MPANJI 12
Antu Anakutuña Kaposhi Keneni
MWAHITILI yaaka yayivulu. Anyana kaNowa avweli anyana amavulu. Dichi chakuliliwu anyanawu, niwena avweli anyana amavulu. Mukuhita kwampinji hamaseki hekalili antu amavulu.
Wumu hadi awantu wadiña mwana kamwijikulwa Nowa wejina daNimirodi. Nimirodi wadiña muntu watama, wadiña chibinda nawa wajahileña anyama niantu hamu. Nimirodi wadidyishili yomwenindi wanta kulonda ayuleña antu. Nzambi hamukeñeli Nimirodiku.
Antu ejima hayina mpinji ahosheleña idimi dimu hohu. Nimirodi wakeñeleña nindi ayihembi wejima wawu hamu kulonda ayiyuleña. Wuneluki chuma cheliliyi? Walejeli antu kutuña musumba nikaposhi keneni. Yitali hamwevulu chanakutafulawu matafwali.
Yehova Nzambi hatiyili kuwaha naniwu mudimu wakutuñaku. Nzambi wakeñeleña nindi antu atandi nakushakama mwejima mwakumina iseki. Ilaña antu ahosheli nawu: ‘Twayenu! Tuyenu tutuñi musumba nikaposhi kakalehi insa yaku yakashiki mwiwulu. Dichi twakatiyakani!’ Antu wenawa akeñeleña kudilemesha, bayi kulemesha Nzambiku.
Dichi Nzambi walekesheli antu kutuña kaposhi. Wuneluki cheliliyi? Kuhitila mukuyilisha antu kuhosha madimi ashiyañana, chatela ahosheña idimi dimu hohu. Akwakutuña hiyatwesheli kutiyashana wumu namukwawuku. Dimuloña waweni chawuteneneniwu musumba wawu nawu Babeli hela Babiloni, chalumbuluka nawu “Kuluwankana.”
Antu atachikili kupalañena kwakulehi naBabeli. Mazanvu awantu adiña nakuhosha idimi dimu, ayili nakushakama hamu mumpata yacheñi yahamaseki.