Diloñeshenu Chikupu Kulonda Mutañishi
1. Muloñadi wutwatelela kusha maana hakusañumuna kadizi kuhameka yuma yinakudizayi hampinji yitunakulombola kudiza kwaBayibolu?
1 Neyi tunakulombola kudiza kwaBayibolu, twatela kudiloñesha chikupu neyi tunakukeña kumusañumuna kadizi kulonda yamukalakeli Yehova. Kuzata nañovu kukutuleñela kumukwasha kadizi kuhameka yuma yinakudizayi muBayibolu. Chumichi chikumukolesha kadizi. (Kuhit. 6:5; Yish. 4:23; 1 Kor. 9:26) Hanu dinu tunateli kwila ñahi mwenimu?
2. Indi kulomba kunateli kutukwasha ñahi kuloñesha kudiza?
2 Lombenuña haMpinji Yimunakuloñesha: Chineli Yehova diyi waleteshaña mbutu yansañu yalala kukula mumuchima wakadizi, chachiwahi kulomba hakutachika kuloñesha nsañu yakudiza nakutena kukankila kwakadizi. (1 Kor. 3:6; Yak. 1:5) Kulomba kwamuchidiwu kukutukwasha kwiluka chitwatela kumukwasha chikupu kulonda muchima windi wusweji “kwiluka” nkeñelu yaYehova.—Kol. 1:9, 10.
3. Tunateli kuloñesha ñahi nakutoñojoka hadi kadizi?
3 Mwilukenu Kadizi: Yesu welukili nindi kutañisha chiwahi kwakeñekaña kwiluka izaza. Yesu amwihwili lwihu lwolumu mapampa kayedi hampinji yashiyashana nawu: “Nukwila ñahi kulonda niswani wumi wahaya nyaka?” Wakwili munjila jashiyashana. (Luka 10:25-28; 18:18-20) Hampinji yitunakuloñesha, twatela kutoñojoka yuma yatela kudizayi kadizi wetu. Nsonanyi jinatenuwu jitukutaña nindi? Kuvula kwansañu yishika hadihi yitukudiza? Yikumanyi yitukudiza yatela kumukalila kadizi kutiyishisha hela kwiteja? Neyi twilukilañahu dehi malwihu amakwawu atela kwihulayi kadizi, tukudiloñesha chikupu kwakula chachiwahi.
4. Indi kuloñesha chachiwahi kwakeñekaña kwiladi?
4 Hitulukenu muNsañu Yimunadizi: Hichikweti muloña wakudiza nsañu yeniyi mapampa kakavulu kunyimaku, dikapampa katachi kudiza naniwu kadizi. Chalema kudiloñesha chachiwahi hampinji yejima yitunakudiza kulonda tumushiki hamuchima. Chumichi chaya mukwila nawu twileña chuma chitwakoleshaña atudizi etu kwila. Hitulukenu munsañu, kushilahu ninsona jinatenuwu nakutoñojoka hadi kadizi, hadaha nikufunda yikuma yamaneni.—Rom. 2:21, 22.
5. Tunateli kumwimbujola ñahi Yehova?
5 Yehova wafwilaña nindi atudizi ejima aBayibolu ayileñaku hambidi. (2 Pet. 3:9) Kuhitila mukwikala nampinji yakuloñesha kudiza kwaBayibolu kwejima, tukumwekeshaña kukeña.