MPANJI 84
Kañelu Namuhempuli Mariya
IWU mumbanda walubanji diyi Mariya. Himumbanda kaIsarela, washakamaña mumukala waNazareta. Nzambi neluki nindi himuntu wamuwahi chikupu. Dimuloña waweni wunatemesheliyi kañelu kindi Gabireli nakuhosha nindi. Wuneluki nsañu yinenjiliyi Gabireli nakumuleja Mariya? Tutalenu ntahi.
Gabireli hakumwila nindi, ‘Kolaku, eyi anatiyiliwu luwi lwabadika. Yehova wudi naneyi.’ Mariya kanda amumoneñahu dehi iwu muntu. Hakwakamena muloña haneluki munatwaliyiku. Hohenohu Gabireli hakumuwundisha.
Hakuhosha nindi, ‘Mariya, bayi wutiya womaku. Yehova nakutiyi kuwaha nankashi. Dimuloña waweni wukukwililayi chuma chakuhayamisha. Keña wukavwali mwana. Wakamutumba ijina neyi Yesu.’
Gabireli hakutwalekahu nakulumbulula nindi: ‘Mwana iwu wukekala muneni, akamutena nawu Mwana kaNzambi Mukwakubadika. Yehova wukamwilisha mwanta neyi chadiñayi Davidi. Ilaña Yesu wukekala mwanta haya nyaka, nawa wanta windi hiwukakumaku!’
Mariya hakwihula nindi, ‘Indi ichi chikutwesheka ñahi? Hinasumbukaku. Kanda nidimoneñahu dehi neyala, dichi natweshi ñahi kwikala namukeki?’
Gabireli hakwakula nindi, ‘Ñovu yaNzambi yikenza hadeyi. Dichi mwana akamutena nawu Mwana kaNzambi.’ Dichi hakumuleja Mariya nindi: ‘Anukaku ntaña yeyi Elizabeta. Antu ahosheli nawu nakuli chakwila akwati kulusemu. Ilaña katatakichi wukwikala namwana weyala. Dichi wunamoni, kwosi nichuma chamukalila Nzambiku.’
Hohenohu Mariya hakuhosha nindi: ‘Ami nikambuña kaYehova wamumbanda! Mwonsu muwunahoshi mumwekani.’ Kañelu hakuya.
Mariya hakunyakala nakumuhempula Elizabeta. Chineli Elizabeta atiyi izu daMariya, mwana wudi mwivumu daElizabeta hakutuntoka namuzañalu. Elizabeta hakwinzala naspiritu yaNzambi, hakumuleja Mariya nindi: ‘Wakiswilewa chakubadika hadi ambanda.’ Mariya hakushakama tukweji tusatu naElizabeta, hakufunta cheñi kuNazareta.
Mariya wudi kwakwihi nakusumbuka kudi iyala wejina daYosefu. Ilaña chineli Yosefu yeluki nindi Mariya wukuvwala mwana, hanatoñojoki cheñi jakumusumbulaku. Dichi kañelu kaNzambi hakumuleja nindi: ‘Bayi wuchina kumusumbula Mariya neyi iñodeyiku. Muloña Nzambi diyi wunamwinki mwana weyala.’ Dichi Mariya naYosefu hiyakudisumbula, nawa hiyakuhembelela Yesu yavwaliki.