Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
JANUARY 6-12
YUMA YALEMA YAMWIZU DANZAMBI MASAMU 127-134
Anvwali, Twalekenuhu Kwakamena Wuswana Wenu Walema
Lemeshenu Mudimu Wumukweti muChisaka chaYehova
9 Yehova wayinka antu wuswa wakuvwala anyana nimudimu wakuyidizisha kumukeña nikumukalakela. Neyi mudi anvwali, komana mwasakililaña hanichi chawana? Hela chakwila añelu ayikiswila chikupu kudi Yehova, hiyekala naniku kukoolekaku. Dichi neyi mudi anvwali, mwekeshenuña kusakilila haniwu mudimu wayinkawu wakukulisha anyana. Anvwali ayinka mudimu weneni wakukulisha anyana, “[kuyifumba] nikuyikonkomwena kwesekeja nachakeñañayi Yehova.” (Efwe. 6:4; Kuhit. 6:5-7; Mas. 127:3) Hakwila nawu chiyikwashiku anvwali, kuloñesha kwaYehova kwaloñesha yuma yashindamena haBayibolu chidi neyi nyikanda, mavidiyo, tumina niyibaaba yahaintaneti. Tata yetu wamwiwulu niMwanindi ayikeña atwansi. (Luka 18:15-17) Dichi Yehova watiyaña kuwaha neyi anvwali amushindamena nawa azata hakumina ñovu jawu kwakamena anyanawu. Nawa anvwali amuchidiwu ayikwashaña anyanawu kwikala muchisaka chaYehova chahaya nyaaka.
Anvwali Dizishenu Anyanenu Amukeñi Yehova
20 Yilukenu chikupu anyanenu. Mukanda wa Masamu 27 wesekeja anyana najinsewu. (Tañenu Isamu 127:4.) Neyi chochinateli kutuñawu jinsewu kuzatisha yuma yamboka-mboka nikwambuka mukutoha, anyana niwena ambuka. Dichi anvwali atela kwiluka chakudizisha mwana himwana. Adisumbula amuIsarela akwashili anyanawu ayedi kumukalakela Yehova ashimwini chuma chayikwashili. Dichi ahosheli nawu, “Twayidizishileña Bayibolu iwu kankawindi iwu kankawindi.” Hela chochu, mutu wachisaka watela kufuukulahu njila yinamuwahili chili iyi njila hela nehi.
Yuma Yalema yakuSpiritu
it-1 543
Nyitondu Yashimunawu muBayibolu
Ñimbi yamasamu wahosheli yuma yimu yekala namutondu wamuolivi hakanineña antu amutiyaña Yehova nindi: “Anyaneyi awamayala akekala neyi nyitayi yamutondu wamuolivi kumesa yeyi.” (Ms 128:1-3) Nyitayi yinaketuliwu hela yinakunkuliwu kumutondu wamuolivi wunashimbuli, kakavulu ayizatishaña hakutachika nachu nyitondu yayiha. Kubombelahu, nyitondu yanyiolivi yinashimbuli yasapukaña nyitayi yayiha kunyiji, chumichi chaleteshaña yitwalekihu. Kufwana ayina nyitayi yinakusapuka, anyana akamunyeñumuka tata yawu nakuleta muzañalu muchisaka.
JANUARY 13-19
YUMA YALEMA YAMWIZU DANZAMBI MASAMU 135-137
“Mwanta Wetu hiMuneni Kubadika aNzambi Ejima”
it-2 661 ¶4-5
Ñovu, Nyidimu yaÑovu
Nzambi wayuulaña Yileñaleña yikweti ñovu Munjila yaambukaku. Hakwila adimwekeshi nawu hiNzambi walala, Yehova nateli kumwekesha nindi wukwetu ñovu yakuyuula yileñaleña yikweti ñovu, kwila mwenimu kukunuñañana namwatalisha ijina. (Ms 135:5, 6) Chineli itena, kakweji, mapulaneti, nitutumbwa jalondelaña nshimbi jayinkawu, chineli nchiilu yamwiwulu (yaletaña mpepela, nvula, niyuma yikwawu) yovwahilaña nshimbi yayilombolaña, chineli mukanka watubola niatuda afumaña kwiluña dimu nakuya kwiluña dacheñi, dikwila nawu iyi niyuma yikwawu yayivulu yovwahilaña nshimbi kwila yitwesha kujilika ijina daNzambi kudi akakudimbulula niakakudifukula akutwamba nehi.
Hela chochu, Yehova Nzambi nateli kwilisha yileñaleña yikweti ñovu niyuma yikwawu kumwekesha nawu hiNzambi kuhitila mukuyizatisha munjila muyabulaña kuzatikila kulonda yeli yuma yinakukeñayi, kakavulu hampinji yinatoñoliyi. Niyuma yamwekanaña, yidi neyi chaaña, nvula yampepela, hela yuma yikwawu yadifwanaku, yadiña yaambukaku wanyi, ilaña chiyashikijili wuprofwetu waYehova chayiletesheli kwikala yambukaku. (Esekejenu 1An 17:1; 18:1, 2, 41-45.) Hela chochu, kakavulu iyi yuma yamwekeneña munjila yakuhayamisha, hadaha hamuloña wakusweja kutoha hela kusweja ñovu (Kwi 9:24) indi kwiji muloña yamwekeni munjila yakwila kanda yimwekaneñahu nikutiyakanahu dehi hela hampinji iyatela kubula kumwekena.—Kwi 34:10; 1Sa 12:16-18.
