichima yawu’ kudi amana kwawu adiña mukukalaku. Yehova wayilejeli nindi ateleleli kukwasha atuzweñi akeñekeleña kuyikwasha.—Kuhit. 15:7, 11; Lev. 25:35-38.
9 Chatela tuyitwikeña nyiloña hela kuyijinooka, twatela kukolesha antu anakumona kukala namazu amuBayibolu. (Yoba 33:6, 7; Mat. 7:1) Chakutalilahu: Neyi muntu wudi hakatukutuku amukatisha mumaposu ahamukwakwa nawa amutwala kuchipatela, komana andotolu atachikaña kwihula neyi diyi wakojeja maposu? Inehi, ashikenaña dakumwinka muntu yitumbu. Munjila yoyimu, neyi mukwetu mukwakwitiya nazeyi hamuloña wakukala kunakumonayi, twasambilaña kumukolesha naBayibolu.—Tañenu 1 ATesalonika 5:14.
10 Neyi tutoñojokaña hakukala kunakumonawu amana kwetu, tunateli kumona kuzeyazeya kwawu munjila yacheñi. Toñojokenu hadi muhela wunomiki ikañesha muchisaka hadi yaaka yayivulu. Amakwawu ekala adizoza nawa amwekanaña kuzeya, ilaña amwekeshaña chikuhwelelu chakola niñovu. Neyi mumona mama yawantu wabula kusumbuka wenzaña mpinji yejima kukupompa namwanindi hela nawanyana, komana himwazañalalaña hachikuhwelelu chindi nikutatakena kwamwekeshañayuku? Toñojokenu cheñi hadi anyana anakukolela kuchalala hela chakwila amonaña kukala hashikola. Yuma yejimiyi, yatukwashaña kwiluka netu antu amwekanaña neyi azeya diwu ‘aheta muchikuhwelelu’ neyi chekala amakwawu hakachi ketu anakuhanda chiwahi.—Yak. 2:5.
Mpinjinyi Yatelela Yitwatela Kuhosha?
17 Iyala wamuchiwana wamwendeleli Yoba wadiña Elihu ntaña yaAbarahama. Wadiwunjikili mpinji yadiña nakuhoshayi Yoba ninana amayala asatu. Chakadi nikujina, watiyilili nakanañachima yuma yahosheleñawu chakwila wamufumbili Yoba nawushona ilaña chakadi kumuhita mumbadi nawa chumichi chamukwashili Yoba kuhimpa yitoñojoka yindi. (Yoba 33:1, 6, 17) Chuma chacheni chafwilileñayi Elihu hikumulemesha Yehova, bayi yomweni hela muntu wacheñiku. (Yoba 32:21, 22; 37:23, 24) Kudi Elihu twadizilañaku netu kudi mpinji yakumwena niyakutiyilila. (Yak. 1:19) Twadizilañaku cheñi netu, neyi tunakufumbana tufwileña kumulemesha Yehova bayi etu aweniku.
18 Tukumwekesha netu twalemesha chawana chakuhosha neyi tuzatishaña kufumba kwamuBayibolu kutalisha hampinji yakuhosha nichakuhosha. Mwanta wamaana Solomoni amoneneni kusoneka nawu: “Izu dakuhoshela hidinateleli didi neyi mabula awuru analoñejuwu mumabañu asiliva.” (Yish. 25:11) Neyi tutiyilila nakanañachima kumazu anakuhoshawu akwetu nawa tutoñojokahu henohu kanda tuhoshi, mazu etu akwikalaña neyi mabula awuru, alema nawa amawahi. Dichi, hela chakwila twawunda hela twalokota, nhoshelu yetu yinateli kutuña antu nawa tukumuzañalesha Yehova. (Yish. 23:15; Efwe. 4:29) Iyi diyi njila yayiwahi yitwatela kumusakililamu Nzambi hanichi chawana.
Yuma Yalema yakuSpiritu
Twalekenuhu Kukundama Kwakwihi naYehova
10 Chochimu, chachiwahi kusha maana kummwekenu yetu. Ilaña bayi tufumishaña yinjikijilu yejima yinakumwekesha nawu tunakuli dehi. Iyi yinjikijilu yamwekeshaña kupama, kalemesha nikuwaha kwamukachi. Chakutalilahu, Bayibolu yahosha nawu: “Mutu wanvu hichibañula chalubanji neyi akuwuwana munjila yakuloña.” (Yish. 16:31) Ichi dichatumonañayi Yehova nawa twatela kudimwonaña neyi chatumonañayi yena. (Tañenu 1 Petulu 3:3, 4.) Komana chachiwahi kusha wumi wenu hakatoña kuhitila mukuyiladika hela kuzatisha yitumbu kulonda mumwekaneña chiwahi nankashi kumujimba? Hela chakwila tunashinakaji hela twakola kumujimba, kuwaha kwalala kwamukachi kwafumaña hakwikala ‘namuzañalu waYehova.’ (Nehe. 8:10) Mwituña dadiha hohu dimutwakekala akola chikupu kumujimba nikufunta cheñi kuwansi. (Yoba 33:25; Isa. 33:24) Chayinu mpinji twatela kumwekesha maana nichikuhwelelu kulonda tukundami kwakwihi naYehova nikudiluñisha wumi sampu iyi mpinji yinashiki dehi.—1 Tim. 4:8.
