CHIBAABA CHAKUDIZA 37
Mushindamenenu Yehova Neyi Cheliliyi Samusoni
“Eyi Yehova Mwanta Wabadika, mwani ñanukihu, [nawa] nkoleshi.”—ANSO. 16:28.
KAMINA 30 Tata, Nzambi Yami, Ibwambu Dami
NSAÑU YIDI MUCHIBAABAa
1-2. Muloñadi chitwatela kudizila nsañu yahosha hadi Samusoni?
CHUMANYI chenzaña muyitoñojoka yenu chimwatiya ijina daSamusoni? Chakadi nikujina, mwatoñojokaña hadi iyala wadiña nañovu chikupu. Diimu. Ilaña Samusoni wafuukwili chuma chaluwa chaletesheli akabakani chikupu. Hela chochu, Yehova washili muchima hayuma yejima yeliliyi Samusoni hakumukalakela, nawa wayishili muBayibolu kulonda tudizileñaku.
2 Yehova wamuzatishili Samusoni kwila yuma yamaneni yakuhayamisha kulonda akwashi antu jindi atondewa aIsarela. Chimwahitili yaaka yayivulu kufuma hafwiliyi Samusoni, Yehova wamwoneneni kapostolu Pawulu kumusha Samusoni hakachi kawamayala adiña nachikuhwelelu chikupu. (Heb. 11:32-34) Chuma cheliliyi Samusoni chinateli kutukolesha. Wamushindameneni Yehova nimumpinji yakala. Tuhanjekenu yuma yitunateli kudizila kudi Samusoni niyuma yeliliyi chiyinateli kutukolesha.
SAMUSONI WAMUKUHWELELELI YEHOVA
3. Mudimwinyi wamwinkeliwu Samusoni?
3 Havwalikiliyi Samusoni, aFilisitinu diwu ayuulileña muza waIsarela nawa adiña nakuwukabisha. (Anso. 13:1) AIsarela akabakeneña chikupu muloña ayiyuulileña chatama. Yehova wamutondeli Samusoni kulonda “[ayamwini] aIsarela mumakasa awaFilisitinu.” (Anso. 13:5) Iwu wadiña himudimu wakala! Hakwila atweshi kuzata iwu mudimu wakala, Samusoni wateleleli kumushindamena Yehova.
Samusoni wamukuhweleleli Yehova nawa wadiña nakuhimpa kwesekeja nachidi yuma. Wazatishili chuma chadiñayi nachu kulonda ashikiji nkeñelu yaNzambi (Talenu maparagilafu 4-5)
4. Yehova wamukwashili ñahi Samusoni kuyitemuka aFilisitinu? (Ansompeshi 15:14-16)
4 Talenu chakutalilahu chinakumwekesha Samusoni chamukuhweleleliyi Yehova nichamukwashiliwu kudi Nzambi. Mpinji yimu, amashidika awaFilisitinu enjili nakumukwata Samusoni kuLehi, hadaha muYuda. Amayala akumuchidi waYuda atiyili woma, dichi afuukwilihu kumuhana Samusoni kudi ayilumbu. Antu jaSamusoni amukasili chiwahi nanyonji yayiha yiyedi nawa amutwalili kudi aFilisitinu. (Anso. 15:9-13) Hela chochu, “spiritu yaYehova yamwinkeli [Samusoni] ñovu” nawa wadikasunwini yomweni munyonji. Kufumahu “wawanini ifwaha dituuta dachibaña chachimbuulu wachizamba,” wadinoneli nawa wadizatishili kujaha nachu amayala aFilisitinu 1,000.—Tañenu Ansompeshi 15:14-16.