Kukeña kwaYehova Kwakashinshi Kwayikwashaña Ñahi?
16 Neyi tukuhwelela netu Yehova wukutukiñaña, hitukwakamañaku. Ilaña mpinji yikwawu tunateli kuneña nikuleka kutoñojoka netu twakiñewa. Yehova wukutukwasha ñahi haniyi mpinji? (Tañenu Isamu 136:23.) Wukusha makasa indi kwishina detu, nakutunyamuna nikutukwasha kulonda tuleki kuneña. (Ms. 28:9; 94:18) Chichatukwashaña: Neyi twiluka netu Nzambi nateli kutukwasha, chatukwashaña kwanuka netu Nzambi nateli kutukwasha muniji njila jiyedi. Chatachi, hichikweti muloña nakutwashakamañaku, tuneluki netu Yehova wukutukiñaña mpinji yejima. Chamuchiyedi, Tata yetu wamwiwulu watwakamenaña chikupu.
Yuma Yalema yakuSpiritu
it-1 1248
Ya
Izu dakwila nawu Ya kakavulu adizatishaña hamazu akushimeka nikamina ashikaña hamuchima, kulomba nawa kakavulu dawanikaña hamutu wansañu wunashindameni hakuzañalala muloña wakushinda nihawamwinu, hela hanakumwekeshawu chikasa chaNzambi chañovu niñovu. Kudi yakutalilahu yayivulu yinakumwekesha chazatishawu iyi nhoshelu. Mazu akwila nawu, “Mushimekenu Ya!” (Haleluya) muMasamu ayizatishaña neyi mazu akumushimeka nachu Nzambi, akutachikilahu ekala haIsamu 104:35. Mumasamu amakwawu awa mazu ekalaña kumatachikilu hohu (Ms 111, 112), mpinji yikwawu hakachi kesamu (135:3), mpinji kwawu kumakumishilu hohu (Ms 104, 105, 115-117), ilaña kakavulu awanikaña kumatachikilu nikumakumishilu (Ms 106, 113, 135, 146-150). Mumukanda waChimwekeshu yileñaleña azatishileña iyi awa mazu nakufuntisha funtishahu hakumushimeka Yehova.—Chi 19:1-6.
Mapampa amakwawu azatishawu izu dakwila nawu “Ya” amwekeshaña chitwatiyaña hakwimba tumina nihakulomba kudi Yehova. Kudi kamina kawamwinu kembiliwu kudi Mosi. (Kwi 15:2) Mumukanda wasonekeli Isaya wakonkomweneni kuhitila mukubomba hamu mazu majina ejima, “Ya Yehova.” (Isa 12:2; 26:4) Hezekiya, mumazwindi akuzañalala hanyima yakumuuka muchihayamisha henohu wadiña kwakwihi nakufwa, amwekesheli chatiyileñayi kuhitila mukufuntisha funtishahu izu dakwila nawu Ya. (Isa 38:9, 11) Anakumwekesha chaambu chekala hakachi kawafu, anateli kubula kumushimeka Ya, nanowu anakufwila chikupu kuhanda chihandilu chakumushimeka Ya. (Ms 115:17, 18; 118:17-19) Cheñi masamu amakwawu amwekeshaña kulomba kwakusakilila hamuloña wakuyamwina, kuyikiña nikuyolola.—Ms 94:12; 118:5, 14.
JANUARY 20-26
YUMA YALEMA YAMWIZU DANZAMBI MASAMU 138-139
Bayi Mwiteja Woma Wuyikañeshiku
Mushimekenu Yehova muChipompelu
10 Komana muchima wenu wetaña neyi munakukeña kwimika chikasa kulonda mwakulihu? Neyi muchima wenu wetaña, himudi nkawenuku. Walala wudi wakwila nawu wejima wetu twatiyaña woma neyi tunakukeña kwakulahu. Hakwila nawu muleki kutiya woma, mwatela kwiluka chuma chaleteshaña mutiyeña woma. Komana mwatiyaña woma muloña wakwila nenu mukujimbala ñakwilu ntahindi nenu mukuhana ñakwilu yakutwamba? Komana mwatiya woma nenu ñakwilu yenu yikuwaha neyi yawakwenu wanyi? Chidi hohu chiwahi kutiya woma, muloña chamwekeshaña nawu mwekala adizoza nawa mwamonaña akwenu nenu ayibadika. Yehova wakeña antu adizoza. (Mas. 138:6; Fwi. 2:3) Yehova wakeñaña cheñi nindi mumushimekeña nawa mukolesheña amanakwetu niahela hakupompa. (1 Tesa. 5:11) Wayikeña nawa wukuyikwashaña kwikala ahamuka.
