Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2025 Watch Tower Bible and Tract Society of Pennsylvania
JANUARY 5-11
YUMA YALEMA YAMWIZU DANZAMBI ISAYA 17-20
“Iseka Dawantu Anakutubuwa”
“Wanta Wami Hiwudi Wamukanu Kaayiku”
16 Elili chiwahi kuhimpa. Bayibolu yesekeja yilwilu yawantu nakaluñalwiji kabwankañilaña nikuvundujola, kaluñalwiji kabulaña kuwunda. (Isa. 17:12; 57:20, 21; Chim. 13:1) Nsañu yamapolitiki yinakuhilisha antu, kuyambula nikuleta madombu abula kutelela, ilaña etu twahembaña kuwunda nikunuñañana kwetu. Nawa Yehova chashinshikayi kaayi kabula kukwatankana, watela kutiya kuwaha hakumona kunuñañana kudi hakachi kawantu jindi.—Tañenu Zefwaniya 3:17.
Bayi Mudiñija Munsañu Jamatuña Mukanu Kaayi Mudi Chaambuku
4 Hadaha twashakamaña mwiluña mwatwilukawu nawu hitwadiñijaña mujamapolitikiku. Ilaña chitunakuswila kwakwihi nakukuma kwakaayi kaSatana, chikutukalilaña kubula kudiñija munsañu jamapolitiki. Makonu, antu ‘oma nyichima’ nawa ‘achinchika,’ nawa akasweja kwambokelamu. (2 Timotewu 3:3, 4) Amanakwetu amakwawu adi mukukala muloña wakuhimpika kwajipolitiki mwituña dawu. Dimuloña waweni wutwatelela kudiloñesha chadimu kubula kudiñija munsañu jamapolitiki nimumpinji yakala. Twayenu tushinshiki hayuma yiwana yikutukwasha kudiloñesha.
ip-1 198 ¶20
Kufumba Kwafumbiliyi Yehova Nyuza
20 Yumanyi yafuminimu? Isaya wahosheli nindi: “Namelela kwatiyishaña woma. Henohu kanda kwili ntetemena, ajimañanaña. Idi didu iseka dawantu anakutubuwa nawa dichinjikijilu chawantu anakutupuupa.” (Isaya 17:14) Antu amavulu anakupuupa antu jaYehova, kuyila chatama nikuyisawula. Muloña hiyekala nawa hiyakeñaña kwikala mujinsakililu jamaneni jamukaayiku, akaKristu alala ayimonaña neyi aswayi kuyidimbulula kudi antu abula kukuhwelela muyuma yakuhwelelawu. Ilaña antu jaNzambi akuhwelela chikupu nawu “ntetemena” yakamana makabi awu yinakuswina kwakwihi.—2 ATesalonika 1:6-9; 1 Petulu 5:6-11.
Yuma Yalema yakuSpiritu
w06 12/1 11 ¶1
Yikuma Yamaneni Kufuma muMukanda waIsaya—I
20:2-5—Komana mwamweni Isaya wendeli nzekesi hadi yaaka yisatu? Hadaha Isaya wafumishili hohu chakuvwala chindi chahewulu nakwenda hohu nachakuvwala chamukachi.—1 Samweli 19:24.
JANUARY 12-18
YUMA YALEMA YAMWIZU DANZAMBI ISAYA 21-23
Yuma Yitwadizilaña kuChajilumukiliyi Shebina
Kubabesha—Kwamwekeshaña Nawu Nzambi Watukeña
7 Hakwila twiluki kulema kwakubabesha, twayenu tushinshiki antu ayedi ababesheliwu kudi Yehova: Shebina, wadiñaku mumafuku aMwanta Hezekiya niGraham, manakwetu wamunanu mafuku. Chineli wadiña ‘mukwakutala kwitala,’ hadaha daHezekiya, Shebina wadiña nawuswa chikupu. (Isa. 22:15) Chawushona, wadivwimbili nawa wakeñeleña kumulemesha. Wadimbilili niijamu dadiwahi nawa wendeleleña ‘mumakalu akulema’!—Isa. 22:16-18.
8 Muloña wakwila Shebina watachikili kudilemesha, Nzambi ‘wamunañumwini hakulema’ nakuhiñishahu Eliyakimi. (Isa. 22:19-21) Chumichi chamwekeni hampinji yakeñeleñayi Mwanta Senakeribi wakuAshuri kulukuka Yerusalema. Chimwahitili mpinji, iwu mwanta watemesheli akulumpi niamashidika amavulu kuYerusalema, kulonda yayichiinishi aYudeya niHezekiya kulonda adihani. (2 Anya. 18:17-25) Eliyakimu amutemesheli kuya nakuhosha nawakulumpi, ilaña wadiña nkawindi wanyi. Wayili nawakwawu ayedi, hakachi kawu hadiña Shebina, wadiña nsoneki haniyi mpinji. Komana chumichi chinakumwekesha wanyi nawu Shebina hahililiku nawa wadizozeli kutambwila chifulu chaheshina chakadi kuhemba nkunyi? Neyi dicheliliyi, yumanyi yitwatela kudizila kuniyi nsañu? Tuhanjekenu yuma yisatu yitukudizilaku.