JANUARY 8-14
YUMA YALEMA YAMWIZU DANZAMBI | YOBA 34-35
Neyi Yuma Yinakuyitamina muChihandilu
Yilwilwinyi Yikwetiyi Nzambi?
Nzambi welaña mwoloka. Nawa, “Nzambi kwila chatama kwakulehi! Chinaweji kwila yakuheña kwakulehi!” (Yoba 34:10) Wunsompeshi windi woloka neyi chahosheli ñimbi yamasamu wumu kutalisha hadi Yehova nindi: “Wakasompesha antu mwaloña hohu.” (Masamu 67:4) Chineli “Yehova watalaña kumuchima,” wamonaña wunfwikiji nikashinshi kamuntu nawa wafuukulaña chiwahi. (1 Samweli 16:7) Cheñi, Nzambi weluka mwejima mwatwilañawu chatama nikuheña kwejima kudi heseki. Nashiiki nindi “antu atama akayifumisha mwituña.”—Yishimu 2:22.
Yumanyi Yikajiya Neyi Wanta waNzambi Wunenzi?
5 Yehova wakeladi? Yehova nakuyinka antu mpinji yakuhimpa yilwilu yawu yatama. (Isa. 55:7) Awa antu kanda ayisompeshi. Ilaña nshakaminu yamakonu ayisompesha dehi. Indi antu anakukaana kuhimpa yilwilu yawu, anakutwalekahu kwila yuma yanshakaminu yamakonu kushika nihakatachika lukadi lwasweja? Yehova wahosha nindi wakajilumuna antu ejima atama hamaseki. (Tañenu Masamu 37:10.) Antu atama anateli kutoñojoka nawu akayijilumuna wanyi. Amavulu aswekaña yuma yelañawu nawa kwosi wunakuyibabesha mukanu kaayi nawa hiyanakumona yuma yatama yinakufuma muyuma yelañawuku. (Yoba 21:7, 9) Ilaña, Bayibolu yashimunaña nawu: “Mesu [aNzambi] atalaña mwendelaña muntu, wamonaña mwayañayi mwejima. Hikudi mwidima, hela wulelu wakufwa, kwakubatama akwakukoña yakuluwaku.” (Yoba 34:21, 22) Kwosi muntu wunateli kuswama kudi Yehova Nzambi. Kwosi muntu wunateli kumuluwañesha; nawa kwosi mwidima hela wulelu wunateli kumukañesha Nzambi kumona yuma yinakumwekana. Hanyima yaAmagedoni, twakatalatalaña hadiña antu atama, ilaña twakayimona wanyi. Akekala ayijilumuna dehi haya nyaaka!—Mas. 37:12-15.
Mukwiteja Chuma Chidi Chejima Chiyikañeshi Kumulondela Yesu?
19 Komana dichidiwu antu makonu? Eña. Makonu antu amavulu ahukanaña muloña twadiñijaña wanyi mujamatuña nachiyuulu. Akeñaña nawu ninetu tudibombi nawu hakutonda anlomboli. Ilaña, tweluka netu neyi tutonda muntu netu yekali nlomboli yetu, dikwila nawu tunakumukaana Yehova. (1 Sam. 8:4-7) Antu anateli cheñi kukeña nawu tutuñeña mashikola, yipateli nikuhana wukwashu kudi antu. Akaanaña nsañu yetu muloña twasha muchima hamudimu wakushimwina, bayi hakumanisha kukala kudi mukaayiku.
20 Tunateli kwila ñahi kulonda tubuleña kuhukana? (Tañenu Matewu 7:21-23.) Twatela kusha muchima hamudimu watulejeliyi Yesu kuzata. (Mat. 28:19, 20) Bayi tuluwankana nansañu jamwituña nikukeña kumanisha kukala kudimuku. Twayikeña antu nawa twakamaña nakukala kukwetiwu, ilaña tweluka netu njila yayiwahi yakukwashilamu akwetu, hikuyidizisha nsañu yaWanta waNzambi nikuyikwasha ekali amabwambu jaYehova.
Yuma Yalema yakuSpiritu
Spiritu Yenu Yakudihana Yimushimeki Yehova!
3 Elihu amuzuwilili wanyi kudi Yehova chenhwiliyi nindi: “Neyi waloña, chiwamwinkaña [Nzambi]; chumanyi chatambwilañayi kudi eyi?” (Yoba 35:7) Komana Elihu watalishili mukwila nindi nyidimu yitwamukalekelaña Nzambi yamukunkulwayi? Inehi. Watalishili mukwila nindi Yehova washindamenaña wanyi hakudifukula kwetu. Yehova wakankila wanyi. Kwosi chuma chidi chejima chitunateli kwila chikuletesha yaheti hela kwikala nañovu. Muloña Nzambi diyi watwinka yuma yejima yayiwahi, yawaana yitukweti hela ñovu jitukweti, nawa wamonaña chitwayizatishaña.
JANUARY 15-21
YUMA YALEMA YAMWIZU DANZAMBI | YOBA 36-37
Kuhwelelenu muChikaninu chaNzambi chaWumi Wahaya Nyaaka
Komana Chalala Tunateli Kumwiluka Nzambi?
