“Hinadiña Nkawamiku”

CHAKUTALILAHU CHAWANVWALI JAMI

Atata nawamama adiña aKatolika aweni. Ilaña chadiziliwu muBayibolu nawu ijina daNzambi diyi Yehova, wejima wawu ayedi ekalili aYinsahu jaYehova adikita chikupu. Atata alekeli kubaza yifwikija yaYesu. Ilaña, azatishili mudimu welukawu wakusoña kulonda ahimpi hanji yetala detu hekali Itala daWanta datachi muSan Juan del Monte, tawuni yekala kwakwihi naManila, musumba weneni muPhilippines.

Hanyima yakuvwalika mu 1952, anvwali jami atachikili kundizisha chikupu yuma yakuspiritu yadiña nakudizishawu ayaya jami awamayala awana niawambanda asatu. Chinakulili, atata ankolesheli nawu nitañeña kapetulu kamu kamuBayibolu hefuku-hefuku, nawa adizileña nanami kuzatisha nyikanda yayivulu yamukuloñesha yambokamboka. Mumpinji-mumpinji, anvwali jami atambwilileña ankoñi endaña niañimeni akasanji kamutayi kwinza nakushakama kwitala detu. Hamu neyi chisaka, twekalileña namuzañalu chikupu nawa twakolesheweleña neyi awa amanakwetu atuleja yuma yayivulu yahitilimu, yumiyi yatusañumwini wejima wetu kutwamijaku mudimu waYehova muchihandilu chetu.

Anvwali jami ankwashili kwikala nachikuhwelelu chakola. Amama yami inakeña chafwiliwu nachikatu, ami nawatata twatachikilili hamu wupayiniya mu 1971. Ilaña mu 1973 hinadiña nayaaka 20, atata afwili. Chinafwishili anvwali jami ejima ayedi nadimweni kwikala wamukunkulwayi nawa natiyili neyi nidi nkawami. Ilaña kuchiñeja “kwalala nawa kwakola” kwekala muBayibolu kwankwashili kubula kuswijewa nawa nekalili wakola muyitoñojoka nikuspiritu. (Heb. 6:19) Hashimbwili wanyi kufuma hafwiliwu atata, netejeli kuya nakuzata neyi payiniya wadimena hachituutu chekala hankawachu chaCoron, kukabeta kaPalawan.

HINADIÑA NKAWAMI HAMPINJI YINAZATILEÑA NYIDIMU YAKALA

Nadiña nayaaka 21 hinashikili kuCoron. Chineli nakulilili mutawuni, nahayamini chinawanini nawu hanichi chituutu hadiña hohu antu antesha adiña namalayiti mumatala, menji, hela nyotoka nimahonda. Hela chakwila kwadiña amanakwetu antesha, hinadiñahu namukwetu payiniya wakuzata nindiku, nawa mpinji jikwawu nashimwinineña nkawami. Mukakweji kakutachikilahu, nanukileña nankashi chisaka chami niamabwambu jami. Nawufuku, nabanjilileña tutumbwa mwiwulu iku madilu anakuwulumuka mumesu. Nakeñeleña kushiya mudimu wami kulonda nifunti kwitala.

Muniyi mpinji yakala, namulejeleña Yehova yuma yejima yadiña kumuchima wami mukulomba. Nanukileña nsañu yakukolesha yinatañileña muBayibolu nimunyikanda yetu. Kakavulu nanukileña chahosha Isamu 19:14. Nelukili nami Yehova wukwikala “Ilola dami nawa Nkuuli yami” neyi nitoñojokaña chikupu hayuma yamutiyishaña kuwaha, chidi neyi nyidimu yindi niyilwilu yindi. Chibaaba chamuKaposhi Kakutalila chahosheleña nawu “You Are Never Alone” (“Wudi Nkaweyi Wanyi”),a chankwashili nankashi. Nachitañili kapampa kakavulu. Munjila yikwawu, nadiña nkawami hamu naYehova haniyi mpinji, nawa chumichi chankwashili kwikala nampinji yakulomba, kudiza nikutoñojokahu chikupu.

Hashimbwili wanyi kufuma hinashikili kuCoron, antondeli kwikala mukulumpi. Chineli nadiña mukulumpi nkawami, mulungu nimulungu yami walombweleña Shikola yaMudimu waTeokalatiki, Kupompa kwaMudimu, Kudiza kwaMukanda haChipompelu niKaposhi Kakutalila. Nahanineña cheñi mpanji yawantu amavulu mulungu himulungu. Dichi, hinatiyileñahu nami nidi nkawamiku!

