MPANJI 86
Amayala Alombweliwu Kudi Katumbwa
WUNAKIMONI kana katumbwa kanatoñeki kanakwinyikayi wumu hadi awa amayala? Chafuminiwu muYerusalema, katumbwa kamwekeni. Awa amayala anafumi Kumusela, nawa adiza jatutumbwa. Anakuhweleli nawu aka katumbwa kakaha kanakuyilombola kudi muntu walema.
Chashikiliwu muYerusalema, hiyakwihula nawu: ‘Owu mwana wukwikala mwanta wawaYudeya wudi kudihi?’ Ijina dikwawu dawaIsarela diwu “aYudeya.” Awa amayala hiyakuhosha nawu ‘Twasambila kumona katumbwa kamwana mpinji yitwadiña Kumusela dichi tunenzi nakudifukula kudi yena.’
Chinachitiyiyi Herodi mwanta wudi muYerusalema, hakwakamena. Hakeñeli mwanta mukwawu kuswana heluña dindiku. Dichi Herodi hakutambika akulumpi awatupristu nakuyihula nindi: ‘Mwanta wuyakanawu wukavwalikila kudihi?’ Hiyakumwakula nawu: ‘Bayibolu yahoshaña nawu muBetelemi.’
Dichi Herodi hakutambika amayala afumini Kumusela nakuyileja nindi: ‘Yenu mukeñakeñi owu mwana wanyanya. Neyi munamumoni, mukanleji. Ninami nawa nakukeña nakayi nakudifukula kudi yena.’ Ilaña, chalala, Herodi wakeñeleña kumumona mwana kulonda amujahi!
Kulondelahu katumbwa hikakutwamina kumbidi yawamayala anakuya kuBetelemi, hikakwimana heluña hadi mwana. Chaneñiliwu amayala mwitala, hiyakuwana Mariya nimwana wanyanya Yesu. Hiyakwidisha yawaana nakumwinka Yesu. Mukuhita kwampinji Yehova hakuyisoñamisha awa amayala muchilota nindi bayi afunta kudi Herodiku. Dichi hiyakufunta kwituña dawu munjila yacheñi.
Cheliliyi Herodi yeluki nindi awa amayala akuMusela anafuti dehi kumukala, hakuhila nankashi. Dichi hakuleja kulonda ajahi atwansi awamayala ejima amuBetelemi adi nayaaka yiyedi yakusemuka nakufunta heshina. Ilaña Yehova hakumusoñamisha Yosefu dekulu muchilota, dichi Yosefu hakuya kuEjipitu nachisaka chindi. Chimunahiti mafuku, Yosefu chanatiyiyi nindi Herodi nafwi dehi, hakusenda Mariya niYesu nakufunta kuNazareta. Kweniku diku kwakuliliyi Yesu.
Wunatoñojoki neyi hinyi welishili kana katumbwa kakaha kutoñeka? Anukaku, awa amayala ayili kuYerusalema hanyima yakumona katumbwa. Satana Diyabolu wakeñeleña kujaha Mwana kaNzambi, nawa welukili nindi Mwanta Herodi wamuYerusalema wukukeña kumujaha. Dichi Satana diyi welishili kana katumbwa kutoñeka.