MPANJI 36
Mwana Kañombi waWuru
YOWE-E! Chumanyi chanakwilawu antu ahanu? Anakulomba kudi mwana kañombi! Muloñadi chanakwililawu ñana?
Chanaswejiyi Mosi kushimbula hampidi, antu hiyakuhosha nawu: ‘Hituneluki chinamumwekeni Mosiku. Dichi twilenu nzambi wukutulombola kufuma muyinu mpata.’
Mana kwa Mosi, Aroni hakuhosha nindi, ‘Chachiwahi. Kotolenu tuzeya twenu twawuru twakumatu mutunleteli.’ Chanaletiwu antu, Aroni hakutusuñununa nawa hakwila mwana kañombi wawuru. Dichi antu hiyakuhosha nawu: ‘Iwu diyi Nzambi yetu watulombweli hakufuma muEjipitu!’ A Isarela hiyakudya chawija cheneni nakudifukula kudi mwana kañombi wawuru.
Chanachimoniyi Yehova hakuhila nankashi. Dichi hakumuleja Mosi nindi: ‘Nyakalaku wukunkumuki. Antu anakwila chuma chatama nankashi. Anavulameni dehi nshimbi jami nawa anakufukamina mwana kañombi wawuru.’
Mosi hakunyakala kukunkumuka hampidi. Cheliliyi nashiki dehi kwakwihi, hakumona chumiche. Antu anakwimba nakuhañana iku anakunyeñumuka mwana kañombi! Mosi hakuhila chakwila anata nihamaseki malola ayedi awubasa hakusoneka nshimbi, hiyakuhumoka muyibalu yayivulu. Hakunona mwana kañombi wawuru nakumusuñununa. Hakumutwa wuña-wuña.
Antu anakoñi chuma chatama nankashi. Dichi Mosi hakuleja antu amakwawu kunona mpoku jawu jatubali. Mosi hakuhosha nindi: ‘Antu atama adifukulaña kudi mwana kañombi wawuru chiña afwi tuhu.’ Dichi amayala hiyakujaha antu 3,000! Ichi komana hichinakutuleja nawu twatela kwikala ababala nakudifukula kudi Yehova hohu, bayi tunzambi twakutwambaku?