NZAMBI WAHAYA NYAAKA: Bayibolu yatulejaña nawu Nzambi wadiñaku “kufuma kunyaaka oko-o nakuya haya nyaaka.” (Masamu 90:2) Chumichi chinatalishi mukwila nawu, Nzambi hekala nantachikilu hela kwikala nansaku. Kwesekeja nachitwekala etu antu, “yaaka yindi hitukutwesha kuyilukaku.”—Yoba 36:26.
Kuwaha kwekalamu: Nzambi wayishiika nindi wakayinka wumi wahaya nyaaka neyi mumwiluka. (Yowanu 17:3) Nzambi nateli kushiika ñahi antu nindi mwakashakama haya nyaaka neyi chakwila yena kwila yatwesha kushakama haya nyaakaku? Muntu wunateli kushikija hohu ichi chikaninu “[hi]Mwanta wahaya nyaaka.”—1 Timotewu 1:17.
Mwasakililaña haYawaana Yayinkayi Nzambi?
6 Tukweti Menji muloña wakwila iseki dekala heluña datelela netena. Neyi iseki adiswijaku chanti kwitena, menji ejima akuuma nawa iseki dikutata chakwila kwosi chileñaleña chachumi chikuhandaku. Nawa neyi iseki adifumisha hidekala nawa adiswija kwakulehi netena, menji ejima akudikwata nawa iseki dikwikala ilola. Chineli Yehova washa iseki heluña datelela, menji akwashaña yileñaleña yikweti wumi. Mwaana watatishaña menji mukaluñalwiji niheseki nawa menji akakumukaña nakuya muluzwizu nakutuña mavu. Chaaka nichaaka itena dakakumwishaña mamiliyoni namamiliyoni amalita amenji kufuma heseki. Awa menji ashakamaña muluzwizu mafuku ikumi henohu kanda ekali nvula hela nvula yachishika yitooka. Kuhiñahu menji afuntaña cheñi mutuluñalwiji hela mutuloña nawa chatwalekañahu chochenichi. Yehova chaleñayi menji muniyi njila chamwekeshaña nawu wukweti maana niñovu chikupu.—Yoba 36:27, 28; Mukwa. 1:7.
Chiñejenuña Chikupu
16 Kuchiñeja kutwachiñejaña wumi wahaya nyaaka hichawaana chatwinkayi Nzambi. Tunakutalila yuma yayiwahi kumbidi, yitweluka chikupu netu yikamwekana. Yekala neyi chikuñu chakwimika nachu, yatukoleshaña kulonda tuumiki kukala, makabisha nikufwa. Yekala neyi itepa detu, dakiñaña yitoñojoka yetu kulonda tutondolweli yuma yatama nakukakela yaloña. Kuchiñeja kwetu kwashindamena haBayibolu kwatukwashaña kuswina kwakwihi naNzambi nawa kwamwekeshaña chaswejayi kutukeñayi.
Yuma Yalema yakuSpiritu
it-1 492
Kuhanjeka
Nsañu yendeleña kufuma kudi muntu wumu nakushika kudi mukwawu munjila yambokamboka mumatuña akushankulu ashimunawu muBayibolu. Nsañu yinamwekani mwiluña niyakwacheñi ayishimwineña hohu hakanwa. (2Sa 3:17, 19; Yob 37:20) Akakwenda, endeleleña mumakalu, diwu ashimwineña nsañu kumaluña akwakulehi neyi anemani nakuda, kunwa menji hela kwila yuma yikwawu munyisumba hela anakuya munyikwakwa. Kwambukaku namaluña amuAsia, Africa, niEurope, ituña Palesitini mwavulili antu endeleña namakalu. Dichi antu amunidi ituña atiyileña nsañu yakumatuña acheñi kudi awa antu. Nsañu, yamwituña niyakwacheñi, kakavulu ayitilileña kujimaketi jamunyisumba.
JANUARY 22-28
YUMA YALEMA YAMWIZU DANZAMBI | YOBA 38-39
Komana Mwekala naMpinji Yakubanjila Yileñaleña?
Muchiñililenuña Yehova Yakawahishi Yuma?
7 Hakulumbulula Yehova chaleñeliyi Iseki, Bayibolu yashimuna “yesekelu yachu, kushimika “chikuku” nikusha “ilola dakwiwombu.” (Yoba 38:5, 6) Nawa wadiña ninampinji yakubanjila yuma yaleñeliyi. (Kutach. 1:10, 12) Fwikijenu chatiyiliwu añelu hakumona yuma yaleñeleñayi Yehova chovu-chovu. Azañaleli chikupu. Hamuloña wachumichi “hiyakudikuwa nakuzañalala.” (Yoba 38:6) Chumanyi chitunakudizilaku? Hahitili yaaka yayivulu hakwila nawu Yehova yamanishi kuleña, ilaña chatalileñayi yuma yaleñeliyi, wahosheli nindi “yinawahi.”—Kutach. 1:31.
Kusañuka Kwamwekeshaña Nawu Nzambi Wukweti Kukeña, Maana, nawa Wadiwunjika
2 Chatachi, Yehova waleñeli mwanindi, Yesu. Dichi kuhitila mudi Mwanindi, “dimwaleñeleliwu yuma yejima” kushilahu niañelu. (Kol. 1:16) Yesu wazañaleli kuzatila hamu naTata yindi. (Yish. 8:30) Añelu niwena azañaleli. Adiña kwoku mpinji yaleñeleñayi Yehova niMukalawenu windi, Yesu, mawulu nimaseki. Añelu elili ñahi? Chelili aleñi maseki “hiyakudikuwa nakuzañalala” nawa chakadi nikujina, atwalekelihu kumushimeka Yehova hayuma yaleñeliyi kushilahu tuhu niantu. (Yoba 38:6; Yish. 8:31) Yileñaleña yejimiyi yamwekeshaña nawu Yehova wukweti kukeña nimaana.—Mas. 104:24; Rom. 1:20.