Mudimu wakushimwina wendeleña chiwahi kuCoron, atudizi ami aBayibolu apapatisheweli. Ilaña namweneña cheñi kukala. Mpinji jikwawu, nendeleña chikunku chefuku hakwila nishiki kunayileña nakushimwina, nawa nelukileña wanyi kunatela kukaama neyi nishika. Mwiluña dachipompelu dakushimwina mwabombeleli nituyituutu twanyanya twatuvulu. Kakavulu nendeleleña muwatu hakaluñalwiji hadiña mankanda amaneni hakwila nishiki oku kwinnakuya, hela chakwila nelukili kusala wanyi! Muniku kukala kwejima Yehova wankiñileña nawa wankwashileña. Nkumininaku, nelukili nami Yehova wadiña nakundizisha chinatela kuumika kukala kunadi kuwana mumudimu wukwawu.

PAPUA NEW GUINEA

Mu 1978, antemesheli kuya nakuzatila kuPapua New Guinea, kabeta kakuchimunswa kaAustralia. Papua New Guinea hiituña damapidi, dikwesekana kutoha kwakwihi naSpain. Nahayamini chinelukili nami antu kwakwihi namamiliyoni asatu ahosheleña madimi kubadika ha 800. Hela chochu, antu amavulu ahosheleña chiMelanesia Pidgin, idimi davula kutenawu nawu Tok Pisin.

Anlejeli kuzatila muchipompelu chaIngilishi hakapinji kantesha mumusumba weneni muPort Moresby. Ilaña mukuhita kwampinji nabuukilili muchipompelu mwahoshañawu idimi daTok Pisin nawa natachikili kudiza idimi. Nazatishileña yuma yinadizileña muniyi shikola mumudimu wakushimwina. Chumichi chankwashili kudiza swayi idi idimi. Hashimbwili wanyi, natachikili kuhana mpanji yawantu amavulu mwidimi daTok Pisin. Fwikijenu chinatiyili henohu kanda nishikiji chaaka chimu kufuma hinashikili muPapua New Guinea, antondeli kwikala nkoñi wañinza kuzatila muyipompelu yamadimi aTok Pisin mutubeta twatuvulu.

Chineli yipompelu yadiña mwamulehi, naloñesheleña kupompa kwañinza kwakuvulu nikwenda nankashi. Hakusambila, natiyili kwikala nkawami muloña wakwikala mumaluña inabula kwinjilila, ituña dadiha, idimi dadiha nichisemwa chachiha. Hinatwesheleña kuya kuchipompelu hichipompelu hamasekiku muloña wajimpidi ninyikandu yatama. Dichi mulungu himulungu navulileña kwenda nandeki. Mpinji jikwawu, nakandamineña hohu nkawami mukadeki kanyanya. Kwenda munaka kadeki kwantiyishileña woma nankashi neyi chinatiyileña kwenda muwatu!

Antu antesha hohu diwu adiña namafoni, dichi nadiña nakuhanjeka nayipompelu kuzatisha nyikanda. Kakavulu, nashikileñahu dehi henohu nyikanda yami kanda nawa nadiña nakwihujola hakwila niwani akakushimwina. Hela chochu, chinawana amanakwetu, antambwilileña namuzañalu chikupu chakwila nanukileña chaletesheleña nizateña nañovu. Namweneña Yehova chankwashileñayi munjila jajivulu, nawa wubwambu wami nayena wakoleleña chikupu.

Chinayili nakupompa katachi kuchituutu chakuchikumu chatenañawu nawu Bougainville, adisumbula atumbili chimwemweta, enjili nakunwana nakuñihula nawu, “Munatwanuki?” Inakwanuka nayishimwinini awa adisumbula mpinji yinashikili katachi kuPort Moresby. Natachikili kudiza nawu Bayibolu henohu kanda niyihani kudi manakwetu wamunidi iluña. Ichi wejima wawu ayedi adiña apapatishewa! Iyi yadiña hinkisu yimu yinatambwilili hakachi kankisu jinatambwilili muyaaka yisatu yinakalakeleli muPapua New Guinea.