5. Samusoni wamwekesheli ñahi nindi wamukuhweleleli Yehova chazatishiliyi ifwaha dachibaña chachimbuulu?
5 Muloñadi Samusoni chazatishililiyi ifwaha dachibaña chachimbuulu? Hichitwa chabulileña kuzatishawu antu! Chakadi nikujina, Samusoni welukili nindi Yehova diyi wamukwashili kwimika mushindu, bayi chitwa chazatishiliyiku. Mwamweni, iwu iyala washinshika wazatishili chuma chadiñayi nachu hanoyu mpinji kulonda ashikiji nkeñelu yaYehova. Chakadi nikujina, Samusoni washindili muloña wamushindameneni Yehova.
6. Chumanyi chitunateli kudizila kudi Samusoni neyi tunakuzata nyidimu yetu yakuspiritu?
6 Ninetu Yehova nateli kutwinka ñovu yakuzata mudimu wunatwinkiyi, hela chakwila wunakumwekana neyi wakola. Nawa Nzambi nateli kutukwasha munjila yinateli kutuhayamisha. Kuhwelelenu nenu Yehova, wamukwashili Samusoni, wukuyikwasha ninenu kwila nkeñelu Yindi chakala hohu mumushindamena nenu wukuyikwasha.—Yish. 16:3.
7. Chakutalilahwinyi chinakumwekesha nawu chalema kwiteja wunlomboli waYehova?
7 Amanakwetu niahela amavulu azataña mudimu wakutuña matala etu akudifukwilamu, amwekeshaña chamukuhwelelawu Yehova. Kunyima, amanakwetu edishileña pulani yakutuñilamu nikutuña Matala aWanta amaha nimatala amakwawu. Ilaña chineli antu amavulu anakupapatishewa, kuloñesha kwakeñekeleña kuhimpaku yuma yimu. Amanakwetu alombolaña alombeli wunlomboli waYehova nawa esekeli kuzatishaku njila jajiha, chidi neyi kulanda matala nikuyituñulula. Manakwetu Robert wunazati munyidimu yetu yakutuña yayivulu mukaayi hadi yaaka yinahitihu, wahosheli nindi: “Hakusambila, chayipeleleli wanyi amakwawu kwila yuma muniyi njila yayiha. Ichi chuma chambukiliku chikupu nachitwelileña hadi yaaka yayivulu yinahitihu. Ilaña amanakwetu etejeleña kuhimpa kwesekeja nachidi yuma, nawa chinamwekani hatooka nawu Yehova wakiswilili iku kuhimpika.” Ichi hichakutalilahu chimu hohu chinakumwekesha Yehova chinakulombolayi antu jindi kushikija nkeñelu yindi. Wejima wetu tukwila chiwahi neyi tudihulaña mumpinji-mumpinji netu, ‘Komana inakukeña wunlomboli waYehova nikutwalekahu kuhimpa kulonda nimukalakeleña munjila yayiwahi?’
SAMUSONI WAZATISHILEÑA CHIWAHI YUMA YAMWINKELEÑAWU KUDI YEHOVA
8. Mpinji yimu hatiyiliyi Samusoni mpwila nankashi, chumanyi cheliliyi?
8 Hadaha mwatañahu dehi nsañu yikwawu yamwekeshaña yuma yakuhayamisha yakoñeliyi Samusoni. Wajahili mutupa nkawindi hohu, nawa mukuhita kwampinji watapili amayala 30 mumusumba wawaFilisitinu waAshikeloni. (Anso. 14:5, 6, 19) Samusoni welukili nindi hadi kutwesha kwila yuma yejimiyi chakadi wukwashu waYehovaku. Chumichi chamwekeni hatooka mpinji yimu hatiyiliyi mpwila nankashi hanyima yakutapa aFilisitinu 1,000. Welili ñahi? Chatela adishindameni yomweni kuya nakukeña menji kulonda anwi, wamwaabilili Yehova nindi amukwashi.—Anso. 15:18.
