Gabireli Nenzi Kudi Mariya

Elizabeta wadiña nantaña yindi wakansi Mariya, washakamineña mumusumba waNazareta muÑaliliya. Mariya amwoteli kudi Yosefu, mukakusoña. Elizabeta hadiñayi nevumu datukweji 6, kañelu Gabireli wamwekeni kudi Mariya. Wahosheli nindi: ‘Kolaku, Mariya. Yehova nakutiyi kuwaha chikupu.’ Welukili wanyi mwatalishiliyi Gabireli. Wamulejeli nindi: ‘Wakemita nawa wakavwala mwana weyala, wakamutuumba neyi Yesu. Wakayuula neyi Mwanta. Wanta windi wakekala wahaya nyaaka.’

Mariya wahosheli nindi: ‘Kanda nikaameñahu dehi neyala. Nukwikala ñahi namwana?’ Gabireli wahosheli nindi: ‘Kwosi chuma chikukañanyayi Yehovaku. Spiritu yajila yakenza hadi eyi nawa wakavwala mwana weyala. Ntaña yeyi Elizabeta niyena nemiti.’ Kuhiñahu Mariya wahosheli nindi: ‘Ami nidi nduñu yaYehova wamumbanda. Chimwekani kudi ami kwesekeja nachiwunahoshi.’

Mariya wayili kumusumba wamapidi nakumutala Elizabeta. Mariya chamwimushiliyi, Elizabeta watiyili mwana wadiña mwivumu hakutuntoka. Chenzeliyi naspiritu yajila, wahosheli nindi: ‘Mariya, Yehova nakukiswili. Hikukooleka kwikala namama yaMwanta wami mwitala dami.’ Mariya wahosheli nindi: ‘Namushimeki Yehova namuchima wami wejima.’ Washakamini naElizabeta hadi tukweji tusatu, kuhiñahu wafuntili kumukala wawu kuNazareta.

Yosefu chelukiliyi nindi Mariya wudi nevumu hakeñeleña kumusumbulaku. Ilaña kañelu wamwekeni kudi yena muchilota nakumuleja nindi: ‘Bayi wutiya woma kumusumbulaku. Hanakoñihu chuma chatamaku.’ Dichi Yosefu wamusumbwili Mariya nawa wamutwalili kwitala dindi.