Kaposhi kaBabeli

Hanyima yaDibaji, anyana kaNowa nawañodi jawu avweli anyana amavulu nankashi. Yisaka yawu yavulili nawa atachikili kutaanda mwahita iseki dejima neyi chayilejeliyi Yehova.

Ilaña yisaka yikwawu hiyamwovwahilileña Yehovaku. Ahosheli nawu: ‘Twayenu tudituñili musumba kulonda tushakami kunu. Tukutuña kaposhi kakalehi kakashika mwiwulu. Kufumahu twakaya mpuhu.’

Yehova hatiyili kuwaha nachuma chelileñawu awa antuku, dichi wayilekesheli. Wuneluki cheliliyi hakwila ayilekeshi? Hohenohu wayiletesheli atachiki kuhosha madimi ashiyashana. Chineli akañenyeña kutiya idimi dinakuhosha mukwawu, alekeli mudimu wakutuña. Musumba watuñileñawu awutuumbili nawu Babeli, daya mukwila nawu “Kuluwankana.” Antu atachikili kupalañana nakushakama mwahita iseki dejima. Ilaña atwalekelihu nakukoña yuma yatama kumaluña kwayiliwu nakushakama. Komana hayina mpinji kwadiñahu antu amukeña Yehova? Tukwiluka chumichi mukapetulu kanalondelihu.