Ilukilenuhu Yuma Yayivulu Hadi Yehova Kuhitila muYileñaleña Yindi
8 Twatela kumukuhwelela Yehova. Yehova wamukwashili Yoba kulonda asweji kumukuhwelela. (Yoba 32:2; 40:6-8) Hampinji yahanjekeleñayi naYoba, Nzambi wateneni yileñaleña yayivulu, kushilahu tutumbwa, mavu nikukenashana. Yehova wahosheli cheñi hadi anyama, chidi neyi iboñu dañombi nikawalu. (Yoba 38:32-35; 39:9, 19, 20) Yuma yejimiyi hiyamwekesheli hohu ñovu yabadika yikwetiyi Nzambiku, ilaña yamwekesheli cheñi kukeña kwindi nimaana indi asweja. Muloña waniyi mpanji, Yoba wamukuhweleleli Yehova chikupu. (Yoba 42:1-6) Munjila yoyimu, neyi tushinshikaña chekala yileñaleña, twelukaña netu Yehova wukweti maana niñovu jasweja kubadika etu. Nateli cheñi kumanisha kukala kwejima kutwamonaña nawa wakakumanisha. Chumichi chinateli kutukwasha kumukuhwelela chikupu.
Yuma Yalema yakuSpiritu
it-2 222
Mukakuhana Nshimbi
Yehova diyi Mukakuhana Nshimbi. Kafwampi Yehova hohu diyi Mukahana Nshimbi walala mwahita kuleña kwejima. Diyi wenkaña nshimbi yileñaleña yabula wumi yamumawulu (Yob 38:4-38; Ms 104:5-19), nianyama. (Yob 39:1-30) Muntu niyena, amuleña kudi Yehova, walondelaña nshimbi jaYehova, nawa chineli hichileñaleña wukweti maana, wukweti wuswa wakutoñojoka nimaana akumwiluka Nzambi, niyena watela kwovwahila nshimbi jaNzambi. (Rom 12:1; 1Ko 2:14-16) Kubombelahu, nshimbi jaYehova jalombolaña yileñaleña yakuspiritu, añelu.—Ms 103:20; 2Pe 2:4, 11.
Nshimbi jaYehova yayuulaña yileñeleña yindi jafumpewaña wanyi. (Yer 33:20, 21) Yuma yejima yaleñawu yitweluka yalondelaña nshimbi jindi jabulaña kuhimpa, mpinji yikwawu asayantisiti elukaña chendaña kakweji chakadi kulweza, mapulaneti niyileñaleña yikwawu yayivulu yamumawulu. Neyi chuma chimu chibula kulondela iyi nshimbu muteli kufuma kukala kweneni chikupu. Munjila yoyimu, nshimbi jaNzambi hiyatela kujihimpa hela kubula kujilondelaku. Nshimbi jindi jidi tuhu neyi jalondelaña yileñaleña yabula wumi, hela chakwila hakanjikijaña antu ejima kujilondelaku. “Nzambi hiyamusupishañaku. Muloña chuma chinakukuwayi muntu, dichakamunayi.”—Ñal 6:7; 1Ti 5:24.
JANUARY 29–FEBRUARY 4
YUMA YALEMA YAMWIZU DANZAMBI | YOBA 40-42
Yuma Yitwadizaña Kuyuma Yamweniyi Yoba
“Hinyi Weluka Mwatoñojokañayi Yehova?”
4 Chitukutoñojokaña hanyidimu yaYehova, twatela kutondolwela chaaku chakumutwika Nzambi muloña kwesekeja nayitoñojoka yetu. Ichi chaaku achilumbulula mumazu ahosheliyi Yehova muMasamu 50:21 nawu: “Eyi watoñojokeli neyi ami nekala chochiwekala eyi aweni.” Awa mazu anesekani nachahosheliyi kadizi waBayibolu yaaka 175 yinahituhu nindi: “Antu ekala nachaaku chakumutwika Nzambi muloña kwesekeja nayitoñojoka yawu, nawa atoñojokaña nawu Nzambi walondelaña nshimbi neyi jalondelañawu antu.”
5 Twatela kushaku kashinshi kulonda tubuleña kumumona Yehova kwesekeja nanshimbi niyitoñojoka yetu yawuntu. Muloñadi? Muloña chitukudizaña Nsona, kwesekeja nayitoñojoka yetu yabula kuwanina tukukañanyaña kwiluka mwelañayi Yehova. AIsarela akushankulu niwena atoñojokeleña munjila yoyimu nawa atoñojokeleña mwaluwa nawu mwelileñayi Yehova mwaheña. Talenu chayilejeliyi Yehova nindi: “Hakwinza enu mudi nakwila nenu, Mwelañayi Mwanta [Yehova] himwesekanaku. Enu akwamutaña waIsarela, tiyenu dinu, komana munelañami himwesekanaku? Mwabula kwesekana himwomu mumwelañenuku?”—Ezek. 18:25.