9 Chatachi, Shebina amutambwili chifulu. Chakutalilahu chindi chatusoñamishaña nawu “kudinka wanta kwasambilaña, kujilumuka kwakumininaña; muchima wakudivuna wasambilaña, kudimbuka kwakumininaña.” (Yish. 16:18) Neyi mukweti kukooleka muchipompelu, hadaha chifulu cheneni, komana mukutwalekahu kwikala adizoza? Komana mukumulemesha Yehova hawaana wumukweti hela hayuma yimunazati mumudimu wunayinkiwu? (1 Kor. 4:7) Kapostolu Pawulu wasonekeli nindi: “Inakuleja muntu-himuntu hakachi kenu nami, bayi yatoñojoka nindi walema kubadika chekalayiku, ilaña muntu-himuntu yatoñojokeña kwesekeja nachekalayi.”—Rom. 12:3.
Kubabesha—Kwamwekeshaña Nawu Nzambi Watukeña
10 Chamuchiyedi, Yehova chamubabesheleñayi Shebina, welukili nindi kubabesha kwindi kukumukwasha Shebina kuhimpa yilwilu yindi. (Yish. 3:11, 12) Antu ejima anatambuliwu kukooleka muchipompelu chaNzambi atela kudizila kuniyi nsañu. Chatela ahili hela kuhemba ndulu, atela kutwalekahu kumukalakela Nzambi nañovu yawu yejima hela chakwila anayitambuli kukooleka nawa atela kumona nawu Yehova wayikeña hakuyibabesha. Twatela kwanuka netu, neyi tudizoza, Tata yetu wakatukiswila. (Tañenu 1 Petulu 5:6, 7.) Nzambi chatubabeshañayi munjila yakukeña chamwekeshaña nawu nakutuwumba, dichi twikaleña amwovu kutuwumba mumakasa indi.
Kubabesha—Kwamwekeshaña Nawu Nzambi Watukeña
11 Chamuchisatu, Yehova chamubabesheliyi Shebina chadizishaña antu enkawu mudimu wakubabesha chikuma chalema, chidi neyi anvwali niatulama akwaKristu. Chikumanyi chiyakudizilaku? Hela chakwila kubabesha kwaYehova kwamwekeshaña nawu wahela nshidi, ilaña kwamwekeshaña cheñi nawu wamukeña muntu wunavulumuni. Neyi wudi nvwali hela kalama wukweti mudimu wakubabesha, komana wukwimbujola Yehova kuhitila mukuhela yuma yatama iku wunakumonamu yuma yayiwahi mudi mwaneyi hela mukwenu mukwakwitiya?—Yuda 22, 23.
Yuma Yalema yakuSpiritu
w06 12/1 11 ¶2
Yikuma Yamaneni Kufuma muMukanda waIsaya—I
21:1—Ituñanyi datenañawu nawu “isaña dakaluñalwiji”? Hela chakwila Babiloni yadiña wanyi kwakwihi nanaka kaluñalwiji, ayitenaña nanidi ijina. Tunahoshi mwenimu muloña menji amukaloña Yufurati nimukaloña Tigirisi akunkumukileña hachaaka-hachaaka munidi ituña, nakutuña “kaluñalwiji.”
JANUARY 19-25
YUMA YALEMA YAMWIZU DANZAMBI ISAYA 24-27
“Iwu Diyi Nzambi Yetu!”
cl 15 ¶21
“Talenu! Iwu Diyi Nzambi Yetu!”
21 Komana mwamonahu dehi mwana wanyanya nakwinyikila akwawu nawa nakuhosha namuzañalu nindi, “Ana diwu atata”? Akakudifukula aYehova niwena akweti wunsahu wawuvulu wayileteshaña kutiya chochimu hadi Yehova. Bayibolu yashimwineñahu dehi mpinji yakabidikawu antu ashinshika nawu: “Talenu! Iwu diyi Nzambi yetu!” (Isaya 25:8, 9) Neyi mwilukisha nankashi yilwilu yikwetiyi Yehova, mukutiya chikupu nenu mudi naTata yenu wamuwahi imwatela kuswina kwakwihi nindi.
Yuma Yitwadizilaña kuChihayamisha chaMankendi
14 Chahosheleñayi “[hakutwinka] yakuda yetu yefuku dalelu,” Yesu wateneni mpinji yakela nkeñelu yaNzambi akayili “hamaseki neyi chayilañawu mwiwulu.” (Mat. 6:9-11) Chumichi chinakuyanukishadi? Bayibolu yamwekeshaña nawu yuma yafwilañayi Nzambi kwila hamaseki mwabombela niyakuda yayiwahi. Kwesekeja naIsaya 25:6-8, kwakekala yakuda yayivulu yayiwahi yitwakadiluñishaña muWanta waYehova. Isamu 72:16 yahosha nawu: “Hamaseki hakekala mbutu jajivulu chikupu; jakavula nankashi hewulu damapidi.” Komana mwatalilaña wanyi kulonda mwakazatishi iji mbutu kutuñilamu mankendi imwakeñesha hela kudiza njila jajiha jakutuñilamu? Kubombelahu, mwakadiluñishaña nyikaabu yamumatempa anyivinyu yimwadimini. (Isa. 65:21, 22) Nawa himwakekala nkawenuku.
Yuma Yayiwahi Yitwadiluñishaña Muloña waKukeña kwaYehova
11 Toñojokenu chihandilu chichakekala muParadisa hamaseki. Mwakakamenaña wanyi kukata hela kufwa. (Isa. 25:8; 33:24) Yehova wakayinka yuma yejima yimwafwilaña. Yumanyi yimwakafwilaña kwila? Mukafwilaña kudiza yuma yayivulu hadi anyama? Mwakafwilaña kwiluka kwimba kuzatisha chisanji? Mwakakeñaña kwiluka chakuleña? Chakadi nikujina, kwakakeñekaña antu aleñaña, akakutuña matala niandimi. Nawa kwakekala nyidimu yikwawu yakuwahisha nikuloñesha, kuloñesha yakuda, kutuña yitwa nikuwayisha kulonda ituña dakamwekaneña lubanji. (Isa. 35:1; 65:21) Chimwakashakamaña haya nayaaka, mwakekalaña nampinji yakuzata nyidimu yejima yimwakakeña.