9. Yehova welili ñahi nakulomba kwaSamusoni kwakulomba wukwashu? (Ansompeshi 15:19 nitumazu twaheshina)
9 Yehova waakwili kulomba kwaSamusoni kuhitila mukwilisha kaseloki kamenji muchihayamisha. Samusoni chanwinimu, “ñovu yindi yafuntilimu nawa wakoleli cheñi.” (Tañenu Ansompeshi 15:19 nitumazu twaheshina.) Chinakumwekana neyi, aka kaseloki kakaha katwalekelihu hadi yaaka yayivulu kushika nimpinji yamwoneneniwu kaprofwetu Samweli kusoneka mukanda waAnsompeshi. AIsarela amweni ana menji edikileña atela ayanukishili nawu neyi amushindamena Yehova, nateli kuyikwasha antu ashinshika adifukula kudi yena hampinji yinakaankiliwu.
Samusoni wekalili nañovu helili anwi menji amwinkeliwu kudi Yehova. Tukwila chiwahi neyi tuzatishaña yuma yatwinkañayi Yehova kulonda tutwalekihu kukolesha wubwambu wetu nayena (Talenu paragilafu 10)
10. Chumanyi chitwatela kwila hakwila tutambwili wukwashu waYehova? (Talenu cheñi mwevulu.)
10 Ninetu twatela kulomba wukwashu kudi Yehova hichikweti muloña nayuma yitweluka, ñovu yitukweti indi kwiji nyidimu yitunazati mumudimu windiku. Twatela kudikehesha nakwiteja netu tunateli hohu kuzata mudimu wunatwinkiyi Yehova neyi tumushindamena. Neyi chekaliliyi Samusoni nañovu hampinji yanwiniyi menji amwinkeliwu kudi Yehova, ninetu tunateli kwikala akola kuspiritu neyi tuzatishaña yuma yejima yatwinkañayi Yehova.—Mat. 11:28.
11. Tunateli kumushindamena ñahi Yehova hakwila atukwashi? Lumbululenu.
11 Toñojokenu hadi manakwetu Aleksey, wumu hakachi kawamanakwetu muRussia anakuumika ikabisha dasweja. Chumanyi chinamukwashi kutwalekahu kuumika mumpinji yakala chikupu? Yena niñodindi mpinji yejima elaña yuma yakuspiritu. Wahosheli nindi: “Nazataña nañovu kwila yuma yakuspiritu, kudiza nikutaña Bayibolu mafuku ejima. Mpinji yejima nantetemena, twahanjekaña hansona yahefuku-hefuku nawa twalombelaña hamu kudi Yehova.” Chumanyi chitunakudizilaku? Chatela tudishindameneña etu aweni, twatela kumushindamena Yehova. Munjilanyi? Kuhitila mukwila yuma yinateli kukolesha chikuhwelelu chetu, chidi neyi kudiza Bayibolu nkawetu nikwila yuma yikwawu yakuspiritu. Chikufumamu, Yehova niyena wukutukiswila chitunakuzata nañovu kumukalakela. Wamukolesheli Samusoni, ninetu nateli kutukolesha.
SAMUSONI HALEKELI KUMUKALAKELA YEHOVAKU
12. Chumanyi chaluwa chafuukwiliyi Samusoni, nawa chumichi chinambukiku ñahi nayuma yeliliyi kunyima?
12 Samusoni wadiña wabula kuwanina neyi etu, dichi mpinji jikwawu wafuukwileña mwaluwa. Chuma chimu chafuukwiliyi chamuleteleli kukala kwakuvulu. Hanyima yakukalakala mudimu wawunsompeshi hadi mpinji yayilehi, Samusoni “wakeñeli mumbanda washakamineña muChinekineki chaSoreki nawa ijina dindi wadiña Delila.” (Anso. 16:4) Hakusambila, Samusoni woteli mumbanda kaFilisitinu, ilaña iku kudikunda ‘kwafumini kudi Yehova,’ owu “wakeñeleña njila yakuzuñilamu nawaFilisitinu.” Nkumininaku, Samusoni washakamini mwitala dachivumbi mumusumba wawaFilisitinu waGaza. Haniyi mpinji, Nzambi wamwinkeli Samusoni ñovu yakusenda yenzelu yakuchiisu chamusumba, nakuletesha musumba wubuli kwikala wakiñewa. (Anso. 14:1-4; 16:1-3) Hela chochu, Delila watela wadiña kaIsarela, dichi kudikunda kwawu hikwadi kuletesha awani njila yakuzuñilamu nawaFilisitinuku.