CHISAKA CHANYANYA CHADIKITA

Henohu kanda nifumi kuCoron mu 1978, nadilukili namuhela walubanji nawa wadikita wejina daAdel. Wadiña payiniya wampinji yejima iku nakukulisha anyanindi ayedi, Samuel niShirley. Hampinji yoyimu, wadiña nakwakamena amama yindi akula dehi. MuMay 1981, nafuntili kuPhilippines nakumusumbula Adel. Chitwadisumbwili, wejima wetu twazatileña wupayiniya wampinji yejima nikwakamena chisaka.

Hela chakwila nadiña nachisaka, mu 1983, antondeli cheñi kutwalekahu kwikala payiniya wadimena nawa antemesheli kuya nakuzatila kuChituutu chaLinapacan, kukabeta kaPalawan. Chisaka chejima chabuukilili kunidi iluña dekala kwankawadu kwabulili aYinsahu. Chimwahitili chaaka chimu amama yaAdel afwili. Hela chochu, twatwalekelihu kudikita mumudimu wakushimwina, nawa watukwashileña kuumika nakukala kutwadiña naku. Twatachikili atudizi aBayibolu apamineña kuLinapacan chakwila hashimbwili wanyi kwakeñekeleña Itala daWanta danyanya. Dichi twatuñili dimu etu aweni. Chimwahitili hohu yaaka yisatu kufuma hitwashikili, twazañaleli hakumona antu 110 anenzi kuChanukishu, nawa amavulu hakachi kanawa antu apamini nakupapatishewa hanyima yikwila tunafumiku dehi.

Mu 1986, antemesheli kuya nakuzatila hachituutu chaCulion, hatwalileñawu antu akata mbumba. Kufumahu, Adel niyena amutondeli kwikala payiniya wadimena. Hakusambila, twatiyileña woma kushimwina antu adiña nambumba. Ilaña akakushimwina amunidi iluña atulejeli nawu antu akatili ichi chikatu ayinkeli yitumbu nawa chasambukilileña wanyi. Antu amakwawu akata apompeleleña mwitala damuhela. Hashimbwili wanyi twenjililili nawa mwafumineña yuma yayiwahi chitwalejeleña antu nsañu yamuBayibolu yakuchiñeja adimweneña nawu ayidiwula kudi Nzambi niantu. Chatuzañalesheli hakumona antu adiña akata nankashi chekaliliwu namuzañalu nanochu chelukiliwu nawu ifuku dimu akekala akola kumujimba chikupu.—Luka 5:​12, 13.

Anyanetu enjilili ñahi chihandilu chamuCulion? Ami naAdel twatambikili ahela ayedi atwansi afumini kuCoron kwinza nakushakama nanetu kulonda anyanetu ekaliku nawantu akudikunda nawu chiwahi. Samuel, Shirley, ninawa ahela ayedi adiluñishileña kushimwina nkawawu, nakudizisha anyana amavulu iku ami naAdel tunakudizisha anvwali janawa anyana. Kafwampi, mpinji yimu twadizishileña yisaka 11. Hashimbwili wanyi, twatachikili kulombola atudizi aBayibolu amavulu apamineña chakwila twatuñili nichipompelu chachiha!

Hakusambila, nadiña hohu mukulumpi nkawami munidi iluña. Dichi kasanji kamutayi kanlejeli nawu nilomboleña kupompa kwejima kwamumulungu kudi akakushimwina 8 muCulion nikudi akakushimwina 9 mumukala watenañawu nawu Marily, hitwendeleña maora asatu nawatu. Chitwamanisha kupompa kunidi iluña, hamu neyi chisaka, twahitileña mwiluña damapidi hadi maora amavulu nakulombola atudizi aBayibolu mumukala watenañawu nawu Halsey.

Nkumininaku, antu amavulu nankashi enjili muchalala muMarily nimuHalsey chakwila twatuñili Matala aWanta mumaluña ejima ayedi. Neyi chichadiña kuLinapacan, amanakwetu niantu itwadizishileña diwu atwinkeleña yuma yakumujimba nikutukwashaku nyidimu yikwawu. Itala dakupompela damuMarily dadiña deneni mwakwiñila antu 200 nawa aditohesheli nankashi, chumichi chaletesheli tutachiki kupompelamu kupompa kwamaneni.