12 Wenowu muzañalu wutwakekala nawu hakutambwila antu akasañulawu! (Yilw. 24:15) Fwikijenu cheñi chimwakadiluñishaña kudizilahu yuma yayivulu hadi Yehova kuhitila mukushinshika yileñaleña. (Mas. 104:24; Isa. 11:9) Chasweja kubadika, twakazañalalaña chitwakadifukulaña kudi Yehova chakadi kudimona netu tudi akanshidi! Komana mukukeña kuhimpa yuma yitwakadiluñisha kumbidi nakudiluñisha “chiseki chanshidi chahakapinji kantesha”? (Heb. 11:25) Kwakulehi mwani! Nkisu yitukatambwila yabadika kudihana kutunateli kudihana chayinu mpinji. Anukenu, twakatwalekahu wanyi kuchiñeja Paradisa yahamaseki. Haniyi mpinji dichuma chitwakadiluñishaña. Kwosi chuma chitwadi kutambwila haniyi yuma neyi Yehova watukeñeli wanyi nakutwinka chawaana chaMwanindi!
Yuma Yalema yakuSpiritu
w24. 12/24 ¶18
Madilu Enu Alema Nankashi Kudi Yehova
Mazu ahosheliyi Yehova amukundejeli Hezekiya. Ninetu Izu daNzambi dinateli kutukundeja. Yehova watuhembela mazu amawahi anateli kutukundeja neyi kudi kukala kutunakuhitamu. (Rom. 15:4) Muhela wumu wakuWest Africa chamukwatiliwu nachikatu chakansa, wadilileña mpinji yejima. Wahosheli nindi: “Nsona yimu yankundejaña nankashi hiIsaya 26:3. Hela chakwila hitwavula kumanisha kukala kutwamonañaku, iyi vasi yankwashaña kwiluka nami Yehova nateli kunyinka kuwunda kwamuyitoñojoka kunateli kunkwasha kwiluka chinatela kwila nakukala kwejima kunukweti.” Kudihu nsona yayikundejaña, sweje-e neyi munakumona kukala kunakumwekana neyi kwasweja, indi kwiji kukumana wanyi?
JANUARY 26–FEBRUARY 1
YUMA YALEMA YAMWIZU DANZAMBI ISAYA 28-29
Mulemeshenuña Yehova naNyivumbu Yenu ninaMuchima Wenu
ip-1 299 ¶23
Isaya Washimwinineñahu dehi “Mudimu Wacheñi”
23 Anlomboli ansakililu amuYuda adimweneña nawu adiña ashinshika muyuma yakuspiritu, ilaña amushiyili Yehova. Atañishileña hohu jadiña muyitoñojoka yawu kutalisha hayuma yaloña niyabula kuloña, kulonda amwekeshi nawu adiña nachikuhwelelu niyilwilu yayiwahi nikuletesha antu ayitiyeña kutama kudi Nzambi. Yehova wakayisompesha hamuloña wawunfwikiji wawu kuhitila mukwila “yuma yakuhayamisha yayivulu” dikwila nawu “mudimu wacheñi.” Wahosheli nindi: “Awa antu ansolomokaña natunwa twawu nawa anlemeshaña hohu nanyivumbu yawu, ilaña muchima wawu wudi kwakulehi nanami; nawa woma wantiyañawu washindamena hanshimbi jawantu jayidizishawu. Dichi, ami Yami nakayikoñela cheñi awa antu yuma yakuhayamisha, yuma yakuhayamisha yayivulu; nawa maana awantu jawu akamaana akanoña, nikwiluka kwawantu jawu ashinshika kwakajimañana.” (Isaya 29:13, 14) Maana aYuda adisambilañayi nikwiluka jakajimañana hakakojejayi Yehova Wanta waÑovu Mukaayi wawaBabiloni kujilumuna nsakililu yejima yawakakusekesha. Dichuma chochimu chamwekeni mumafuku awakaKristu akusambila hanyima yakwila anlomboli awaYudeya adimweneña nawu akweti maana ajimbeshi muza. Dichuma chinakumwekana nimumafuku etu kudi Kristendomu.—Matewu 15:8, 9; ARoma 11:8.
Kwosi Chuma Chinateli Kuyihukesha Antu Aloña
7 Yesu wayifwishili akulumpi jansakililu amumafuku indi namuloña, muloña wakwila ayidizishileña wanyi antu yuma yakeñañayi Yehova. Chakutalilahu, wamwekesheli nindi aFwarisi adiña anfwikiji muloña alemesheli kwisuka kumakasa kubadika kwakamena anvwali jawu. (Mat. 15:1-11) Atumbanji twaYesu atela ahayamini namazu ahosheliyi. Dichi amwihwili nawu: “Wuneluki ntahi neyi aFwarisi ahila chiyatiyawu mazu iwahosha?” Yesu wayakwili nindi: “Mutondu wejima wabulili kutumbawu kudi Tata yami wekala mwiwulu akawuchañula. Yilekenu ahileña. Hiyanlomboli amputamesu. Muloña neyi mputamesu yalombola mukwawu mputamesu, wejima wawu akuholokela mwibuku.” (Mat. 15:12-14) Yesu hetejeli yitoñojoka yawakulumpi jansakililu kumukañesha kuhosha chalalaku.