13. Delila wamwilili Samusoni chumanyi?
13 Delila watambwili mali amavulu kudi aFilisitinu kulonda amufukejeli Samusoni. Hadaha chineli wamukeñeli nankashi, wakañenyi kwiluka yuma yakeñeleñayi kwila Delila. Tuneluki wanyi chuma chaletesheli, ilaña Delila watwalekelihu kumukanjikija Samusoni kulonda ashimuni kwafumineña ñovu yindi nawa nkumininaku, Samusoni wamulejeli. Chawushona, Samusoni wadikojejeli yomwenindi kwiñila mukukala kwaletesheli ajimbeshi ñovu yindi niwubwambu windi naYehova hakapinji kantesha.—Anso. 16:16-20.
14. Kukalanyi kwamweniyi Samusoni hamuloña wakumukuhwelela Delila?
14 Samusoni wamweni kukala kwakuvulu muloña wakumukuhwelela Delila chatela amukuhweleli Yehova. AFilisitinu amukwatili Samusoni nakumulokola mesu. Amukasilili muGaza mwadiña antu asawiliyi hakusambila, nawa wekalili mukakuhala mbutu wakehelamu. Kuhiñahu amusawishili helili aFilisitinu apompi kuchawija. Amulambwili nzambi yawu wakutwamba Dagoni mulambu weneni, neyi kwiji diyi wamuhanini Samusoni mumakasa awu. Amwidishili Samusoni nakumuleta kuchawija hakwila ayilili “yuma yakusehesha,” kulonda amusehi.—Anso. 16:21-25.
Yehova wamwinkeli Samusoni ñovu kulonda ashikiji wunsompeshi Windi hadi aFilisitinu (Talenu paragilafu 15)
15. Samusoni wamwekesheli ñahi cheñi nindi wamushindameneni Yehova? (Ansompeshi 16:28-30) (Talenu mwevulu wudi hakava.)
15 Samusoni waluwañesheli nankashi, ilaña halekeli kumukalakela Yehovaku. Wakeñeli njila yakuzatilamu mudimu wamwinkeliwu kudi Nzambi wakuzuña nawaFilisitinu. (Tañenu Ansompeshi 16:28-30.) Samusoni wamulembeleli Yehova nindi: “Ñiiteji niditendi nawaFilisitinu.” Nzambi walala waakwili kulomba kwaSamusoni nawa wamufuntishilili ñovu yindi yakuhayamisha. Chafuminimu, Samusoni wayimikili mushindu chikupu aFilisitinu haniyi mpinji kubadika chayishindiliyi kunyima.
16. Chumanyi chitunakudizila kuchiluwa chakoñeliyi Samusoni?
16 Hela chakwila Samusoni wamweni kukala kwakuvulu muloña wanichi chiluwa chakoñeliyi, walekeli wanyi kuzata nañovu kulonda eleña nkeñelu yaYehova. Hela chakwila tunakoñi chiluwa nawa tunakukeñeka kutuzuwila hela kujimbesha kukooleka kutukweti, hitwatela kuleka kumukalakela Yehovaku. Anukenu nenu, Yehova wadiloñesha kutwanakena. (Mas. 103:8-10) Hichikweti muloña nayiluwa yetuku, Yehova nateli kutuzatisha neyi chamuzatishiliyi Samusoni.
Samusoni watela watiyili kutama hachiluwa chakoñeliyi, ilaña walekeli wanyi kumukalakela Yehova, ninetu hitwatela kulekaku (Talenu maparagilafu 17-18)
17-18. Chuma chamumwekeneni manakwetu Michael chinakuyikolesha ñahi? (Talenu cheñi mwevulu.)