Dikoleshenuña Wumu naMukwawu haKupompa kwaChipompelu
7 Kuhituluka munjila jashimunawu muTuposhi twaKutalila twedishawu dehi kunateli kuyikwasha. Chakutalilahu, loñeshenuña chiwahi. (Yish. 21:5) Neyi mutiyishisha nsañu yimukudiza, chikuyipelela kwakulahu hakupompa. Cheñi, ñakwilu yenu yikaleña yayihi. (Yish. 15:23; 17:27) Ñakwilu yayihi yikuyiletesha mubuli kutiya woma kwakulahu. Ñakwilu yayihi, hadaha yikweti hohu mukuku wamazu wumu hela yiyedi, yikuyipelela amanakwenu niahela kutiyishisha chikuma kubadika ñakwilu yayilehi mudi yikuma yayivulu. Neyi mwakulaña ñakwilu yayihi mumazu enu, mukumwekesha nenu mwaloñesha chiwahi nawa mwatiyishisha nsañu yimunakudiza hakupompa.
Yuma Yalema yakuSpiritu
it-1 862 ¶4
Kwanakena
Kubombelahu, kwanakena muntu hichikweti muloña nayiluwa yinakoñiwuku, dichuma chakeñekaña kudi mukaKristu. (Luk 17:3, 4; Efw 4:32; Kol 3:13) Nzambi hanakenaña antu abulaña kwanakena akwawuku. (Mat 6:14, 15) Hela chochu, hela chakwila nshidi yasweja yinakoñiyi muntu yikumuletesha akumuhaña “mutu watama” muchipompelu chawakaKristu, muntu wamuchidiwu anateli kumwanakena neyi chakwila yabalumuka mukuhita kwampinji. Nawa haniyi mpinji antu muchipompelu anateli kutachika cheñi kumumwekeshela kukeña. (1Ko 5:13; 2Ko 2:6-11) Hela chochu, akaKristu hiyatela kwanakenaña antu ahembaña ndulu, nakukoña nshidi mumushikilaku. Antu amuchidiwu ekalaña ayilumbu jaNzambi.—Heb 10:26-31; Ms 139:21, 22.
JANUARY 27–FEBRUARY 2
YUMA YALEMA YAMWIZU DANZAMBI MASAMU 140140-143
Zatenu Hakumina Ñovu Jenu Hanyima yaKulomba Wukwashu
“Tiyililaku kuMazu Amukamaana”
13 Neyi anayifumbi monenuña nenu diyi njila munakuyimwekeshelayi Yehova kukeña. Yehova wakeñaña yuma yinateli kutukwasha. (Yish. 4:20-22) Neyi yatufumba kuzatisha Izu dindi, nyikanda yashindamena haBayibolu hela mukwetu mukaKristu wapama kuspiritu dikwila nawu nakutumwekeshela kukeña. AHeberu 12:9, 10 hahosha nawu, ‘Welaña mwenimu kulonda atukwashi.’
14 Shenu muchima hakufumba bayi hanjila munayifumbiliwuku. Mpinji yikwawu tunateli kutoñojoka netu hakuhanini munjila yayiwahi wanyi. Hela chochu, muntu wejima wunakufumbana watela kufumbana chiwahi kulonda muntu wunakufumbayi yeteji. * (Ñal. 6:1) Ilaña neyi yetu anakufumbawu twatela kusha muchima kuyuma yitunateli kudizilaku kukufumba. Hela chakwila tunakutoñojoka netu adi kunfumba munjila yayiwahi. Twatela kudihula netu: ‘Hela chakwila nakeñi wanyi munjila mwanfumbilayi kudihu chuma chinatela kudizilaku? Kwila nidiwula yiluwa yamuntu wanfumba nehi nikusha muchima kuyuma yahoshayi nehi?’ Chikuwaha kudi etu mukufumba kutunatambwili kunonamu yikuma yitunateli kuzatisha muwumi wetu.—Yish. 15:31.
Twalekenuhu Kwikala ‘Atooka muMuchima’ Munanu Mafuku Akala
Ikakeja dawakwakudimbulula, kukala kwansañu jamali, niyikatu yamaneni yinazeyeshi ambuña aNzambi amakwawu. Mpinji yikwawu, nyichima yawu yaluwankanaña. Mwanta Davidi niyena wamweni kukala kwamuchidiwu wahosheli nindi: “Spiritu yami jinamukañi dehi mukachi kami; muchima wami wafwa dehi puchi mwivumu.” (Mas. 143:4) Chumanyi chamukwashili kushinda kukala kwamuchidiwu? Davidi watoñojokeleña chikupu hayuma yakoñeleliyi Yehova antu jindi nichamupulwishiluwu yena. Watoñojokeleña hayuma yakoñeliyi Yehova kulonda kulemesha ijina Dindi dabadika. Davidi washili maana kunyidimu yaNzambi. (Mas. 143:5) Munjila yoyimu, kutoñojokaña hadi Nleñi yetu nihayuma yejima yatukoñelayi niyichidi kutukoñelayi kukutukwashaña hampinji yitudi mukweseka.
