Zatishenu Chiwahi Yuma Yidi muMukanda waChatañishaña Bayibolu

Neyi kadizi waBayibolu yeluka yuma yayeni yatañishaña Bayibolu nikuyizatisha wukupama nikusoña nyikabu. (Mas. 1:1-3) Tunateli kukwasha atudizi aBayibolu kupama kuspiritu neyi tukuzatishaña chiwahi yuma yidi mumukanda waChatañishaña Bayibolu.

Malwihu Akutachikilahu: Tupetulu twejima twatachika namalwihu akulawu munitu tupetulu. Mwatela kumwihula kadizi awa malwihu kulonda mumusañumuni mpwila yakudiza. Hela mwihulenu yahoshi mukwihihisha hamalwihu ejima. Neyi ñakwilu yindi yaloña wanyi, bayi mumwolola haniyi mpinjuku. Ñakwilu yindi yikuyikwasha kwiluka yikuma yimwatela kulumbulula nakashinshi nikukonkomwena.—Yish. 16:23; 18:13.

Apendikisi: Neyi kadizi natiyi nawa neteji nsañu yimunakudiza mumukanda, mulejenu yakatañi nsañu yikwawu yidi haapendikisi nkawindi. Ifuku dikwawu dimwakadizaña, mwakahanjeki nindi chanti kulonda mwakamoni neyi neluki nsañu yatañayi. Ilaña neyi nsañu yidi muapendikisi yikumukwasha, hanjekenu nindi iyi nsañu hampinji yimunakudiza kuhitila mukutaña maparagilafu nikumwihula malwihu imwaloñeshela chadimu.

Chikasha Chamalwihu Akuhitulukamu: Chikasha chamalwihu akuhitulukamu chidi kunsa yakapetulu mudi nsañu yakula malwihu adi kumatachikilu akapetulu. Mwatela kuzatisha iyi nsañu kulonda mumukwashi kadizi yeluki yikuma yamaneni nikuyilumbulula. Tañenu nsañu yidumu nezu datiyakana kushilahu ninsona. Nkumininaku, mwilenu kadizi yalumbululi yikuma yidi muchikasha chiyinekalili yalala kuzatisha nsona.—Yil. 17:2, 3.