6 Chuma chimu chikutukwasha kutondolwela kumutwika Yehova muloña kwesekeja nayitoñojoka yetu chidi chakwiluka netu yitoñojoka yetu hiyawaninaku nawa mpinji jikwawu twatoñojokaña mwaheña chikupu. Ichi dichuma chateleleli kudizayi Yoba. Hampinji yamweniyi yihuñu, Yoba waneñeli chikupu nawa watachikili kudiyiñisha yomweni. Wakañenyi kwiluka kwafumineña kukala kwamweneñayi. Ilaña Yehova wamukwashili kwiluka yuma yejima. Kuhitila mukumwihula Yoba malwihu ashiyashana 70, nawa Yoba wakañenyi kuyakula, Yehova wamwekesheli nindi yitoñojoka yaYoba yakuminamu chikupu. Yoba wadizozeli nawa wahimpili yitoñojoka yindi.—Tañenu Yoba 42:1-6.
Shenu Maana Hachuma Chalema
12 Komana Yehova wahosheli chatama chamuzuwililiyi Yoba chakubula kuhita mumbadi hanyima yakumona makabi asweja? Nzambi wahosheli chatama wanyi nawa Yoba dichatoñojokeliyi wanyi. Hela chakwila waluwañesheli, Yoba watachikili kudanakena. Wahosheli nindi: “Nabalumuki dehi mumuchima mulunkuñu namawuti.” Dichakeñeleñayi Yehova ilaña wamufumbili munjila yayiwahi. (Yoba 42:1-6) Hakusambila, Yoba wetejeli kufumba kwamufumbiliwu kudi kansi Elihu. (Yoba 32:5-10) Hanyima yakwila Yoba neteji dehi mwamufumbiliwu kudi Nzambi, Yehova walejeli antu amakwawu kashinshi kamwekesheliyi Yoba mumpinji yakala.—Yoba 42:7, 8.
“Muchiñeji Yehova”
17 Yoba wudi hakachi kawambuña Yehova atwalekelihu kwikala ahamuka nawa akola hampinji yamweneñawu kukala. Mumukanda wayisonekeleli aHeberu, kapostolu Pawulu washimwini amakwawu, wayiteneneni nindi “ivu deneni dawayinsahu.” (Heb. 12:1) Wejima wawu ahitili mukukala kweneni, ilaña, atwalekelihu kwikala ashinshika kudi Yehova. (Heb. 11:36-40) Komana kuumika kwawu ninyidimu yawu yayili hohu mumenji? Inehi mwani! Hela chakwila mumpinji yawu hiyamweni kushikijewa kwayikaninu yaNzambi yejimaku, atwalekelihu kumuchiñeja Yehova. Nawa chineli elukili chikupu nawu Yehova wayitiyileña kuwaha, akuhweleli chikupu nawu akamona yuma yakanayi. (Heb. 11:4, 5) Yuma yeliliwu yinateli kutukwasha kutwalekahu kumuchiñeja Yehova.
18 Mukaayi mutunakushakama makonu, yuma yinakutaminaku. (2 Tim. 3:13) Satana kanda amanishi kweseka antu jaNzambi. Hela chakwila tukamona makabi kumbidi, tutwalekihu kumukalakela Yehova nañovu, nakwiluka netu “tunakuhweleli mudi Nzambi wamumi.” (1 Tim. 4:10) Anukenuña nenu, yuma yamwinkeliwu Yoba kudi Nzambi yinakumwekesha nawu “Yehova wukweti wushona chikupu niluwi.” (Yak. 5:11) Tutwalekenuhu kwikala ashinshika kudi Yehova, nakukuhwelela netu yena wakafweta “antu amukeñakeñaña chikupu.”—Tañenu AHeberu 11:6.
Yuma Yalema yakuSpiritu
it-2 808
Kadiwu
Yoba watwalekelihu kwikala washinshika mpinji yejima yamudiwileñawu. Ilaña watachikili kumona yuma mwaluwa nawa waluwañesheli, dichi amufumbili. Elihu wamulejeli nindi: “Hinyi mukwawu wudi neyi Yoba, wanwaña kasawuntu neyi menji?” (Yob 34:7) Yoba washili maana hakudiyiñisha yomweni kubadika Nzambi, nawa wafwilileña kumwekesha nindi waloña kubadika Nzambi. (Yob 35:2; 36:24) Chelili “amabwambu” jindi asatu amudiwuli, Yoba wateleli kumona nindi anakudiwula Nzambi bayi yenaku. Cheliliyi mwenimu wadiña tuhu neyi muntu wunadiñiji mukasawuntu nimukadiwu nawa nakutiya kuwaha naniyi yuma neyi muntu wunakunwa menji nakutiya kuwaha. Chimwahitili mpinji Nzambi wamulumbulwili Yoba nindi awa akakudiwula (neyi wushinshikisha) adiña nakuhosha yuma yamakudi hadi Nzambi. (Yob 42:7) Munjila yoyimu, Yehova wamulejeli kaprofwetu Samweli helili aIsareli amuleji mwanta nindi: “Hiyanakukaani eyiku, ilaña yami anakaaniwu kwikala mwanta wawu.” (1Sa 8:7) Nawa Yesu wayilejeli atumbanji twindi nindi: “Akayihela kudi nyuza yejima kukoola ijina dami.” (Mat 24:9) Kwanuka iyi yuma kunateli kumukwasha mukaKristu kuumika neyi anakumudiwula nawa akamufweta hakchinakuumikayi.—Luk 6:22, 23.
