Imbujolenu Ntañishi Muneni Hakuzatisha Mukanda waChatañishaña Bayibolu
1. Indi Yesu watañishileña ñahi?
1 Ntañishi Muneni, Yesu, mpinji yejima walumbulwileña yuma munjila yapela nawa yatiyakana. Hakwila nawu yakwashuku antiyilili indi kutoñojoka, mpinji yikwawu watachikileña kuyihula lwihu kulonda kwiluka yitoñojoka yawu. (Mat. 17:24-27) Washili kashinshi nankashi Kwiizu daNzambi. (Mat. 26:31; Maku 7:6) Washiliku maana kulonda kubula kuyileja atumbanji twindi nsañu jajivulu, muloña welukili nindi akutwalekahu nakudiza. (Yow. 16:12) Yesu cheñi wakeñeleña kwiluka neyi chakwila atumbanji twindi anakuhweleleli nikutiyisha yuma yadiña nakuyitañishayi. (Mat. 13:51) Mukanda waChatañishaña Bayibolu niwena anawisoneki kulonda kutukwashaku kutañisha munjila yoyimu.
2. Munjilanyi mutwatela kuzatishila malwihu akutachikilahu amukapetulu kadi kejima?
2 Malwihu Akutachikilahu: Neyi himukutachika kudiza kapetulu, chachiwahi kuhosha hamalwihu akutachikilahu ekala mwishina damutu wansañu. Ihulenu lwihu lwakusañumuna nachu mpwila yakadizi. Hela munateli kumuleja kulonda yahoshuhu mukwihihisha hanawa malwihu. Hichakeñekaña kuhituluka cheñi mumazu ejima ahoshayi mukukunama hela kolola hejima haluwañeshayiku. Munateli kumuhameka hamazu anahoshiyi nakutachika kutaña mazu adi mumukanda. Mazu akuhoshayi hamalwihu akutachikilahu akuyikwasha enu kwiluka neyi chakwila munakukeña kuhosha chikupu hachikunku chimu chidi mukudiza.
3. Munjilanyi mutwatela kupeleshela kudiza?
3 Jinsona: Kudiza kwatela kushindamena hajiNsona. (Heb. 4:12) Hela chochu, hichinakukeñeka kutaña nsona yejima yanatenuwuku. Konkomwenenu haNsona hashindamena yuma yitwakuhwelela. Nsona yahanaña chikunku chansañu yayeni hekwawu hitwatela kuyitañaku. Mukanda waChatañishaña Bayibolu walumbululaña chalala munjila yaswayi kutiya. Ilishenu kudiza kwikala kwapela. Shindamenenu hayikuma yamaneni, tondolwelenu chaaku chakuhoshaña hoshe-e hela kuletamu nsañu jikwawu mukuhanjeka chakubula kutelela.
4. Chumanyi chikutukwashaku kufuukula neyi chakwila tunakukeña kwikalaku nampinji hakudiza kulonda kutaña nsañu yidi muapendikisi?
4 Apendikisi: Apendikisi yikweti nyitu yakudiza 14 yakubombela kunsañu yidi mukapetulu. Kuhanjeka haniyi nyitu yansañu hampinji yakudiza hichuma chimwatela kufuukulahu. Neyi himukuhosha hanyitu yansañu yikwawu, mwatela kutondahu kukolesha kadizi wenu kuditañila yomwenindi nsañu yinabombelewihu, sweje-e neyi natiyishishi nikwiteja nsañu yidi mukapetulu. Chakutalilahu, neyi kadizi wakuhwelela dehi nindi Yesu diyi Mesiya, hichinakukeñeka kudiza cheñi nindi hamutu wunakwila nawu ‘Yesu Kristu—Mesiya Wakaniniwuku’ hampinji yimukudizaña mukapetulu 4, kanakwila nawu “Yesu Kristu Hinyi?” Mpinji yikwawu, munateli kushiyaku mpinji hakudiza kulonda kuhoshahu hansañu yidi muapendikisi hela muchikunku chikwawu.
5. Neyi tunasakuluhu kuhanjeka nsañu yidi muapendikisi, tunateli kuyila ñahi?
5 Neyi munasakuluhu kuhanjeka hansañu yidi muapendikisi, mwatela kuloñeshela chadimu malwihu nakutaña maparakalafu nakadizi neyi chochina chimukutaña mukapetulu nakadizi. Hela kwesekeja nayuma yinakukeñeka kudi kadizi, mwatela kwikalahu nakapinji kantesha hampinji yimunakudiza kulonda muhitulukimu nindi muniyi nsañu. Ichi chikuyikwashaku kwiluka chikupu nawu watiyishaña nsañu yinakuditañilayi yomwenindi.
6. Indi chikasha chamalwihu akuhitulukamu hakukumisha kudiza kudi kwejima chatela kuzatishewa ñahi?
6 Chikasha Chakuhitulukamu: Chikasha chekala kunsa yakapetulu kejima chahanaña nsañu yavula kwakula malwihu akutachikilahu. Mwatela kuzatisha nsañu yeniyi kulonda kuhituluka muyikuma yamaneni yamukapetulu. Akwakushimwina amakwawu anachimoni neyi chakwashaña kutañila hamu nyikuku yeniyi nakadizi hekwawu ninsona jinalondeluhu. Kufumahu akumwihula kadizi kulumbulula mukwihihisha chinesekani nsona namukuku wamazu. Ichi chakwashaña ntañishi kwiluka neyi chakwila kadizi watiyishishaña chikupu yikuma yamaneni yidi mukudiza nichiyinesekani nakuhosha kwaBayibolu nakumona kwila nawu neteji awa mazu. Cheñi nawa chikumudizisha kadizi chakuzatisha Bayibolu hakulumbulula chalala kudi amakwawu.
7. Munjilanyi mutwatela kuzatishila mukanda waChatañishaña Bayibolu hakukalakala mudimu wetu?
7 Njila yimu yayiwahi yakukalakelamu mudimu wetu wakutañisha antu nikwilisha atumbanji yindi yakwimbujola njila yadiña nakutañishilamu Yesu. (Mat. 28:19, 20) Mukanda waChatañishaña Bayibolu wunateli kutukwasha kwila mwenimu. Wuzatishenuña chikupu kulonda mutañishi amakwawu chalala munjila yatiyakana, yapela nawa yakutiyisha kuwaha.