MPANJI 37

Itenti daKudifukwilamu

WUNADILUKI idi itala? Hitenti dalema dakudifukwilamu kudi Yehova. Aditenaña cheñi nawu tabanaka. Antu amanishili kudituña hanyima yakufuma muEjipitu henohu munahiti dehi chaaka chimu. Wuneluki mwini maana azatishiliwu hakudituña?

Adiña maana aYehova. Mpinji yadiñayi Mosi hewulu yaMpidi yaSinayi, Yehova wamulejeli mwakudituñila. Wahosheli nindi adituñi munjila yakwila dipeleña kudikasununa. Muniyi njila yikunku atela kuyisenda kwiluña dikwawu nakuyipata cheñi. Dichi, chadiñawu aIsarela nakutuntuluka kufuma heluña dimu nadikwawu mwisaña, adiña nakusenda itenti.

Neyi wukutala mukachi kakapeka kanyanya kunsa yetenti, wunatweshi kumona chikasha. Achitenaña nawu chimbañu chachitiyañenu. Chadiña nawañelu ayedi hela akerubi akwila nawuru, wumu kunsa yimu mukwawu kunsa yekwawu. Nzambi wasonekeli cheñi Nshimbi Ikumi hamalola ayedi awubasa muloña Mosi wabalwili atachi. Awa malola ayihembeleleña mukachi kachimbañu chachitiyañenu. Ahembelelimu cheñi ninsaba yamanina. Wunakwanuka manina hichumanyi?

Mana kwa Mosi, Aroni diyanatondiwu kudi Yehova kwikala kapristu muneni. Walombolaña antu hakudifukulaña kudi Yehova. Nianyanindi niwena hiyatupristu.

Dichi talaku mukapeka keneni ketenti. Keneni mapampa kayedi kubadika kapeka kanyanya. Wunachimoni chikasha chanyanya mudi nakufwinda wishi? Dihakameña hochelañawu atupristu yuma yanunkila chiwahi yatenañawu nawu insensi. Dichi hadi niitanda denoñu hadi manoñu atanu nayedi. Chuma chamuchisatu chidi mukapeka himesa. Hamesa ahembelañahu mankendi 12.

Mulubanza lwatabanaka mudi cheña cheneni hela mbashila yakwinzesha menji. Dimwawelelañawu kudi atupristu. Mudi cheñi kameña keneni. Aha dihochelañawu anyama afwa neyi mulambu kudi Yehova. Itenti didi mukachi kachilombu, nawa didi mukachi kamatenti awaIsarela.

Kwidika 25:8-40; 26:1-37; 27:1-8; 28:1; 30:1-10, 17-21; 34:1, 2; Aheberu 9:1-5.