Twalekenuhu Kwikala Mwenyi waYehova Haya Nyaaka!
8 Antu ‘ahoshaña chalala mumuchima wawu’ hiyatwambaña kwikala ovwahila hamesu awantu ilaña kumbadi anakufumpa nshimbi jaNzambiku. (Isa. 29:13) Atondolwelaña kutwamba. Muntu watwambaña nateli kutachika kutoñojoka nindi nshimbi jaYehova hijakwashanaña mpinji yejimaku. (Yak. 1:5-8) Nateli kudikaña naYehova munsañu yinamoniyi nindi yalema nankashi wanyi. Kuhiñahu neyi amona nindi mukudikaña kwindi himunafumi yuma yatamaku, wukuswejelaku kufumpa nshimbi jaNzambi, nawa kudifukula kwindi kukwikala kwawunfwikiji. (Mukwa. 8:11) Ilaña etu, tunakukeña kwikala ashinshika muyuma yejima.
Yuma Yalema yakuSpiritu
it “Ariyeli” ¶1; it “Ariyeli” Na. 3
Ariyeli
(Ariyeli) [Hewulu daKameña hakwochela nyilambu kudi Nzambi].
3. Idi ijina dakala kutiyishisha dekala haIsaya 29:1, 2, 7 datalisha kuYerusalema. Yerusalema dadiña iluña mwadiña tembeli yaNzambi nikameña kajila kakulambwilahu nyilambu. Chineli iwu musumba wadiña naniyi yuma, awuteneneña nawu hewulu dakameña kaNzambi. Iwu musumba wakeñekeleña cheñi kwikala iluña daYehova dakudifukula kwalala. Hela chochu, mazu ekala aIsaya 29:1-4 himazu atama nawa amwakeshaña chakamujimunawu Yerusalema kudi aBabiloni mu 607 B.C.E., hakekalayi “ijiku dakameña” munjila yikwawu: hakapwekayi musumba mashi, hakahayi nakesi nawa hakenzalayi nayibimbi oyu yajilumwiniwu nakuzuwa kwakesi. Yuma yakaletesha akamoni kukala kwamuchidiwu anayishimuni mumavasi 9 nakushika ku 16. Hela chochu Isaya 29:7, 8, yamwekeshaña nawu nyuza yikakeñaña kujilumuna Yerusalema, yakakañanya kwila chuma chakafwilañawu.
FEBRUARY 2-8
YUMA YALEMA YAMWIZU DANZAMBI ISAYA 30-32
Batamenu muMpuula jaYehova
w01 11/15 16 ¶7
Yehova Diyi Chiswamu Chetu
7 Chineli Yehova diyi chiswamu chetu, twakundejewaña namazu akwila nawu: “Wakakubuta nambandu jindi, nawa wakabatama mumpuula jindi. Kashinshi kindi kakekala nkebu yeneni nawa mbañu yakiñaña.” (Isamu 91:4) Nzambi watukiñaña, neyi kada kadi nanyana chikasañalalaña mpuula nakukiña anyanaku. (Isaya 31:5) ‘Watubutaña nambandu jindi.’ Kwesekejaku hohu, mbandu yakada himpuula jaku. Kada kazatishaña mbandu yaku kuyibuta anyana nikuyikiña kudi ayisumi. Kufwana anyana katuda, twakiñewa mumbandu jaYehova jachifwikija muloña twaswama mukuloñesha kwindi kwawakaKristu alala.—Luti 2:12; Isamu 5:1, 11.
Yehova Wukuyikwashaña haMpinji Yimunakumona Kukala
13 Chuma chitwatela kwila. Kañeshenu yitoñojoka yakufwila kudaambula nawakwenu. Neyi tudaambulaña nawakwetu, tukutachika kutoñojoka hohu hadi etu aweni nihakukala kutunakuhitamu. Yitoñojoka yamuchidiwu yinateli kutuletesha kufuukula mwaluwa. (Yish. 18:1) Hela chochu, wejima wetu twakeñekaña kwikala nkawetu, sweje-e neyi kudi kukala kweneni kunatumwekeni. Ilaña neyi tudaambula nawakwetu hadi mpinji yayilehi, tunateli kukañesha njila yazatishañayi Yehova hakutukwasha. Dichi hela chakwila chinateli kuyikalila kudikunda nawakwenu hampinji yimunakumona kukala, itejenu wukwashu wunakufuma kudi amuchisaka chenu, amabwambu niakulumpi. Yimonenuña nenu hinjila yimu yinakuzatishayi Yehova hakwila ayikwashi.—Yish. 17:17; Isa. 32:1, 2.
“Wakayinka Ñovu”—Munjilanyi?
19 Munateli kutwalekahu ñahi kuchiñeja yuma yakumbidi? Chakutalilahu, neyi mudi nakuchiñeja kwakushakama haya nyaaka hanu hamaseki, tañenuña nsañu yamuBayibolu yashimunaña chakekala Paradisa nikutoñojokahu chikupu. (Isa. 25:8; 32:16-18) Fwikijenuña chakekala chihandilu mukaayi kakaha. Difwikijenu munakushakama mwenomu. Hinyi imunamoni? Munakutiya yumanyi? Munakutiya ñahi? Hakwila musweji kufwikija chakekala paradisa, talenu nyevulu yidi munyikanda yetu yamwekeshaña chakekala Paradisa hela talenu vidiyo yakamina, chidi neyi Mwituña Dadiha, Paradisa Yidi Mukamwihi, hela Elenganyeni Ukuti Muli Mu Calo Cipya. Neyi tutwalekahu kuchiñeja chikupu yuma yakekala mukaayi kakaha, kukala kutwamonaña kukwikala ‘kwakapinji kantesha nawa kwapepela.’ (2 Kor. 4:17) Yuma yimwachiñejaña yayishiikayi Yehova, yinateli kuyikwasha kutwalekahu kuumika kukala.