Kusumbula Hela Kusumbukila “Mudi Mwanta Hohu,” Kuchidi Kwetejewa?
Mpinji yikwawu munateli kutiya neyi chatiyili ñimbi yamasamu Davidi, wahosheli nindi: ‘Nyakala wuñakuli, Eyi Yehova; ñovu yami jinakumi dehi. Bayi wunswekela mesu eyuku.’ (Mas. 143:5-7, 10) Hampinji yamuchidiwu, muchiñilili Tata yeyi wamwiwulu kulonda yakumwekesheli chuma chakeñañayi nindi wili. Munateli kwila mwenimu neyi mutañaña Izu dindi mpinji yejima nikutoñojoka chikupu hayuma yimunakutaña. Mukwiluka nshimbi yindi chiyekala nichakwashiliyi antu jindi kunyima. Neyi mumutiyilila Nzambi, chumichi chikuyikwasha kutwalekahu kumwovwahila.
Yuma Yalema yakuSpiritu
it-2 1151
Wulembi
Nhoshelu Yankinji. Mazu akutwamba, afumaña mukanwa kumuntu watama, atamishaña ijina damuntu, ayesekeja nakapela kajahañanaña kakweti wulembi. (Ms 58:3, 4) Muntu watwambaña, amushimuna nawu, “kunyivumbu yawu kudi wulembi watubandayuula” (hela, “wulembi watupela”), hela chakwila itu tumbandayuula twanyahunaña mazu akutwamba kunyima yamadimi atu nakujiika mutunwa twatu. (Ms 140:3; Rom 3:13) Neyi chakwila muntu nakutwambila nedimi dindi, wudi namatuñu, nakutañisha nsañu yakutwamba, hela nakuhosha mazu akutapana, idimi damuchidiwu “denzala wulembi wafwana”—Yak 3:8.
FEBRUARY 3-9
YUMA YALEMA YAMWIZU DANZAMBI MASAMU 144-146
“Adi naMuzañalu Wowu Antu Akweti Nzambi Yawu Yehova!”
Malwihu Kufuma Kudi Antañi
2. Iyi nsañu yinesekani nansañu yikwawu yekala mwisamu. Nkisu jashimunawu muvasi 12 nakushika ku 14 akajitambwila kudi antu aloña, anakulomba ‘kuyipulwisha kudi antu atama’ ashimunawu (muvasi 11). Iyi nsañu yinesekani namazu adi muvasi 15, muyazatishawu mazu akwila nawu “anakooleki” kapampa kayedi hakutena antu wowamu—“antu akweti Nzambi yawu Yehova.”
3. Iyi nsañu yinesekani nansañu yikwawu yekala muBayibolu yashimuna antu jaNzambi ashinshika chiyakatambwilawu nkisu jaNzambi. Idi isamu damwekesha Davidi chamukuhweleleliyi Nzambi hanyima yakuyipulwisha aIsarela kudi ayilumbu jawu, Wayikiswilili nawa ashakamineña chachiwahi. (Lev. 26: 9, 10; Kuhit. 7:13; Mas. 128:1-6) Chakutalilahu, Kuhituluka 28:4 yahosha nawu: “Nianyaneyi, ninyikabu yaheseki deyi, ninyikaabu yakuyimuna yeyi, mwakasemunwinawu añombi jeyi nianyana kanyikoku yeyi, yakakooleka hohu.” Mwamweni, mpinji yayuulileñayi Solomoni mwana kaDavidi, antu adiluñishili chikupu kuwunda nawa ashakamineña chachiwahi. Cheñi nawa, chiyuulu chaSolomoni chemeneneñaku chiyuulu chaMesiya.—1 Anya. 4:20, 21; Mas. 72:1-20.
Chiñejenuña Chikupu
16 Kuchiñeja kutwachiñejaña wumi wahaya nyaaka hichawaana chatwinkayi Nzambi. Tunakutalila yuma yayiwahi kumbidi, yitweluka chikupu netu yikamwekana. Yekala neyi chikuñu chakwimika nachu, yatukoleshaña kulonda tuumiki kukala, makabisha nikufwa. Yekala neyi itepa detu, dakiñaña yitoñojoka yetu kulonda tutondolweli yuma yatama nakukakela yaloña. Kuchiñeja kwetu kwashindamena haBayibolu kwatukwashaña kuswina kwakwihi naNzambi nawa kwamwekeshaña chaswejayi kutukeñayi.