FEBRUARY 5-11
YUMA YALEMA YAMWIZU DANZAMBI | MASAMU 1-4
Hakwilenuku Wanta waNzambi
‘Nakakankisha Nyuza Yejima’
8 Antu elaña ñahi neyi tuyishimwina iyi nsañu? Amavulu akaanaña. (Tañenu Masamu 2:1-3.) Nyuza yinazuwi nankashi. Akaanaña kwiteja Nyuli atondawu kudi Yehova. Atoñojokaña nawu Nsañu yaWanta yitwashimwinaña diyi “nsañu yayiwahi” wanyi. Nfulumendi jikwawu jinalekeshi mudimu wakushimwina. Hela chakwila anyuli amavulu amuniyi nyuza ahoshaña nawu amukalakelaña Nzambi, hiyakeñaña kudizozaku. Neyi chelileña anyuli adiñaku mumafuku aYesu, adikañaña naWawayishewa waYehova kuhitila mukulukuka atumbanji twindi ashinshika.—Yilw. 4:25-28.
Bayi Mudiñija Munsañu Jamatuña Mukanu Kaayi Mudi Chaambuku
11 Maheta. Neyi twalemesha mali nimaheta, chikwikala chaswayi kudiñija munsañu jamatuña. Hanyima ya 1970, aYinsahu amavulu kuMalawi ahanini mahetawu ejima muloña akaanini kudiñija mujipati. Chawushona, antu amakwawu akaanaña kushiya chihandilu chachiwahi. Muhela Ruth wahosheli nindi, “Amanakwetu amakwawu twayili nawu muwunkoli, ilaña adiñijili munsañu jamatuña nawa afuntili muloña akeñeleña wanyi kukabakana muchilombu chawa matunduka.” Ilaña antu jaNzambi amavulu dichelañawu wanyi. Adiñijaña wanyi mujamapolitiki, hela chakwila akwikala namali antesha hela akujimbesha yuma yawu yejima.—Heb. 10:34.
Yuma Yalema yakuSpiritu
it-1 425
Muzuñu
Muzuñu wafumaña kumbuutu yidi neyi kachaayi, bali hela tidiiku. Hela chakwila muBayibolu azatisha muzuñu muchifwikija, chamwekeshaña chahulileñawu mbuutu kunyima. Neyi anañuli dehi, muzuñu awufumishileña, dichi wemeneneñaku chuma chapela, chamukunkulwayi, chinakubula kukeñeka, chatela kufumishawu kuyuma yayiwahi nawa chatela kunatawu.
Chatachi, ahulileña kulonda kufumi muzuñu. Kuhiñahu apepeleña, nawa muzuñu wapepela chikupu awulelwileña neyi lunkuñu kudi mpepela. (Talenu KUPEPA.) Chumichi chinakumwekesha Yehova Nzambi chafumishañayi akakusekesha hakachi kawantu jindi nichanatañayi antu atama ninyuza yadikañaña. (Yob 21:18; Ms 1:4; 35:5; Isa 17:13; 29:5; 41:15; Hos 13:3) Wanta waNzambi wakachika ayilumbu jindi nawa akayilelula neyi muzuñu.—Dan 2:35.
Muzuñu kakavulu awocheleña kuchina wakenda kaleluka nakufunta cheñi nakutamisha mbutu. Munjila yoyimu, Yowanu Mpapatishi washimwineñahu dehi nindi kwakenza kujilumuka kwawantu atama ekala mukwitiya—Mukakuhula, Yesu Kristu, wakapompesha tidiku, “ilaña wakwocha muzuñu nakesi kakubula kutwesha kujima.”—Mat 3:7-12; Luk 3:17; talenu KUHULA.
FEBRUARY 12-18
YUMA YALEMA YAMWIZU DANZAMBI | MASAMU 5-7
Twalekenuhu Kwikala Ashinshika Hela Chakwila Akwenu Anakwila Yuma Yambukaku
Chitwatela Kwila Kulonda Nsañu Yitunakutaña muBayibolu Yitukwashi
7 Ayineñeshahu dehi kudi ibwambu denu hela ntaña yenu? Neyi ayineñeshahu dehi chuma chikuyikwasha hikwiluka cheliliyi Mwanta Davidi helili mwanindi Abisalomi yamuneñeshi nawa yeseki kumutambula wanta.—2 Sam. 15:5-14, 31; 18:6-14.
8 (1) Lombenu. Iku munakutoñojoka hanoyu nsañu, mulejenumu Yehova chimunakutiya hachuma chatama chinayiliwu. (Mas. 6:6-9) Mulejenumu chimunakutiya. Nkumininaku mulombenu Yehova yayikwashi kuwana yikuma yikuyikwasha kuumika kukala kumunakumona.