Yuma Yalema yakuSpiritu
it “Dinkendi” ¶6
Dinkendi
Kuzatisha Nkinji. Izu dakwila nawu “dinkendi,” neyi chadizatishawu muBayibolu, datalisha mwamuvulu. Chakutalilahu, Yoshuwa naKalebi alejeli aIsarela apompeli nawu antu ashakamaña muKenani “himankendi etu,” hadaha atalishili mukwila nawu akuyishinda swayi nawa nawu yuma yikumwekana yikukolesha Isarela. (Kuc 14:9) Chineñi chasweja chenzaña muloña wakubula kuyitiya kuwaha kudi Nzambi anachimwekeshi haIsamu 80:5, hanamuteniwu Kabiña kawaIsarela Yehova nawu: “Wayidiishaña madilu neyi dinkendi dawu.” Yehova amutena cheñi nawu wenkaña antu jindi “yihuñu kwikala yakuda [yawu] nimakabisha kwikala menji,” chinakumwekesha hatooka yuma yikayimwekena hakayikuchikawu nawa chumichi chakamwekanaña mpinji yejima kudi wena neyi dinkendi namenji.—Isa 30:20.
FEBRUARY 9-15
YUMA YALEMA YAMWIZU DANZAMBI ISAYA 33-35
“Diyi Wakukwashaña Kwikala Wakiñewa”
Yehova Wukuyikwashaña haMpinji Yimunakumona Kukala
7 Kukala kwekalañaku. Neyi tunakuhita mukukala kweneni, hitunateli kutiya, kutoñojoka nikwila yuma neyi chitwelaña mpinji yejimaku. Tunateli kutiya neyi anakutulelujola kufuma kuniku kukala kweneni nakututwala kukukala kukwawu. Muhela Ana, ashimunawu hakusambila, wahosheli nindi wakabakeni muyitoñojoka hanyima yakufwa kwanfumwindi Luis. Wahosheli nindi: “Mpinji jikwawu naneñeleña nikuditiyila ami aweni luwi. Cheñi nahilileña nami nanshiyi.” Kubombelahu, muhela Ana watiyileña wuudi nichikela chelili atachiki kuzatila hayuma yadiña nakuzatilahu chiwahi nfumwindi Luis. Mpinji jikwawu, watiyileña neyi wudi hakaluñalwiji hampinji yinakunoka nvula yampepela. Yehova watukwashaña ñahi neyi tutachika kukabakana nayitoñojoka yamuchidiwu?
8 Chuma chatushiikayi Yehova. Watushiika nindi wukutukwashaña kwikala akiñewa. (Tañenu Isaya 33:6.) Neyi hakaluñalwiji hadi nvula yampepela, mbopolu yinateli kutachika kubenkañila. Hakwila akañesheña iku kubenkañila, mbopolu jajivulu ajituña natuyuma twakwashanaña twekala mumbanvu jejima jiyedi jambopolu nawa twajiyamaña mumenji. Itu tuyuma twaleteshaña mbopolu kubula kusweja kubenkañila, chumichi chaleteshaña antu adi muwatu kwikala akiñewa nikubula kwakama. Hela chochu, itu tuyuma twakwashaña mbopolu kubula kubenkañila, twazataña chiwahi neyi mbopolu yinakwenda. Munjila yoyimu, Yehova wukutukwashaña kwikala akiñewa neyi tutwalekañahu kumukalakela nakashinshi hampinji yitunakumona kukala kweneni.
Chakutwalekahu Kwikala naMuzañalu Hela Tunakumona Kukala
10 Chakwila: Mulombenu Yehova yayinki maana. Hakwila tuumiki kukala kutunakumona nikutwalekahu kwikala namuzañalu, twatela kumulomba Yehova kulonda yatwinki maana akutukwasha kufuukula chachiwahi. (Tañenu Yakoba 1:5.) Tukwila ñahi neyi tumona netu Yehova nakuli kulomba kwetu swayi wanyi? Yakoba wahosheli nindi twatela ‘kutwalekahu kumulomba’ Nzambi. Yehova wahilaña wanyi neyi tutwalekahu kulomba netu yatwinki maana. Hakutuhosholaku. Tata yetu wamwiwulu wahanaña “namuchima wumu” neyi tumulomba netu yatwinki maana kulonda tuumiki kukala. (Mas. 25:12, 13) Wamonaña kukala kutwamonaña, wukweti wushona nawa nakufwila kutukwasha. Chumichi chatuzañaleshaña. Hanu dinu Yehova watwinkaña ñahi maana?