CHINEÑI, KUDITIYA KWIKALA NKAWAMI NICHINEKALILI CHEÑI NAMUZAÑALU

Mu 1993, chelili anyanetu anakuli dehi, ami naAdel twatachikili mudimu wawunkoñi muPhilippines. Kuhiñahu mu 2000, nayili kuShikola yaKudiza Mudimu wawuNkoñi kulonda andizishi kwikala ntañishi waniyi shikola. Nadimweneña nami nashikilimu wanyi kuzata iwu mudimu, ilaña Adel wankolesheleña mpinji yejima. Wañanukishileña nindi Yehova wukunyinka ñovu yakuzata chiwahi iwu mudimu wanyinkeliwu. (Fwili. 4:13) Adel welukili nindi chumichi chikutwesheka muloña wadiña nakuzata mudimu windi chiwahi iku nakukata.

Mu 2006, hinadiña nakutañisha, Adel amukwatili nachikatu chatenañawu nawu Parkinson. Twahayamini nankashi! Chinahosheli nami tuleki mudimu wutwazatileña kulonda nimwakameneña, Adel wahosheli nindi, “Nkeñelenu ndotolu kulonda ankwasheña nachikatu chinukweti, nawa neluki nami Yehova wukutukwasha kutwalekahu kuzata mudimu wetu.” Muyaaka 6 yalondelelihu, Adel watwalekelihu kuzata mudimu waYehova chakadi kutooba. Chatachikiliyi kukañanya kwenda, washimwinineña iku wudi mukakinga kawayifwayi. Chatachikiliyi kukañanya kuhosha, wakwileña hakupompa mwizu dimu hela mumazu ayedi. Sampu nichafwiliyi mu 2013, mpinji yejima Adel watambwilileña mameseji akusakilila hachakutalilahu chindi chachiwahi chakuumika. Nashakamini naAdel kubadika hadi yaaka 30, ibwambu dami inakeña nawa washinshika. Dichi chafwiliyi, natachikili cheñi kutiya chineñi nikutiya neyi nidi nkawami.

Adel wakeñeleña nindi nitwalekihu mumudimu wami, dichinelili. Natwalekelihu kudikita, chumichi chankwashili kubula kuditiya nami nidi nkawami. Kufuma mu 2014 nakushika mu 2017, antemesheli kuya nakwendela yipompelu yahoshaña idimi daTagalog mumatuña mwakaanishiliwu mudimu wetu. Kufumahu, nendeleli yipompelu yahoshaña idimi daTagalog muTaiwan, muUnited States, nimuCanada. Mu 2019, natañishileña Shikola Yawakakushimwina aWanta mwidimi daIngilishi muIndia nimuThailand. Nekalaña namuzañalu nankashi muniyi nyidimu yejima. Nekalaña namuzañalu waweni neyi inakudikita chikupu mumudimu waYehova.

MPINJI YEJIMA TWATAMBWILAÑA WUKWASHU WUTWAKEÑAÑA

Mumudimu wejima wawuha wanyinkeleñawu, nadikundaña nawamanakwetu niahela inawanineña, dichi chankalilileña nankashi kuyishiya. Hampinji yamuchidiwu, nadizi kumukuhwelela chikupu Yehova. Mpinji yejima namonaña Yehova chankwashañayi, nawa chumichi chinankwashi kwiteja chakufuma hamuchima kuhimpika kwejima kwenzaña muchihandilu chami. Ichi nidi payiniya wadimena muPhilippines. Nidi wakasunuka muchipompelu mwinnabuukili, chinekali neyi chisaka chinakunkwasha nikuñakamena. Nidi cheñi namuzañalu hakumona aSamuel naShirley chinakwimbujolawu chikuhwelelu chamama yawu.—3 Yow. 4.

Eña, nahiti mukukala kwakuvulu muchihandilu chami, kushilahu nikumona ñodami inakeña chinakukabakanayi nikufwa nachikatu chafwana. Natwalekihu cheñi kuhimpa kwesekeja nachidi yuma muchihandilu. Ilaña, namoni nami Yehova “hekala kwakulehi nanetu ejimaku.” (Yilw. 17:27) Chikasa chaYehova “chachihi wanyi” mwaka chikañanyi kukwasha nikukolesha ambuñindi, hela chakwila adi mumaluña mwakankawawu. (Isa. 59:1) Yehova, Ilola dami, wekalaña nanami muchihandilu chami chejima, nawa namusakililaña nankashi. Hinadiña nkawamiku.