17 Kapostolu Pawulu wahosheli mumukanda windi kudi Aroma nindi: “Zañalelenuña mukuchiñeja.” (Rom. 12:12) Pawulu wazañaleleña muloña welukili nindi neyi atwalekahu kwikala washinshika, wakatambwila wumi wahaya nyaaka mwiwulu. Ninetu twatela kuzañalala mukuchiñeja kwetu muloña tuneluki netu Yehova washikijaña mwakanayi. Neyi chasonekeliyi ñimbi yaMasamu nindi: “Wudi namuzañalu yowu . . . wachiñejaña mudi Yehova Nzambi yindi, . . . Owu wekala washinshika mpinji yejima.”—Mas. 146:5, 6.
Kukeña Kwamuchidinyi Kwaletaña Muzañalu Walala?
19 Hadi yaaka 6,000 yinahitihu, antu anamoni yihuñu chikupu. Ilaña muyinu mpinji yakukuma kwanshakaminu yamakonu, mukaayi munenzali antu adikeña aweni, akeña mali nawa akeña yuma yakuditiyisha aweni kuwaha. Antu anashi maana hayuma yinakufwilawu kwikala nayu nawa anashi muchima hachihandilu kubadika yuma yejima. Antu amuchidiwu hiyanateli kwikala namuzañalu walalaku. Ilaña ñimbi yamasamu washimwini chitunateli kwikala namuzañalu walala, wasonekeli nindi: ‘Wudi namuzañalu yowu muntu wukweti Nzambi yaYakoba wakumukwashaku, wachiñejaña kwindi Yehova Nzambi yindi.’—Mas. 146:5.
20 Antu jaYehova anakumwekesha nawu amukeña Nzambi, nawa anakuvulilaku hachaaka-hachaaka. Chumichi chinakumwekesha nawu Wanta waNzambi wunakuyuula nawa keña wuleti nkisu yayivulu hamaseki. Muzañalu walala nawa wabulaña kumana wenzaña neyi tunakwila nkeñelu yaNzambi nihakwiluka nawu tunakuzañalesha Muntu wasweja kulema. Nawa antu amukeña Yehova akazañalalaña haya nyaaka! Muchibaaba chinalondelihu, tukashinshika hayilwilu yikwawu yafumaña mukusweja kudikeña nawa tukamona iyi yilwilu chiyambuka nayilwilu yekala nawambuña aYehova.
Yuma Yalema yakuSpiritu
it-1 111 ¶9
Anyama
Bayibolu yatufumbaña choloka nawu twela kwakamenaña chiwahi yileñaleña yakehelamu nikuyitiyila luwi. Kafwampi, Yehova yomweni wayimwekeshelaña kukeña nikuyakamena iyi yileñaleña yikweti. (Yis 12:10; Ms 145:15, 16) Nshimbi jaMosi jalumbulwili chiwahi chitwatela kwakamenaña yimuna yetu. Neyi awana nawu yimuna yinakululuta, adiña nakuyitwalila aweni; neyi nawu anadimbuki nachiteli, ayikwashileña. (Kwi 23:4, 5) Ayizatishileña munjila yaluwi. (Kuh 22:10; 25:4) Neyi chochichadiña nikudi antu, niwena hefuku daSabata anookeleña. (Kwi 20:10; 23:12; Kuh 5:14) Ayimuna aleteleña wubanji elukileña chakuyihemba mpinji jikwawu ayijahileña. (Kut 9:5; Kwi 21:28, 29) Anyama kudisemesha nayimuna yamuchidi wacheñi, achitejeli wanyi.—Lev 19:19.
FEBRUARY 10-16
YUMA YALEMA YAMWIZU DANZAMBI MASAMU 147-150
Tukweti Yuma Yayivulu Yikutuletesha Kumushimeka Yehova
“Muloñadi Chitwatelela ‘Kumushimeka Ya’?
5 Yehova hakuminini dakukundeja muza wawaIsarela wejima hohuku, ilaña wayikundejeli hamuntu-hamuntu. Dichatukundejañayi nimakonu. Ñimbi yamasamu wembili hadi Nzambi nindi: “Wakuswishaña abaluka nyichima; wakasaña hayilonda yawu.” (Mas. 147:3) Mwamweni, Yehova wakamenaña ejima akweti kukala, kumujimba nimuyitoñojoka. Makonu, Yehova nakufwila chikupu kutukundeja nikutuwundisha muyitoñojoka. (Mas. 34:18; Isa. 57:15) Watwinkaña maana niñovu yakutukwasha kuumika kukala kwejima kutunateli kumona.—Yak. 1:5.
6 Ñimbi yamasamu washinshikili cheñi mwiwulu nakutuleja nindi Yehova “wachindaña tutumbwa” nawa “watutumbaña twejima majina.” (Mas. 147:4) Muloñadi chahimpiliyi nsañu nakutachika kuhosha hayuma yamwiwulu? Toñojokenu chumichi: Ñimbi yamasamu wamweneña tutumbwa namesu awuntu, ilaña welukili wanyi kuvula kwatu. Tutumbwa tutunakumona tunavuliliku nankashi hadi yaaka yayivulu yinahitihu. Antu amakwawu atoñojokaña nawu muMulalanji wumu mwekala mabiliyoni atutumbwa. Nawa kwekala matililiyoni anyilalanji. Etu, tweluka wanyi kuvula kwatutumbwa. Ilaña Nleñi watutumba twejima majina nawa watwinka yinjikijilu. Chumichi chinakumwekesha nawu katumbwa kejima kalema kudi Yehova. (1 Kor. 15:41) Indi antu jindi ahamaseki? Neyi Nzambi weluka hadi katumbwa kadi kejima, dikwila nawu ninenu wayiluka hamuntu-hamuntu kwejima kumudi, chimwatiyaña niyuma yejima yimwakeñaña mpinji yidi yejima.