11 Yehova watwinkaña maana kuhitila Mwizu dindi. (Yish. 2:6) Hakwila twikali nanawa maana, twatela kudizaña Izu daNzambi ninyikanda yashindamena haBayibolu. Ilaña kudi yuma yikwawu yitwatela kwila. Twatela kuzatishaña maana aNzambi muchihandilu chetu kuhitila mukuzatisha yuma yitunakudiza. Yakoba wasonekeli nindi: “Ikalenu akwakwila mwaya mazu, bayi mwikala akwakutiya hohuku.” (Yak. 1:22) Neyi tulondelaña kufumba kwaNzambi, tukwikala awunda, hitukukokwelaña kumu hohuku nawa tukwikala naluwi. (Yak. 3:17) Iyi yilwilu yatukwashaña kuumika kukala kwejima kutunateli kumona chakadi kujimbesha muzañalu wutukweti.
ip-1 352-355 ¶21-22
“Kwakekala Wanyi Muntu Wakahosha Nindi: ‘Nakata’”
21 Hela chochu, wuprofwetu waIsaya wunakushikijewa nimakonu. Antu jaYehova makonu niwena okewa kuspiritu. Ayisubula kuntañishilu yakutwamba yidi neyi wumi wamuntu hiwafwañaku, kwekala anzambi Asatu nikesi kahelu. Ayidizishaña kwikala nayilwilu yayiwahi yayikwashaña kubula kwila yuma yatama nikuyikwasha kufuukula chiwahi. Muloña wamulambu wefutu danyiloña daYesu Kristu, akweti ñimenu yayiwahi kumesu aNzambi nawa ekala nachinleji chitooka. (AKolosi 1:13, 14; 1 Petulu 2:24; 1 Yowanu 4:10) Muniku kuukewa kwakuspiritu mwafumaña yuma yayiwahi yakwashaña mujimba. Chakutalilahu, kutondolwela kwila wuvumbi nikuzatisha makanya, kwayikiñaña akakristu kuyikatu yenzaña hamuloña wakwila wuvumbi nikukata kansa.—1 AKorinda 6:18; 2 AKorinda 7:1.
22 Kubombelahu, mazu ekala haIsaya 33:24 akashikijewa chikupu hanyima yaAmagedoni, mwituña daNzambi dadiha. Muchiyuulu chaWanta waMesiya, antu akayuuka chikupu kumujimba nikuspiritu. (Chimwekeshu 21:3, 4) Hanyima yakujilumuna kaayi kaSatana kanshakaminu yamakonu, yihayamisha yakoñeliyi Yesu hadiñayi hanu hamaseki, akayikoña cheñi mwahita iseki dejima. Amputamesu akatona, anjika matu akatiya, nawa akakubalakata akenda! (Isaya 35:5, 6) Chumichi chakaletesha antu akapuluka halukadi lwasweja kuzataku mudimu weneni wakwilisha iseki kwikala paradisa.
Yuma Yalema yakuSpiritu
Twalekenuhu Kwenda ‘muNjila yaKujila’
8 Amakwawu anateli kutoñojoka nawu, ‘Iyi nsañu yayiwahi, hanu dinu yuma yamwekeneni aYudeya kunyima oko-o, komana yinateli kutukwasha makonu?’ Mwamweni yikutukwasha, muloña yuma yitunakwila tunateli kuyesekeja nakwenda ‘muNjila yaKujila.’ Hela chakwila tudi awayishewa indi kwiji “anyikoku amakwawu,” twatela kutwalekahu kwenda ‘muNjila yaKujila’ hampinji yiyinakutulombola muparadisa yakuspiritu makonu nikututwala kuyuma yayiwahi yakaleta Wanta kumbidi. (Yow. 10:16) Kufuma mu 1919 C.E., antu amavulu, amayala, ambanda nianyana anafumi muBabiloni Muneni, wanta wakudifukula kwakutwamba mukaayi, nawa anatachiki kwenda muniyi njila yachifwikija. Chakadi nikujina, ninenu mudi hakachi kawu. Hela chakwila iwu mukwakwa awenzunwini hadi yaaka kubadika 100 yinahitihu, mudimu wakuloñesha iwu mukwakwa weneni watachikili dehi hadi yaaka yayivulu henohu kanda awenzununi.
FEBRUARY 16-22
YUMA YALEMA YAMWIZU DANZAMBI ISAYA 36-37
“Bayi Wutiya Woma Muloña Wamazu Iwunatiyiku”
it “Hezekiya” Na. 1 ¶14
Hezekiya
Senakeribi Chamukañenyiyi Yerusalema. Neyi chakuhweleleliyi Hezekiya, Senakeribi wafwilileña kuya nakulukuka Yerusalema. Hakuchikileñayi Senakeribi namashidika indi musumba wakola waLakishi, watemesheli chibalu chindi chawamashidika hamu nawakulumpi awamashidika kulonda ayi nakuleja antu amuYerusalema nawu adihani. Wadiña mukakuhoshelaku idi izanvu wadiña Rabisheka (bayi neyi idi didadiña ijina dindiku, ilaña hiijina damuteneneñawu muwushidika), welukili kuhosha chiwahi chiHeberu. Wamusupishili nikumuhosha kasawuntu Yehova, nakuditiya nindi neyi chakañenyiwu anzambi amakwawu akunyuza kukiña maluña awu akudifukwila kudi mwanta wawaSiriya, Yehova niyena kwila atwesha kwamwina Yerusalema nehi.—2An 18:13-35; 2Ku 32:9-15; Isa 36:2-20.
