Kukuma Kwakenza Mpinjinyi? Chahosheliyi Yesu

TALENU MAZU AHOSHELIYI YESU KUTALISHA HAKUKUMA:

“Dichi tonenuña, muloña himuneluki ifuku hela mpinjiku.”—MATEWU 25:13.

“Babalenu, tonenuña, muloña himuneluki mpinji yatoñolawuku.”—MAKU 13:33.

Dichi kwosi nimuntu wumu hanu hamaseki weluka mpinji yikakuma nshakaminu yamakonuku. Hela chochu, Nzambi ‘watoñola dehi mpinji,’ “ifuku niora,” hakenza kukuma. (Matewu 24:36) Komana chumichi chinatalishi mukwila nawu kwosi njila mutwatela kwilukila mpinji yakenza kukuma? Inehi. Yesu wayilejeli atumbanji twindi kumona yuma yikamwekesha nawu kukuma kudi mukamwihi.

CHINJIKIJILU

Iyi yuma yinashimuniwu yikamwekana yikekala chinjikijilu chikamwekesha “kukuma kwanshakaminu yamakonu.” Yesu wahosheli nindi: “Muloña muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu, kwakekala nzala yakapwelendendi ninyitentanshi kweñi-nakweñi.” (Matewu 24:3, 7) Wahosheli cheñi nindi kwakamwekana “niyipupu,” nyisoñu yeñi-nayeñi. (Luka 21:11) Komana munakumona yuma yateneniyi Yesu?

Majita, nzala yakapwelendendi ninyitentanshi kushilahu yikatu yabulaña kumana yinatwalekihu munanu mafuku. Chakutalilahu, 2004, muIndian Ocean mwafumini mutentashi weneni waletesheli tsunami yajahili antu 225,000. Hadi yaaka yisatu, chikatu chaCOVID-19 chinajahi antu akubadika ha 6.9 miliyoni mukaayi kejima. Yesu wahosheli nindi yuma yamuchidiwu yakamwekeshaña nawu kukuma kwanshakaminu yamakonu kudi mukamwihi.

“MAFUKU AKUKUMININA”

Bayibolu yalumbulula mpinji yakwila henohu kukuma kanda nawu “mafuku akukuminina.” (2 Petulu 3:3, 4) 2 Timotewu 3:1-5, yahosha nawu mumafuku akukuminina antu akekala nayilwilu yatama. (Talenu chikasha chinakwila nawu “Henohu Kukuma Kwakanu Kaayi Kanda.”) Komana mwamonaña wanyi antu asweja kudikeña, akweti lwisu, asweja kuzuwa nawa abula kudikeña wumu namukwawu? Ichi nichena hichinjikijilu chinakumwekesha nawu tunakushakama kwakwihi nakukuma kwakaayi.

Mafuku akukuminina akatwalekahu kushika mpinjinyi? Bayibolu yahosha nawu ‘hikapinji kantesha.’ Nkumininaku, Nzambi “[wakajilumuna] antu anakukisañana iseki.”—Chimwekeshu 11:15-18, tumazu twaheshina; 12:12.

PARADISA YIDI KWAKWIHI!

Nzambi watoñola dehi ifuku niora yakajilumunayi nshakaminu yatama yamakonu. (Matewu 24:36) Hela chochu, kudi nsañu yikwawu yayiwahi yakwila nawu Nzambi “hakeñaña muntu hela wumu akamujilumuniku.” (2 Petulu 3:9) Dichi nakuyinka antu kukooleka kwakwiluka yuma yakeñañayi kwila nikumwovwahila. Muloñadi? Muloña nakukeña tukapuluki hakukuma kwanshakaminu yamakonu nakushakama mwituña dadiha, hakelishayi iseki kwikala paradisa.

Nzambi nakukeña antu ejima eluki yuma yatela kwilawu hakwila akekali mwituña dadiha dikayuulañawu kudi Wanta windi. Yesu wahosheli nindi nsañu yayiwahi yaWanta waNzambi akayishimwina “mwahita iseki dejima.” (Matewu 24:14) AYinsahu jaYehova mukaayi kejima ashimwinaña maora amavulu nankashi nikudizisha antu nsañu yamuBayibolu yakuchiñeja. Yesu wahosheli nindi iwu mudimu wakushimwina akawuzata mwahita iseki dejima henohu kukuma kanda kwinzi.

Chiyuulu chawantu keña chimani. Ilaña nsañu yayiwahi yidi yakwila nawu munateli kupuluka hakukuma kwakaayi nakwikala muParadisa hamaseki yakaanayi Nzambi. Chibaaba chinalondelihu chikushimuna yuma yimunateli kwila hakwila mwakashakami mwituña dadiha.