Ilukenu Chikupu Nenu Yuma Yimwakuhwelela Dichalala
3 Chikuhwelelu chetu hichatela hohu kushindamena hakukeña kwawakwaKristu kwekala nawantu jaNzambiku. Muloñadi? Twili netu mukwenu mukwakwitiya, mukulumpi hela payiniya yakoña nshidi yeneni. Hela neyi manakwetu indi kwiji muhela yayila chatama? Hela neyi muntu yekala mukwakusekesha, nakuhosha nindi yuma yitwakuhwelela yakutwamba. Neyi yuma yamuchidiwu yimwekana, mukuzeya muleka nikumukalakela Yehova? Chikuma chidi chakwila nawu: Neyi chikuhwelelu chenu mudi Nzambi chashindamena hayilwilu yawantu amakwawu chatela chishindameni hawubwambu wenu naYehova, chikwikala chakola wanyi. Chikuhwelelu chenu hichatela hohu kushindamena hachimwatiyaña hadi Yehova niantu jindiku, ilaña chatela kushindamena cheñi hakudiza Bayibolu, kwiluka yuma yimunakudiza nikusandujola kulonda mwiluki nenu munakudiza chalala.—Rom. 12:2.
4 Yesu wahosheli nindi antu amakwawu aketeja chalala “namuzañalu,” ilaña chikuhwelelu chawu chikoma neyi ayeseka. (Tañenu Matewu 13:3-6, 20, 21.) Hadaha elukili wanyi nawu neyi anakumulondela Kristu anateli kumona kukala. (Mat. 16:24) Indi kwiji atoñojokeleña nawu neyi ekala mukwaKristu akamonaña wanyi kukala, ilaña yuma yayiwahi hohu. Ilaña mukanu kaayi katama, mudi kukala kwakuvulu. Yuma yinateli kuhimpika nawa muzañalu wetu wunateli kukeha.—Mas. 6:6; Mukwa. 9:11.
Yuma Yalema yakuSpiritu
it-1 995
Ijamu
HaRoma 3:13 kapostolu Pawulu nahoshi mazu hekala haMasamu 5:9, hakwesekeja mudiwu wawantu atama niantu atwambaña “nejamu dachashi.” Neyi chinateli kushawu muntu wunafwi mwijamu dachashi nawa wukutoka, nyidiwu yawu yahoshaña mazu afwa nawa atama.—Esekejenu Mat 15:18-20.
FEBRUARY 19-25
YUMA YALEMA YAMWIZU DANZAMBI | MASAMU 8-10
“Nukukushimeka, Eyi Yehova”!
Lemeshenu Mudimu Wumukweti muChisaka chaYehova
6 Yehova watuloñesheleli mukala wawuwahi. Henohu kanda yaleñi muntu watachi Yehova wayiloñesheleli antu iseki kulonda ashakameñamu. (Yoba 38:4-6; Yere. 10:12) Chineli watutoñojokelañaku nawa wekala nachisambu, Yehova watuloñesheleli yuma yayiwahi nawa yayivulu yitwatela kudiluñisha. (Mas. 104:14, 15, 24) Mpinji yimu, washinshikili hayuma yaleñeliyi nawa ‘wamweni nindi yinawahi.’ (Kutach. 1:10, 12, 31) Wayilemesheli antu kuhitila mukuyinka mudimu wakutala yuma yejima yaleñayi hamaseki. (Mas. 8:6) Nkeñelu yaNzambi yidi yakwila nawu antu awanina ekaleña namuzañalu hakwakamena yuma yaleñayi. Komana mwamusakililaña Yehova hayuma yayiwahi yakanayi?
Mwasakililaña haYawaana Yayinkayi Nzambi?
10 Njila yimu yitunateli kumwekeshelamu kusakilila hachawaana chakuhosha hikulejaku antu akuhwelela nawu yuma yadileñeli yayeni muloña wutwakuhwelela netu Nzambi diyi Nleñi. (Mas. 9:1; 1 Pet. 3:15) Antu akuhwelela muniyi ntañishilu ahoshaña nawu iseki niyuma yekalahu ayileñeli wanyi. Neyi tuzatisha Bayibolu niyuma yitunadizi muchinu chibaaba, tunateli kumuhakwilaku Tata yetu wamwiwulu nikuyilumbulwila antu ejima akukeña kutiyi muloña waweni wutwakuhwelela netu Yehova diyi Nleñi wamawulu niiseki.—Mas. 102:25; Isa. 40:25, 26.
Komana Mwekala “Akutalilahu . . . muKuhosha”?
13 Imbenu namuchima wenu wejima. Neyi tunakwimba tumina twetu twaWanta chuma cheneni chitwatela kufwilaña hikumushimeka Yehova. Muhela Sara watoñojokaña nindi wekala ñimbi wamuwahi wanyi. Hela chochu, wakeñaña kumushimeka Yehova nakamina. Dichi, hampinji yinakuloñeshayi kupompa waloñeshaña nitumina, wembaña tumina nawa wesekaña kumona mazu adimu chiyanesakaniwu nansañu yikudizawu hakupompa. Wahosheli nindi, “Kwila mwenimu kwankwashaña kusha muchima hamazu chatela nitoñojokeña hachinembaña.