ip-1 387 ¶10
Mwanta Anamukiswili Muloña waChikuhwelelu Chindi
10 Kuhiñahu Rabisheka wayanukishili aYudeya nindi adiña adana amashidika akuzuña nawena. Wahosheli mukudivwimba nindi: “Nukukwinka tuwalu 2,000 neyi wukutwesha kuwana akakwendelahu.” (Isaya 36:8) Komana chikweti muloña neyi chakwila akakwendela hatuwalu awaYuda adizishawu amavulu hela antesha? Inehi, muloña wamwinu wawaYuda hiwashindameneni hañovu jawamashidikaku. Yishimu 21:31 yalumbulula iyi nsañu muniyi njila nawu: “Kawalu akiloñeshelaña ifuku danjita, ilaña wamwinu wambala waYehova.” Kuhiñahu Rabisheka wahosheli nindi Yehova wadiña nakukiswila aSiriya bayi aYudeyaku. Dichi wahosheli nindi Asiriya hiyadi kwiñila mwiluña dawaYudeyaku.—Isaya 36:9, 10.
ip-1 388 ¶13-14
Mwanta Anamukiswili Muloña waChikuhwelelu Chindi
13 Mumazu indi akutadikisha adiñayi nawu, Rabisheka wahosheli mazu amakwawu akutiyisha woma. Wayisoñamishili aYudeya kubula kumukuhwelela Hezekiya neyi chakwila ahosha nindi: “Yehova wakatwamwina.” Rabisheka wayanukishili aYudeya nindi anzambi awaSamariya akañenyi kwamwina nyichidi 10 kudi aSiriya. Indi anzambi anyuza yikwawu yashindiliwu kudi aSiriya? Wayihwili nindi: “Indi anzambi aHamati niAripadi adi kudihi? Indi anzambi aSefavayimi adi kudihi? Nawa anamwamwini Samariya muchikasa chami tahindi?”—Isaya 36:18-20.
14 Kafwampi, Rabisheka, mukakudifukula wawanzambi akutwamba, neluki wanyi nindi hadi chaambu cheneni hakachi kawaSamariya akakusekesha naYerusalema ayuulileñawu kudi Hezekiya. Anzambi awaSamariya adiña wanyi nañovu yakukiña wanta wanyichidi 10. (2 Anyanta 17:7, 17, 18) Munjila yikwawu, Yerusalema wayuulileñawu kudi Hezekiya walekeli kudifukula kudi anzambi akutwamba nawa watachikili kudifukula kudi Yehova. Hela chochu, añimenu asatu awaYudeya hiyamulumbulwilili Rabisheka chumichiku. “Wena amweneni kwanzo-o nawa hiyahoshelihu izu hela dimu dakumwakulaku, muloña mwanta wayilejeli nindi, “Bayi mumwakulaku.” (Isaya 36:21) Eliyakimi, Shebina niYowa afuntili kudi Hezekiya nawa amulejeli mazu ejima ahosheliyi Rabisheka.—Isaya 36:22.
Yuma Yalema yakuSpiritu
it “Mubulu” ¶4
Mubulu
Yehova wamulejeli Mwanta wawaSiriya Senakeribi nindi: “Nukusha ilowa dami mumuzulu weyi nawa nukukasa mubulu wami hakachi kanyivumbu yeyi, nawa nukukufuntishila munjila yiwenjililimu.” (2An 19:28; Isa 37:29) Yehova wamuletesheli Senakeribi kubula kukuchika Yerusalema nawa wamufuntishili kuNineva, kwamujahililiwu kudi anyanindi awamayala. (2An 19:32-37; Isa 37:33-38) Yehova chashiliyi mubulu mumbaña jawayilumbu chinakumwekesha hatooka chayuulañawu anyama kuhitila mukuyisha mubulu.—Isa 30:28.
FEBRUARY 23–MARCH 1
YUMA YALEMA YAMWIZU DANZAMBI ISAYA 38-40
“Kufwana Kabiña, Wakakamena Mukanka waYimuna Yindi”
Yuma Yatudizishaña Bayibolu Hadi Nsoneki Yachu
3 Tañenu Isaya 40:8. Izu daNzambi dinalomboli chiwahi amayala niambanda ashinshika hadi yaaka yayivulu. Chumichi chatweshekaña ñahi? Ilu hilwihu lwaluwahi, muloña Nsona ajisonekeli dehi kunyima hayuma yakisikaña, dichi kwosi nyivuñilu yayeni yatachi yidiku makonuku. Ilaña Yehova walejeli antu kukopolola nsona yajila. Hela chakwila akakukopolola adiña awanina wanyi, ilaña ashiliku muchima nankashi. Chakutalilahu, kutalisha haNsona jachiHeberu, muntu wumu wadiza chikupu wasonekeli nindi: “Tuneluki netu kwosi mukanda wukwawu wakushankulu wabalumunawu choloka neyi Bayiboluku.” Dichi hela chakwila hahitili mpinji yeneni, ayisonekeli hayuma yakisikaña nawa antu ayikopolweli adiña awanina wanyi, tunateli kukuhwelela chikupu netu mazu itwatañaña muBayibolu yetu makonu amwekeshaña yitoñojoka yaNsoneki yachu, Yehova.
