Kuhituluka muYikuma Yamaneni

Komana chayikalilaña mpinji yikwawu kwanuka yuma yimunafumi nakudiza? Chumichi chatumwekenaña wejima wetu kakavulu. Chumanyi chinateli kutukwasha? Kuhituluka muyikuma yamaneni.

Neyi munakudiza, hudikilenu kulonda musoneki yikuma yamaneni. Talenu kapostolu Pawulu chayikwashiliyi antu atañileña mukanda windi chayisonekeleliyi nindi: “Ichi dichikuma chacheni.” (Heb. 8:1) Nanawa mazu, wayikwashili antiyilili jindi kulondela nsañu chiyadiña niyikuma chiyadinuñili namutu wansañu.

Munateli kushiyaku mpinji, hadaha maminetisi 10 hanyima yakudiza, kulonda mutoñojoki hayikuma yamaneni yimunadizi. Neyi munakañanyi kuyanuka, talenu tunyitu twanyana hela nyitu yanyikuku yamazu—kakavulu yekala hinyikuku yamazu yakutachikilahu muparagilafu—kulonda mwanuki. Neyi munadizi nsañu yayiha, esekenu kuyilumbulula mumazu enu. Neyi muhitulukaña muyikuma yamaneni, chikuyikwasha kwanuka nikumona oyu nsañu chiyinateli kuyikwasha muchihandilu chenu.