Yuma Yalema yakuSpiritu
it-1 832
Munu
Muchifwikija, Nzambi amutena nawu wamanishili mudimu windi “namunu [nyinu],” chidi neyi hasonekeliyi Nshimbi 10 hamalola awubasa (Kwi 31:18; Kuh 9:10), hakukoña yihayamisha (Kwi 8:18, 19), nihaleñeleñayi mawulu (Ms 8:3). Nawu nyinu yaNzambi yazatishiliyi hakuleña nachu yuma naspiritu yindi yajila hela netu ñovu yazatikaña, ayishimuna munsañu yahosha hakuleña yekala muKutachika, mwahoshawu nawu ñovu yaNzambi yazatikaña (ruʹach, “spiritu”) yadiña nakuhitañana hewulu damenji. (Kut 1:2) Hela chochu, Nsona jawakaKristu jachiGiriki yatukwashaña kwiluka mwatalisha yinjikijilu yazatishawu, nsañu yaMatewu yalumbulula nawu Yesu wafumishileñ andemoni naspiritu yaNzambi nawa Luka nakutuleja nindi afumishileña “namunu waNzambi.”—Mat 12:28; Luk 11:20.
FEBRUARY 26–MARCH 3
YUMA YALEMA YAMWIZU DANZAMBI | MASAMU 11-15
Difwikijenu Mudi Mwituña daNzambi Dawunda
w06 5/15 18 ¶3
Yikuma Yamaneni Kufuma muMukanda Watachi waMasamu
11:3—Yikukwinyi yahumonañawu? Iyi hiyikuku yashindamenawu antu muchihandilu chawu, chidi neyi nshimbi, kuleja, niwuñaji. Neyi anayihumoni dehi, kwekalaña wanyi kuwunda niwuñaji. Muyuma yamuchidiwu, “antu aloña” atela kumukuhwelela chikupu Nzambi.—Masamu 11:4-7.
Komana Kwamba Kekalahu Kaayi Mwakabula Madombu?
Bayibolu yakana nawu katataka Nzambi yamanishi madombu heseki dejima. Kaayi kamakonu kamadombu kakumona ‘ifuku daNzambi dakusompesha nikujilumuka kwawantu asekeshaña Nzambi.’ (2 Petulu 3:5-7) Kwosi akwamadombu akakabishaña akwawu. Tunateli kukuhwelela ñahi netu Nzambi nakukeña kufumishahu madombu?
Bayibolu yahosha nawu Nzambi wahela “muntu wakeña madombu.” (Masamu 11:5) Nleñi wakeña kuwunda niwuñaji. (Masamu 33:5; 37:28) Dichakabulilayi kwitejayi akwamadombu kutwalekahu haya nyaaka.
Munakuhembelela Mukudiwunjika?
15 Muloñadi Davidi chahembeleleliyi mukudiwunjika? Ñakwilu wayishimwini mwisamu dodimu mwehwiliyi kapampa kawana nindi: “Nikumwaka wudihi?” Wahosheli nindi: “Ami kwami nakuhweleli luwi lweyi; muchima wami wakatiya kuwaha nawamwinu weyi. Nukumwimbila Yehova tumina, nanichi chinawani wuselewa kudi yena.” (Mas. 13:5, 6) Davidi wamukuhweleleli Yehova muloña waluwi lwindi. Wadiña nakuhembelela kumupulwisha nawa watoñojokeleña chamukwashiliwu kudi Yehova. Davidi wamweni nindi welili chiwahi kuhembelela.
Wanta Wunakwila Nkeñelu yaNzambi haMaseki
16 Kubula kwakama. Nkumininaku, mazu amawahi ekala haIsaya 11:6-9 akashikijewa. Amayala, ambanda nianyana ejima hiyakakamenañaku kudi kwejima kwakayañawu hanu heseki. Kwosi yuma yikatuchinishaña hela antu hela atunyamaku. Toñojokenu chimwakatiyaña hampinji yimwakabula woma wakuya kwejima hanu hamaseki chakwila mwakayaña nakuwela mutuloña, mumajiya, mutuluñalwiji; nikukandama jimpidi nakuhitañana mumasaña chakubula kwakama. Neyi wufuku wuneli, himwakatiyaña womaku. Mazu ekala haEzekeli 34:25 akashikijewa, chakwila antu jaNzambi “akashakamaña mwisaña chakadi kwakama, akakamaña tulu mulusesa.”
Yuma Yalema yakuSpiritu
Komana Ayibalumuna?
12 Chawushona, atunyeñumuka kudi antu amukaayi adi neyi ana ateneniyi Pawulu. Atela atoñojoka nawu kulondela nshimbi jaNzambi hiyuma yakunyaka. Antañishi amavulu nianvwali alekaña anyana akoñeña mwejima munakukeñawu, ayilejaña nawu muntu wejima wudi nawuswa wakufukulahu yomweni yuma yayiwahi hela yatama. Antu amuchidiwu akuhwelela nawu hiyanateli kwiluka yuma yayiwahi niyatamaku. Kubombelahu niantu amavulu ahoshaña nawu amukuhwelela Nzambi atoñojokaña nawu hiyatela kwila yuma yahoshayi Nzambi nindi yaloñaku. (Mas. 14:1) Yitoñojoka yamuchidiwu yinateli kuleta wubanji kudi akwaKristu alala. Antu achidi kanda apami kuspiritu niwena anateli kwikala nayitoñojoka yaheña hantanjikilu yateokalatiki. Anateli kutachika kukaana kulondela ntanjikilu yachipompelu nikutoba hayuma yidi yejima yinabuli kukeñawu. Hadaha kudi kufumba kwamuBayibolu kutambwilaña kuyajinokaña kwahoshaña hayisela, hakuzatisha Intaneti nihakutaña shikola yahewulu.