“Muloñadi Chitwatelela ‘Kumushimeka Ya’?
7 Yehova wayakamenaña enu nkawenu nawa wukweti ñovu yakuyikwasha nakukala kumunakumona. (Tañenu Masamu 147:5.) Munateli kumona nenu kukala kunayiswejeli nawa mukutwesha wanyi kukwimanisha. Nzambi wayiluka chikupu nawa “waanukaña kwindi nindi hilunkuñu hohu kwalu.” (Mas. 103:14) Chineli hitwawaninaku, twakoñaña yiluwa yoyimu mpinji yejima. Twaditoñeshaña hayuma yitwahoshaña, yuma yatama yitwafwilaña mpinji yejima hela kutiya ichima nayuma yikwetiwu akwetu. Yehova kanda yeleñahu dehi yuma yamuchidiwu; ilaña, kwosi wukwiluka chatwilukayi.—Isa. 40:28.
Muloñadi Chitwatelela ‘Kumushimeka Ya’?
18 Ñimbi yamasamu welukili Nzambi chayikwashiliyi antu jindi kunyima. Diwu hohu muza wenkeliwu “izu” daNzambi, “yidika yindi nawuñaji windi.” (Tañenu Masamu 147:19, 20.) Makonu, yetu hohu antu adi hamaseki atenañawu nejina daNzambi. Tudi nawubwambu wawuwahi naYehova muloña twamwiluka nawa twazatishaña Izu dindi. Kufwana nsoneki Wesamu 147, komana ninenu kudi yuma yinateli kuleñela kubidika nenu “Mushimekenu Ya!” nikulejaku amakwawu kuhosha chochimu?
Yuma Yalema yakuSpiritu
it-1 316
Atuda
Ñimbi yamasamu wahosheli nindi “atuda akweti mpuula” amushimeki Yehova (Ms 148:1, 10), nawa atuda elaña mwenimu kuhitila muchayituñawu muchihayamisha hanji nimukachi. Kada kamu kanateli kwikala namavuji 1,000 nakushika ku 20,000 hela kubadikahu. Ilaña ivuji hivuji dekala nakachuma katooka kakola kekala hakachi kevuji kwalamata tunyana kamavuji twanyanya twatuvulu nankashi twatuñaña chibaambi chamukachi, itu tunyana kamavuji tukweti nyilumba yatukwawu tunyana twanyanya nankashi twadivuña kunsa. Ivuji dimu hohu dakada katenañawu nawu kateela dikweti tunyana kamavuji twatuvulu tukweti cheñi nyana mamiliyoni. Chazatikaña mpuula jatuda ninyijimba yatu chabadika chikupu chazataña ndeki jinakutuñawu makonu. Mafwaha atu akweti mpaku atukwashaña kwikala twapepela, dichi mafwaha ampuula jakada atenañawu nawu frigate amalehi kushika ku 2-m (7 ft) neyi ayitandumuna anateli kulema hohu magiramu 110 (4 oz). Mafwaha awatuda amakwawu amaneni alelaña, akweti tumafwaha twayikwashaña, neyi yikuñu yatuñañawu nachu mpuula jandeki mukachi.
FEBRUARY 17-23
YUMA YALEMA YAMWIZU DANZAMBI YISHIMU 1
Enu Akwenzi, Hinyi Imukutiyilila?
Bayi Mwiteja Chuma Chidi Chejima Chiyikañeshi Kutambwila Isomuku
16 Indi neyi wudi kampululu nawa wunakutiyañana wanyi nawanvwali jeyi akwaKristu nawa wumona neyi anakukukañesha kwila yuma yimu, wukwiladi? Neyi wukuhila, chikukukojeja kumona neyi kumukalakela Yehova kwatama. Nawa neyi wuleka kumukalakela Yehova muloña wakuhila, wukumona neyi kwosi muntu wakwakamenaña chikupu kubadika chipompelu nianvwali amwakamaña Nzambi.