4 Yehova diyi wahanaña “chawaana chejima chachiwahi nichawaana chejima chabadika kuwaha.” (Yak. 1:17) Bayibolu yidi hakachi kayawaana yayiwahi yatwinkayi Yehova. Chawaana chamwekeshaña chatwilukayi muntu wunakutwinka nichelukayi kukala kutukweti. Dichekalayi niMuntu Watwinka Bayibolu. Neyi tushinshika hanichi chawaana, twelukaña yuma yayivulu kutalisha hachekalayi Yehova. Twelukaña netu watwiluka chiwahi nawa weluka niyuma yitwakeñaña. Muchinu chibaaba, tukuhanjeka hachamwekeshaña Bayibolu yilwilu yisatu yikwetiyi Yehova: maana indi, wuñanji windi nikukeña kwindi. Tuhanjekenu ntahi hanjila mwamwekeshelaña Bayibolu maana aNzambi.
cl 70 ¶7
“Nzambi Diyi Chiswamu Chetu” Nawa diyi Wukweti Ñovu Yakutukiña
7 Chadesekejayi nakabiña, Yehova watulejaña nindi wakeñaña kutukiña. (Ezekeli 34:11-16) Anukenu chamulumbululawu Yehova mumazu ekala haIsaya 40:11, ashimunawu muKapetulu 2 kawunu mukanda nawu: “Kufwana kabiña, wakakamena mukanka wayimuna yindi. Wakapompesha hamu anyana kanyikoku, nawa wakayisendela hantulu yindi.” Hanu dinu mwana kamukoku wekala ñahi “hantulu” yakabiña, hewulu dachakuvwala chindi chahewulu? Mwana kamukoku wukuya kudi kabiña nikukwata kumwendu windi. Hela chochu, kabiña diyi watela kubandama nakunona mukoku nikumusha hantulu yindi kulonda ekali wakiñewa. Chumichi chinakumwekesha chafwilañayi kutukiña Kabiña wetu Muneni!
“Wamwinkaña Muntu Wazeya Wuswa”
4 Tañenu Isaya 40:26. Kwosi muntu wachindahu dehi tutumbwa twekala mwiwuluku. Asayantisiti akuhwelela nawu mulalanji wetu waMilky Way wekala natutumbwa 400 biliyoni. Hela chochu, Yehova watwitumba majina nawa weluka hitwekala. Yumanyi yitunateli kudizilaku? Neyi Yehova washa maana yileñaleña yabula wumi, indi enu antu mwamukalakelaña, bayi neyi mwamukalakelaña muloña wayileña munjila yakwila nawu mumukalakeleñaku, ilaña mwamukalakelaña muloña wakumukeña. (Mas. 19:1, 3, 14) Tata yetu watukeña wayiluka chikupu hamuntu-hamuntu. “Ninsuki jenu jakumutu jejima ajichinda dehi” kudi yena. (Mat. 10:30) Nawa nsoneki yamasamu wahosheli nindi: ‘Yehova weluka kukala kwamonañawu antu alala.’ (Mas. 37:18) Mwamweni, wamonaña kukala kwejima kumwamonaña nawa wukuyinka ñovu yakuumika kukala kudi kwejima kumunateli kumona.
5 Tañenu Isaya 40:28. Yehova diyi Mukwakuhana ñovu jabadika. Chakutalilahu, fwikijenu iyena dafumaña kwitañwa. David Bodanis mukwakusoneka jasayansi wahosheli nindi: “Iyena dafumaña kwitañwa hasekondi yimu dikwesekana namabiliyoni amatenda nzumbu akutuña nama atomu.” Mukwakusandujola mukwawu niyena wahosheli nindi “iyena dafumaña kwitañwa hasekondi yimu dinateli kukwasha antu hadi yaaka 200,000”! Kudihu muntu wukujinooka nindi Muntu waleteshaña itañwa kufumisha iyena damuchidiwu kwila yatwinka ñovu yakuumika kukala kutunakumona nehi?
6 Tañenu Isaya 40:29. Mukumukalakela Yehova mwekala muzañalu chikupu. Yesu wayilejeli atumbanji twindi nindi: “Sendenu mpaanda yami.” Wabombelelelihu nindi: “Mukuhizumuka. Muloña mpaanda yami yaswayi kusenda nawa chiteli chami chapepela.” (Mat. 11:28-30) Awa mazu alala chikupu. Mpinji yikwawu neyi tunayi kukupompa hela mumudimu wakushimwina twazeyaña. Hanu mwatiyaña ñahi neyi munafunti kwitala? Mwahizumukaña, nawa mwatiyaña nenu mukushinda kukala kudi kwejima kwamuchihandilu. Mpaanda yaYesu mwamweni yaswayi kusenda!
Yuma Yalema yakuSpiritu
ip-1 400 ¶7
“Kundejenu Antu Jami”
7 Kufuntisha kudifukula kwalala kwadiñaku mu 600 B.C.E. bayi neyi dikwadiña kushikijewa kwaniwu wuprofwetu hohuku. Kwadiña cheñi kushikijewa kwaniwu wuprofwetu muyaaka nkulakaji yakusambila C.E. Yowanu Mpapatishi wadiña izu damuntu ‘wabidikileña mwisaña,’ nakushikija chahosha Isaya 40:3. (Luka 3:1-6) Hampinji yamoneneniwu, Yowanu wahosheli nindi mazu aIsaya atalishili kudi yena. (Yowanu 1:19-23) Kutachika hohu mu 29 C.E., Yowanu watachikili kuloñesha njila yaYesu Kristu. Mazu ashimwineñahu dehi Yowanu aletesheli antu kutachika kumukeñakeña Mesiya akaniniwu, kulonda niwena atachiki kumutiyilila nikumulondela. (Luka 1:13-17, 76) Kuhitila mudi Yesu, Yehova wakatwala antu ejima akabalumuka mumuchima mukusubuka kwalala kunateli kuyisubulawu hohu kudi Wanta waNzambi, dikwila nawu kuyisubula kunshidi nikufwa. (Yowanu 1:29; 8:32) Mazu aIsaya ashikijeweli chikupu hamwininiwu Isarela wakuspiritu washalilihu kufuma muBabiloni Muneni mu 1919 nihafuntishiliwu kudifukula kwalala.