Komana Nzambi Wazatishili Yuma Yasefukili Kulonda Yaleñi Nachu Yuma Yikwawu?
Ñakwilu yamuBayibolu
Inehi. Bayibolu yashimuna hatooka nawu Nzambi diyi waleñeli antu kushilahu tuhu nianyama ashiyashana ninyitondu ‘iyi namwayu, iyi namwayu.’a (Kutachika 1:12, 21, 25, 27; Chimwekeshu 4:11) Yahosha nawu antu ejima afuma kudi Adama naEva, anvwali jetu atachi. (Kutachika 3:20; 4:1) Bayibolu hiyeteja yitoñojoka yakwila nawu Nzambi welili hohu yileñaleña yashiyashana yidileñi yayeniku. Hela chochu, muBayibolu mwekalahu wanyi nsañu yatadikishaña nayuma yashimunañawu asayansi yakwila nawu yileñaleña yonaña yadileñeli yayeni.b
Komana Nzambi wazatishili yuma yasefukili kulonda yaleñi nachu yuma yikwawu?
Antu akuhwelela nawu Nzambi wazatishili yuma yasefukili kulonda yaleñi nachu yuma ekala nayitoñojoka yashiyashana kutalisha hachayileñeliyi. Kwesekeja namukanda waEncyclopædia Britannica, antu amakwawu ahoshaña nawu “Nzambi waleñeli yileñaleña yonaña kulonda yitwalekeñahu kwikalaku nawa yikwawu yifweña.”
Nsañu yakwila nawu yuma yadileñeli yayeni mwabombela nsañu yinalondelihu:
Yileñaleña yejima yikweti wumi yafuma kudi ankakulula adiñaku kunyima.
Chileñaleña chimu chinateli kuhimpika nakwikala chuma chacheñi chonaña, mpinji yikwawu iyi yitoñojoka yatalishaña kukubalumuka kufuma muchuma chimu nakwikala chuma chikwawu.
Hadaha Nzambi diyi waleteshaña iyi yileñaleña yileña mwenimu.
Komana Bayibolu niyena yahosha nawu yuma yadileñeli yayeni?
Antu akuhwelela nawu yuma yadileñeli yayeni amonaña nsañu yamuBayibolu yekala mumukanda waKutachika nawu yakutwamba. Hela chochu, Yesu wateneni nsañu yekala mumukanda waKutachika nindi nsañu yalala yakunyima. (Kutachika 1:26, 27; 2:18-24; Matewu 19:4-6) Bayibolu yahosha nawu henohu kanda yenzi heseki, Yesu wadiña mwiwulu naNzambi nawa wamukwashileñaku Nzambi kuleña “yuma yejima.” (Yowanu 1:3) Dichi, nsañu yakwila nawu yuma yadileñeli yayeni yambukaku nachatañishaña Bayibolu.
Komana nyitondu nianyama akweti wuswa wakudihimpa kulonda atwalekihu kuhanda kwesekeja neluña kuyidi?
MuBayibolu hiyashimunamu mapampa anateli kudihimpa chuma kwesekeja namuchidi wachuku. Hela hiyatadikishaña nansañu yakwila nawu nyitondu nianyama ashiyashana aleñeliyi Nzambi anateli kuhimpikaku mumutapu yowumu kwesekeja nachinakusemawu hela neluña kwadiwuku. Hela chakwila antu amonaña iku kuhimpika kwayuma nawu yadileñeli yayeni, kwosi chuma nichuma chachiha chikweti wumi chadileñaku.
a Kakavulu, ahoshaña asayantisiti nawu yuma yabalumukaña ilaña yabalumukaña niwanyi.
b Yitoñojokaña yamuchidiwu mpinji yikwawu yatalisha kukubalumuka kufuma muchuma chimu nakwikala chuma chikwawu.