MPANJI 54
Muntu Wasweja Ñovu
WUNELUKI ijina damuntu wasweja ñovu wadiñaku hadantu ejima? Hinsompeshi wejina daSamisoni. Yehova diyi wamwinka Samisoni ñovu. Henohu Samisoni kanda yovwaliki, Yehova wamulejeli mama yindi nindi: ‘Katataka wukuvwala mwana weyala. Wukalombola aIsarela nakuyipulwisha kudi aFwilistinu.’
A Fwilistinu hiyantu atama ashakamaña muKenani. Akweti amashidika amavulu nawa ayiyandishaña aIsarela. Ifuku dimu henohu Samisoni wudi halwendu lwakuya kwashakamaña aFwilistinu, mutupa weneni hakwinza nakubuluma nakumubulakana. Ilaña Samisoni hakumujaha mutupa namakasindi. Samisoni wajahahu dehi cheñi makulakaji awaFwilistinu atama.
Nkumininaku, Samisoni hakusweja kukeña mumbanda wejina daDelila. Anlomboli akuFwilistinu hiyakumukana Delila nawu wejima wawu akumwinka mali asiliva 1,100 neyi wukuyileja chaletesha Samisoni kwikala nañovu. Delila hakukeña ana mali ejima. Delila hibwambu dalala daSamisoni hela dawantu jaNzambiku. Dichi hakutwalekañahu kumwihula Samisoni chamuletesha kwikala nañovu.
Nkumininaku, Samisoni hakumuleja Delila kajindilu kañovu yindi. Hakuhosha nindi, ‘Nsuki yami kanda niyitewuleñahu dehi. Kufuma hinavwalikili, Nzambi wantondeli kwikala kambuñindi walema wuyatenañawu nawu kaNazari. Neyi nsuki yami ayitewula, ñovu jami jikumana.’
Eña, chinelukiyi Delila ichi, hakumukamika Samisoni hanyendu yindi. Dichi hakutambika iyala kulonda enzi nakumutewula nsuki yindi. Chanahindukiyi Samisoni, ñovu jindi jimumana nikumumana. A Fwilistinu hiyakwinza nakumukwata. Hiyakumulokola mesu indi ejima nakumwilisha nduñu yawu.
Ifuku dimu aFwilistinu hiyakwikala nachawija cheneni chakudifukula kudi nzambi yawu Dagoni, dichi hiyakumwidisha Samisoni mukaleya nakumuseha. Hanoyu mpinji, nsuki yaSamisoni yadiña yakula dehi. Samisoni hakuleja kansi weyala wadiña nakumulombola kuchikasa nindi: ‘Nleki nikwati kuyishimi yakolela itala.’ Dichi Samisoni hakulomba kudi Yehova kulonda yomwinki ñovu, yokwata nikukwata kuyishimi. Hakubidika nañovu nindi: ‘Nifwili hamu nawaFwilistinu.’ Muchawija mudi aFwilistinu 3,000 nawa chineli Samisoni yobandami nañovu kuyishimi, itala hidikushiwuka nakujaha awantu atama ejima.
Ansompeshi kapetulu 13 nakushika ku 16.