Antu Anakukabakana naYitoñojoka muKaayi
“Mpinji yejima kudi yuma yañakamishaña, hela chakwila nashakami nkawami mukapeka.”
“Neyi nisweja kuzañalala, natachikaña kwakama. Kwesekeja nachinadiluka ami aweni neyi ‘nisweja’ kuzañalala hashimbulaña wanyi natachikaña kuneña ‘nankashi.’”
“Nesekaña kusha muchima hayuma yinakumwekana hohu hanodu ifuku, ilaña mpinji jikwawu natachikaña kwakama nankashi hayuma yamwekanaña mafuku amakwawu.”
Awa mazu ayihosheli kudi antu akabakanaña nayitoñojoka. Komana ninenu indi kwiji ntaña yenu imwakeña nakuhita mukukala kwokumu?
Ilukenu nenu himudi nkawenuku. Antu amavulu makonu anakukabakana nayitoñojoka, chili yawu aweni hela yawantaña jawu.
Chakadi nikujina, tunakushakama ‘mumpinji jakala’ jinakuletesha antu kumona yihuñu yayivulu. (2 Timotewu 3:1) Akakusandujola amu achindili nawu, mukaayi, hadi antu 8 hanateli kuwanika muntu wumu wudi nachikatu chamuyitoñojoka. Mu 2020, muloña wachipupu chaCOVID-19, antu amavulu akushika kumapesenti 26 akameneneña nankashi nawa antu amavulu akushika kumapesenti 28 niwena aneñeli nankashi nayitoñojoka.
Hela chochu, twatela kwiluka netu antu amavulu anakukabakana nayitoñojoka. Ilaña chalema enu niantaña jenu kwiluka chimunakutiya kushilahu nichimunakuhanda.
Kwikala nayitoñojoka yayiwahi kwatalisha mudihi?
Neyi yitoñojoka yenu yidi chiwahi, mukutiyaña kuwaha nawa mukwilaña yuma munjila yayiwahi. Mukuswejaña kwakama wanyi, mukuzataña chiwahi nawa mukwikalaña namuzañalu.
Chikatu chamuyitoñojoka . . .
HICHENZAÑA muloña wakuzeyazeya kwamuntuku.
HICHIKATU chaleteshaña muntu kusweja kwakama, kuluwañesha yitoñojoka yindi nikukañanya kudiyuula muyilwilu.
Kakavulu chaleteshaña muntu kukañanya kutiyañana nawakwawu nikukañanya kuzata nyidimu yakudikwasha nachu muchihandilu.
Muntu wejima nateli kukata ichi chikatu, chili hikansi hela mukulumpi, hichikweti muloña nachisemwa, ikowa, muchidi, kudifukula kwindi, shikola yatañayi hela mali akwetiyiku.
Yuma yinateli kuyikwasha neyi munakukabakana nayitoñojoka
Neyi mumona nenu kudi yuma yinahimpiki muchihandilu chenu indi kwiji chantaña yenu, hadaha nkaaminu indi kwiji ndiilu, hela kusweja kwakama indi kwiji kuneña, mwatela kuya nakudimona namuntu wadiza chikupu hayikatu yamuyitoñojoka kulonda ayikwashi kwiluka chinakuletesha oku kukala nichimwatela kukumanisha. Hanu dinu kudihi kumunateli kutambwila iwu wukwashu?
Muntu wumu wadiña namaana nankashi, Yesu Kristu, wahosheli nindi: “Antu akola hiyakeñaña ndotoluku, chiña akata.” (Matewu 9:12) Antu anakukabakana nayikatu atambwilaña wukwashu kudi andotolu niyitumbu kwesekeja nayikatu yikwetiwu, anateli kukeheshaku yuma yaleteshaña iyi yikatu nawa chumichi chinateli kuyikwasha kwikala namuzañalu. Neyi iyi yuma yaleteshaña chikatu chamuyitoñojoka yinakuswejelaku indi kwiji yinatwalekihu, chikuwaha neyi antu anakumona iku kukala akunyakala kudimona nandotolu.a
Hela chakwila Bayibolu himukanda wahosha hansañu yakukola kumujimbaku, nsañu yekalamu yinateli kutukwasha kwikala nayitoñojoka yayiwahi. Tunakuyikolesha kutaña yibaaba yinalondelihu yinakuhosha haBayibolu chiyinateli kutukwasha chakwila nayikatu yamuyitoñojoka.
a Kaposhi Kakutalila hikashimunahu njila yakuukilamuku. Muntu-himuntu watela kutoñojokahu chikupu hanjila yakumuukilamu henohu kanda afuukuli.