17 Neyi anvwali jeyi abula kukufumba, wukutoñojoka neyi akwakamenaña? (Heb. 12:8) Hadaha kufumba kwakufumbawu kudi anvwali jeyi dikwakuhilisha. Chatela wuhili nachakufumbawu, watela kwiluka neyi kudi chuma chaletesha akufumbi. Dichi diwunjiki nawa zataku nañovu kulonda wubuli kuhila nankashi nachinakuzuwiliwu. Izu daNzambi dahosha nawu: “Waanzaña mazu indi wukweti kwiluka; niwadiwunjika mumuchima himuntu wakashinshi.” (Yish. 17:27) Zataku nañovu kulonda wileña yuma neyi muntu wapama watambwilaña kufumba munjila yakuwunda, chakadi kutiya kutama njila mwakufumbilawu. (Yish. 1:8) Hikukooleka kwakweni kwikala nawanvwali akwakwitiya amukeña chikupu Yehova. Akukukwasha chikupu kulonda wukatambwili isomu dawumi.
w05 2/15 19-20 ¶11-12
Kukiña Ijina Detu dawiniKristu
11 Fwilenuña kumuzañalesha Nzambi, bayi muntuku. Neyi kudi chidika twadilumbululaña kuhitila mukudibomba nawu nezanvu. Muntu wejima wakeñaña kwikala nebwambu, nawa neyi atwibomba hamu nawantu twatiyaña kuwaha. Hampinji yituchidi atwansi—nichitukakula tuhu mukuhita kwampinji—ikakeja dawakwetu dinateli kutuletesha, kwikala namuchima wakufwila kuyimbujola hela kuyizañalesha akwetu. Ilaña amabwambu hela akwetu bayi neyi mpinji yejima afwilaña kwila yuma yitwakeñañaku. Mpinji jikwawu akeñaña hohu antu akudinuña nawu kulonda eleña yuma yatama. (Yishimu 1:11-19) Neyi mukaKristu yatachika kwiteja ikakeja dawakwawu, kakavulu wadiswekaña chekalayi. (Masamu 26:4) Kapostolu Pawulu watusoñamishili nindi: “Bayi mwiteja yilwilu yidi mukanu kaayi yiyibalumuniku.” (ARoma 12:2, The Jerusalem Bible) Yehova watwinka ñovu yatukwashaña kuzuña nekakeja didi dejima kulonda tumwovwahileña.—AHeberu 13:6.
12 Neyi chakwila tumona netu ikakeja dafuminaña hanji hidikuluwañesha yitoñojoka yanetu akaKristu, twatela kwanukaña netu kwikala ashinshika kudi Nzambi kwalema nankashi kubadika yitoñojoka yawantu akunji hela yawantu. Mazu itwawanaña haKwidika 23:2 ashimunahu chishina chinateli kutukwasha nawu: “Bayi wulondela izaza dawantu nakwila yuma yatamaku.” Chelili akwetu aIsarela amavulu ajinooki wuswa waYehova wakushikija yikaninu Yindi, Kalebi wakanini kulondela yitoñojoka yawantu amavulu. Welukili chikupu nindi Yehova washikijaña yikaninu yindi, nawa amukiswilili hachumichi. (Kuchinda 13:30; Yoshuwa 14:6-11) Komana ninenu mukwila neyi cheliliyi kuhitila mukukana ikakeja dawakwenu kulonda muhembi wubwambu wenu naYehova?
Yuma Yalema yakuSpiritu
it-1 846
Chisupi
Chatela alumbululi muntu wabula maana, Izu dakwila nawu “chisupi,” dazatishawu muBayibolu, kakavulu datalishaña kudi muntu wakañanyaña kutoñojoka chiwahi nakulondela njila jatama jabulaña kuditeja nanshimbi jaNzambi jaloña. Mazu achiHeberu ashiyashana amutena nawu hi kesilʹ (‘wasupa; Yis 1:22), ʼewilʹ (“chisupi”; Yis 12:15), na·valʹ (‘wabula maana’; Yis 17:7), nawa nidakwila nawu (“mukakusehana”; Yis 13:1). Izu dachiGiriki da aʹphron datalisha kudi antu “abula maana” (Luk 12:20), da·noʹe·tos datalisha kudi “abula maana” (Ñal 3:1), nawa da mo·rosʹ kudi ‘chisupi’ hela “ayisupi.”—Mat 23:17; 25:2.
FEBRUARY 24–MARCH 2
YUMA YALEMA YAMWIZU DANZAMBI YISHIMU 2
Muloñadi Chimwatela Kusha Muchima Kukudiza Bayibolu Kwahalwenu?
‘Twalekenuhu Kwenda muChalala’
16 Bayi neyi wejima wetu twakeña kutaña nikudizaku. Ilaña Yehova watulejaña nindi tutwalekihu “kukeñakeña” yuma yakunama yachalala. (Tañenu Yishimu 2:4-6.) Mukukeñakeña, mwafumaña yuma yayiwahi. Corey wahosheli nindi neyi nakutaña Bayibolu nkawindi, washaña maana havasi yimu yinakutañayi. Walumbulwili nindi: “Nukutaña mafutunoti ejima, nsona jikwawu jinateniwu nikusandujola chikupu. . . . Nadizaña yuma yayivulu nankashi kuzatisha iyi njila!” Hela chakwila twazatishaña iyi njila hela yikwawu, twamwekeshaña netu twasakililaña chalala neyi twikalaña nampinji yakudiza.—Mas. 1:1-3.