17 Talenu chuma chamumwekeneni manakwetu wakansi Michael. Wadiña nakudikita chikupu mumudimu waYehova, wadiña nkoñi wakuzatila nawa payiniya wampinji yejima. Ilaña chawushona, wakoñeli chiluwa chaletesheli ajimbeshi kukooleka kwadiñayi naku muchipompelu. Wahosheli nindi, “Nadiña nakudikita chikupu mumudimu waYehova kushika tuhu nimpinji yamwekeni chumichi. Ilaña neyi mukulabula kwadisu, natiyili tuhu neyi kwosi chuma chinatela kwila mumudimu waYehova. Hinatoñojokelihu nami Yehova wakanshiya chisayikilaku, ilaña najinokeleña neyi chakwila wubwambu wami naYehova wakekalahu neyi chiwadiña hakusambila hela neyi nakamukalakelahu chikupu muchipompelu neyi chinadiña nakumukalakela.”
18 Chasweja kuwaha, manakwetu Michael walekeli wanyi kumukalakela Yehova. Wabombelelihu nindi: “Nashili maana hakuwahisha wubwambu wami naYehova kuhitila mukulomba kudi yena mpinji yejima, kudiza nikutoñojokahu chikupu.” Mukuhita kwampinji, manakwetu Michael wekalili cheñi nakukooleka muchipompelu. Chayinu mpinji himukulumpi nawa hipayiniya wampinji yejima. Wahosheli nindi: “Wukwashu nimazu akukolesha inatambwilileña, sweje-e kudi akulumpi, ankwashili kwiluka nami Yehova wuchidi wankeña. Ichi inakukalakala cheñi muchipompelu nachinleji chitooka. Ichi chuma chammwekeneni chankwasha kwiluka nami Yehova nateli kwanakena muntu wejima wunabalumuki chikupu mumuchima.” Twatela kukuhwelela chikupu netu Yehova wukutuzatisha nikutukiswila ninetu hela chakwila tunakoñi yiluwa, chakala hohu neyi tuzata nañovu nakuhimpa yilwilu yetu nikutwalekahu kumushindamena.—Mas. 86:5; Yish. 28:13.
19. Chuma chamumwekeneni Samusoni chinayikoleshi ñahi?
19 Muchinu chibaaba, tunahanjeki hohu hayuma yantesha yamwekeni muchihandilu chaSamusoni. Hadiña wawaninaku; ilaña walekeli wanyi kuzata nañovu kumukalakela Yehova, nihanyima yakukoña chiluwa muloña waDelila. Nawa Yehova watwalekelihu kumuzatisha. Nzambi wamuzatishili cheñi Samusoni munjila yakuhayamisha. Yehova watwalekelihu kumumona nindi hiiyala wadiña nachikuhwelelu chikupu nawa wamushili hakachi kamajina awantu ashinshika ekala muAHeberu kapetulu 11. Twakoleshewaña chikupu hakwiluka netu twakalakelaña Tata wamwiwulu wukweti kukeña wafwilaña kutukolesha, sweje-e neyi tunazeyi! Dichi neyi cheliliyi Samusoni, tumulembeleleña Yehova netu: “Mwani ñanukihu, [nawa] nkoleshi.”—Anso. 16:28.
KAMINA 3 Ñovu Yetu, Kuchiñeja, Itwashindamena
a Samusoni—idi hiijina damuntu ashimunawu muBayibolu elukawu kudi antu amavulu, kushilahu niantu abula kwilukisha Nsona. Nsañu yindi antu ayisha muyisela, mutumina, nimumafilimu. Hela chochu, nsañu yahosha hachihandilu chindi yakuzañalesha hohu wanyi. Tunateli kudizila yuma yayivulu kudi iwu iyala wadiña nachikuhwelelu chikupu.