Malwihu Kufuma Kudi Antañi
Chineli Yehova wakaanisha kupesha, muloñadi chabuliliyi kumubabesha Aroni hakwila mwana kañombi?
Chelili Aroni yeli mwana kañombi, neyi chiyasonekawu mumukanda waKwidika kapetulu 32, wafumpili lushimbi lwaNzambi lwahisha kupesha. (Kwid. 20:3-5) Chafuminumu, ‘Yehova waswejeli kuzuwa naAroni, nindi amujilumuni; [Mosi] wamulembeleli Aroni henohu nawa.’ (Kuhit. 9:19, 20) Komana kulembelela kwamuntu waloña Mosi ‘kwekalili nañovu’ yakumukwasha Aroni? (Yak. 5:16) Eña, muloña wakuna kulembelela nihayuma yikwawu yiyedi, Yehova wakwili kulomba kwaMosi nawa wamwanakeneni Aroni.
Chuma chimu chaleñeleli muloña Aroni wadiña muntu washinshika hadi yaaka yayivulu. Chamutemesheluwu Mosi kuya nakwimana kumesu Afwaro nakuyifumisha aIsarela muEjipitu, Yehova wamulejeli Aroni kuya hamu naMosi kulonda yamwimenuku Yehova. (Kwid. 4:10-16) Awa amayala ayedi ovwahilili nakwimana kumesu amwanta waEjipitu mapampa kakavulu, omikili hela chakwila Fwaro wadiña wachinchika muchima. Iku achidi muEjipitu, Aroni wamwekesheli kashinshi, nikwikala wakola mumudimu waYehova.—Kwid. 4:21.
Shinshikenu cheñi chuma chikwawu chaletesheli Aroni yeli mwana kañombi. Mosi wadiña haMpidi yaSinayi hadi mafuku 40. “Antu chamwenuwu nawu Mosi hakulaba, kukunkumuka swayi hampidi nehi,” amushinjilili Aroni kulonda yayilili mukishi. Aroni wetejeli nawa wayilili mwana kañombi wawuru. (Kwid. 32:1-6) Hela chochu, yililu yamwekesheliyi Aroni hanyima yakwila mukishi, yamwekesheli chikupu nawu mumuchima windi himwadiña yililu yakupeshaku. Welili mwenimu muloña wekakeja. Chakutalilahu, Mosi chanyakeliyi kulekesha iyi nsañu yakupesha, anyana kaLevi ejima, kushilahu niAroni, adikunjikili chikupu kukabadi kaYehova. Antu 3,000 ayijahili hamuloña wayililu yawu yakupesha.—Kwid. 32:25-29.
Kuhiñahu Mosi wayilejeli antu nindi: “Enu munavulumuni nshidi yeneni.” (Kwid. 32:30) Dichi, Aroni hidiyi hohu enkeluwu muloña wakuvulumuna kankawinduku. Yena niantu amakwawu ahetelelumu muluwi lwaYehova lwabadika.
Chelili nsañu yamwana kañombi wawuru yinahiti dehi, Yehova wahosheli nindi Aroni amuswanyiki hachifulu chakwikala kapristu muneni. Yehova wamulejeli Mosi nindi, “Wakamuvwiki Aroni yuma yakuvwala yajila, wakamuwayishi manji, wakamujiliki kulonda akankalakeli mudimu wawupristu.” (Kwid. 40:12, 13) Mwalala, Yehova wamwanakeneni Aroni hakuzeya kwamwekesheliyi. Mumuchima windi, Aroni wadiña mukwakudifukula walala washinshika, bayi mukwakupeshaku.