Maana Alala Anakudila Nezu daHewulu
3 Maana hiwuswa wakuzatisha yuma yitweluka kufuukula chiwahi. Hela chochu, maana alala mwabombela yuma yayivulu. Bayibolu yahosha nawu: “Kumutiya Yehova woma diyi ntachikilu yamaana, nawa kumwiluka Wajila Chikupu dikashinshi.” (Yish. 9:10) Neyi tunakufuukulahu chuma chalema, twatela kwiluka chatoñojokañayi Yehova, “kumwiluka Wajila Chikupu.” Tunateli kwila mwenimu kuhita mukutaña Bayibolu ninyikanda yashindamena haBayibolu. Neyi twila mwenimu, tunakumwekesha nawu tudi namaana alala.—Yish. 2:5-7.
4 Yehova hohu diwunateli kutwinka maana alala. (Rom. 16:27) Muloñadi chekalilayi Nsulu yamaana? Chatachi, diyi Nleñi yetu, weluka yuma yejima nawa weluka yileñaleña yejima. (Mas. 104:24) Chamuchiyedi, yuma yejima yelañayi Yehova yamwekeshaña nawu wukweti maana. (Rom. 11:33) Chamuchisatu, kufumba kwaYehova kwamaana kwakwashaña ejima akuzatishaña. (Yish. 2:10-12) Neyi tunakukeña kwikala namaana alala, twatela kwiteja ichi chalala nikwiteja chitulomboleña neyi tunakufuukula nimuyilwilu yetu.
Enu Atwansi, Koleshenu Chikuhwelelu Chenu
2 Chineli mudi kambuña aYehova wakansi indi kwiji munakudiza hadi Yena, komana mwatiyaña neyi kwiji munakukeña kwiteja ntañishilu yaya mpuhu yidi neyi yuma yadileñeli yayeni, chatela mukuhweleli mudi Nleñi tahindi? Neyi dimu, kudi njila jimwatela kwila kulonda mukoleshi chikuhwelelu chenu nikutwalekahu. Njila yimu hikuzatisha wuswa wenu wakutoñojoka wayinkayi Nzambi, ‘wakekala kalama keyi.’ Wukuyikwasha kubula kukuhwelela muyitoñojoka yawantu yinateli kujiyisha chikuhwelelu chenu.—Tañenu Yishimu 2:10-12.
3 Chikuhwelelu chalala chashindamena hakwiluka kwalala hadi Nzambi. (1 Tim. 2:4) Dichi, hampinji yimukudizaña Izu daNzambi ninyikanda yetu yawakwaKristu, bayi muyitañeña lufuchi kulonda mumanishi swayiku. Zatishenu wuswa wenu wakutoñojoka kulonda mwiluki ‘munalumbulukili’ nsañu yimunakutaña. (Mat. 13:23) Tushinshikenu kwila mwenimu chikunateli kuyikwasha kukolesha chikuhwelelu chenu mudi Nzambi hamu neyi Nleñi nikukuhwelela nyitu yansañu yamuBayibolu yikweti ‘wunsahu walala.’—Heb. 11:1, tth.
Yuma Yalema yakuSpiritu
it-1 1211 ¶4
Kashinshi
Muntu nateli kutwalekahu kwikala nakashinshi, bayi muñovu jindiku, ilaña kuhitila mukwikala nachikuhwelelu chasweja nikumukuhwelela Yehova niñovu Jindi jawamwinu. (Ms 25:21) Chikaninu chaNzambi chidi chakwila nawu wakekala “nkebu” nawa “kaposhi kakola,” kakukiñilamu antu endaña mukashinshi. (Yis 2:6-8; 10:29; Ms 41:12) Chineli atwalekañahu kumutiyisha Yehova kuwaha ekalaña ashakamaña chiwahi muchihandilu chawu nawa chayikwashañaku kushikija chikonkwanyi chawu. (Ms 26:1-3; Yis 11:5; 28:18) Neyi chamweniyi Yoba, antu akadi muloña anateli kukabakana muloña watama diyi wunakuyuula nawa anateli kufwila hamu nawantu atama, Yehova nakutuleja nindi weluka kukala kwejima kwamonañawu antu akadi muloña nawa washika nindi muntu wamuchidiwu wuswana windi wakekala wahaya nyaaka, nawa mbidi yindi yakekala yawunda, nawa wakaswana yuma yayiwahi chikupu. (Yob 9:20-22; Ms 37:18, 19, 37; 84:11; Yis 28:10) Neyi chadiñayi Yoba, watondelihu kwikala washinshika, kubadika maheta aleteshaña muntu amulemesheña, nakumwinka kavumbi. (Yis 19:1; 28:6) Anyana akooleka hakwikala nanvwali wamuchidiwu akala namuzañalu (Yis 20:7), atambwilaña iseka dadiwahi muloña wachakutalilahu chachiwahi chatata yawu, niwena ekalaña nejina dadiwahi nawa ayilemeshelaña kumu.